1, 2. ¿Néna terukuntasïni ambe enga Eclesiastés 11:6 uandajka ambakiti aianhperakua Reinueri jingoni?

MÁRU paisicharhu kʼuiripuechaksï tsitisïndi kurhaani ambakiti ambe Reinueri. Ka indeni ambeksïsï uétarhinchani japti kurhaani. Peru máteru nanisï kʼuiripuechaksï no tsitisïndi uandontskuarheni Tata Diosïri ambe o Bibliaeri. Ia sea kʼuiripuecha kurhaani o nómbe, Jeoba uékasïndi eskachi seguiriuaka aianhpini astaka ima exeaka eskachi nóteru uákia ini ánchikuarhitani.

² Enga niárakia ima jurhiatikua enga Jeoba exerini jakaia, nóteruchi aianhpiakia ka “jimajkani kʼamaraati i tiempu” (Mat. 24:14, 36). Enga jamberi niáraaka ima jurhiatikua, ¿nénachi uá seguru jarhani eskaksï juchari jájkicha no ísku jauaka eska na uandajka Eclesiastés 11:6? (Arhinta je). *

3. ¿Ambechi exea ini jorhenguarhikua jimbo?

³ Máteru jorhenguarhikua jimbochi exeska tʼámu ambe engajtsïni jarhuataaka parachi ambakiti aianhpiri máeni (Mat. 4:19). Ini jorhenguarhikua jimbo, exeakachi tanimu ambe engajtsïni jarhuataaka parachi no kuatantani aianhpini ambe uéjkichi nitamakuarhini jarhani. Jorhenguarhiakachi andisï xáni jukaparhakue eskachi orheta peeraka aianhpikuani, eskachi tekaantstiuaka ka eskachi kánikua mintsikaaka Jeobani.

4. ¿Andichisï jatsi para orheta peerani ini ánchikuarhitani engajtsïni Jeoba íntskuka?

⁴ Jesusi uandaspti ambe enga úkuarhini japiringa últimu jurhiatikuecha jimbo ka na engaksï jásïpiringa kʼuiripuecha. Ístu uandaspti eska i ambe úpiringa úni eska imeri chúxapaticha no orheta  peerapiringa aianhpikuani. Ísï jimbo arhiaspti: “Méntkisï jingontku je” (Mat. 24:42). Noeri jurhiatikuecha jimbo, jarhaspti uánikua ambe enga úpka eskaksï kʼuiripuecha no kasu úpiringa ambe enga Noe aianhpienga ka iásï májkueni úkuarhixati (Mat. 24:37-39; 2 Ped. 2:5). Jimbochisï uéjka méntkisï orheta peerani ini ánchikuarhitani engajtsïni Jeoba íntskuka.

5. Eska na uandajka Ukuecha 1:6-8, ¿asta nani jamberi aianhperanhapirini Tata Diosïri ambe?

⁵ Ini jurhiatikuecha jimbo, jatsiskachi para kánikua jánguarhintani ambakiti ambe aianhpini Reinueri. Jesusi uandaspti eskaksï imeri chúxapaticha seguiripiringa aianhpini enga ima na uarhipiringuia ka sánderu uápurisï (Juanu 14:12). Enga Jesusi na uarhipkia, máru imeri chúxapatichaksï ménderu uénaspti ánchikuarhini paraksï kuruchechani pʼímaani. Enga na tsíntapkia, Jesusi úraspti imeri uinhapikuani parakaksï máru chúxapaticha uánikua kuruchechani pʼítamaapiringa. Enga indeni ambe úpka, ístu arhiaspti imeri chúxapatichani eska aianhpini sánderu jukaparhakua ambeska eska náki uéjki ánchikuarhita (Juanu 21:15-17). Ante de ima auandarhu karhanchintani, arhiaspti imeri chúxapatichani eska ima ánchikuarhita enga ima uénapka no solu Israeli úkuarhipiringa sino sánderu iauanisï jamberi (arhinta je Ukuecha 1:6-8). Máru uéxurhini tátsekua, exeraspti apostuli Juanuni janhaskakua ma jimbo ambe enga úkuarhipiringa “Táteri jurhiatikua jimbo”. * Ka ístu, Juanu exespti eska ánjelicheri jarhuajperata jimbo, iámindu nasionicha ka tribuecha ka imecha engaksï táchani jásï idioma uandajka ka iámindu kʼuiripuecha aiangunhaxapkaksï ambakiti aianhperakua enga jindeka para méntkisï (Jaŋ. 1:10; 14:6). Xarharasïndi eska Jeoba uékasïnga eskachi uáka ini xáni kʼéri ánchikuarhitani asta kʼamarani.

