1. ¿Ambe sési jaua eskachi uaaka engachi na jatiripani jauakia?

 ENGACHI jatiripani jarhajkia, úpiringachi chénisï pʼikuarherani engachi eratsejka eskachi nóteru uaakia xáni marhuakuni Tata Diosï Jeobani. Ísïisti eskachi nóteru xáni uinhapikua jatsisïngia, joperuchi uaaka úrani juchaari jánhaskakuani ka ambe engachi xáni jorhenguarhikia, para jarhuataani tumbiichani paraksï sánderu jarhuajpeni Tata Diosïri kúnguarhikuarhu ka paraksï intsïnhaani mámaru járhati ánchikuarhitechani. Eska na uandaka erachi ma enga ióni páni jakaia orhejtsïkutini: “Engani ueenapkia nóteruni xáni ambe únia jimbokani jatiriispkia, diosmaiamukua íntskuntaspka Tata Diosïni, jimbokaksï jarhaspka erachicha engaksï sánderu sapichku japka ka engaksï jorhendakata japka paraksï úni ánchikuarhitani”.

2. ¿Ambechi exea ini jorhenguarhikua jimbo?

² Máteru jorhenguarhikua jimbochi exeska eska kánikua marhuakuasïnga tumbiichani, amigu úkuarhini imeecheri engaksï jatiriikia. Ini jorhenguarhikua jimbochi exeni jauaka, eska enga ma kaxumbitijka ka míteni asta nani jamberi uaa úni ambe ma, enga agradesiduejka ka intsïmpitiini, eska i ambe jarhuatasïnga imeechani engaksï jatiriikia paraksï májku kʼéri ánchikuarhini tumbiicha jingoni ka i ambe kánikua marhuakusïndi kúnguarhikuani.

3. a) Eska na arhijka Filipusʌ 2:3, 4, ¿ambe arhikuekasïni kaxumbitini? b) ¿Néna jarhuatasïni kaxumbikua kristianuni ma?

³ Engaksï jatiriicha uéjka jarhuataani tumbiichani, jatsistiksï para kaxumbitini. Ima enga kaxumbitijka, eratsesïndi eskaksï máteruecha sánderu kʼéri ambeeska eska ima (arhinta je Filipusʌ 2:3, 4). Imeecha engaksï jatiriikia ka kaxumbitini, mítestiksï  eska uaaka mámaru úkuarhini ambe ma enga terukuntajka Biblia jingoni ka enga sési jauaka. Ísï jimbo, nóksï erokuarhisïndi eskaksï máteruecha ísï uaaka ambe ma eskaksï imeecha na ueenga (Ecl. 7:10). Nájkirukaksï uánikua ambe míteka engaksï úpiringa máteruechani jorhendaani, mítestiksï eska iámindu parhakpini anapu ambe engachi iásï exeni jaka, mójtakukuarhipaxaka ka eska jamberi uétarhiaka eskaksï ísï uaaka ambe ma eska na úkuarhini jaka iásï (1 Kor. 7:31).

4. ¿Nénaksï xarhatasïni sirkuitueri orhejtsïkuticha eskaksï májkueni jámasïnga eska lebitecha?

⁴ Erachicha engaksï jatiriikia ka kaxumbitinksï, kurhangusïndiksï eskaksï nóteru úsïngia xáni ambe úni eska antesi. Pori ejemplu, sirkuitueri orhejtsïkuticha engaksï 70 jatiriijkia, máteru ánchikuarhitaksï intsïnhasïndi. Jamberi para imeecha úkua jukajti jurajkuni, jimbokaksï tsitisïreenga indeni ánchikuarhitani ka ísï marhuakuani erachichani ka nóksï méni mirikurhiati indeni ambe. Joperuksï eratsesïndi eska sánderu sési jarhaska eska nema enga sánderu sapichku jaka, uaakia indeni ánchikuarhitani. Ísïksï úsïndi eska ióntki anapu lebitecha, engaksï nóteru ánchikuarhiengia tabernakurhuru engaksï na 50 jatiriengia. Imeecheri tsípikuarhita no indeni ánchikuarhita jimboesïreendi. Tsípikua jingonksï úsïreendi ambe engaksï xáni úpiringa ka jarhuatasïrendiksï sánderu sapichkuechani (Núm. 8:25, 26). Iásï, nájkirukaksï erachicha engaksï sirkuitueri orhejtsïkutipka, nóteru pʼorhembiajkia uánikua kúnguarhikuechani, kánikuaksï jarhuatasïndi ka uinhaperantani kúnguarhikuani engaksï imeecha marhuajka.

