1. ¿Nénaksï jarhuajpisïni pirenchicha Jeobaeri kúnguarhikuarhu, joperu náki uandanhiatechanksï jatsiasïni máru? (Exe je imajeni enga uénakuarhu jaka).

KÁNIKUACHI sési pʼikuarherasïnga enga juchari kúnguarhikuarhu xáni uánikua pirenchicha jaka engaksï kánikua ánchikuarhijka. Por ejemplu, partisiparisïndiksï tánguarhikuecharhu, uérasïndiksï aianhpini ka uandanhiasïndiksï erachichani jimbo. Ístu, máruksï jarhuajpisïndi para sési jatsini Kʼumanchikua Reinuerini. Peru ístuksï jatsiasïndi uandanhiatechani. Máruksï kuidariuasïndi táti jémbechani engaksï jatirikia. Máteruechaksï tekaantaxati engaksï imecheri familiaricha no káni jurajkuajka paraksï Jeobani marhuakuni. Ka máteru pirenchichaksï jandiajku tʼarhexeraaxati sapiichani ka kánikuaksï jánguarhintasïndi para kéndaani.

2. ¿Andichisï jatsi para jánguarhintani pirenchichani jarhuataani?

² ¿Andichisï jatsi para jánguarhintani pirenchichani jarhuataani? Jimboka parhakpinirhu, nóksï méntkisï janhanharhikua jingoni kaasïnga nanakechani. Ístu, jimbokajtsïni mismu Biblia arhisïnga eskachi jarhuatauaka. Por ejemplu, apostuli Pablu arhiaspti Roma anapu kúnguarhikuarhu anapuechani eskaksï sési erokapiringa Fébeni ka eskaksï jarhuatapiringa iámindu ambe jimbo enga uétarhinchapiringa (Rom. 16:1, 2). Enga Pablu fariseuepka, imajtu jakajkusïrendi eskaksï nanakecha no xáni jukaparhakuespka. Peru enga Kristueri chúxapati úkuarhipkia, májkueni úspti eska Jesusi ka pʼamojperakua ka janhanharhikua jingoni kaaspti nanakechani (1 Kor. 11:1).

3. ¿Jesusi néna kaaspi nanakechani ka néna exeasïreni imechani engaksï uénga ambe enga Táti jémba uéjka?

³ Jesusi janhanharhikua jingoni kaaspti iámindu nanakechani (Juanu 4:27). Ima no ísïspti eskaksï judiuecha engaksï relijionini orhejtsïkuenga. Libru ma enga Bibliaeri ambe uandajka, arhisïndi: “Jesusi no méni uandaspti ambe ma enga menosi uápiringa nanakechani”. Joperu sánderu jukaparharaasïrendi imani nanakechani engaksï uénga ambe enga Táti jémba uéjka. Ka jiáni enga ima  uandapka né engaksï jindepka imeri familia, uandaaspti tatakechani ka ístu nanakechani (Mat. 12:50).

4. ¿Ambechi exea ini jorhenguarhikua jimbo?

⁴ Jesusi méntkisï jarhuataaspti nanakechani engaksï marhuakuenga Tata Diosïni. Ístu jukaparharaasïrendi ka kuájpiani. Ju je exeni nénachi uá májkueni úni eska Jesusi.

5. ¿Andiksïsï máru pirenchicha úkua jukanchajki tsípikuarhini máteruecha jingoni?

⁵ No arhiparini sinchi tatakeski o nanakeski, iáminduechachi kánikua sési pʼikuarherasïnga máteruechani jingoni jarhani. Peru i ambe no méntkisï fásilisïndi para máru pirenchicha. ¿Andi? Ju je exeni ambe engaksï uandajka máru. Pirenchi ma enga Yolanda * arhinhajka uandasïndi: “Jimbokani no uambuchatiska, ísï exesïnga enajkini ji no terukujki kúnguarhikuarhu, no sáni sési pʼikuarherasïnga”. Cristina, enga prekursora máeka ka máteru nani mótseni para sánderu aianhpini, uandasïndi: “Engari apenasi niárajka kúnguarhikua ma jimbo, ísïri pʼikuarherasïnga enajkiri jandiajku jaki”. Peru ístu, imecha engaksï irekani jaka familiaricha jingoni engaksï no Testigueka, úpirindiksï jandiajku pʼikuarherani imecho ka ístu kúnguarhikuarhu. Ka ístuksï úpirindi jandiajku pʼikuarherani imecha engaksï no újka uérani imecho pʼamenchakua jimbo o engaksï familiarini ma kuidarini jaka enga pʼamenchani jaka. Pirenchi ma enga Ana arhinhajka uandantasïndi: “Jimbokani ji kuidarixapka juchiti nándini no úsïrenga nirani nani engajtsïni pʼímarhienga”.

