SEMANA 39
¿Karakata jarhaski chaari nombri libru tsípikueri jimbo?
“Imeeri orhepatini libru ma karanhaspti paraksï imeecha miánhani engaksï janhanharhienga Tata Diosï Jeobani” (MAL. 3:16).
PIREKUA 61 ¡Ju je aianhpini!
AMBE ENGACHI EXEAKA *
Desde iónisïa, Tata Diosï Jeoba karaaxati nombrichani “libru tsípikueri” jimbo. (Exea je párrafuechani 1 ka 2).
1. Eska na arhijka Malaquías 3:16, ¿Tata Diosï Jeoba náki libruni karaxaki, ka ambe karakata jarhaski jimini?
IÓNISTIA enga Tata Diosï Jeoba lista ma úni jaka nombricheri ka ambakiti librurhu ma karaaxati. Lista Abelini jingoni ueenasïndi, primeru Testigu enga no méni jurajkupka Tata Diosïni (Luk. 11:50, 51). * Desde iónisïa, Tata Diosï seguirixati karaani nombrichani indeni libru jimbo ka uánikua karaastia (arhinta je Malaquías 3:16). Biblia ísï arhisïndi indeni libruni: “libru tsípikueri” (Jaŋ. 3:5; 17:8).
2. ¿Neeri nombrichaksï karakata jarhaski libru tsípikueri jimbo, ka ambechi uaa úni paraka juchaari nombri jima jauaka?
2 Ini librurhu, imeecheri nombrichaksï karakata jarhasti engaksï xáni kʼéri ambe arhijka Tata Diosï Jeobani kánikua janhanharhikua jingoni ka engaksï jukaparharajka imeeri nombrini. Íksï erokuarhixati paraksï auandarhu irekani o paraksï Echerirhu irekani para méntkisï. Juchaari nombri uaati karakata jarhani indeni librurhu engachi jánguarhintaska sési pájperani Tata Diosï Jeobani jingoni mintsikaparini tata Jesukristueri uarhikuani (Juanu 3:16, 36). Iáminduechachi uékasïnga eska juchaari nombri karakata jauaka indeni librurhu, ¿a no?
3, 4. a) Enga iáiasï juchaari nombri karakata jaka libru tsípikueri jimbo, ¿arhikuekasïni i ambe eskachi uaaka irekani para méntkisï? b) ¿Ambechi exea ini jorhenguarhikua jimbo ka máteru jimbo?
3 ¿Arhikuekasïni i ambe eska né enga indeni libru jimbo karakata jaka uaaka irekani para méntkisï? Ju je exeni ambe enga arhipka Tata Diosï Jeoba Moisésini ixú Éxodo 32:33 jimbo, ima uandaspti: “Borrariuaka juchiiti librurhu imani engareni no kurhajchaaka ka pekadu ambe úni”. I ambe arhikuekasïndi eska ima nombricha engaksï karakata jaka ini librurhu uaaka borrarinhani, ísïisti enajki Tata Diosï orheta lápisi jingoni karaapirini (Jaŋ. 3:5). Uétarhisïndi eskachi jánguarhintaaka paraka juchaari nombri seguirini jauaka karakata jarhani librurhu astaka Tata Diosï Jeoba lapiseru jingoni karaaka juchaari nombrini.
4 I ambe úpirindi eskachi kurhamarhikuarhiaka máru ambe. Pori ejemplu, ¿ambe uandasïni Biblia imeecheri engaksï karakata jakaia libru tsípikueri jimbo ka imeecheri engaksï no karakata jaka? ¿Kánksï intsïnhaa tsípikua para méntkisï imeecha engaksï karakata jakaia librurhu? ¿Ambe úkuarhia imeecha jingoni engaksï uarhikia ka nóksï úni míteni Tata Diosï Jeobani? ¿Imeecheri nombrichaksï karakata jaki indeni librurhu? Ini ambechi exeaka ini jorhenguarhikua jimbo ka máteru jimbo.
¿NÁKI NOMBRICHAKSÏ KARAKATA JARHASKI LIBRURHU?
