1. ¿Na jásï kʼuiripu máeski ima enga mintsinharhikueka?

 IMA kʼuiripu enga mintsinharhikueka, jánguarhintasïndi ísï úni eska na aiatspejka ka jurhimbitku uandasïndi (Sal. 15:4). Ka máteruechaksï mítesti eskaksï uaaka imani mintsikani. Juchajtuchi uékasïnga eskaksï erachicha májkueni eratseaka juchaari ambe. ¿Ambejtsïni jarhuataa parajtsïni erachicha mintsikani?

2. ¿Ambechi jatsiski para úni parajtsïni máteruecha mintsikani?

² Parajtsïni máteruecha mintsinharhini, jatsiskachi para andakuarheni. Uandanhasïndi eska para ma mintsinharhinhani, ísïiska komueska sentabu: úkua jukasïndi andani, peru fásiliisïndi tsïtani. Tata Diosï Jeoba jindeesti enga sánderu mintsinharhikueka, jimboka “iámindu ambe enga ima újka mintsinharhikues[ka]” (Sal. 33:4). Ka ima erokuarhisïndi eskachi juchajtu májkueni jámaaka eska ima (Efes. 5:1). Ini jorhenguarhikua jimbo, exeakachi máru Tata Diosïri marhuaricheeri ejempluni engaksï májkueni úpka eska juchaari Taati auandarhu anapu ka engaksï xarhatapka eskaksï mintsinharhikuespka. Ístuchi uandani jauaka sinko kualidadicheeri ambe engajtsïni jarhuataaka parachi mintsinharhikueni.

3, 4. a) ¿Néna xarhataspi profeta Danieli eska mintsinharhikuespka? b) ¿Ambechi jatsipirini para kurhamarhikuarhini?

³ Profeta Danieli ambakiti ejemplu máesti para jucha. Engaksï jupikapka paraksï Babilonia páni, no ióndaspti xarhatani eska mintsinharhikuespka. Ka kʼuiripuechaksï sánderu mintsikaspti enga Tata Diosï Jeobaeri jarhuajperata jingoni, uandantapka ambe engaksï arhikuekeenga rei Nabukodonosoriri tsánharhikuecha. Ma xanhari, Danieli arhispti reini ambe ma enga no ma rei tsitipiringa kurhaani: eska Tata Diosï no jaiapanhentaxapka. Danieli jatsispti para balori jukantani jimboka Nabukodonosori sóntku  ikiasïreenga (Dan. 2:12; 4:20-22, 25). Uánikua uéxurhini tátsekua, Danieli ménderu xarhataspti eska mintsinharhikuespka enga uandantapka ambe enga arhikuekeenga ima ambe enga xarharapka paredirhu Babilonia anapu palasiurhu (Dan. 5:5, 25-29). Ka tátsekua, Darío enga Media anapuepka ka imeeri ánchikuarhiricha, exesptiksï eska Danieli kánikua jánhastiispka. Jiókuarhisptiksï eska Danieli mintsinharhikuespka ka ístu “no nema úsïreendi arhini eska no sési úsïreenga imeeri ánchikuarhitani, nijtu eska no jurhimbikua jingoni jámasïreenga” (Dan. 6:3, 4). Asta ima juramutiicha engaksï no kómarhienga Tata Diosï Jeobani, exesptiksï eska Danieli mintsinharhikuespka.

⁴ Danieliiri ejempluni eratseparintani, ju je kurhamarhikuarhini: “¿Ambeksï uandasïni imeecha engaksï no Jeobaeri testigueka juchiiti ambeeri? ¿Uandasïnksï eskani mintsinharhikueska ka eskani kumpliriuasïnga juchiiti responsabilidadichani?”. Kánikua jukaparhakuesti eskachi ini ambe kurhamarhikuarhiaka jimboka engachi xarhataska eskachi mintsinharhikueska, kʼéri ambechi arhini jarhasïnga Tata Diosï Jeobani.

5. ¿Andisï Ananíasi ísï mítekateepi komueska nema enga mintsinharhikueka?