6. ¿Ambechi uá úni parachi orheta peerani aianhpikuani?

⁶ Ambe ma engajtsïni jarhuataaka orheta peerani aianhpikuani, jindesti eratseni ambe enga  xáni úkia Jeoba parajtsïni jarhuatani. Por ejemplu, uánikua ambejtsïni íntskusïndi komu publikasionichani engaksï sïranda jimbo uérajka, engachi újka exeani selulari o tabletarhu, audiuechani ka bideuechani ka ístu programa JW Broadcasting. Ju je eratseni ini ambe: juchari pájina Internetirhu jukari mili idiomecha jimbo jarhasti informasioni (Mat. 24:45-47). Nájkirukaksï kʼuiripuecha no újka sési pájperani politika, relijioni ka tumina jimbo, Tata Diosïri marhuaricha engachi jukari ocho miionika interu parhakpinirhu, májku kʼérichi jarhaska. Por ejemplu, biernisï 19 de abrili de 2019 jimbo, interu parhakpinirhu Jeobaeri testiguechachi úspka exeni bideu ma enga uandenga ima jurhiatikua anapu karakatani. Ima chúrikua 20,919,041 kʼuiripuechachi tánguarhispka para miátani tata Jesukristueri uarhikuani. ¿A no eska kʼéri kóntperata máeska exeni ini milagruni juchari jurhiatikuecha jimbo ka úni jarhuajpini? Ini ambe eratseni úsïndi eskachi órheta peeraaka Reinueri ambe.

7. ¿Nénajtsïni jarhuata Jesusiri ejemplu parachi orheta peerani aianhpikuani?

⁷ Ambe ma engajtsïni ístu jarhuataaka orheta peerani aianhpikuani, jindesti májkueni úni eska Jesusi. Ima no jurajkuspti eska ambe ma ójkutapiringa para aianhpini jurhimbikua ambe (Juanu 18:37). No jurajkuspti eska Noambakiti tsʼéjkupiringa enga aiakuapka “iámindu parhakpini anapu nasionichani ka [...] imeri tʼíntskuani”, ni enga kʼuiripu uékenga rei úni (Mat. 4:8, 9; Juanu 6:15). No jánguarhintaspti jatsikuarhikua ambe uékani jatsini ni chéni enga kʼuiripu no sési kámenga (Luk. 9:58; Juanu 8:59). Engachi niáraaka tsʼéjkunhani juchari jakajkukua jimbo, jánguarhintaakachi sánderu aianhpini májkueni eska na úpka Jesusi parachi no kuatantani ni chketakuani ísï eska na uandapka Pablu (Ebr. 12:3).

8. ¿Ambe arhikuekasïni tekaantani ka andichisï jatsi para tekaantstini iásï?

⁸ Tekaantani arhikuekasïndi erokuarhini eska ambe ma mójtakurhiaka ka no kuatantani. Jatsiskachi para tekaantani parachi erokuarhini eskachi nóteru no sési nitamakuarhiakia o eska iásï kʼóru úkuarhiakia ambe engachi iónisï erokuarhika. Profeta Abakuki uékasïrendi eska Juda nóteru no sési janhaskuarhipiringuia (Hab. 1:2). Jesusiri chúxapatichaksï “tantiarixapti eska enga ima niárapiringa luejku xarharapiringa Diosïri juramukua” ka eska nóteru Roma juramukuapiringuia (Luk. 19:11). Ka juchachi uékaxakaia eska januaka ima jurhiatikua enga Tata Diosïri Reinu kénditaaka no sési jásï ambe ka úni eska jauaka jimbanhi parhakpini ma nani enga jurhimbitku janhaaka (2 Ped. 3:13). Ísïsti, jatsiskachi para tekaantani ka erokuarhini imani jurhiatikuani enga Jeoba exerini jakaia na enga jatini uáka ambe ma. Ju je exeni máru ambe na engajtsïni Jeoba jorhendajka parachi tekaantstini.