6. Eska na uandajka Lukasʌ 10:38-42, ¿Jesusi néna jarhuataspi Martani ka Mariani?

⁶ Jesusi arhutasïrendi tiempu para pirenchicha jingoni jarhani ka ambakiti amigu máespti para imecha. Ju je exeni na enga sési pájperenga Maria ka Marta jingoni engaksï no uambuchatipka (arhinta je Lukasʌ 10:38-42). Na enga káuenga ka uandontskuarhekuani, úsïrendi eskaksï pirenchicha sési pʼikuarherapiringa. Maria no sáni chéparini uaxakaspti imeri Jorhentpiriri jantsiricha jimbo para imeri ambe jorhenguarhini. * Ka Marta no chéspti arhini Jesusini eska ikiaxapka jimboka Maria no jarhuataxapka. Ka ini ambe jimbo enga úkuarhipka, Jesusi ambakiti ambe jorhendaaspti. Ístu, nirasïrendi pʼorhembiani para xarhatakuani eska pendienti jarhasïrenga imechani jimbo ka ístu Lasaruni jimbo (Juanu 12:1-3). Ísï jimbo, enga Lasaru uinhamu pʼamenchapka, Maria ka Marta mintsinharhisptiksï Jesusini ka jarhuajperataksï kurhakuspti (Juanu 11:3, 5).

7. ¿Nénachi uá uinhaperantaani pirenchichani?

⁷ Máru pirenchichaksï solu tánguarhikuecharhu úsïndi erachicha jingoni jarhani. Ísï jimbo, ju je sési eroaani, imecha jingoni uandontskuarheni ka xarhatakuani eskachi uandanhiasïnga imecha jimbo. Yolanda, engachi antesi uandaka, uandasïndi: “Ji kánikua jukaparharasïnga engajtsïni máteruecha sési ambe arhijka imani ambe jimbo engani komentarijka tánguarhikuecharhu, engajtsïni pʼímarhijka parachi márku uérani aianhpini oksï máteru ambe úni jindeni jimbo”. Ju je úni eskaksï pirenchicha míteaka eskachi jukaparharaasïnga. Pirenchi ma enga Karla arhinhajka, uandasïndi: “Engani no újka nirani tánguarhikuarhu, míteska eskarini nema mensaji ma axachiaka. I amberini xarhatachesïndi eska kúnguarhikua pendienti jarhaska jindeni jimbo”.

8. ¿Nénateruchi uá májkueni úni eska Jesusi?

⁸ Ju je arhutani tiempu parachi pirenchicha jingoni jarhani, májkueni eska Jesusi. Jamberichi úpiringa juchiniu pʼímarhiani arhani ambe ma  o solu parachi márku jarhani. Ka ju je imani ambe uandontskuarheni enga uinhaperantauaka (Rom. 1:11, 12). Kánikua jukaparhakuesti eskaksï orhejtsïkuticha májkueni uáka eska Jesusi. Ima mítespti eska para máru úkua jukasïnga no tembuchatini o uambuchatini jarhani. Peru uandaspti eska para ma tsípikua jingoni irekani, no uétarhisïnga tembuchani o uambuchani o sapiichani kaani, sánderu sési jindesti Jeobani marhuakuni (Mat. 19:12; Luk. 11:27, 28).

9. ¿Nénaksï uá orhejtsïkuticha jarhuataani pirenchichani?

⁹ Joperu sánderu orhejtsïkutichaksïsï jatsiti para ísï kaani kúnguarhikuarhu anapu nanakechani komueska imecheri nándichani ka ermanechani (1 Tim. 5:1, 2). Jatsistiksï para jánguarhintani arhutani tiempu ante de uénakuarhini tánguarhikua ka enga na kʼamakurhiakia paraksï pirenchicha jingoni uandontskuarheni. Cristina uandasïndi: “Orhejtsïkuti ma kuenta íntskukuarhispti eskani kánikua okupada jarhasïrenga ka iatsitakuarhurini kurhamarhispti ambe ka ambe xáni úsïreni. Kánikua sési pʼikuarheraspka enga erachi pendienti japka jindeni jimbo”. Engaksï erachicha jánguarhintajka someni arhutani tiempu paraksï pirenchicha jingoni uandontskuarheni, xarhatakuasïndiksï eskaksï uandanhiasïnga imechani jimbo. * Ana ístu uandasïndi andisï xáni marhuajki engaksï orhejtsïkuticha ini ambe újka: “Sánderuni sési míteasïnga ka imajtujtsïni sánderu  sési mítesïndi jindeni, ka engani uandanhiata ambe nitamakuarhini jarhajka, no úkua jukanchasïnga jarhuajperata kurhakuani”.