5, 6. a) Eska na uandajka Filipusʌ 4:3, ¿neecheri nombrichaksï karakata jarhaskia libru tsípikueri jimbo? b) ¿Kánksï karanhaa imeecheri nombricha para méntkisï?
5 ¿Náki nombrichaksï karakata jarhaski libru tsípikueri jimbo? Parachi úni míteni, exeakachi eskaksï kʼuiripuecha sinko grupuecha jimbo arhukurhitixaka. Máru i grupuechaksï karakata jarhastia libru tsípikueri jimbo ka máteruechaksï nómbe.
6 Primeru grupurhuksï jarhasti imeecha engaksï erakukateka paraksï Kristuni jingoni juramuni auandarhu. ¿Imeecheri nombrichaksï karakata jarhaskia indeni libru tsípikueri jimbo? Jo, jimboka apostoli Pablu arhiaspka Filipusï anapuechani, imeechani engaksï jarhuatenga, eskaksï erakukatecheri nombrichaksï —imeecheri engaksï pʼímarhinhaka paraksï Kristuni jingoni juramuni— karakata jarhaskia libru tsípikueri jimbo (arhinta je Filipusʌ 4:3). Joperu paraka imeecheri nombricha no borrarinhaaka librurhu, nóksï jatsisti para jurajkuni Tata Diosïni. Ka engaksï na mínda jukaakia, imeecheri nombrichaksï karakata jauatia para méntkisï libru tsípikuerirhu. Ka i ambe ísï úkuarhisïndi ante de imeechaksï uarhini o ante de kʼéri mískuarhita ueenakuarhini (Jaŋ. 7:3).
7. ¿Nénajtsïni jarhuatasïni Jaŋaskuecha 7:16, 17 míteni kánksï karanhaa para méntkisï uánikua kʼuiripuecheri nombricha libru tsípikueri jimbo?
7 Segundu grupurhu jarhastiksï uánikua kʼuiripuecha. ¿Imeecheri nombrichaksï karakata jarhaskia librurhu? Jo. ¿Ka seguiriuaksï karakata jarhani engaksï na tsípiti pakaraakia Armajedonirhu? Jo (Jaŋ. 7:14). Jesúsi uandaspti eskaksï i kʼuiripuecha engaksï ísïika komueska karichicha, intsïnhaakaksï “tsípikua para méntkisï” (Mat. 25:46, TNM). Peru imeecha engaksï tsípiti pakaraaka Armajedonirhu, nóksï jirejiresï intsïnhaati tsípikua para méntkisï, jimboka imeecheri nombrichaksï, pori ísï arhini, lápisi jingonksï karakata jauati libru tsípikuerirhu. Enga Jesúsi Juramuni jauaka Mili Uéxurhini, kuidariuauati ini kʼuiripuechani ka páuati jima enga itsï tsípikueri uérajka. Imeecha engaksï kurhajchaaka tata Jesukristuni ka xarhatanksï eskaksï no méni jurajkuaka Tata Diosïni, imeecheri nombrichaksï karanhaati para méntkisï libru tsípikuerirhu (arhinta je Jaŋaskuecha 7:16, 17).
8. ¿Neecheri nombrichaksï no karakata jarhaski libru tsípikuerirhu, ka ambeksï úkuarhinchaa?
8 Terseru grupurhuksï jarhasti chibuecha engaksï Armajedonirhu kʼamajkunhaaka. Imeecheri nombrichaksï no karakata jarhasti libru tsípikuerirhu. Ka Jesúsi uandaspti eskaksï ʻi kʼuiripuecha méntku kʼamajkunhaakaʼ (Mat. 25:46, TNM). Ka Tata Diosïiri jarhuajperata jingoni, Pablujtu uandaspti eskaksï kastigarinhaaka “paraksï méntkisï tsïncheni [o kʼamajkunhani]” (2 Tes. 1:9; 2 Ped. 2:9). Ka májkueni úkuarhiati imani kʼuiripuecha jingoni engaksï ióntki ka ístu iásï uékaparini no sési ambe uandaka espiritu santueri ambe, imeechajtuksï kʼamajkunhaati para méntkisï ka nóksï intsïnhaati tsípikua para méntkisï. Iámindu i ambe xarhatasïndi eskaksï ícha no tsíntaaka (Mat. 12:32; Mar. 3:28, 29, TNM; Ebr. 6:4-6). Iásïchi exeaka tsimani grupueri ambe engaksï Echerirhu tsíntaaka.
