1. ¿Na jatini sánderu úkua jukasïni marhuakuni Jeobani?

¿NA JATINI sánderu úkua jukasïni marhuakuni Jeobani? ¿Jiáni engachi no sési nitamakuarhini jarhajka o jiáni enga iámu ambe sési jarhajka? Engachi uandanhiata ambe jatsijka jirejiresïchi jirinhasïnga Jeobaeri jarhuajperata. Joperu ¿ambechi úsïni enga iámu ambe sési jarhajka? ¿Úpirinchi mirikurhini na enga xáni jukaparhakueka Tata Diosïni marhuakuni? Jeoba arhiaspti israelitechani eskaksï jingontku jámapiringa paraksï no ini ambe úkuarhinchani (Deut. 6:10-12).

2. ¿Náki ejemplujtsïni xarhatacheski rei Asá?

² Rei Asá, ambakiti ejemplujtsïni ma xarhatachesti, jimboka sési úska enga mintsita jingoni mintsikapka Jeobani. Ima no solu jiáni marhuakuspti Jeobani enga kánikua úkua jukapka, sino ístu jiáni enga iámu ambe sési japka. Desde sapichuetini, “Asá, méntkisï marhuakuspti Jeobani iámu mintsita jingoni” (1 Rey. 15:14). Ka xarhataspti ini ambe jimboka úspka eskaksï Juda anapuecha nóteru kómarhiapiringuia diosï úkatechani. Biblia uandasïndi eska kénditaaspka “altarichani diosïcheri engaksï máteru nani ísï anapuepka ka ístu imani lugarichani nani engaksï kómarhiauenga, kʼamajkuaspti pilarichani engaksï kómarhiauenga ka kuáskuaspti postichani” (2 Crón. 14:3, 5). Asta úspti eska imeri mama kʼéri, Maaká, nóteru reinepiringuia jimboka diosïni ma úspka paraka ireta kómarhipiringa (1 Rey. 15:11-13).

3. ¿Ambechi exea ini jorhenguarhikua jimbo?

³ Asá no solu úspti eskaksï Juda anapuecha nóteru kómarhiapiringuia diosï úkatechani, ístu jarhuataaspti parakaksï ménderu uéntapiringa kómarhini Jeobani. Ka Tata Diosï újchakuraspti  Asáni ka úspti eska Juda pínandikua japiringa. * Jiáni enga ima juramuni japka, diesi uéxurhini pínandikua jarhaspti imani lugari jimbo (2 Crón. 14:1, 4, 6). Ini jorhenguarhikua jimbo, orhetachi exeka ambe enga úpka Asá imani jurhiatikuechani jimbo. Tátsekua, exeakachi primeru sigluru anapu kristianuecheri ejempluni engaksï ístu májkueni úpka eska Asá, engaksï sési úraapka imani jurhiatikuechani enga iámindu ambe sési japka. Ka últimu, mókuntaakachi ini kurhamarhikuani: ¿Ambechi jatsiski para úni engachi imani lugari jimbo irekani jaka nani engachi sésikua jatsika para marhuakuni Jeobani?

4. Eska na uandajka 2 Crónicas 14:2, 6, 7, ¿ambe úspi Asá enga iámindu ambe sési japka?

⁴ (Arhinta je 2 Crónicas 14:2, 6, 7). Asá arhiaspti iretarhu anapuechani eska Jeobaespka enga “pínandikua” íntsaapka iápurisï. Peru Asá no eratsespti eska indeni ambe jimbo nóteru xáni jánguarhintapiringuia. Sánderu sési, uénaspti iretechani uáni, kʼérati bardechani, torrechani ka puertechani. Arhiaspti Juda anapuechani: “Paisi útasï juchari jájki jimbo jarhasti”. ¿Ambe arhikuekaspi? Eskaksï úpiringa nani uéjkisï jámani imani echeri jimbo enga Tata Diosï íntsaapka ka konstruirini no sáni chérhiapariani imecheri ikiatspitichani. Ísï jimbo, arhispti iretani eska sési úraapiringa imani jurhiatikuechani enga iámindu ambe sési japka.

5. ¿Andisï Asá úpi eska imeri ejersitu sánderu kʼépiringa?

⁵ Ístu imani tiempu jimbo, Asá úspti eska imeri ejersitu sánderu kʼépiringa (2 Crón. 14:8). Peru ¿úspi indeni ambe jimboka no mintsikasïrenga Jeobani? Nómbe, mintsikasïrendi Jeobani. Peru mítespti eska komu rei, jatsispka para úni eska ireta listu japiringa para jiáni enga no sési ambe úkuarhipiringa. Mítespti eska Juda no méntkisï iámu ambe sési japiringa.  Ka ísï úkuarhispti, eskachi na exeaka sánderu orhepani.