10. ¿Ambe sési pʼikuastaasïni pirenchichani?

¹⁰ Iáminduechachi sési pʼikuarherasïnga engaksï máteruecha exejka ambe engachi újka sési úni, ka engajtsïni arhijka eskaksï jukaparharanga ambe engachi újka. Ka no sésichi pʼikuarherasïnga engajtsïni no nema arhijka i ambe. Prekursora ma enga Abigaili arhinhajka ka enga no uambuchatika, uandasïndi eska ménisï ísï pʼikuarherasïnga enajki no nema sési míti: “Ísïjtsïni mítesti komu ima uájpa o imeri ermana. Ménisï eratsesïnga eskarini no nema míteska”. Peru ju je exeni ambe enga uandapka pirenchi Pamela enga ióni marhuapka komu misionera peru tátsekua jatsispti para imeo kʼuanhatsentani para imeri tátichani kuidariuani. Iásï 70 uéxurhini jatiristia ka útasï prekursoresti, ima uandasïndi: “Ambe engarini sánderu jarhuatajka, jindesti engajtsïni máteruecha arhijka na engajtsïni xáni xénchajka”.

11. ¿Néna xarhataspi Jesusi eska jukaparharaasïrenga imani pirenchichani engaksï nirenga imani jingoni aianhpini?

¹¹ Jesusi jukaparharaasïrendi imani pirenchichani engaksï jarhuatenga “imecheri jatsikuarhekua ambe jimbo” (Luk. 8:1-3). Ka no solu íntsaasti indeni kʼéri kóntperatani sino ístu ambakiti ambe aianguaspti enga Tata Diosïri Karakata uandenga. Por ejemplu, aianguaspti eska uarhipiringa ka eska tsíntapiringa (Luk. 24:5-8). Ísï eska na úpka imeri apostulicha jingoni, jorhendaaspti pirenchichani nénaksï úpirini orhepani uérani jiáni engaksï no sési kámapiringa imani ka uándikunksï (Mar. 9:30-32; 10:32-34). Ka jarhasti ambe ma enga kánikua jukaparhakueka, jiáni engaksï Jesusini jupikapka ka apostulicha sïpakuarhini, máru pirenchichaksï no jurajkuspti Jesusini enga uarhini japkia chkarirhu (Mat. 26:56; Mar. 15:40, 41).

12. ¿Náki ánchikuarhita íntsaaspi Jesusi máru pirenchichani?

¹² Jesusi mintsinharhiaspti máru pirenchichani paraksï kʼéri ánchikuarhita ambe úni. Por ejemplu imecha engaksï exepka eska Jesusi tsíntaspkia, pirenchichesptiksï. Arhiaspti eskaksï aianguapiringa apostulichani eska ima tsíntaspkia (Mat. 28:5, 9, 10). Ka Pentekostesi uéxurhini 33 jimbo, jiáni engaksï kristianuecha espiritu santu intsïnhapka, jamberiksï japti nanakecha. Enga ísïpka, imaksï pirenchicha engaksï apenasi erakunhapka, intsïnhaptiksï sésikua paraksï uandantani “kʼéri ambe enga Diosï úka” mámaru jásï idiomecha jimbo (Uku. 1:14; 2:2-4, 11).

13. a) ¿Ambeksï úxaki pirenchicha paraksï marhuakuni Jeobani? b) ¿Nénachi uá xarhatakuani juchari pirenchichani eskachi jukaparharaasïnga ambe engaksï xáni újka?

¹³ Pirenchichaksï jukanchasïndi parachi diosmeiamukua arhiani iámindu ambe jimbo engaksï újka para Jeobani marhuakuni. Por ejemplu jarhuajpisïndiksï konstruksionirhu ka paraksï sési jatsiani kʼumanchikuechani engachi úraajka parachi Jeobani kʼéri ambe arhini, nirasïndiksï máteru idiomecha jimbo aianhpini ka jarhuajpisïndiksï Beteli. Ístuksï jarhuajpisïndi jimesïsï enga no sési ambe úkuarhijka ka ístuksï jarhuajpisïndi paraksï juchari publikasionichani tradusiriuani ka marhuasïndiksï komu prekursorecha ka misionerecha. Ka májkueni eskaksï erachicha, pirenchichajtuksï nirasïndi prekursoricheri jorhentperakuarhu, ebanjelisadoricheri jimbo ka Galaadiri jorhentperakuarhu. Ístuksï jarhasti pirenchicha engaksï jarhuataajka imecheri acheetichani paraksï kʼéri ánchikuarhita ambe úni kúnguarhikuarhu ka Jeobaeri organisasioni jimbo. Engaksï i pirenchicha no jarhuataapiringa imecheri uámbechani engaksï intsïmperakua máeka, íksï erachicha no úpirindi úni imecheri ánchikuarhitechani (Efes. 4:8, TNM). ¿Eratseskichia nénachi úpirini jarhuataani juchari pirenchichani engaksï xáni jánguarhintajka Jeobani marhuakuni?

