1. ¿Na jásïchi pájperakua ma uaa jatsini kʼuiripuecha Tata Diosï Jeoba jingoni?

 TATA Diosï Jeoba jatsikuarhesti k’éri familia ma engaksï imani marhuakujka. Ixú kuenta úkuarhisïndi Jesúsi “enga tʼuini jindeepkia enga nótki ambe kueraakatepka” ka ístu uánikua ánjelicha (Kol. 1:15; Sal. 103:20). Enga Jesúsi Echerirhu jámani japka, xarhatakuaspti imeechani engaksï no méni jurajkupka Tata Diosï Jeobani eskaksï uaaka ísï exeni Tata Diosï, komueska Taati ma. Ma xanhari, enga uandontskuarheni japka imeeri disipuluecha jingoni, uandaspti Tata Diosï Jeobaeri ambe: “Juchiiti Taati ka chaari Taati” (Juanu 20:17). Ístu, engachi aiakujka juchaari tsípikuani Tata Diosï Jeobani ka engachi itsï atakuarhijka, niárasïngachi kʼéri familia ma jingoni úkuarhini, pirenchicheri ka erachicheri engajtsïni kánikua sési kámajka (Markusʌ 10:29, 30).

2. ¿Ambechi exea ini jorhenguarhikua jimbo?

² Máru Tata Diosïri marhuarichaksï úkua exesïndi ísï exeni Tata Diosï Jeobani komueska Taati ma enga xénchpetiika. Máteruechaksï no jánhaskasïndi néna xarhatakuani uékperakua erachichani. Ini jorhenguarhikua jimbo, exeakachi na engajtsïni Jesúsi jarhuatajka parachi ísï exeni Tata Diosï Jeobani komueska nema engajtsïni xénchajka ka eskachi uaaka andarhierani. Ístuchi exeaka, nénachi uaa ísï kaani juchaari erachichani eska Tata Diosï Jeoba na kaajka.

3. ¿Andijtsïnisï sánderu andarhieterajki Tata Diosï Jeobani kómarhikua padrenuestrueri?

³ Jeoba, Taati uékpiti máesti ka Jesúsi uékasïndi eskachi ísï exeaka jucha eska ima na exejka: komueska Taati ma enga uékpitika ka engachi uaaka uandajpani méntkisï engachi jucha uékaaka, no komueska nema enga no uékpijka ka engajtsïni nomasi juramuchini jarhajka. Jesúsi xarhataspti eska Tata Diosï Jeoba uékpitispka enga jorhendaapka imeeri chúxapatichani na engaksï kómarhipiringa, ima ísï ueenaspti kómarhini: “Juchaari Taati” (Mat. 6:9). Jesúsi úpirindi  arhiani imeeri chúxapatichani eskaksï ísï uandajpapiringa Jeobani komueska: “Ima enga iámu ambe Újka Úni”, “Kueraajpiri” o “Enga méntkisï jindeeka Rei”, jimboka sési jarhaska ísï uandajpani ka Bibliarhuksï jarhasti i títuluecha (Gén. 49:25; Is. 40:28; 1 Tim. 1:17). Peru Jesúsi úrasti uandakua “Taati” para xarhatani eska Tata Diosï Jeoba uékpitiska.

4. ¿Andichisï míte eska Tata Diosï Jeoba uékasïnga eskachi jucha andarhieraaka imani?

⁴ ¿Úkua exesïnchi ísï exeni Jeobani eska Taati ma enga uékpitika? Máruchi úkua jukanchasïnga ísï exeni. Jamberi jindeeti jimbokachi no sési kánhaska engachi sapiipka. Peru kánikuajtsïni sési pʼikuastasïndi míteni eska ima míteska na engachi pʼikuarherajka ka eska uékasïnga eskachi jucha andarhieraaka. Jimbojtsïnisï imeeri karakata jimbo pʼímarhijti: “Andarhiera je Tata Diosïni ka imajtuksïni andarhieraati chánksïni” (Sant. 4:8). Tata Diosï Jeobajtsïni xénchasïndi ka arhisïndijtsïni eska ima jindeeska sánderu ambakiti Taati engachi jucha uaaka jatsini.

5. Eska na uandajka Lukasʌ 10:22, ¿andijtsïnisï újki jarhuatani Jesúsi, parachi úni sánderu andarhierani Tata Diosï Jeobani?