6. ¿Ambeksï úspi primeru sigluru anapu kristianuecha jiáni enga iámindu ambe sési japka?

⁶ Nájkirukaksï primeru sigluru anapu kristianuecha someni no sési kánhapka, ístuksï niáraspti irekani jurhiatikuecha jimbo enga iámu ambe sési japka o pínandikua jarhani. ¿Ambeksï úspi imani jurhiatikuecha jimbo? Ima kristianuechaksï kánikua jánguarhintaspti ambakiti ambe aianhpini. Ukuecha uandasïndi eska kúnguarhikua janhanharhisïrenga Jeobani, ka sánderuksï uánixapti jimbokaksï no jurajkuspka aianhpini. I ambe xarhatasïndi eska Jeoba újchakuraaspka jimbokaksï tsípikua jingoni aianhpispka jiáni enga iámindu ambe sési japka (Uku. 9:26-31, Táta Diósïri Uandakua Tata Jesukristueri Aiatsperakua [TDU]).

7, 8. Uandanta je ambeksï úsïreni Pablu ka máteru kristianuecha paraksï méntkisï aianhpini Tata Diosïri ambe.

⁷ Primeru sigluru anapu kristianuechaksï méntkisï jánguarhintaspti ambakiti ambe aianhpini. Por ejemplu, apostuli Pablu jini Efesu pakaraspti enga exepka eska kʼéri ánchikuarhita jarhaspka imani ireta jimbo para aianhpini ka para Jesusiri chúxapatichani uáni (1 Kor. 16:8, 9).

⁸ Uéxurhini 49 jimbo, Pablu ka máteru kristianuechaksï exespti eskaksï úpiringa aianhpini jiáni engaksï sési peentapkia uándanhiatani sirkunsisioniri ambe (Uku. 15:23-29). Engaksï na aianguapkia kúnguarhikuechani ambe engaksï pakatperapka, kristianuechaksï kánikua jánguarhintaspti paraksï aianhpini Jeobaeri “uandakuani” ka “ambakiti aianhperakuani” (Uku. 15:30-35). ¿Ambe úkuarhispi tátsekua? Biblia uandasïndi eskaksï kúnguarhikuecha ‘sánderu sési jakajkuxapka ka mándani pauanksï sánderu uáneeni’ (Uku. 16:4, 5, TDU).

9. ¿Ambechi úsïni úni uánikua lugaricha jimbo ka ambechi jatsipirini para kurhamarhikuarhini?

⁹ Ini jurhiatikuecha jimbo, úsïngachi uápurisï aianhpini. Engachi paisi ma jimbo irekani jaka nani engachi sésikua jatsika ini ambe úni, ju je kurhamarhikuarhini: “¿Jánguarhintaxaki na engani xáni uáka aianhpini?”. Ini últimu jurhiatikuecha jimbo, Jeobaeri kúnguarhikua kánikua jánguarhintaxati aianhpini, ísï eska no méni (Mar. 13:10). ¡Xáni ambakiti ambe, kánikuachi ánchikuarhita jatsiska Jeobaeri marhuaricha!

10. ¿Ambejtsïni arhisïni 2 Timoteo 4:2 eskachi jatsiska para úni?

¹⁰ Engachi irekani jaka jurhiatikuecha jimbo enga pínandikua jaka, ¿nénachi uá sési úrani ini tiempuni? (Arhinta je 2 Timoteo 4:2). Ju je sési eratsentani sini jucha o juchari familiarhu anapu ma úpirini sánderu jánguarhintani aianhpini asta prekursori úkuarhini. No tiempuesti para tumina o jatsikuarhekua ambe tánani jarhani jimboka i ambe no marhuauaka kʼéri mískuarhitarhu (Prov. 11:4; Mat. 6:31-33; 1 Juanu 2:15-17).

11. ¿Ambeksï úski uánikua aianhpiricha paraksï sánderu uánikua kʼuiripuechani aianguani Tata Diosïri ambe?

¹¹ Uánikua aianhpirichaksï máteru idioma jorhenguarhisti paraksï aianguani ka jorhendaani máteru kʼuiripuechani Tata Diosïri ambe. Ka paraksï úni ini ambe úni, Jeobaeri kúnguarhikua sánderu ka sánderu uánikua idiomecha jimbo peetaaxati publikasionichani engaksï Bibliarhu pʼitakateka. Por ejemplu, 2010 jimbo, publikasionichaksï ma kinientu idiomecha jimbo jarhaspti, peru iásïksï jukari mili idiomecha jimbo jarhastia.

