SEMANA 39
Enga nema engachi xénchajka jurajkujka Tata Diosï Jeobani
“Namuni xanhari no sésijtsï pʼikuastaspi” (SAL. 78:40).
PIREKUA 102 Ju je uinhaperantaani máteruechani
AMBE ENGACHI EXEAKA *
1. Enga nema petanhantajka kúnguarhikuarhu uératini, ¿néna uaa pʼikuarherani imeeri familia?
ENGA nema petanhantajka kúnguarhikuarhu uératini, imeeri familia kánikua no sési pʼikuarherasïndi. Pirenchi ma enga Hilda * arhinhajka, uandasïndi: “Juchiiti acheeti no méni jurajkusti Tata Diosï Jeobani ka uarhisti jiáni engachi 41 uéxurhini páni japkia temungurhirini ka ji eratsesïreenga eska no ma ambe japiringa engareni sánderu no sési pʼikuastapiringa. Peru jiáni enga juchiiti sapi jurajkupka Tata Diosï Jeobani, imeeri uarhiitini ka imeeri sapiichani, sánderu no sési pʼikuarheraspka”.
Tata Diosï Jeoba kurhangusïndi na enga no sési pʼikuarherakuarhijka enga nema engachi xénchajka nóteru marhuakujkia imani. (Exe je párrafu 2 ka 3). *
2, 3. Eska na uandajka Salmo 78: 40, 41, ¿néna pʼikuarherasïni Tata Diosï Jeoba enga imeeri marhuari ma jurajkujka?
2 Ju je eratsentani na enga pʼikuarherapka Tata Diosï Jeoba enga exeapka uánikua ánjelichani engaksï imeeri familiarhu anapuepka eskaksï nóteru kurhajchasïreengia (Jud. 6). Ka úsïnchi eranhaskani na enga xáni no sési pʼikuarherapka engaksï israelitecha, imeeri iretani enga ima xáni xéncheenga, mémindu no kurhajcheenga (arhinta je Salmo 78:40, 41). Enga nema engajtsï kánikua xénchajka jurajkujka Tata Diosï Jeobani, uaakajtsï seguru jarhani eska juchaari Taati auandarhu anapu engajtsïni xáni xénchajka, ístu no sési pʼikuarherasïnga. Ima sési kurhangusïndi na engajtsï no sési pʼikuarherani jaka, pʼamojkuatiksïni, uinhaperantaatiksïni ka nóksïni méni jurajkuati.
3 Ini jorhenguarhikua jimbo, exeakachi ambechi jatsiski para úni parajtsïni Tata Diosï Jeoba jarhuatani jiáni enga petanhantaaka nema engachi kánikua uékajka. Ístuchi exeaka nénachi uaa jarhuataani kúnguarhikuarhu anapu erachichani engaksï ini ambe nitamakuarhini jaka. Peru ju je orheta exeni ma ambe engachi no méni jatsika para eratseni.
ASÏ KULPARIKUARHI JE
4. ¿Nénaksï pʼikuarherasïni uánikua taaticha enga ma imeeri sapi jurajkujka Tata Diosï Jeobani?
4 Enga sapi ma jurajkujka Tata Diosï Jeobani, uánikua taatichaksï kurhamarhikuarhisïndi ambeksï no úski sési úni parakaksï imeeri sapiicha seguiripiringa marhuakuni Tata Diosï Jeobani. Erachi ma enga arhinhajka Luke, uandaspti eska i ambe eratsesïrenga ísï tátsekua engaksï na petantapka imeeri sapini kúnguarhikuarhu uératini: “Eratsesïreenga eskani ji kulpa jatsispka. Chúrikuechani no sési tsánharhisïreenga. Ménisï uerasïreenga ka kánikua no sési pʼikuarhinhesïreenga”. Pirenchi ma enga arhinhajka Elizabeth enga májkueni nitamakuarhipka, uandasïndi eska méntkisï eratsesïreenga : “¿Ambe no úski sési úni juchiiti sapi jingoni? Ísï pʼikuarherasïreenga eskani ji no káni jánguarhintaspka parani jarhuatani juchiiti sapini para ima no jurajkuni Tata Diosï Jeobani”.