IMEECHA ENGAKSÏ TSÍNTAAKA
9. ¿Náki tsimani grupu kʼuiripuecheri tsíntaa Echerirhu, ka andiksïsï no májkueni i tsimani grupuecha? (Hechos 24:15, TNM).
9 Biblia uandasïndi tsimani grupu kʼuiripuecheri engaksï tsíntaaka ka engaksï sésikua jatsiaka paraksï irekani para méntkisï Echerirhu: imeecha “engaksï sési jámaka” ka imeecha “engaksï no káni sési jámaka” (arhinta je Hechos 24:15, TNM). Imeecha engaksï “sési jámaka”, imeechestiksï engaksï sési marhuakupka Tata Diosï Jeobani jiáni engaksï tsípiti japka. Ka imeecha engaksï “no káni sési jámaka”, imeechestiksï engaksï no marhuakupka Tata Diosï Jeobani ante deksï uarhini. Na engaksï jámapka, sáno méntkisï no terukuntasïreendi Tata Diosï Jeobaeri juramukuecha jingoni. Ka jimbokaksï i tsimani grupuecha tsíntaaka, ¿arhikuekasïni i ambe eskaksï imeecheri nombricha karakata jarhaska libru tsípikuerirhu? Parachi úni míteni ju je exeni sánderu ambe i tsimani grupuecheri.
10. ¿Andiksïsï tsíntaa imeecha engaksï sési jámaka, ka máruksï náki kʼéri kóntperata jatsia? (Ístu exe je ini rebista jimbo partini “Ambe enga kurhanguarhijka ima enga arhintajka” enga tsíntskueri ambe uandajka Echerirhu).
10 Kuartu grupurhu imeechaksï jarhasti engaksï “sési jámaka”. Ante deksï uarhini, imeecheri nombrichaksï karakata jarhasptia libru tsípikuerirhu. ¿Borrarinhaskiksï imeecheri nombricha engaksï uarhika? Nómbe, jimboka Tata Diosï Jeoba miáuaxaka. Ima no jindeesti “uarhiricheri [Tata] Diosï, sino imeecheri engaksï irekani jarhajka, jimbokaksï imani japarini iáminduecha irekaxaka” (Luk. 20:38). I ambe arhikuekasïndi eska jiáni engaksï tsíntaaka Echerirhu imeecha engaksï sési jámaka, imeecheri nombrichaksï karakata jauati libru tsípikuerirhu. Joperu ueenakuarhu lápisi jingoni, pori ísï arhini (Luk. 14:14). Ka máru engaksï tsíntaaka, jatsiatiksï kʼéri kóntperata paraksï prinsipeeni iámu parhakpinirhu (Sal. 45:16).
11. ¿Ambeksï jatsia para jorhenguarhini ima kʼuiripuecha engaksï “no káni sési jámaka” paraksï imeecheri nombricha karanhani libru tsípikuerirhu?
11 Últimu, ju je exeni kintu grupueri ambe. Íksï imeesti engaksï “no káni sési jámaka”. Jamberi jimbokaksï no míteapka Tata Diosï Jeobaeri leichani, nóksï jurhimbikua jingoni jámasïreendi ante deksï uarhini, jimboksïsï imeecheri nombricha no karakata jati libru tsípikuerirhu. Peru enga Tata Diosï tsítantauaka, sésikua íntsauati parakaksï imeecheri nombricha niáraaka karanhani librurhu. I kʼuiripuecha engaksï no káni sési jámaka, kánikuaksï jarhuajperata uétarhinchaati. Ante deksï uarhini, máruksï kánikua no sési ambe úspti. Ísï jimbo, uétarhiati eskaksï jorhenguarhiaka ísï irekani eskaksï Tata Diosï Jeobaeri juramukuecha na uandajka. Para jarhuataani, Tata Diosïiri Reinu uaati eska programa ma jauaka para jorhendaani iámindu ini kʼuiripuechani ka i jindeuati ánchikuarhita ma enga no méni úkuarhini jaka Echerirhu.