⁵ Jesúsijtsïni uaati jarhuatani parachi úni sánderu andarhierani Tata Diosï Jeobani. Ima sési mítesti ka sáno májkueni jásïisti eska ima. Jimbosï uandapti: “Ima engareni exeka jíndeni, exesti Diosï Taatini” (Juanu 14:9). Komueska ermanu ma enga sánderu kʼérika, Jesúsijtsïni jorhendasïndi parachi janhanharhini ka kurhajchani juchaari Taatini ka parachi sési pʼikuastani ka parajtsïni jaiapanhentani. Joperu, sánderu jukaparhakua ambe, ambe enga Jesúsi úpka enga ixú Echerirhu jámani japka, xarhatachesïndijtsïni eska Jeoba kánikua xénchpetiska ka eska sési kámpisïnga (arhinta je Lukasʌ 10:22). Ju je exeni máru ejempluechani engajtsïni xarhatachejka i ambe.

6. ¿Andichisï újki uandani eska Tata Diosï Jeoba jingontku kurhajchaspka Jesúsini?

⁶ Tata Diosï Jeoba kurhajchaasïndi imeeri uájpeechani. Ju je exeni na enga kánikua jingontku kurhajchapka imeeri orheta Uájpani. Seguruchi jarhaska eska kurhajchaspka jiáni enga Jesúsi mémindu kómarhipka enga ixú Echerirhu jámani japka (Luk. 5:16). Kurhajchaspti Jesúsi jiáni enga jukaparhakua ambe úpiringa, komu jimajkani enga imeeri 12 apostolichani erakuapka (Luk. 6:12, 13). Tata Diosï Jeoba ístu kurhajchaspti jiáni enga Jesúsi no sési nitamakuarhini japka. Sánisï antesi de Judasï  traisionarini, kurhakuspti imeeri Taatini, eska jarhuatapiringa imani no sési jásï ambe jingoni enga nitamakuarhipiringa. Peru Tata Diosï Jeoba no nomasi kurhajchaspti imeeri Uájpani enga xáni xénchajka, ístu, ánjelini ma axaspti para uinhaperantani (Luk. 22:41-44).

7. ¿Nénajtsï pʼikuarherasïni chá engajtsï mítejka eska Tata Diosï Jeoba kurhauasïni juchaari kómarhikuecha?

⁷ Iásïjtu, Tata Diosï Jeoba ístu kurhaasïndi engachi kómarhijka ka mókuchintasïndijtsïni jiáni enga ima sési exeaka ka imani ambejtsïni mókuchintasïndi engachi meru uétarhinchajka (Sal. 116:1, 2). India anapu pirenchi ma, meru i ambe nitamakuarhispti. Ima jukari uandanhiasïreendi ka kurhakuspti Tata Diosï Jeobani eska jarhuatapiringa. Ima uandasïndi: “Maiu de 2019 jimbo, programa JW Broadcasting^® uandasïreendi néna uaa ma orhepani uérani enga jukari uandanhiani jauaka ka no sési pʼikuarherani jarhani. Inde ambesïni meru uétarhinchani japka. Ísïrini mókuchiantaspti Tata Diosï Jeoba juchiiti kómarhikuechani”.

8. ¿Tata Diosï Jeoba néna xarhatakuski Jesúsini eska xénchasïreenga?

⁸ Tata Diosï Jeobajtsïni májkueni xarhatachesïndi uékperakua eska na xarhatakupka imeeri Uájpani enga ixú Echerirhu jámani japka (Juanu 5:20). Jarhuataspti paraka Jesúsi no jurajkupiringa imani, paraka sési pʼikuarherapiringa ka paraka jatsikuarhepiringa ambe enga uétarhinchapiringa. Ka méntkisï arhispti na enga xáni xéncheenga ka eska jaiapanhentasïrenga (Mat. 3:16, 17). Jesúsi no méni jandiajku pʼikuarheraspti, mítespti eska imeeri Taati auandarhu anapu enga xáni xéncheenga, méntkisï imani jingoni jarhasïreenga (Juanu 8:16).

9. ¿Ambe ka ambechi jatsiski engajtsïni xarhatachejka eskajtsïni Tata Diosï Jeoba xénchasïnga?