5. Enga nema jurajkujka Tata Diosï Jeobani, ¿né kulpa jatsiski?
5 Nóchi jatsiska para mirikurhini eskajtsïni Tata Diosï Jeoba sésikua íntskuska iáminduechani parachi erakukuarhini ambe úni. Ísï jimbo, ma úsïndi erakuni marhuakuni Tata Diosï Jeobani o nómbe. Máru tumbiichaksï no méni jatsiaspti taaticha engaksï jorhendapiringa Biblieri ambe, peruksï erakuska Tata Diosï Jeobani marhuakuni ka nóksï méni jurajkuxati. Máteruechaksï jatsiaspti taatichani engaksï jánguarhintapka desde sapichu uératini jorhendaani Biblieri ambe, joperu engaksï kʼépkia, jurajkusptiksï Tata Diosï Jeobani. Ísï jimbo, mándani jatsisti para erakuni marhuakuni Tata Diosï Jeobani o nómbe (Jos. 24:15). Ísï jimbo, taaticha, enga chaari sapi ma jurajkuaka Tata Diosï Jeobani, asï jáma je uandani eskajtsï chá kulpa jatsiska.
6. ¿Nénaksï pʼikuarherasïni tumbiicha enga ma imeecheri taati jurajkujka Tata Diosïni?
6 Ménisï, jindeesïndi taati o naandi enga jurajkujka Tata Diosï Jeobani ka asta niárani jurajkuni familiani (Sal. 27:10). I ambe kánikua no sési pʼikuastaasïndi sapiichani engaksï ísï exeajka imeeri taatichani komueska ejemplu ma. Esther uandasïndi na enga pʼikuarherapka engaksï petantapka kúnguarhikuarhu uératini imeeri taatini: “Someni uerasïreenga jimboka kuenta íntskukuarhespka eska juchiiti taati no sánhani arispka jurajkuni Tata Diosï Jeobani, sino eska meru eratsespka jurajkuni. Kánikua uékasïnga juchiiti taatini. Ísï jimbo, engaksï petantapka, someni uandanhiani jarhasïrenga sési jarhaspi o nómbe. Ménisï niárasïreenga jamberi kánikua chéni”.
7. ¿Néna pʼikuarherasïni Tata Diosï Jeoba imani tumbiicha jimbo enga ma imeeri taati petanhantajka kúnguarhikuarhu?
7 Tumbiicha, enga chaari taati o chaari naandi petanhantaaka kúnguarhikuarhu, míteskachi na engajtsï no sési pʼikuarherani jaka. Ka seguru ja je eska Tata Diosï Jeobajtu exexaka na engajtsï no sési pʼikuarherajka. Imaksïni xénchasïndi ka sési pʼikuarherasïndi engajtsï chá seguirini jaka marhuakuni. Ka juchajtu, chaari erachicha, májkuenchi pʼikuarherasïnga. Miá je eskajtsï no chá kulpa jatsiska imani ambe jimbo engaksï chaari taaticha úka. Eskachi na exekia, Tata Diosï Jeobajtsïni sésikua íntskusti parachi erakukuarhini ambe engachi jatsika para úni. Ka mándani imeeri marhuari enga aiakukuarhekia ka itsï atakuarhini, jandiajku ‘pendienti jatsikuarheati para imeeri ambe jimbo’ (Gal. 6:5).
8. ¿Ambeksï uaa úni imeecha engaksï sési marhuakuni jaka Tata Diosïni engaksï jamberi erokuarhiaka eska imeecheri familiari kʼuanhatsentaaka Jeoba jingoni? (Ístu exe je rekuadruni “ Tata Diosï Jeoba uékasïndi eskajtsï kʼuanhatsentaaka imani jingoni”).