12. a) ¿Neechaksï jorhendaua imani kʼuiripuechani engaksï no káni sési jámaka? b) ¿Ambeksï úkuarhinchaa imeecha engaksï no uékaaka úni ambe engaksï jorhenguarhini jauaka?
12 ¿Neechaksï jorhendaua imani kʼuiripuechani engaksï no káni sési jámaka? Uánikua kʼuiripuecha ka imeecha engaksï sési jámaka engaksï na tsíntaakia. Ka, ¿ambeksï jatsiski para úni imeecha engaksï no káni sési jámaka paraka imeecheri nombricha karanhaaka libru tsípikuerirhu? Jatsiatiksï para Tata Diosï Jeobaeri amigu úkuarhini ka aiakukuarhenksï para marhuakuni. Jesúsi ka erakukatecha engaksï juesika, jingontkuksï jauati paraksï exeni sinksï úxaki eskaksï na jorhenguarhini jaka ima kʼuiripuecha engaksï no káni sési jámaka (Jaŋ. 20:4). Enga nema no uékaaka úni ambe enga jorhenguarhini jauaka, kʼamajkunhaati, nájkiruka 100 uéxurhini jatiriuakia (Is. 65:20). Tata Diosï Jeoba ka Jesúsi, úsïndiksï exeni kʼuiripuecheri mintsitani ka nóksï jurajkuati eska nema no sési útspiaka jimbanhi parhakpinirhu (Is. 11:9; 60:18; 65:25; Juanu 2:25).
TSÍNTSKUA PARA IREKANI KA TSÍNTSKUA PARA JUSGARINHANI
13, 14. a) ¿Nénachi kurhangusïreeni ambe enga Jesúsi uandapka ixú Juan 5:29, TNM? b) ¿Ambechi jatsiski para exeni engachi arhintani jauaka ini karakatani?
13 Ístu, Jesúsi uandaspti imeecheri ambe engaksï Echerirhu tsíntaaka. Pori ejemplu, ima uandaspti: Niáraati “ima jandora engaksï iámindu imeecha engaksï tumbecharhu jaka, kurhachakuaka ka uéntaatiksï: imeecha engaksï ambakiti ambe úka, tsíntaatiksï paraksï irekani; ka imeecha engaksï no sési ambe niátaka, tsíntaatiksï paraksï jusgarinhani” (Juan 5:28, 29, TNM). ¿Ambe arhikuekaxapi Jesúsi?
14 Antesichi ísï kurhangusïreenga eska ambe enga Jesúsi uandapka, arhikuekasïreenga eska máru imeecha engaksï tsíntapiringa ambakiti ambeksï úpiringa, peru eskaksï máteruecha no sési ambe niátapiringa ka eska i ambe ísï tátsekua úkuarhipiringa engaksï na tsíntapiringia. Peru ju je exeni eska Jesúsi no uandaspka eska imeecha engaksï tumbecharhu uéntaaka ambakiti ambeksï uaaka o eskaksï no sési ambe niátaaka. Sánderu sési, uandaspti eskaksï úspkia indeni ambe, jimboka uandaspka: “imeecha engaksï ambakiti ambe úka” ka “imeecha engaksï no sési ambe niátaka”. I ambe arhikuekasïndi eskaksï úspkia indeni ambe ante deksï uarhini. Ka i ambe meru ísïisti, jimboka jimbanhi parhakpinirhu, no nema jurajkunhaaka paraka no sési ambe niátaaka. Ísï jimbo, imeecha engaksï no káni sési jámaka, no sési ambeksï niátaspti ante deksï uarhini. Jimajkani, ¿ambe arhikuekaxapi Jesúsi enga uandapka “tsíntaatiksï para irekani” ka “tsíntaatiksï para jusgarinhani”?
15. ¿Neechaksï tsíntaa “paraksï irekani”, ka andi?