⁵ Uéxurhini 455 jimbo ante de Jesúsi, engaksï na únhantapkia Jerusaléniri bardecha, juramuti Neemíasi erakuaspti máru achamasïchani engaksï mintsinharhikuepka. Ma jindeespti Ananíasi, enga orhejtsïkutiipka ima kʼumanchikueri engaksï soldaduecha jarheenga. Biblia uandasïndi eska Ananíasi “achamasï máespka enga kánikua mintsinharhikuepka ka sánderu janhanharhisïreendi Tata Diosï jurhimbitini eska uánikua máteruecha” (Neh. 7:2).  Xénchani ka janhanharhini Tata Diosï Jeobani, jarhuataspti Ananíasini paraka kánikua jánguarhintapiringa sési úni náki uéjki ánchikuarhitani enga intsïnhapiringa. Ístu, inde mismu kualidadichajtsïni jarhuataati juchantsïni parachi mintsinharhikueni Tata Diosïiri kúnguarhikuarhu.

6. ¿Néna xarhataspi Tíkiku eska ambakiti amigu máespka enga apostoli Pablu ueenga mintsikani?

⁶ Iásï ju je exeni Tíkikueri ejempluni, apostoli Pablueri kompanieru ma enga kánikua mintsinharhikuepka. Enga Pablu ónhakata japka kʼumanchikuarhu ma, Tíkiku jarhuataspti ka Pablu uandaspti eska kánikua “mintsinharhikue[sp]ka para juchaari Tatani jingoni” (Efes. 6:21, 22). Pablu no solu mintsikaspti imani paraka kartechani pákuapiringa erachichani engaksï Éfesu ka Kolosasi japka, sino ístu paraka uinhaperaantapiringa ka sési pʼikuastaantani. Títikueri ejemplujtsïni eratsetarantaasïndi iásï anapu erachichani, engaksï sési marhuakuni jaka Tata Diosïni, engaksï mintsinharhikueka ka engajtsïni jarhuatajka sési jarhani Tata Diosïni jingoni (Kol. 4:7-9).

7. ¿Náki ambakiti ejemplujtsïni íntskusïni juchaari kúnguarhikuarhu anapu orhejtsïkuticha ka orhejtsïkutiiri jarhuajpiricha?

⁷ Iásïchi kánikua jukaparharasïnga ánchikuarhitani engaksï újka orhejtsïkuticha ka orhejtsïkutiicheri jarhuajpiricha, achamasïcha engaksï kánikua mintsinharhikueka. Ísï eska Danieli, Ananíasi ka Tíkiku, íksï erachicha kánikua jánguarhintasïndi sési úni imeecheri ánchikuarhitani. Pori ejemplu, engachi tánguarhikuecharhu nirajka entre semana jimbo, seguruchi jarhasïnga eskaksï jauakia erachicha engaksï nitamatarauaka partichani. Ka orhejtsïkutichaksï kánikua jukaparharasïndi engaksï erachicha ka pirenchicha sési prepararikuarhijka paraksï nitamataraani imeecheri partichani. Ístu, engachi pʼímarhiajka imeechani engachi Biblieri ambe jorhendaajka fini de semana anapu tánguarhikuarhu, seguruchi jarhasïnga eska jauaka nema enga nitamataraaka arhijtsïkperatani para iáminduecha. Ístuchi, mintsikasïnga eskachi jatsiauaka publikasionichani parachi úni aianhpini. Meruchi exesïnga eskajtsïni i erachicha kánikua sési kuidarisïnga ka diosmaiamukuachi íntskuntasïnga Tata Diosï Jeobani ini erachichani jimbo. Peru juchachi, ¿néna uaa xarhatani eskachi mintsinharhikueska?

8. ¿Nénachi uaa no xáni inchaakukuani máteruechani engachi pendienti jarhajka imeechani jimbo? (Proverbios 11:13).