5. ¿Ambeksïni jorhendasïni Daniri ka Katieri ejemplu?

 ⁵ Ju je exeni Daniri ejempluni enga 23 uéxurhini marhuapka komueska sirkuitueri orhejtsïkuti. Enga na 70 jatiripkia, ima ka imeeri témba, Katie, prekursori espesialiksï únhaspti. ¿Néna nikuaxaki? Dani uandasïndi eska kánikua ánchikuarhita jatsiska kúnguarhikuarhu ka para jarhuataani erachichani paraksï orhejtsïkuticheri jarhuajpiricheni ka para jorhendaani erachichani paraksï úni aianhpini kʼérati iretecharhu ka kárselicharhu. Erachicha engajtsï jatiriikia, iasea engajtsï tiempu kompletueri marhuani jaka o nómbe, uaakajtsï kánikua jarhuataani máteruechani. ¿Néna? Engajtsï sési pʼikuarheraska imani ambe jimbo engajtsï jatsika, engajtsï eratseska ambejtsï uaa úni ka engajtsï imani ambe úska engajtsï uaaka.

6. ¿Andisï sési jaki eskachi míteaka asta nani jamberichi uaa úni ambe ma? Uandanta je ejemplu ma.

⁶ Nema enga mítejka asta nani amberi uaa úni ambe ma, no jámasïndi sánderu úni ambe ma ka eska xántku uaaka. Ísï jimbo, niárasïndi sánderu sési pʼikuarherani ka sési ánchikuarhini (Prov. 11:2). Úpiringachi terukutantani nemani jingoni enga juátarhu ma karhamani jarhajka, para úni asta karhakua jamberi niárani jatsisti para sánderu iatsitakuarhu xanharani. Májkueni úsïndi ima kʼuiripu enga mítejka káni jatsisïni para sánderu iatsitakuarhu nirani, para seguirini Jeobani marhuakuani ka jarhuataani máteruechani (Filip. 4:5).

7. ¿Néna xarhataspi Barsilái eska mítespka asta nani jamberi úpirini úni ambe ma?

⁷ Ju je exeni Barsiláiri ejempluni, rei Dabidi pʼímarhispti para imeeri kʼumanchikuarhu marhuani enga Barsilái 80 jatiriipkia. Barsilái no jiókuarhispti jimboka mítespka asta nani jamberi úpirini úni ambe ma. Exespti eska jatirispkia ka eska uánikua ambe nóteru úpiringia úni, jimbosï arhipti eska sánderu sési japiringa enga Kimami nipiringa imeeri kuenta jimbo, achamasï ma enga sapichku japka (2 Sam. 19:35-37). Májkueni eska Barsilái, erachicha engaksï jatiriikia, tsípisïndiksï engaksï jurajkukuajka sánderu sapichkuechani máru ánchikuarhitechani.

8. ¿Néna xarhataspi rei Dabidi eska mítespka asta nani jamberi úpirini úni ambe ma jiáni enga templuni uékeenga úni?