15 Ima kʼuiripuecha engaksï sési jámaka o engaksï ambakiti ambe úka ante deksï uarhini, “tsíntaatiksï paraksï irekani” jimboka imeecheri nombrichaksï karakata jauakia libru tsípikuerirhu. Ísï jimbo, enga Juan 5:29, TNM, uandajka eskaksï tsíntaaka imeecha “engaksï ambakiti ambe úka”, ístu imeechanisï arhikuekaani jati “engaksï sési jámaka” enga Hechos 24:15, TNM, uandaajka. I ambe sési terukuntasïndi imani ambe jingoni enga Romanos 6:7, TNM, uandajka, jimini uandasïndi: “Ima kʼuiripu enga uarhikia, puáminhantastia imeeri pekadu jimbo”. Ísï jimbo, engaksï uarhijka imeecha engaksï sési ambe úka, imeecheri pekaduechaksï borrarinhasïndi, peru Tata Diosï no méni mirikurhisïndi na engaksï no méni jurajkupka engaksï tsípiti japka (Ebr. 6:10). Ísïisti, engaksï tsíntaaka ima kʼuiripuecha engaksï sési jámaka, jatsistiksï para seguirini marhuakuni Tata Diosïni ka nóksï méni jurajkuni paraka imeecheri nombricha no borrarinhaaka libru tsípikuerirhu.
16. ¿Ambe arhikuekasïni eskaksï máru kʼuiripuecha ‘tsíntaaka paraksï jusgarinhani’?
16 ¿Ambe úkuarhia imeecha jingoni engaksï no sési ambe niátaka ante deksï uarhini? Nájkirukaksï imeecheri uarhikua jimbo maianhpentakia pekaduechani, imeechaksï no úspti marhuakuni Tata Diosïni engaksï tsípiti japka. Imeecheri nombrichaksï no karakata jarhasti libru tsípikuerirhu. Ísï jimbo, ima kʼuiripuecheri tsíntskua engaksï no sési ambe niátaka, májkueniisti imani tsíntskua jingoni enga Hechos 24:15, TNM, uandajka kʼuiripuecheri “engaksï no káni sési jámaka”. Imeechaksï tsíntaati paraksï jusgarinhani. * I ambe arhikuekasïndi eska Jesúsi exeauaka na engaksï jámaaka i kʼuiripuecha (Luk. 22:30). Tiempu uétarhiati paraka Jesúsi uandaaka neeri nombrichaksï uaa karakata jarhani libru tsípikuerirhu. Peru paraka imeecheri nombricha engaksï no káni sési jámaka karanhaaka librurhu, jatsiatiksï para nóteru no sési ambe únia ísï eska ióntki ka aiakunksï imeecheri tsípikuani Tata Diosï Jeobani.
17, 18. ¿Ambeksï jatsia para úni imeecha engaksï Echerirhu tsíntaaka, ka náki “úkuechani” arhikuekaasïni Jaŋaskuecha 20:12, 13?
17 Imeecha engaksï tsíntaaka, iá sea engaksï sési jámapka o engaksï no káni sési jámapka ióntki, jatsiatiksï paraksï kurhajchani Tata Diosïiri juramukuechani engaksï jimbanhi roiuecharhu uéraaka imani 1,000 uéxurhini jimbo. Apostoli Juanu uandantaspti ambe enga exepka jánhaskakua ma jimbo. Ima uandaspti: “Exeaskani imeechani engaksï uarhikia, kʼératichani ka sapirhatichani, [Tata] Diosïri orhepani jimboksï anhaxurhitini jarhani. Ka pʼirakunhasptiksï libruecha ka ístu pʼirakunhaspti máteru libru enga jindeepka libru tsípikueri, ka luejkuksï jusgarinhasti uarhiricha indeni ambe jimbo engaksï karakata japka libruecharhu, eskaksï námindu jukanchapka imeecheri úkuechani jimbo” (Jaŋ. 20:12, 13).