8 Enga nema engajtsï kánikua uékajka jurajkujka Tata Diosï Jeobani, normalisti eskajtsï erokuarhini jauaka eska ma jurhiani kʼuanhatsentaaka ima jingoni. Peru, ¿ambejtsï uaa enga jamberi i ambe úkuarhiaka? Seguiri je uinhaperantani chaari pájperakua Tata Diosï Jeoba jingoni. Ísï, uaakajtsï ambakiti ejemplu máeni para máteru familiarhu anapuecha ka asta para ima enga petanhantaka kúnguarhikuarhu. Ístu, i ambeksïni uinhapikua íntskuati parakajtsï no xáni kómu pʼikuarheraaka. Ju je exeni máru ambe engajtsï uaaka úni parajtsï seguirini jarhani ambakiti pájperakua ma jatsini Tata Diosï Jeoba jingoni.
AMBEKSÏNI JARHUATAA PARAJTSÏ SÁNDERU MINTSINHARHINI TATA DIOSÏNI
9. ¿Ambeksïni jarhuataa parajtsï sánderu mintsinharhini Tata Diosïni? (Exe je rekuadruni “ Karakatecha engaksïni uinhaperantaaka enga nema enga chá kánikua uékajka jurajkuka Jeobani”).
9 Jánguarhinta je imani ambe úni engaksïni jarhuataaka parajtsï sánderu mintsikani Tata Diosïni. Kánikua jukaparhakuesti eskajtsï seguiriuaka uinhaperantani chaari pájperakua Tata Diosï Jeoba jingoni ka chaari familia jingoni. ¿Nénajtsï uaa i ambe úni? Ma ambe engaksïni jarhuataaka parajtsï sánderu mintsinharhini Tata Diosïni, jindeesti pauani pauani arhintani Bibliani ka eratsentani ambe enga ima uandajka, ístu no kueratani tánguarhikuechani. Ju je eratsentani Joannaeri ejempluni. Imeeri taati ka imeeri jingonikua jémba, jurajkusptiksï Tata Diosï Jeobani, ima uandasïndi: “Engani arhintajka máru kʼuiripuecheri enga Biblia uandajka komueska Abigaíli, Esteri, Jobu, José ka Jesúsi, sési pʼikuarherasïnga. Ambe engaksï ima úka, úsïndi eska juchiiti mintsita ka juchiiti eratsekua ambakiti ambe eratseni jauaka ka nóteruni xáni no sési pʼikuarherasïngia. Juchaari pirekuecha engaksï JW Broadcasting jimbo jaka, ístujtsïni kánikua uinhaperantasïndi”.
10. Eska na uandajka Salmo 32: 6-8, ¿ambechi uaa úni engachi kánikua no sési pʼikuarherani jauaka?
10 Mintsitarhu uératini aiangukuarhi je Tata Diosï Jeobani. Engajtsï no sési pʼikuarherani jauaka, kómarhi je. Kurhaku je eskaksïni jarhuataaka ísï exeni ambe ma eska ima na exejka, eskaksïni jánhaskakua íntskuaka ka eskaksïni arhiaka ambe úni (arhinta je Salmo 32:6-8). Jamberi kánikuajtsï no sési pʼikuarheraaka engajtsï aiangukuarhini jauaka, peru Tata Diosï Jeobaksïni sési kurhanguchesïndi. Imaksïni kánikua xénchasïndi ka pʼímarhisïndiksïni parajtsï imani jingoni uénhekuarhini (Éx. 34:6; Sal. 62:7, 8).
11. Eska na uandajka Ebreu 12:11, ¿andichisï jatsi para mintsikani eska enga Jeoba jurhimberantajka nemani, jindeeska uékperakua jimbo? (Exe ístu rekuadruni “ Enga nema petanhantajka kúnguarhikuarhu jindeesti jimbokajtsïni Tata Diosï Jeoba xénchasïnga”).
11 Jiókuarhi je ambe engaksï orhejtsïkuticha úka. Enga nema petanhantajka kúnguarhikuarhu, jindeesti ambe ma enga Tata Diosï Jeoba uékperakua jimbo uaxastaka ka enga sési úkuajka iáminduechani, asta imani jamberi enga no sési úka (arhinta je Ebreu 12:11). Jamberi nema úpirindi uandani eskaksï orhejtsïkuticha no sési úska engaksï ísï petantaka imani, peru miá je eskaksï orhejtsïkuticha no méni uandantaaka no sési jásï ambe enga ima úka, ka ístu jucha no iámindu ambe míteska. Ísï jimbo, méntkisï sánderu sésisti mintsikani eskaksï orhejtsïkuticha engaksï komite judisialirhu japka, úskaksï ambe enga Bibliarhu uandajka ka eskaksï míteska eskaksï jusgarixaka para Tata Diosï Jeoba (2 Crón. 19:6).