⁸ Rei Dabidijtu mítespti asta nani jamberi úpirini úni ambe ma. Iámu imeeri mintsika jingoni uékasïreendi úkuni Tata Diosï Jeobani kʼumanchikua ma. Joperu enga Tata Diosï Jeoba uandapka eska Salomónisï úkupiringa, Dabidi sési exespti ka ústi ambe enga xáni uétarhipiringa paraka úkuarhipiringa inde ánchikuarhita (1 Crón. 17:4; 22:5). No uandaspti eska imasï jatsipka para úni jimboka Salomóni sapichku jarhaspka ka eska no xáni ambe mítespka (1 Crón. 29:1). Dabidi mítespti eska ánchikuarhita sési uérapiringa enga Jeoba újchakurapiringa ka no na engaksï xáni jatiripiringa o na engaksï xáni mítekupiringa imeecha engaksï úpiringa. Májkueni eska Dabidi, erachicha engaksï jatiriikia seguirixatiksï kánikua ánchikuarhini, nájkirukaksï iásï máteru ambe újkia kúnguarhikuarhu. Ka mítestiksï eska Tata Diosï Jeoba újchakurauaka imeechani engaksï sánderu sapichku jaka ka engaksï iásï imeecheri ánchikuarhitechani uaajkia.

9. ¿Néna xarhataspi erachi ma enga Grupurhu jaka enga Betelini ma Orhejtsïkujka eska mítespka asta nani jamberi úpirini úni ambe ma?

⁹ Iásï anapu ejemplu ma enga mítepka asta nani enga jamberi úpiringa úni ambe ma, jindeesti erachi Shigeo. Uéxurhini 1976 jimbo, enga ima 30 jatiripka erakunhaspti paraka Grupurhu ma japiringa enga Betelini ma Orhejtsïkujka. Uéxurhini 2004 jimbo, niáraspti ima orhejtsïkuni indeni Grupuni. Joperu ísï tátsekua, exespti eska nóteru xáni uinhapikua jatsispkia  ka eska nóteru xáni sóntku úsïrengia imeeri ánchikuarhitani. Ísï jimbosï uandontskuarhepti Tata Diosï Jeobani jingoni indeeri ambe ka eratsespti eska sánderu sési japiringa eska nema enga sánderu sapichku japka úpiringa imeeri ánchikuarhitani. Iásï nóteru orhejtsïkusïndia indeni Grupuni nájkiruka seguirini jaka jima marhuani. Barsiláiri ejemplu, rei Dabidiri ka Shigeoeri, jorhendasïndijtsïni eska kʼuiripu ma enga kaxumbitijka ka enga mítejka asta nani jamberi uaa úni ambe ma, nóksï exesïndi ambe engaksï no újka sési úni tumbiicha, sino ambe engaksï újka sési úni. Ísïksï exeasïndi eska imeecheri kompanieruecha ka no eska nema enga euauaka imeecheri ánchikuarhitani (Prov. 20:29).

10. ¿Erachicha engaksï jatiriikia nénaksï jatsiski para exeani erachichani engaksï sánderu sapichku jaka?

¹⁰ Erachicha engaksï jatiriikia ísïksï exeasïndi sánderu sapichkuechani, komueska Tata Diosï Jeobaeri regalu ma ka kánikuaksï agradesidu pʼikuarherasïndi imani ambe jimbo engaksï újka. Jimbokaksï sánhani arhisïnga nóteru xáni uinhapinia, jukaparharasïndiksï enga tumbiicha engaksï uinhapiti jaka, uéjka ka újka imani ánchikuarhita ambe enga kúnguarhikuarhu uétarhijka.

11. ¿Néna xarhatasïni Rut 4:13-16 eska kánikua marhuakuasïnga imeechani engaksï jatiriikia engaksï jiókuarhijka sánderu sapichkuecheri jarhuajperata?

¹¹ Noemí enga Biblia uandajka ambakiti ejemplu máesti, jimboka agradesidespka ka jiókuarhispti eska sánderu sapichku ma jarhuatapiringa. Enga na uarhipkia Noemíri uájpa, ima arhispti Rutini eska kʼuanhatsentapiringa imeeri familia jingoni. Joperu enga Ruti méntku úndapka arhini eska imani jingoni nipiringa asta Beléni jamberi, Noemí jurajkuspti eska ísï úpiringa (Rut 1:7, 8, 18). Ka inde ambe kʼéri kóntperata máespti para tsimarhani (arhinta je Rut 4:13-16). Erachicha engaksï jatiriikia ka kaxumbitini májkuenksï úsïndi eska Noemí.