12. ¿Nénaksï pʼikuarherasïni kʼuiripuecha engaksï imecheri idioma jimbo kurhaajka Reinueri ambe? Uandanta je ejemplu ma.

¹² Kʼuiripuechaksï kánikua tsípisïndi engaksï imecheri idioma jimbo kurhaajka Jeobaeri ambe. Ju je exeni ejemplu ma. Jini Memphis  (Tennessee, Estados Unidos), pirenchi ma kʼéri tánguarhikua ma jimbo niraspti enga imeri idioma jimbo úkuarhipka, enga jindeka kiniaruanda enga máru lugaricha jimbo uandanhajka jini África. Enga na nitamapkia kʼéri tánguarhikua, pirenchi uandaspti: “Diesisiete uéxurhini páxakaia ixú Estados Unidos, ka no méni xáni sési kurhanguxapka kʼéri tánguarhikua ma”. Xarharasïndi eska mintsitarhu niárakuspka Tata Diosïri ambe kurhaani imeri idioma jimbo. Engachi úpiringa ísï úni, ¿úpirinchi jorhenguarhini idioma ma parachi jarhuataani imani kʼuiripuechani nani engachi jucha irekaka? ¿Exesïnchi eskaksï kʼuiripuecha sánderu uékapiringa kurhaani engachi imecheri idioma jimbo uandontskuarhekuapiringa? Kánikuachi sési pʼikuarheraaka engachi jánguarhintaaka ini ambe úni.

13. ¿Ambeksï úspi Rusia anapu erachicha jiáni enga pínandikua japka?

¹³ Joperu no iámindu juchari erachichaksï úsïni xáni sési marhuakuni Jeobani, jimbokaksï máru lugaricha jimbo, juramutichaksï nóteru jurajkuaskia ini ambe úni. Por ejemplu, ju je eratseni juchari erachicheri ambe jini Rusia. Imechaksï ióni no sési kánhaspti, peru marsuni 1991 jimbo, juramutichaksï jurajkuasptia paraksï marhuakuni Tata Diosïni. Para imani tiempuni, ma diesiseisi mili aianhpirichaksï jarhasptia. Peru beinte uéxurhini tátsekua, ma siento sesenta mili ísïsptiksïa. Xarharasïndi eskaksï juchari erachicha sési úraspka imani tiempuni enga pínandikua japka. Peru nájkiruka inde ambe niáraka mójtakurhini, imechaksï seguirixati tsípikua jingoni marhuakuni Jeobani ka únksï ambe engaksï xáni uáka nájkirukaksï no sési ambe nitamakuarhini jaka.

14, 15. ¿Jeoba néna úraspi imeri uinhapikuani para Asáni jarhuatani?

¹⁴ Ju je ménderu exeni ambe enga úkuarhipka Asáeri jurhiatikuecha jimbo. Pínandikua engaksï Juda anapuecha jatsipka niáraspti  kʼamakurhini, jimboka Etiopía anapu ejersitu ma engaksï ma miioni soldaduechepka, niraspkaksï imecha jingoni uarhipeni. Séra, enga orhejtsïkuni japka imani ejersituni, seguru jarhaspti eska kʼamajkupiringa Judani. Peru Asá mintsikasïrendi Jeobani, jimbosï kómarhipti: “Jarhuatajtsïni Jeoba, juchari Tata Diosï, jimbokaksïni tʼunguini mintsikasïnga, ka chíti nombri jimbochisï juka uarhipeni ini xáni uánikua kʼuiripuecha jingoni” (2 Crón. 14:11).

¹⁵ Ka nájkiruka Etiopía anapu ejersitu tsimani uelta sánderu kʼépka eska Juda anapu, Asá mítetixapti eska Jeoba jatsispka uinhapikua para jarhuatani imeri iretani. Ka ísï úkuarhispti. Jeobaeri jarhuajperata jingoni, kʼamajkusptiksï Etiopía anapu ejersituni (2 Crón. 14:8-13).

16. ¿Nénachi míteski eska i pínandikua engachi iáiasï jatsika niáraaka kʼamakurhini?