⁹ Májkueni eska Jesúsi, iáminduecha mémindu pʼikuarheraskia eskajtsïni Jeoba xénchasïnga. Ju je eratseni i ambe: Jeoba ústi eskachi andarhierapiringa imani ka intsïkuarhestijtsïni familia ma interu parhakpinirhu enga marhuakuni jaka imani ka engajtsïni xénchajka ka enga újka eskachi jucha tsípikua jingoni irekaaka ka eskachi sési pʼikuarheraaka (Juanu 6:44). Ístujtsïni íntskusïndi ambe engachi jucha uétarhinchajka parachi úni sánderu mintsinharhini imani. Ka jarhuatasïndijtsïni parachi pauani pauani jatsikuarheni ambe engachi uétarhinchajka (Mat. 6:31, 32). Engachi eratsentajka na engajtsïni xáni xénchajka Tata Diosï Jeoba, juchajtuchi sánderu xénchasïnga imani.

10. ¿Nénachi uaa ísï xénchperakua jingoni kaani erachichani eska Tata Diosï Jeoba na kaajka?

¹⁰ Jeoba xénchaasïndi juchaari erachichani. Peru para jucha no méntkisï fásilisïndi arhiani eskachi xénchaasïnga ka xarhatakuani. Ménisï, jindeesïndi jimbokachi no májku nani anapueska o jimbokachi ménderueni tʼarhexeska. Ka iáminduecha ménisï úsïnga ambe ma enga no sési pʼikuastaajka máteruechani o niárani ikiataani. Joperu útasï isï, uaakachi úni eskaksï iámindu juchaari erachicha xénchperaaka, engachi jucha xénchaaska májkueni eska Jeoba na xénchaajka (Efes. 5:1,2; 1 Juanu 4:19). Ju je exeni ambe engajtsïni jorhendajka imeeri ejemplu.

11. ¿Néna xarhataspi Jesúsi eska Tata Diosï Jeoba kánikua pʼamojpisïnga?

¹¹ Tata Diosï Jeoba kánikua pʼamojpisïndi (Luk. 1:78). Nema enga pʼamojpijka uandanhiasïndi imeecha jimbo engaksï kómu nitamakuarhijka ka jánguarhintasïndi exeni néna jarhuataani ka sési pʼikuastani. Ma ambe enga jimbo Jesúsi sési kaapka kʼuiripuechani, jindeespti para xarhatani na enga Tata Diosï Jeoba uandanhienga kʼuiripuecha jimbo (Juanu 5:19). Bibliajtsïni arhisïndi: “enga exeapka xáni uánikua kʼuiripuechani, lastima uaaspti jimbokaksï jandiajku jámaxapka ka etsakuarhitini komueska karichicha engaksï nómbe erangutini jatsijka” (Mat. 9:36). Pʼamojperata enga Jesúsi xarhatakuapka kʼuiripuechani, no jindeespti nomasi pʼikuarhinhekua ma.  Tsinaaspti pʼamenchatichani, jarhuataaspti imeechani engaksï uinhamu ánchikuarhienga ka kuataratinksï jarhani (Mat. 11:28-30; 14:14).

12. ¿Nénachi uaa jucha xarhatani eskachi uandanhiasïnga erachicha jimbo?

¹² Engachi uékaaka xarhatani eskachi uandanhiasïnga juchaari erachicha jimbo ka eskachi pʼamojkuasïnga, jatsiskachi para eratseni ambe engaksï nitamakuarhini jaka. Pori ejemplu, jamberi pirenchi ma uinhamu pʼamenchani jati peru no uandantani. Jamberi uétarhini jati eska nema jarhuataaka. ¿Úpirinchi jucha jarhuatani paraka imeeri familia jatsikuarheaka ambe enga uétarhinchani jaka? ¿Úpirinchi jarhuatani úmantani o kʼumanchikua limpiarikuni? O ju je eratseni eska erachi ma no jatsiska ánchikuarhita, ¿úpirinchi íntskuni sáni sentabu, nájkiruka no mítekuarhiaka, para jarhuatakuarhini asta jiáni enga jatsiaka ménderu ánchikuarhita?

13, 14. ¿Nénachi uaa májkueni intsïmpitini eska Tata Diosï Jeoba?

¹³ Tata Diosï Jeoba kánikua intsïmpitiisti (Mat. 5:45). Engachi jucha uéjka pʼamojpitiini, nóchi jatsiaka para erokuarhini eskajtsïni juchaari erachicha kurhacheaka jarhuajperata. Uaakachi jucha ueenani jarhuatani, ísï eska Tata Diosï Jeoba na újka. Ima pauani pauani úsïndi eska jurhiata uéraaka ka no erokuarhisïndi eskachi jucha kurhakuaka eska uaaka i ambe, ka jurhiateeri tsándu iáminduechani jarhuataasïndi, no nomasi imeechani engaksï diosmaiamukua arhijka. ¿A no eskajtsïni Tata Diosï Jeoba xarhatachesïnga eskajtsïni xénchasïnga engajtsïni íntskujka ambe engachi uétarhinchajka? ¡Xáni enga sési kámpijka ka intsïmpitini, ka xáni engachi xénchajka jucha indeni ambe jimbo!