12. ¿Néna xarhataspi apostoli Pablu eska agradesiduespka?

 ¹² Ístu, apostoli Pablu kánikua agradeserispti engaksï máteruecha jarhuatapka. Ma xanhari, diosmaiamukua arhiaspti Filipusï anapu kristianuechani imani ambe jimbo engaksï axakupka (Filip. 4:16). Ístu, uandaspti na enga xáni jukaparharapka ambe enga xáni úpka Timoteu imani jimbo (Filip. 2:19-22). Ka agradeserikuspti Tata Diosïni engaksï erachicha nípka uinhaperantani engaksï ónhakata páni japka Roma (Uku. 28:15). Pablu no sáni kuatarasïreendi, iauanisï nirasïreendi aianhpini ka jarhuataani kúnguarhikuechani. Joperu kaxumbitispti ka jurajkuspti eskaksï erachicha jarhuatapiringa.

13. Erachicha engaksï jatiriikia, ¿nénaksï uaa agradeserini imani ambe jimbo engaksï újka sánderu sapichkuecha?

¹³ Erachicha engajtsï jatiriikia, uánikua ambe jarhasti engajtsï uaaka úni parajtsï xarhatani eskajtsï jukaparharasïnga ambe engaksï tumbiicha újka kúnguarhikuarhu. Engaksï aiakukuarheaka paraksïni páni nani, parajtsï piántani tʼirekua ambe o ánchperata ambe úni, jiókuarhi je. Ísï exe je eskaksïni Tata Diosï Jeobasï xarhatacheni jaka uékperakua. Jamberijtsï jimini ueenaka sési pájperani indeni erachicha jingoni. Jarhuataa je tumbiichani parakaksï sési pájperakua ma jatsiaka Tata Diosï jingoni. Arhia je eskajtsï tsípisïnga engaksï jaka tumbiicha kúnguarhikuarhu engaksï jánguarhintajka jarhuajpeni. Ka arhuta je tiempu parajtsï imeecha jingoni jarhani ka aiangua je imani ambe engajtsï chá nitamanchaka. Engajtsï ísï úska, diosmaiamukuajtsï íntskuntani jauaka Tata Diosï Jeobani enga ísï andaparhataaka tumbiichani kúnguarhikuarhu (Kol. 3:15; Juanu 6:44; 1 Tes. 5:18).

14. ¿Néna xarhataspi rei Dabidi eska intsïmpitispka?

¹⁴ Rei Dabidi, ambakiti ejemplu máespti máteru ambeeri engaksï erachicha engaksï jatiriikia uaaka úni: intsïmpitiini. Ima kánikua sentabu íntspispti ka ístu máteru ambe enga jukaparhakua ambeepka paraka templu únhapiringa (1 Crón. 22:11-16; 29:3, 4). Ísï úspti nájkiruka imeeri uájpa Salomóni sánderu k’éri ambe arhinhapiringa. Engajtsï chájtu jatiriikia ka nóteru xáni uinhapikua jatsinia, komu para jarhuajpeni konstruksionirhu, uaakajtsï donasioni íntspini na engajtsï xáni uaaka. Ka jorhendaa je imeechani engaksï sánderu sapichku jaka imani ambe engajtsï xáni jorhenguarhikia iásï jamberi.

15. ¿Ambe ka ambe jorhendaspti Pablu, Timoteuni enga jukaparhakua ambeepka?

¹⁵ Apostoli Pablu ístu xarhataspti eska intsïmpitispka. Pʼímarhispti Timoteuni paraka pámbetapiringa iauanisï aianhpini ka jorhendaspti néna ka néna enga úpiringa aianhpini ka jorhentpini (Uku. 16:1-3). Ambe enga Pablu jorhendapka, jarhuataspti paraka imajtu ambakiti jorhentpiri máepiringa ambakiti aianhperakueri (1 Kor. 4:17). Ka Timoteu ístu úraspti ambe enga Pablu jorhendapka para máteruechani jorhendaani.