⁸ Xénchaasïngachi juchaari erachichani ka uandanhiasïngachi imani ambe jimbo engaksï nitamakuarhijka. Peru jatsiskachi para jingontku jámani parachi no jukari inchakukuani. Primeru siglu anapu kúnguarhikuarhu, jarhasptiksï kʼuiripuecha engaksï uandatspini jámeenga, engaksï inchaakukuauenga máteruechani ka engaksï imani ambe uandeenga engaksï no jatsipka para uandantani (1 Tim. 5:13). Seguru eskachi no uékasïnga i jásï kʼuiripueni. Ju je eranhaskani eskajtsïni nema aiangusïnga imeeri ambe, mintsikaparini eskachi no nemani aianguaka. Pori ejemplu, pirenchi májtsïni aiangusïndi eska pʼamenchaxaka o eska uandanhiata ma jatsiska ka arhisïndijtsïni eskachi no nemani aianguaka. Jatsiskachi para ísï úni eskajtsïni ima na arhika (arhinta je Proverbios 11:13). * Ístu, ¿káni uétarhisïni eskachi no jámaaka uandantani ambe ma?

9. ¿Nénaksï uaa familiarhu anapuecha mintsinharhikueni?

⁹ Familiarhu. Iámindu familiarhu anapuechaksï jatsisti para no uandantani kʼumanchikuarhu anapu ambe. Pori ejemplu, jamberi acheeti ma  eratsejti eska ambe ma enga témba újka chistosueska. ¿A no eska no uandontskuarhepiringa indeeri ambe máteru nema jingoni? No ísï úpirindi jimboka xénchasïnga témbani ka no uékasïndi kʼuratsetani o no sési pʼikuastani (Efes. 5:33). Imeecha engaksï taatika, jatsistiksï para miáni eskaksï tumbiicha ka iurhitskiriicha tsitisïnga eskaksï janhanharhikua jingoni kánhaaka. Ísï jimbo, taatichaksï no jámapirindi aianguani máteruechani ambe engaksï imeecha no újka sési úni (Kol. 3:21 Táta Diósïri Uandakua Tata Jesukristueri Aiatsperakua). Ka sapiichaksï jatsisti para jorhenguarhini no jámani uandantani imani ambe enga úpiringa kʼuratsetani familiarhu anapuni ma (Deut. 5:16). Engachi iáminduecha jánguarhintaska para no uandantani familiarhu anapu ambe, familia márku úkuarhintatini jauati.

10. ¿Ambe úsïni ambakiti amigu ma? (Proverbios 17:17).

¹⁰ Amiguecha jingoni. Sáno iámindu kʼuiripuechaksï uékasïndi uénhekuarhini amigu ma jingoni. Peru ménichani inde ambe no fásiliisïndi. Jamberi jimbokachi no pʼindeska juchaari ambe aianguani máteruechani. Ka engachi aiangukuarhijka ambe ma juchaari amiguni ma ka tátsekuachi míteni eska i aianguaska máteruechani, kánikuachi no sési pʼikuarherasïnga. Peruchi kánikua jukaparharasïnga jatsini nemani enga no jámaaka uandantani. ¡I kʼóru “ambakiti amigu” máesïndi! (arhinta je Proverbios 17:17).

11. a) ¿Nénaksï xarhatasïni orhejtsïkutiicha ka imeecheri témbecha eskaksï mintsinharhikueska? b) ¿Ambechi jorhenguarhisïni orhejtsïkutiiri ma enga no aiangujka imeeri familiani kúnguarhikuarhu anapu ambe? (Exe je fotuni).