12. ¿Ambe úkuarhisïni engaksï máru jiókuarhijka na enga Tata Diosï Jeoba jurhimberantajka nemani?
12 Engajtsï jiókuarhiska engaksï orhejtsïkuticha erakuka petantani chaari familiarini, i ambe jarhuataati paraka ima kʼuanhatsentaaka ménderu. Elizabeth engachi párrafu 4 jimbo uandaka, uandasïndi: “Kánikua úkua exespka nóteruni uandajpania juchiiti sapini enga kʼéripkia. Peru enga ima kʼuanhatsentapka Tata Diosï Jeoba jingoni, uandaspti eska sési jarhaspka engaksï petantaka. Ka sánisï tátsekuarini arhispti eska uánikua ambe jorhenguarhispka. I amberini jarhuataspti para sánderuni jukaparharani enga Tata Diosï Jeoba jurhimberantajka nemani”. Mark, imeeri acheeti, uandasïndi: “Máru uéxurhini tátsekua, juchiiti sapirini aianguspti eska kʼuanhatsentaspka Jeoba jingoni jimbokachi jucha úspka ambe engachi jatsipka para úni. Diosmaiamukua arhisïnga Tata Diosï Jeobani engajtsïni jarhuatapka parachi jiókuarhini ambe engaksï orhejtsïkuticha úpka”.
13. ¿Ambeksïni uaa jarhuatani parajtsï no xáni no sési pʼikuarherani?
13 Uandontskuarhi je chaari amiguecha jingoni engaksïni kurhanguchiaka. Imani erachicha jingoni kúnguarhi je engaksï ióni páni jakaia marhuakuni Tata Diosï Jeobani ka engaksïni jarhuataaka parajtsï ambakiti ambe eratseni (Prov. 12:25; 17:17). Joanna engachi párrafu 9 jimbo uandapka, uandasïndi: “Kánikuani jandiajku pʼikuarherasïreenga. Peru kánikuarini jarhuatasti uandontskuarheni juchiiti amiguechani jingoni engani mintsinharhiaka”. Joperu, ¿ambejtsï uaa úni engaksïni erachi ma arhiska ambe ma engaksïni sánderu no sési pʼikuastaaka?
14. ¿Andichisï jatsi para seguirini jarhani tekaatsperantani ka puátsperantani?
14 Tekaakuanta je erachichani. Nóchi uaaka erokuarhini eskaksï erachicha méntkisï uandaaka ambe engachi meru uétarhinchajka (Sant. 3:2). Iáminduchi imperfektueska, ísï jimbo, nóchi ísku pakaraaka enga ménisï erachi ma no míteaka ambejtsïni arhia o engajtsïni no sési pʼikuastaaka no uékaparini. Miá je ambe enga uandapka apostoli Pablu: “Ka tekaatsperanta je ka puátsperantani enga nema jatsika arhijperakua máteruni jingoni” (Kol. 3:13). Pirenchi ma enga jatsika familiarini ma enga petanhantaka kúnguarhikuarhu, uandasïndi: “Tata Diosï Jeobareni jarhuatasti parani úni tekaakuantani erachichani engajtsïni uékeenga ambakiti ambe arhini, peru enga imeecheri imperfeksioni jimbo úpka eskajtsïni sánderu no sési pʼikuastapiringa”. Iásï ju je exeni ambe enga uaaka úni kúnguarhikua para jarhuataani imani erachichani engaksï jatsika nemani enga petanhantaka kúnguarhikuarhu.
KÚNGUARHIKUA UAATI JARHUAJPENI
15. ¿Nénachi uaa jarhuataani imeeri familiani enga no káni iónika enga petanhantaka?