9. ¿Ambe xarhatasïni eska Jeoba tekaantstiska?

⁹ Jeoba jindesti sánderu ambakiti ejemplu enga xarhatajka tekaantskua. Kánikua tiempu íntskuspti Noeni paraka arkani úpiringa ka para aianhpini jurhimbikua ambe (2 Ped. 2:5; 1 Ped. 3:20). Jeoba jingontku kurhajchaspti Abraanini enga ísï someni uénapka kurhamarhini andisï ima eratsepi kʼamajkuani Sodoma ka Gomorra anapu no sési úrichani (Gén. 18:20-33). Jeoba ióni tekakuantaspti Israeli anapuechani engaksï someni no kurhajchapka (Neh. 9:30, 31). Ka ini jurhiatikuecha jimbo exesïngachi eska Jeoba tekaantstiska jimboka tiempu íntskuaxaka imani kʼuiripuechani enga ima uéjka eskaksï imeri amigueuaka (Juanu 6:44; 1 Tim. 2:3, 4; 2 Ped. 3:9). Jeobaeri ejemplu úsïndi eskachi tekaantstiuaka engachi jamberi aianhpiaka ka imeri ambe jorhentpini. Ju je exeni ejemplu ma enga Jeoba úrajka parajtsïni jorhendani tekaantstini ka Bibliarhu jarhasti.

10. ¿Ambejtsïni jorhendasïni ima ejemplu enga Santiagu 5:7, 8 jimbo uandajka?

¹⁰ (Arhinta je Santiagu 5:7, 8). Júskatiri ejemplujtsïni jorhendasïndi parachi tekaantstini.  Ísïsti eskaksï máru plantecha sóntku kʼésïnga, peruksï sáno iáminduecha ióndasïndi ka sánderia imecha engaksï fruta jukajka. Ióntki Israeli, seisi kutsï ióndasïrendi kʼuiripini ima ambe enga ikaranhenga: oktubrini teruani ísï enga uénenguia janini, israelita ma semiia ambe jatsikusïrendi ka abrilini teruani ísï pʼikuntasïrendi jiáni enga nóteru xáni janienguia (Mar. 4:28). Engachi jánhaskatiska, májkuenchi tekantstiuaka eska ima enga jatsintajka ambe ma. Peru ménisï no fasilisïndi tekaantskua xarhatani.

11. ¿Nénajtsïni jarhuatasïni tekaantskua aianhpikuarhu?

¹¹ Jimbokachi kʼamanharhintstiska, kʼuiripuechachi sóntku uékasïnga exeni eskachi jánguarhintaxaka úni ambe ma. Peru enga nema uánikua plantechani ikarauaka ka uékani eskaksï ícha fruta jukaaka, jatsisti para jarhakuni, ikaraani, uitsakua pʼikundukuani ka itsï jatsikuani. Ka májkuenisti ánchikuarhita jingoni enga jindeka Jesusiri chúxapatichani uáni. Jatsiskachi para tiempu arhutani para jarhuataani Bibliaeri jorhenguarhirichani paraksï xénchaani kʼuiripuechani nani uéjkiksï anapueni. Engaksï kʼuiripuecha no uéjka kurhaani Tata Diosïri ambe, tekantskuajtsïni jarhuatasïndi parachi no no sési pʼikuarherani. Peru ístuchi jatsiska para tekaantstini enga kʼuiripu sési kurhaajka Tata Diosïri ambe jimbokachi no uáka úni eska jorhenguarhiri jirejiresï mintsikaaka Tata Diosïni. Asta Jesusiri chúxapatichaksï ióndaspti kurhanguni ambe enga ima jorhentpipka (Juanu 14:9). Ju je miáni eskachi jucha uáka ikarani ka itsï jatsikuni, peru Tata Diosïsï újti eska kʼéaka (1 Kor. 3:6).