¹¹ Kúnguarhikuarhu. Orhejtsïkutiicha engaksï no jámajka uandantani ambe engaksï máteruecha aiangukuarhiajka, para erachichaksï ísïisti “komueska kuájchakukua ma tarhiata jingoni” (Is. 32:2). Míteskachi eskachi uaaka ambe uéjkiri uandontskuarheni imeecha jingoni ka eskaksï no jámaaka uandantani. Nóchi arhiasïnga eskajtsïni aianguaka ambe ma engachi no jatsika para míteni. Ístu, kánikuachi jukaparharaasïnga orhejtsïkutiicheri témbechani, jimbokaksï no jámasïnga kurhamarhiani ambe engaksï  no jatsika para míteni. Kʼéri kóntperata máesti engaksï orhejtsïkutiicha no aianguajka témbechani erachicheeri ambe. Orhejtsïkutiiri témba ma uandasti: “Kánikua agradeserikusïnga juchiiti acheetini engareni no aiangujka nénksï niua pʼorhembini, o jarhuatani. Sési pʼikuarherasïnga engareni juchiiti acheeti no aiangujka erachicheeri ambe, ísï no uandanhiani jarhasïnga ambe ma jimbo engani no ma ambe uaaka úni. Ka ísï úsïnga iámindu kúnguarhikuarhu anapuecha jingoni agustu uandontskuarheni. Ka ístuni míteska eska juchiiti acheeti no nemani aianguaka engani aiangukuarheska uandanhiata ma o na engani pʼikuarherajka”. Eskachi na exekia iáminduechachi uékasïnga eskajtsïni máteruecha mintsinharhiaka. Ju je exeni sinko kualidadichani engajtsïni jarhuataaka parachi mintsinharhikueni.

12. Uanda je andisï uékperakua újki eskachi mintsinharhikueuaka.

¹² Xénchperakua úsïndi eskachi mintsinharhikueuaka. Jesúsi uandaspti eska tsimani juramukuecha engaksï sánderu jukaparhakueka, jindeeska xénchani Tata Diosï Jeobani ka máteruechani (Mat. 22:37-39). Jimbokachi xénchasïnga Tata Diosïni, uékasïngachi ísïini eska ima, jimboka ima jindeeska enga sánderu mintsinharhikueka. Pori ejemplu, na engachi xáni xénchaajka erachichani jarhuataatijtsïni parachi no jámani aianguani máteruechani imeecheri ambe. Ju je no méni jámani uandantani imani ambe enga úpiringa kʼuratsetaani o no sési pʼikuastaani (Juanu 15:12).

13. ¿Nénajtsïni jarhuatasïni kaxumbikua parachi mintsinharhikueni?

¹³ Kaxumbikuajtsïni jarhuataati parachi mintsinharhikueni. Kristianu ma enga kaxumbitiika no jámaati orhetku uandantani ambe ma nomasi para ísku pakataani máteruechani (Filip. 2:3). Ístu, no jatsisti para máteruechani eratsetaraani eska ima míteska ambe ma engaksï imeecha no uaaka míteni. Ístu, engachi kaxumbitiiska nóchi jámaaka uandani na engachi eratsejka jucha ambe máeri enga Biblia no uandajka o juchaari publikasionicha.

14. ¿Nénajtsïni jarhuatasïni jánhaskakua parachi mintsinharhikueni?

¹⁴ Jánhaskakua jarhuataati kristianuni ma para míteni káni tiempueski “para pínasku pakarani” ka káni tiempueski “para uandani” (Ecl. 3:7). Máru lugaricharhu uandanhasïndi eska uandani, ísïiska komueska plata ka pínasku pakarani komueska oru. I ambe arhikuekasïndi eska ménichani sánderu sésiiska pínasku pakarani ka eska uandani. Jimbosï Proverbios 11:12 uandajti: “Ima enga meru jánhaskakua jingoni jámajka pínasku pakarasïndi”. Ju je exeni orhejtsïkutiri ejempluni ma enga jánhastiika ka enga someni arhinhajka eska jarhuatauaka máteru kúnguarhikuechani kʼéri uandanhiatechani exeani. Máteru orhejtsïkuti, i ambe uandasïndi inde orhejtsïkutiri ambe: “Méntkisï jingontku jámasïndi para no uandantani máteru kúnguarhikuarhu anapu ambe”. Jimboka i orhejtsïkuti jánhaskakua jingoni jámasïnga, imeeri kúnguarhikuarhu anapu orhejtsïkutichaksï janhanharhisïndi jimbokaksï míteska eska no jámaaka uandantani ambe engaksï máteruecha no jatsika para míteni.

15. Uandanta je ejemplu ma jingoni nénajtsïni marhuachesïni jurhimbitku uandani ambe ma, parajtsïni máteruecha mintsikani.