15 Ju je sési ka uékperakua jingoni kaani imeeri familiani enga petanhantaka kúnguarhikuarhu. Pirenchi ma enga Míriam arhinhajka uandasïndi eska chésïreenga nirani tánguarhikuecharhu ísï tátsekua enga imeeri ermanu jémba petanhantapka. Uandasïndi: “Chésïreenga ambe engaksï máteruecha uandapiringa. Peruksï jarhaspti amiguecha engaksï ístu kómu pʼikuarherani japka, joperu engaksï no no sési ambe uandeenga juchiiti ermanueri ambe. Ini amiguecha jimbo, no jandiajkuni pʼikuarherasïrenga”. Máteru pirenchi uandasïndi: “Engaksï petantapka juchiiti sapini, uánikua erachicha engajtsïni xéncheenga jurhasptijtsïni sési pʼikuastantani. Máruksï uandasïreendi eskaksï no mítesïreenga ambe uandani. Jíndeni jingonksï ueraspti ojtsïni karachesïreendi ambe ma. I amberi kánikua jarhuataspti”.
16. ¿Néna uaa kúnguarhikua seguirini uinhaperantaani imeeri familiani enga petanhantaka kúnguarhikuarhu?
16 Ju je seguirini uinhaperantaani imeeri familiani enga petanhantaka kúnguarhikuarhu. Imeechaksï iásïsï uétarhinchajti eskachi xarhatakuaka eskachi xénchaasïnga ka eskachi uinhaperantauaka (Ebr. 10:24, 25). Ménisï, imeechaksï exesïndi eskaksï máru erachicha nóteru uandajpaasïngia enajkiksï imeechajtu petanhanta. Ju je no méni úni ini ambe. Tumbiicha engaksï jatsikuarheaka taatichani engaksï petanhantaka kúnguarhikuarhu, sánderuksï uétarhinchasïndi eskachi uinhaperantauaka ka eskachi felisitariuauaka. Pirenchi ma enga María arhinhajka, uandantasïndi ambe enga nitamakuarhipka enga imeeri uámba petanhantapka kúnguarhikuarhu ka enga jurajkupka imeeri familiani: “Máru juchaari amiguechaksï jurhaspti juchiniu ka úmachintasptijtsïni ambe ma ka jarhuatasptijtsïni familieri jorhenguarhikua jingoni. Kurhangusptiksï na engani no sési pʼikuarherani japka ka uerasptiksï jíndeni jingoni. Ka ístujtsïni kuájpispti engaksï máru kʼuiripuecha chkuanderakua ambe uandani japka juchiiti ambe. Kánikuajtsïni uinhaperantaspti” (Rom. 12:13, 15).
Kúnguarhikua uaati uékperakua jingoni apoiarini imeeri familiani enga petanhantaka. (Exe je párrafu 17). *
17. ¿Ambeksï uaa úni orhejtsïkuticha paraksï sési pʼikuastantaani imeechani engaksï kómu nitamakuarhini jaka?
17 Orhejtsïkuticha, jánguarhinta je uinhaperantaani imeeri familiani enga petanhantaka kúnguarhikuarhu. Chájtsï sánderu jatsiska responsabilidadi parajtsï uinhaperantaani imani erachichani engaksï jatsikuarheka nemani enga jurajkuka Tata Diosï Jeobani (1 Tes. 5:14). Chá ueena je andarhieraani ka uandontskuarhekua je ante de ueenani tánguarhikua ka enga na kʼamaraakia. Pʼorhembia je ka kómarhijpikuani. Ístujtsï uaaka uérani aianhpini imeecha jingoni o ménichanisï pʼímarhiani chaari familieri jorhenguarhikuarhu. Orhejtsïkutichaksï jatsisti para pʼamojperakua xarhatakuani ka uékperakua imani erachichani engaksï no sési pʼikuarherani jaka (1 Tes. 2:7, 8).
ASÏ KUATANTA JE EROKUARHINI KA MINTSINHARHINI TATA DIOSÏ JEOBANI
18. Eska na uandajka 2 Pedru 3:9, ¿ambe uékasïni Tata Diosï Jeoba eskaksï uaaka imeecha engaksï nóteru marhuakuani jakaia?