12. ¿Nénachi uá xarhatani eskachi tekaantstiska jiáni engachi juchari familiarichani aianguauaka Tata Diosïri ambe?

¹² Engachi aianguajka Tata Diosïri ambe juchari familiarichani, jamberichi úpiringa úkua jukanchani tekaatskua xarhatani. Eclesiastés 3:1, 7 jimbo, exentasïngachi konseju ma engajtsïni uáka jarhuatani. Jimini arhisïndi: “Jarhasti [...] tiempu ma para pínasku pakarani ka tiempu ma para uandani”. Nájkirukachi juchari ambakiti jángua jingoni aianhpijka ambakiti ambe,  méntkisïchi jingontku jarhasïnga parachi exeni na jatinchi uá uandantani jurhimbikueri ambe (1 Ped. 3:1, 2). Tsípikua jingonchi aianhpisïnga ka jorhentpini, peruchi tekaantstiska iámindu kʼuiripuecha jingoni, asta juchari familia jingoni.

13, 14. ¿Nákiskiksï máru ejempluecha engachi uáka terukukuantani parachi májkueni tekaantstini?

¹³ Jarhastiksï ambakiti ejempluecha ióntki anapu Tata Diosïri marhuaricheri engaksï xarhatapka tekaantskua ka ístu ini jurhiatikuecha jimbo. Abakuki uékaxaptia eska nóteru japiringa no sési jásï ambe, peru Tata Diosïni mintsikaparini uandaspti: “Anhandetini jauaka jima engani kuárini jauaka” (Hab. 2:1). Apostuli Pablu uandaspti eska tsípikua jingoni uékasïrenguia kʼamarani aianhpikuani. Peru tekaantskua jingoni útasï aianhpixapti ambakiti aianhperakuani (Uku. 20:24).

¹⁴ Ju je exeni temungurhiri ejemplu ma engaksï jorhentperakua Galaadiri uéntapka ka paisi ma jimboksï nirani marhuani nani engaksï no uánikua testiguecha jaka ka sánderu uánikua kʼuiripu no jakajkuni Jesusini. Namunitu kʼuiripuechanksï exeantaspti engaksï uékenga Bibliaeri ambe jorhenguarhini, peru imecheri kompanieruecha engaksï máteru paisicha jimbo marhuani japka, ambakiti ambeksï aianguasïrendi imani kʼuiripuecheri engaksï jarhuataapkia itsï atakuarhini. Ka nájkiruka no uánikua kʼuiripu uékenga Bibliaeri ambe kurhaani, i temungurhiri seguirixapti tekaantskua jingoni aianhpini. Engaksï na ochu uéxurhini jámapkia aianhpini no kuatantaparini, niáraspti itsï atakuarhini ma imecheri jorhenguarhiri. ¿Nénaksï terukuntasïni ióntki anapu ejempluecha iásï anapuecha jingoni? Eskaksï jánguarhintaska seguirini ánchikuarhini ka eska Jeoba újchakuraspka imecheri tekaantskua jimbo. Ísï jimbo, ju je májkueni úni eska imecha engaksï Tata Diosïni mintsikaparini ka tekaantskua jingoni, “pʼika indeni ambe engaksï aiaminhapka” (Ebr. 6:10-12).

15. ¿Andichisï sánderu mintsikajki Tata Diosïri Karakatani engachi no kuatantajka aianhpini?

¹⁵ Jimbokachi jakajkusïnga ambe engachi aianhpijka, uékasïngachi eskaksï iámindu kʼuiripuecha míteaka. Mintsikasïngachi eska úkuarhiaka ambe enga Tata Diosïri Karakata uandajka (Sal. 119:42; Is. 40:8). Ini jurhiatikuecha jimbo exexakachi na engaksï úkuarhini jaka máru Bibliaeri profesiecha. Ístuchi exesïnga na engaksï kʼuiripuecha sánderu sési irekajka engaksï uénajka Bibliaeri konsejuechani úraani. Iámindu ini ambe jimbo, sánderuchi exesïnga eska iámindu kʼuiripu uétarhinchasïnga kurhaani ambakiti ambe Reinueri.