18 ¿Náki “úkuechani” jimboksï jusgarinhaa imeecha engaksï tsíntaaka? ¿Imani ambe jimboeua engaksï úka ante de uarhini? Nómbe. Ju je miántani eskaksï imeecheri uarhikua jimbo maianhpentaskia imeecheri pekaduechani. Ísï jimbo, imeecheri ʻúkuechaʼ no jindeesti ima ambe engaksï úka ante deksï uarhini. Sánderu sési, arhikuekasïndi sinksï uaa o nómbe imani ambe engaksï jorhendanhaaka jimbanhi parhakpinirhu. Asta imeecha engaksï no méni jurajkuka Tata Diosïni, komu Noé, Samueli, Dabidi ka Danieli, jatsiatiksï para jorhenguarhini tata Jesukristueri ambe ka xarhatani eskaksï mintsikasïnga imeeri uarhikuani. ¡Engaksï i kʼuiripuecha jatsiaka para jorhenguarhini ini ambe, sánderia imeecha engaksï no káni sési jámaka!
19. ¿Ambeksï úkuarhinchaa imeecha engaksï no jiókuarhiaka ambe engaksï jorhendanhaaka?
19 ¿Ambeksï úkuarhinchaa imeecha engaksï no jiókuarhiaka ambe engaksï jorhendanhaaka? Jaŋaskuecha 20:15 arhisïndi: “Imeecha engaksï no exenhantaka karakata libru tsípikueri jimbo, imeechajtuksï kʼuanijpanhasti japondarhu enga méntku kurhini jaka chpiri”. Jo, kʼamajkunhaatiksï para méntkisï. ¡Kánikua jukaparhakuesti eskachi jánguarhintaaka parakaksï juchaari nombricha karakata jauaka libru tsípikueri jimbo ka eska karakata pakaraaka!
Erachi ma jarhuajpexati kʼéri programarhu enga jauaka para jorhendaani kʼuiripuechani jiáni enga Jesúsi Juramuni jauaka Mili uéxurhini. (Exe je párrafu 20).
20. ¿Náki ambakiti ánchikuarhita úkuarhia jiáni enga Jesúsi Juramuni jauakia Mili Uéxurhini? (Exe je dibujuni enga ueenakuarhu jaka ini rebistarhu).
20 Enga Jesúsi Juramuni jauaka Mili Uéxurhini, kánikua ambakiti ambe úkuarhiati. Programa ma jauati paraksï kʼuiripuecha jorhendanhani, ka i jindeuati ánchikuarhita ma enga no méni úkuarhini jaka Echerirhu. Joperu ístu inde tiempu jindeuati para exenhani ambeksï uaa ima kʼuiripuecha engaksï sési jámaka ka ístu imeecha engaksï no káni sési jámaka (Is. 26:9; Uku. 17:31). ¿Néna úkuarhia i xáni ambakiti ánchikuarhita para jorhentpini? Máteru jorhenguarhikua jimbochi exeaka ini ambe ka jarhuataatijtsïni parachi jukaparharani ini ánchikuarhitani.
PIREKUA 147 Tata Diosï aiatspesti tsípikua ma para méntkisï
^ Ini jorhenguarhikua jimbo, exeakachi na engachi kurhangujkia iásï, ambe enga Jesúsi uandapka ixú Juan 5:28, 29, TNM, jimbo enga uandapka eskaksï máru kʼuiripuecha tsíntaaka “paraksï irekani” ka máteruecha “paraksï jusgarinhani”. Exeakachi ambeksï arhikuekasïni i tsimani tsíntskuecha ka neechani arhikuekasïni.
^ I libru jiáni ueenasti karanhani “desdeka parhakpini kueranhaaka”. Ka parhakpini imani kʼuiripuechani arhikuekaasïndi engaksï uaaka puáminhaantani pekaduechani (Mat. 25:34; Jaŋ. 17:8). Ísï jimbo, peeka Abeliiri nombri jindeeka enga ueenaka karanhani libru tsípikueri jimbo.
^ Antesichi uandasïreenga eska uandakua jusgarinhani, arhikuekasïreenga para no sési úkuni nemani o para arhini ambe enga úkuarhinchapiringa. Ka inde uandakua juisiu, úpirindi inde ambe arhikuekani. Peru enga Jesúsi ini uandakuani úrapka, arhikuekaxapti eska tiempu uétarhipiringa para exeni na engaksï jámapiringa kʼuiripuecha. Diksionariu griegu ma enga Biblieri ambe uandajka, uandasïndi eska uandakua juisiu arhikuekasïnga “exeni na enga jámajka kʼuiripu ma”.