18 Tata Diosï Jeoba no uékasïndi eska nema “tsïncheaka sino eska iáminduecha andajkuarhiaka móantani” (arhinta je 2 Pedru 3:9). Nájkiruka kʼuiripu ma kʼéri pekadu ma uaaka, imeeri tsípikua útasï kánikua jukaparhakuesti para Tata Diosï. Ju je miáni eska Tata Diosï kánikua maiampiska mándani arhini juchantsïni jimbo: Imeeri Uájpeeri tsípikua jingoni enga ima xáni xénchajka. Tata Diosï uékperakua jingoni uékasïndi jarhuataani imeechani engaksï jarharika paraksï kʼuanhatsentani. Ka erokuarhisïndi eskaksï ísï uaaka, ísï eskachi na jorhenguarhijka ejemplurhu enga Jesúsi uandantapka sapiiri enga tsïnchepka (Luk. 15:11-32). Uánikuecha engaksï jurajkupka jurhimbikuani, kʼuanhatsentastiksï imeecheri Taati auandarhu anapu jingoni enga xáni xénchpetiika ka kúnguarhikua uékperakua jingoni eroantaasti. Elizabeth, engachi máteru párrafu jimbo uandakia, uandantasïndi na enga xáni sési pʼikuarherapka enga imeeri sapi kʼuanhatsentapka kúnguarhikuarhu. Pirenchi uandasïndi: “Kánikua diosmaiamukua arhiasïnga iámindu imeechani engajtsïni jarhuatapka parachi no kuatantani”.
19. ¿Andichisï uaa seguirini mintsikani Tata Diosï Jeobani?
19 Méntkisïchi uaaka mintsikani Tata Diosï Jeobani. Imajtsïni no méni kurhacheati ambe ma engajtsïni no sési úchiaka. Taati máesti enga pʼamojpitiika ka enga jingontku jarhajka para jarhuataani imeechani engaksï xénchajka ka engaksï imani kómarhijka. Uaakachi seguru jarhani eskajtsïni Tata Diosï Jeoba no méni jurajkuaka jiáni engachi no sési ambe nitamakuarhini jauaka (Ebr. 13:5, 6). Mark, engachi párrafu 12 jimbo uandaka, uandasïndi: “Tata Diosï Jeobajtsïni no méni jurajkuspti. Ima méntkisï juchantsïni jingoni jarhasïndi jiáni engachi no sési nitamakuarhini jarhajka”. Tata Diosïjtsïni seguiriuati íntskuni “uinhapikua enga xáni kʼéri ambeeka” (2 Kor. 4:7). Ísïisti, uaakachi seguirini mintsikani Tata Diosïni ka nóchi kuatantani asta jiáni jamberi enga nema engachi xénchajka jurajkuaka Tata Diosï Jeobani.
PIREKUA 44 Kómarhikua ma
^ párr. 5 ¡Xáni enga no sési pʼikuarherakuarhijka enga nema engachi xénchajka jurajkujka Tata Diosï Jeobani! Ini jorhenguarhikua jimbo, exeakachi na enga pʼikuarherajka Tata Diosï enga i ambe úkuarhijka. Ístuchi exeaka ambe uaa jarhuataani imeechani engaksï sési marhuakuni jaka Tata Diosï Jeobani paraksï no xáni no sési pʼikuarherani ka paraksï seguirini sési marhuakuni. Ka últimu, exeakachi na enga uaaka jarhuajpeni kúnguarhikua para sési pʼikuastantani ka apoiarini imani familiani enga jatsika nemani enga petanhantaka kúnguarhikuarhu.
^ párr. 1 Ini jorhenguarhikua jimbo, mójtakurhistiksï máru nombricha.
^ párr. 79 AMBE ENGAKSÏ XARHATAJKA IMAJENICHA: Enga erachi ma jurajkujka imeeri familiani ka Tata Diosï Jeobani, témba ka imeeri sapiichaksï kánikua no sési pʼikuarherasïndi.
^ párr. 81 AMBE ENGAKSÏ XARHATAJKA IMAJENICHA: Tsimani orhejtsïkutichaksï pʼorhembixati familiani ma paraksï uinhaperantani ka paraksï seguirini mintsikani Tata Diosïni.