14. Ísï eska na uandajka Salmo 68:11, ¿ambeksï úsïni orhejtsïkuticha?

¹⁴ Orhejtsïkutichaksï mítesti eskaksï uánikueska  pirenchicha engaksï uéjka ánchikuarhini ka uánikuestiksï engaksï sési aianhpijka ambakiti ambe (arhinta je Salmo 68:11). Ísï jimbo, orhejtsïkutichaksï exesïndi naniksï uá sánderu sési marhuani imani ambe jimbo engaksï jorhenaka úni. Abigailini engachi antesi uandaka, kánikua sési pʼikuastasïndi engaksï erachicha kurhamarhijka ambe úsïni para uénani uandontskuarheni kʼuiripuecha jingoni. Ima uandasïndi: “I amberini jarhuatasïndi míteni eskarini Jeoba ánchikuarhita ma íntskuska imeri kúnguarhikuarhu”. Ístu, orhejtsïkutichaksï mítesti eskaksï ambakiti pirenchicha engaksï eratsekua jukarika, uáka jarhuataani pirenchichani engaksï sánderu sapirhatkueka imecheri uandanhiatecha jingoni (Titu 2:3-5). Ísïsti, juchari pirenchichaksï jukanchasti parachi jukaparharaani ka xénchaani.

15. ¿Náni uétarhipirini parachi kuájpiani ka jarhuataani juchari pirenchichani?

¹⁵ Ménisï, máru juchari pirenchichaksï uétarhinchasïndi eska nema kuájpiauaka ka jarhuataani (Is. 1:17). Por ejemplu, pirenchi ma enga tsïndika o enga diborsiarikuarhika, jamberi uétarhinchaati eska nema uandapikuaka o eska imani ambe jingoni jarhuataaka enga antesi imeri acheeti uénga. Jamberi pirenchi ma enga jatirikia, uétarhinchaati eska nema uandapikuaka jiáni enga doktoricha jingoni niuaka. Ka prekursora ma enga máteru ambe jingoni jarhuajpijka Jeobaeri organisasionirhu, úpirindi uétarhinchani eska nema kuájpiaka engaksï máteruecha no sési ambe uandaaka imeri ambe jimboka no xáni uérasïnga aianhpini eskaksï máteru prekursoricha. Ju je ménderu exeni Jesusiri ejempluni parachi míteni ambeteruchi uá úni pirenchicha jimbo.

16. Ísï eska na uandajka Markusʌ 14:3-9, ¿Jesusi néna kuájpispi Mariani?

¹⁶ Jesusi no pínasku pakaraspti para kuájpiani pirenchichani engaksï máteruecha no sési ambe eratsepka imecheri ambe. Por ejemplu, kuájpispti Mariani enga Marta no sési ambe uandapka imeri ambe (Luk. 10:38-42). Ka ménderu kuájpispti engaksï máteruecha ísï exepka enajki ima no sési ambe úpi (arhinta je Markusʌ 14:3-9). Jesusi mítespti andisï Maria ísï úpi. Ísï jimbo, sési jásï ambe arhispti: Ambakiti úkuesti engarini inde úchika, “i uarhiiti ústia eska xáni úpiringa úni”. Asta uandaspti: ‘Naninterkisï parhakpinirhu enga aianhpinhaaka ambakiti aianhperakua, ístu uandanhantaati i ambe enga i uarhiiti úka’. Ka i ambesti engachi miántani jaka ini jorhenguarhikua jimbo. ¡Kánikua sési pʼikuastapti i ambe Mariani! Ka xáni sési enga Jesusi aianhperakua jingoni terukutantapka ambe enga Maria úpka.