16. ¿Andisï Shigeo jorhendaapi máteruechani?

¹⁶ Erachicha engaksï jatiriikia, nóksï chésïndi eskaksï ma jurhiani nóteru marhuauakia, jimbokaksï tʼuini jorhendauakia máteru erachichani engaksï sánderu sapichku jaka parakaksï uaaka imani ambe engaksï imeecha ueenga kúnguarhikuarhu. Pori ejemplu Shigeo, engachi párrafu 9 jimbo uandaka, jorhendaaspti máteru erachichani engaksï sánderu sapichku japka engaksï Grupurhu jaka engaksï Betelini ma Orhejtsïkujka. Ísï úspti para jarhuajpeni Reinueri ánchikuarhitarhu imani paisi jimbo enga ima marhuajka. Ísï jimbo, enga niárapkia jurhiatikua enga ima nóteru úpkia orhejtsïkuni indeni Grupuni, jarhasptia erachi ma enga mítepkia néna úni indeni ánchikuarhitani. Shigeo  seguirisïndi jorhendaani máteru erachichani engaksï sánderu sapichku jaka imani ambe enga ima xáni jorhenguarhika 45 uéxurhini jimbo enga Grupurhu japka enga Betelini ma Orhejtsïkujka. Erachicha engaksï ísïika eska Shigeo, meruksï kʼéri kóntperata máesti para Tata Diosïri iretarhu.

17. ¿Ambeksï uaa íntsaani erachicha engaksï jatiriikia máteruechani? (Lukasʌ 6:38).

¹⁷ Erachicha engajtsï jatiriikia, chájtsï úsïnga xarhatani eska enga ma mintsikaparini marhuakujka Tata Diosï Jeobani ka no jurajkuni, eska inde jindeeska sánderu sési jásï ma irekua. Chaari ejemplu xarhatasïndi eska kánikua jukaparhakueska jánguarhintani míteani Bibliarhu anapu karakatechani ka ísï úni eskaksï na uandajka. Chájtsï exeskia néna enga úkuarhienga ióntki ambe ma, joperujtsï ístu exesïnga eska kánikua jukaparhakueska ísï úni ambe ma eska na mójtakurhikia. Ka enga nótki xáni iónika engajtsï itsï atakuarhika, útasterujtsï uaaka kánikua jarhuajpeni, jimbokajtsï uaaka aianguani máteruechani ambe úspi eskajtsï chá tsípini pʼikuarheraaka engajtsï Jeobani míteka iásï engajtsï jatirikia. Ka imeecha engaksï sánderu sapichku jaka, kánikuaksï tsitiaka kurhaani imani ambe engajtsï chá nitamanchaka ka ambe engajtsï jorhenguarhika. Engajtsï pʼindeka íntspini ima ambeeri engajtsï xáni jorhenguarhikia iásï jamberi, Tata Diosï Jeobaksïni kánikua kóndentaati (arhinta je Lukasʌ 6:38).

18. ¿Nénaksï uaa jarhuajperani erachicha engaksï jatiriikia imeecha jingoni engaksï sapichku jaka?

¹⁸ Engaksï jatiriicha andarhierajka sánderu sapichkuechani, úsïndiksï jarhuajperani (Roma 1:12). Mándani arini jatsisti ambe ma enga jukaparhakua ambeeka, enga máteru no jatsika. Kʼératichaksï jatsisti jánhaskakua ka imani ambe engaksï desde iónisï jorhenguarhikia. Ka tumbiichaksï jatsisti uinhapikua. Engaksï tumbiicha ka kʼératicha jarhuajperajka eska amiguecha, kʼéri ambeksï arhisïndi juchaari Taati auandarhu anapuni enga xáni uékpitiika ka kʼéri kóntperataksï máesïndi kúnguarhikuarhu.