¹⁵ Jurhimbikua jingoni úni ambe ma, jindeesti máteru ambe engajtsïni jarhuatajka parachi mintsinharhikueni. Jimbokaksï kʼuiripuecha engaksï jurhimbitku jámajka méntkisïksï jurhimbitku uandantasïnga, fásiliisïndi mintsikaani (Efes. 4:25; Ebr. 13:18). Pori ejemplu, eranhaska je eska erachi ma uékasïnga sánderu sési arhijtsïkpini. Ísï jimbo, arhisïndi amiguni ma eska kurhajchaaka ka eska arhiaka néna uaa sánderu  sési arhijtsïkpini. ¿Néni arhipirini para jarhuatani? ¿Imani enga arhipiringa ambe enga ima uéjka kurhaani o imani enga iatsitakuarhu arhiaka ambe enga jatsika para úni? Míteskajtsïa. Biblia uandasïndi: “Sánderu sésiisti mátirku jurhimberantani nemani ka eska xénchperakua enga no xarharajka. Amigu ma enga no sési pʼikuastpijka kánikua jarhuajpesïndi.” (Prov. 27:5, 6). Engajtsïni amigu ma jurhimbitku arhijka ambe engachi jatsika para úni, jamberichi ueenakuarhu úkua jukanchajka jiókuarhini, peru tátsekuajtsïni kánikua marhuachesïndi.

16. ¿Néna xarhatasïni Proverbios 10:19 eska kánikua uétarhisïnga pʼíngukuarhini?

¹⁶ Kánikua uétarhisïndi eskachi pʼíngukuarhiaka parakajtsïni máteruecha uaaka mintsikani. I kualidadijtsïni jarhuatasïndi parachi no jámani uandantani ambe ma (arhinta je Proverbios 10:19). Ambe ma enga úpiringa úni eskachi no uaaka pʼíngukuarhini, jindeestiksï redesi sosialicha. Engachi no jingontku jámaska, úpiringachi mítetaraani uánikua kʼuiripuechani ambe engaksï no jatsiaka para míteni. Engachi ísï úska, nóchi uaaka míteni na enga úranhaaka inde informasioni ka nijtu úni sési peentani problemechani engaksï jauaka indeni ambe jimbo. Ístu, uétarhinchasïngachi pʼímukukuarhini engajtsïni juchaari enemiguecha uékani jauaka enganiarini parachi aianguani ambe ma enga úpiringa no sési úkuani juchaari erachichani. I ambe úpirindi úkuarhini engachi paisi ma jimbo japiringa engachi no jurajkunhajka parachi tánguarhini ka aianhpini ka polisiechajtsïni kurhamarhini juchaari kúnguarhikueri ambe. Enga i ambe úkuarhiaka o máteru ambe, kánikuajtsïni jarhuataati ísï úni eska ari prinsipiu na uandajka: “Ómutini jauaka ambe ma jingoni” (Sal. 39:1). Uétarhisïndi eskachi mintsinharhikueuaka para juchaari familia, juchaari amiguecha, juchaari erachicha ka para náki uéjki kʼuiripu ma. Ka para i ambe úni, kánikua jukaparhakuesti eskachi jorhenaaka pʼíngukuarhini.

17. ¿Ambechi uaa úni parachi iáminduecha úni mintsinharperani kúnguarhikuarhu?

¹⁷ Kánikuachi agradesidu jarhaska Tata Diosï Jeobani jingoni engajtsïni andaparhateraka familiarhu ma nani engaksï erachicha kánikua xénchperajka ka mintsinharperani. Iáminduechachi jatsiska para méntkisï jánguarhintani mintsinharhikueni. Engachi mándani arhini jánguarhintaska xénchpeni, kaxumbitiini, jánhastiini, jurhimbikua jingoni jámani ka pʼíngukuarhini, jarhuajpeni jauakachi paraka kúnguarhikuarhu mintsinharperanhaaka. Ju je májkueni jámani eska juchaari Tata Diosï Jeoba ka ju je seguirini xarhatani eskachi mintsinharhikueska.