16. a) Eska na uandajka Salmo 46:1-3, ¿andichisï sánderu mintsikaa Jeobani engachi no kuatantaaka aianhpini? b) ¿Ístujtsïni néna jarhuatasïni mintsikani Jesusini?

¹⁶ Ístuchi, mintsikasïnga Jeobani jimbokachi imeri uandakuanisï aianhpijka ka ístu Jesusini enga ima erakuka para Reini Tata Diosïri Reinurhu (Juanu 14:1). Ambe uéjki úkuarhini, Jeobajtsïni méntkisï kuájchakuati ka íntskuatijtsïni uinhapikua (arhinta je Salmo 46:1-3). Ístu, sésichi mítetixaka eska Jesusi orhejtsïkuxaka aianhpikuani auandarhu uératini, imani uinhapikua ka juramukua jingoni enga Jeoba íntskuka (Mat. 28:18-20).

17. Uanda je ejemplu ma enga xarhatajka andichisï jatsi para seguirini aianhpini.

¹⁷ Juchari jakajkukua jimbo, seguruchi jarhaska eskajtsïni Jeoba újchakuraaka engachi jánguarhintaska ka ménisï imani ambe jingoni engachi no eranhaskajka (Ecl. 11:6). Por ejemplu, pauani pauanksï uánikua kʼuiripuecha nitamasïndi jimesïsï engaksï juchari karrituecha jarhajka ka mesecha publikasionicha jingoni. ¿Marhuasïni engachi karrituecha ka mesecha jingoni aianhpijka? Jo. Nuestro Ministerio del Reino nobiembriri 2014 anapu, uandaspti eska nanaka ma enga unibersidadirhu jámani japka, eratsespti artikulu ma karani Jeobaeri testiguecheri ambe. No ma Kʼumanchikua Reinueri exentaspti,  peru unibersidadirhu exespti mesa ma publikasionicha jingoni, jima exentaspti ambe enga jirinhani japka para imeri artikuluni karani. Tátsekua niáraspti itsï atakuarhini ka iásï prekursora regularistia. I járhati eksperiensiechajtsïni jarhuatasïndi parachi seguirini aianhpini jimboka xarhatasïnga eskaksï útasï jarhaska kʼuiripuecha engaksï uétarhinchani jaka kurhaani Reinueri ambe.

18. ¿Andichisï seguru jaki eska Reinueri aianhpikua, jiáni kʼamakurhiaka enga Tata Diosï exerini jakaia?

¹⁸ Uákachi seguru jarhani eska Reinueri aianhpikua, jiáni kʼamakurhiaka enga Tata Diosï exerini jakaia. Ju je eratseni ambe enga úkuarhipka Noeri jurhiatikuecha jimbo. Jeoba xarhataspti eska méntkisï úsïnga ambe ma jiáni enga sánderu sési jauaka. Ma siento beinti uéxurhinisï antesi, Jeoba uandaspti káni úkuarhipirini kʼéri janikua. Uánikua uéxurhinisï tátsekua, Jeoba arhispti Noeni eska úpiringa arkani ka Noe kánikua ánchikuarhispti ma kuarenta o sinkuenta uéxurhinisï. Ka ístu, nájkirukaksï kʼuiripuecha no kurhajchenga, ima no kuatantaspti aianhpini astaka Jeoba arhipka eska incharaapiringuia animalichani arkarhu. Jiájkani, ima jurhiatikua enga Jeoba uandarini japkia, míkaspti puertani (Gén. 6:3; 7:1, 2, 16).

19. ¿Ambe úkuarhia no ióni jimbo?

¹⁹ No ióni jimbo Jeoba uandaatia eskachi nóteru aianhpiakia, kʼamajkuati Noambakitiri parhakpinini ka uáti eska jimbanhi parhakpini ma jauaka nani enga jurhimbikua jingoni jánhaaka. Enga jamberi niáraaka ima jurhiatikua, ju je májkueni úni eska Noe, Abakuki ka máteru ambakiti Tata Diosïri marhuaricha engaksï no kuatantani jaka ánchikuarhini. Ju je orheta peerani aianhpikuani, tekaantstini ka sánderu mintsikani Jeobani ka imani ambe engajtsïni ima aiachijka.