¹⁶ Nóchi míteska ambe engachi meru nitamakuarhiaka sánderu orhepani, peru kʼóruchi míteska eska i pínandikua engachi iáiasï jatsika, no jindeska para méntkisï. Ju je miáni eska Jesusi uandaspka eska últimu jurhiatikuechani jimbo, iámindu kʼuiripuechaksï no xénchaapiringa imeri chúxapatichani (Mat. 24:9). Ka apostuli Pablu májkueni jásï ambe uandaspti: “Iáminduecha engaksï uéjka ísï irekani eska Diosï na jaiapanhintajka Kristu Jesusini jimbo, no sési kánhaatiksï” (2 Tim. 3:12). Ístu, Noambakiti ‘kánikua ikiaxati’, ka no sési japirindi eratseni eskajtsïni ima no niáraaka tsʼéjkuni (Jaŋ. 12:12).

17. ¿Néna úpirini niárani tsʼéjkunhani juchari jakajkukua?

¹⁷ Nóteru ióndani, iámindu kristianuechachi niáraaka tsʼéjkunhani juchari jakajkukua jimbo. No ióni jimbo jauati “kʼéri mískuarhita ma”. Biblia uandasïndi eska jauaka ma “kʼéri mískuarhita enga nótki méni jarhani jaka desde enga parhakpini kueraanhaka asta iásï jamberi” (Mat. 24:21). Imani tiempu jimbo, jamberijtsïni juchari familiaricha no sési kámaati ka juramutichajtsïni nóteru jurajkunia úni juchari ánchikuarhitani (Mat. 10:35, 36). Ju je kurhamarhikuarhini: “¿Ísïua eska Asá ka mintsikaa eskarini Jeoba jarhuataaka ka kuájchakuni?

18. Eska na uandajka Ebreu 10:38, 39, ¿ambejtsïni jarhuataa listu jarhani para ima ambe engachi sánderu orhepani nitamakuarhiaka?

¹⁸ Jeoba uékasïndi eskachi listu jauaka imani ambe jimbo engachi sánderu orhepani nitamakuarhiaka. Ísï jimbo, úxati eskachi sánderu mintsikaaka imani. Úraxati jántspirini “enga mintsinharhikueka” ka jánhaskatini parajtsïni íntskuni  imani ambe engajtsïni jarhuataaka orhepani uérakuani tsʼéjkukuechani (Mat. 24:45). Peru juchachisï jatsika para jánguarhintani sánderu mintsikani Jeobani (arhinta je Ebreu 10:38, 39).

19, 20. Míteparini ambe enga uandajka 1 Crónicas 28:9, ¿ambechi jatsiski para kurhamarhikuarhini ka andi?

¹⁹ Ísï eska rei Asá, juchajtuchi jatsiska para andarhierani Jeobani (2 Crón. 14:4; 15:1, 2). Uénasïngachi andarhierani Jeobani engachi imeri ambe jorhenguarhijka ka itsï atakuarhini. Ka iásïchi jatsiska para jánguarhintani sánderu xénchani Jeobani. Ka parachi míteni sinchi úxaki indeni ambe, ju je kurhamarhikuarhini: “¿Jánguarhintasïni no méni kueratani tánguarhikuecharhu?”. Tánguarhikuechajtsïni jarhuatasïndi parachi seguirini marhuakuni Jeobani ka sésichi pʼikuarherasïnga juchari erachicha jingoni jarhani (Mat. 11:28). Ístu, ju je kurhamarhikuarhini: “¿Jánguarhintasïni méntkisï jandiajkuni jorhenguarhini Bibliani?”. Ka engachi familia jingoni irekaka, ¿jatsisïnchi mándani semana familieri jorhenguarhikuani? O engachi jandiajku irekaka, ¿arhutasïnchi tiempu parachi estudiarini ísï eskachi na úpiringa familia jingoni? ¿Jánguarhintasïnchi na engachi xáni uáka aianhpini ka jorhendaani máteruechani Tata Diosïri ambe?

²⁰ ¿Andichisï jatsi para ini ambe kurhamarhikuarhini? Jimboka Biblia uandasïnga eska Jeoba exesïnga ambe engachi eratsejka ka ístu ambe enga juchari mintsitarhu jaka. Ísï jimbo juchajtuchi jatsiska para ísï úni (arhinta je 1 Crónicas 28:9). Engachi exejka eskachi jatsiska para mójtakuni imani ambe engachi jucha uékani jaka úni, juchari jángua o na engachi eratsejka, ju je kurhakuni Jeobani eskajtsïni jarhuataaka. Iásïsti engachi jatsika para úni ambe ma para úni orhepani uérakuani tsʼéjkukuechani engachi sánderu orhepani nitamakuarhiauaka. Ísï jimbo, engachi irekani jaka jurhiatikuecha jimbo enga pínandikua jaka, ju je sési úrani ini tiempuni.