17. Jatsiku je ejemplu ma enga xarhatajka na enga xáni uétarhijka eskachi kuájpiaka pirenchini ma.

¹⁷ ¿Kuájpiasïnchi juchari pirenchichani jiáni engaksï uétarhinchani jarhajka? Ju je eranhaskani eskaksï erachicha exesïnga eska pirenchi ma enga imeri uámba enga no Testigueka, ióndasïnga niárani tánguarhikuecharhu ka ménderu jirejiresï níntani. Ístu, iauani méni paasïndi imeri sapiichani tánguarhikuecharhu. Ísï jimbo, erachichaksï uénasïndi no sési ambe uandani pirenchiri ka eratsenksï andisï pirenchi no mátirku arhijki uámbani eskaksï imecheri sapiicha jatsiska para nirani tánguarhikuarhu. Joperu juchari pirenchi jánguarhintaxati na enga xáni úni jaka. Uánikua ambe no imeri jájki jimbo jarhasti, ni imajkue enga exejka imecheri sapiicheri ambe. Jiájkani, ¿ambechi úpirini úni? Engachi ambakiti ambe arhiska pirenchini imani ambe jimbo enga úni jaka ka aianguanchi máteruechani inderi ambe, jamberi nóteru nema no sési uandaatia pirenchiri ambe.

18. ¿Ambe máteru ambechi uá úni para jarhuataani pirenchichani?

¹⁸ Ístuchi uáka úkuechani jingoni xarhatakuani pirenchichani na engachi xáni jukaparharaajka (1 Juanu 3:18). Ana, enga amambani kuidariuenga enga pʼamenchani japka, uandantasïndi: “Máru amiguechaksï jurhasïrendi ménisï parajtsïni jarhuatani sáni engani jamberi ji máteru  ambe úpiringa oksï tʼirekua ambe juasïrendi. Ísïjtsïni pʼikuastasïrendi eskani kúnguarhikuarhu anapuespka ka eskajtsïni uékasïrenga”. Ka erachi ma arhistakuspti Yolandani néna kuidarini imeri karruni. Yolanda uandantasïndi: “Kánikua sési pʼikuarherasïnga míteni eskaksï erachicha no uékasïnga eskani úkuarhinchaaka ambe ma karru jingoni”.

19. ¿Ambe máteru ambeksï uá úni orhejtsïkuticha paraksï pirenchichani jarhuataani?

¹⁹ Ístu, orhejtsïkutichaksï jatsisti para jingontku jarhani ambe engaksï uétarhinchaaka pirenchicha. Mítestiksï eska Jeoba exesïnga na engaksï kánhajka pirenchicha (Sant. 1:27). Ísï jimbo, májkuenksï úsïndi eska Jesusi ka nóksï ísku jatini juramusïndi ambe ma, sánderu sési, kurhangukuasïndiksï pirenchichani (Mat. 15:22-28). Engaksï orhejtsïkuticha exejka néna jarhuataani, jánguarhintasïndiksï paraksï pirenchicha míteni eska Jeoba ka imeri kúnguarhikua pendienti jarhasïnga imechani jimbo. Inde ambesï úkuarhinchapti Karla enga máteru kʼumanchikuarhu mótsepka. Enga orhejtsïkuti ma indeni ambe mítepka, jirejiresï jánguarhintaspti parakaksï erachicha jarhuatapiringa. Karla uandantasïndi: “Inde ambe úspti eskani no xáni uandanhiapiringa. Imecheri uandakuecha jingoni ka ambe engaksï orhejtsïkuticha úpka parajtsïni jarhuatani, xarhatachestijtsïni eskani kánikua jukaparhakueska kúnguarhikuarhu ka eskani no jandiajku jarhaska parani úni orhepani uérakuani uandanhiatechani”.

20, 21. ¿Nénachi uá xarhatani eskachi jukaparharaasïnga iámindu pirenchichani?

²⁰ Juchari kúnguarhikuantku exeparini, uánikua pirenchichaksï jarhasti engaksï ánchikuarhirika ka engaksï jukanchaka eskachi jarhuatauaka. Jesusiri ejempluni exeparini, jorhenguarhiskachi eskachi jánguarhintaaka para arhutani tiempu para pirenchichani jingoni jarhani ka para sési míteani. Ju je xarhatakuani na engachi xáni jukaparharajka ambe engaksï xáni újka paraksï Tata Diosïni marhuakuni, ka kuájpiani jiáni enga uétarhiaka.

²¹ Apostuli Pablu nuebe pirenchicheri nombrichani uandaaspti enga kʼamarani jámenguia kartani para Roma anapuecha (Rom. 16:1, 3, 6, 12, 13, 15). Imechaksï kánikua sési pʼikuarherapti enga Pablu uandajperata axakuapka ka enga ambakiti ambe arhiapka. Engachi juchajtu jarhuataaska juchari kúnguarhikuarhu anapu pirenchichani, xarhataakachi eskachi jukaparharaasïnga ka eskaksï juchari familieska.