¹⁴ Uánikua juchaari erachichaksï májkueni úsïndi eska juchaari Taati auandarhu anapu ka imaksï ueenasïndi jarhuajpeni ka intsïmpitini. Ju je exeni ambe enga úkuarhipka 2013 jimbo, enga akuitsi janikua enga arhinhajka Haiyan, kʼamajkupka ma parti Filipinas. Uánikua erachichaksï tsïtaspti imeecheri kʼumanchikuechani ka iámu ambe engaksï jatsikuarhepka. Peru interu parhakpini anapu erachichaksï sóntku niraspti jarhuataani. Íntspisptiksï sentabu ka jarhuajpesptiksï, ka ini ambe jimbo úspti kánikua ambe úkuarhini, jimboka úspka eskaksï uaantapiringa sáno 750 kʼumanchikuechani, no jamberi ma uéxurhini jimbo. Ka pʼamenchakua COVID-19 jimbo, Jeobaeri testiguechaksï jánguarhintaspti para íntskuani imeeri erachichani ambe engaksï uétarhincheenga. Engachi listu jarhajka para jarhuataani erachichani, xarhatakuasïngachi eskachi xénchaasïnga.

15, 16. Eska na uandajka Colosenses 3:13, TNM, ¿ambechi jatsiski para úni engachi uékaaka májkuenini eska juchaari Taati auandarhu anapu?

 ¹⁵ Tata Diosï Jeoba tekaatspentasïndi (arhinta je Colosenses 3:13, TNM). Juchaari Taati auandarhu anapu, pauani pauantsïni puáchiantasïndi pekaduechani (Sal. 103:10-14). Májkueni, nájkiruka Jesúsiri chúxapaticha imperfektuepka, ima méntkisï tekaakuantasti. Niáraspti jamberi íntspini imeeri tsípikuani parachi jucha úni puáminhantani juchaari pekaduechani (1 Juanu 2:1, 2). ¿A no eska exeni eska Tata Diosï Jeoba ka Jesúsi tekaatspentasïnga úsïnga eskachi sánderu andarhierauaka?

¹⁶ Engachi tekaatspintajka, sánderuchi sési pájperasïnga juchaari erachicha jingoni (Efes. 4:32). Jo ísïisti, ménisï úkua jukasti úni tekaakuantani máteruechani, peruchi jatsiska para jánguarhintani ísï úni. Pirenchi ma uandasïndi na enga jarhuatapka jorhenguarhikua ma rebisteri La Atalaya enga arhinhajka “Perdónense liberalmente unos a otros”. * Ima ini ambe karasti: “I jorhenguarhikuarini jarhuatasti kurhanguni na engareni sési úchijka tekaakuantani máteruechani. Uandasïreendi eska tekaakuantani máteruechani no arhikuekasïnga eskachi jiókuarhixaka ima no sési ambe enga úka o eskachi no xáni kʼéri ambe exexaka ambe enga úkuarhika. Peru kʼóru arhikuekasïndi eskachi no uékasïnga ikiani pakarani kʼuiripuni jingoni ka eskachi uékasïnga sési pʼikuarhinheni”. Engachi tekaakuantajka juchaari erachichani, xarhatakuasïngachi eskachi xénchaasïnga ka eskachi uékasïnga májkueni úni eska juchaari Taati Jeoba.

17. Eska na uandajka Mateu 5:16, ¿nénachi uaa kʼéri ambe arhini juchaari Taati auandarhu anapuni?

¹⁷ Kʼéri kóntperata máesti jarhani ini familia jingoni enga interu parhakpinirhu jaka ka engachi xénchperajka. Ka uékasïngachi úni eskachi sánderu uánikua kʼuiripuecha juuaka paraksï májku kómarhini Tata Diosï Jeobani juchantsïni jingoni. Ísï jimbo, nóchi uékasïnga no sési pakatani juchaari Taati auandarhu anapueri nombrini o imeeri ireteri. Méntkisïchi uékasïnga sési jámani parakaksï kʼuiripuecha tsitiaka kurhaani ambakiti aianhperakua Tata Diosïri Reinueri (arhinta je Mateu 5:16).

18. ¿Ambejtsïni jarhuataa parachi no sáni chéparini uandani ambe engachi jakajkujka?

¹⁸ Ménisï, márujtsïni no sési kámaati ojtsïni no xénchani jimbokachi jucha kurhajchasïnga  juchaari Taati auandarhu anapuni. Peru, ¿ambechi uaa engachi ma repentku chéska uandontskuarhekuani máteruechani ambe engachi jakajkujka? Ju je miáni eska Tata Diosï Jeoba ka imeeri Uájpajtsïni jarhuataaka. Jesúsi arhiaspti imeeri chúxapatichani eskaksï no jámapiringa uandanhiani ambe engaksï uandapiringa o na engaksï uandapiringa. Ima mismu uandaspti: “Imani mismu ora jimbo intsïnhaakajtsï uandakua engajtsï jatsiaka para uandani, jimboka no chámindusï uandaaka, sino chaari Taatiri espiritusï uandaati chánksïni jimbo” (Mat. 10:19, 20).

19. ¿Néna úspi no sáni chéparini aianhpini Tata Diosï Jeobaeri ambe erachi ma enga apenasi jorhenguarhini japka Bibliani?

¹⁹ Ju je exeni ambe enga nitamakuarhinchapka erachi ma enga arhinhajka Robert. Enga apenasi ueenani japka jorhenguarhini Bibliani, sántku mítespti Jeobaeri ambe ka jatsispti para nirani ejersitueri tribunalini ma jingoni Sudáfrica. No sáni chéparini, arhiaspti eska no úpiringa marhuani ejersiturhu jimboka xénchaasïreenga imeeri ermanuechani engaksï ístu jorhenguarhini japka Bibliani. Xarharasïndi eska jukaparharasïreenga Tata Diosï Jeobaeri familia jimbo jarhani. Peru ma repentku, juesi ma kurhamarhispti: “¿Néksï jindeeski chiiti ermanuecha?”. Robert no erokuarhisïreendi eskaksï ini ambe kurhamarhipiringa, peru jirejiresï miántaspti ima jurhiatikueri tekstuni. Jindeespti Mateu 12:50: “Nákinterku nema enga újka enga juchiiti Taati auandarhu anapu jaiapanhentajka, ima jindeesti juchiiti ermanu ka juchiiti pirenchi ka juchiiti naandi”. Nájkiruka Robert no káni tiempu páni japka jorhenguarhini Bibliani, Tata Diosï Jeobaeri espiritu jarhuataspti paraka úpiringa mókuntani imani kurhamarhikuani ka máteruecha enga no erokuarhiani japka. ¡Na xáni sési pʼikuarherapi Tata Diosï Jeoba ini erachi jimbo! Ka májkueni sési pʼikuarheraati juchantsïni jingoni engachi mintsinharhiska eskajtsïni Tata Diosï jarhuataaka, parachi no sáni chéparini aianhpini jiáni enga úkua jukani jauaka.

20. ¿Ambechi jatsiski para seguirini úni? (Juanu 17:11, 15)

²⁰ Ju je seguirini jukaparharani kóntperatani engachi jatsika Tata Diosï Jeobaeri familia jimbo jarhani, engajtsïni xáni xénchajka. Ima jindeesti sánderu ambakiti Taati ka jatsiaskachi uánikua erachichani ka pirenchichani engajtsïni xénchajka. Ju je méntkisï jukaparharani i ambe. Satanasi ka imeeri chúxapaticha uékasïndiksï úni eskachi jucha no seguru jauaka eskajtsïni juchaari Taati auandarhu anapu xénchasïnga ka uékasïndi úni eskachi jucha no márku úkuarhintatini jauaka juchaari erachicha jingoni. Peru Jesúsi kómarhijpichesptijtsïni ka kurhakuspti Tata Diosï Jeobani eskajtsïni jarhuatapiringa parachi jucha méntkisï márku úkuarhintatini jarhani juchaari erachicha jingoni (arhinta je Juanu 17:11, 15). Ka Tata Diosï Jeoba mókuntaxati ini kómarhikuani. Ju je májkueni úni eska Jesúsi ka méntkisïchi seguru jarhani eskajtsïni juchaari Taati auandarhu anapu xénchasïnga ka eskajtsïni no méni jurajkuaka. Ka ju je méntkisï márku úkuarhintatini jarhani juchaari erachicha jingoni.