Juchiiti taatichaksï 1940 jimbo ísï uénaspti jorhenguarhini Biblieri ambe Jeobaeri testiguecha jingoni. Nájkirukaksï tátsekua nóteru seguiripkia jorhenguarhini, juchiiti naandi seguirispti intsïnhantaani rebistechani La Atalaya ka ¡Despertad! Uéxurhini 1950 jimbo, Nueva York kʼéri tánguarhikua internasionali ma úkuarhispti, ka juchiiti familia úspti nirani ini kʼéri tánguarhikua jimbo.

Sánisï tátsekua, erachi Lawrence Jeffries uénasptijtsïni pʼorhembini ka jánguarhintaspti parareni jorhendani jurhimbikua ambe. Uénakuarhu, ji no sési exesïreenga andiksïsï Jeobaeri testiguecha no inchamukueni politikarisï niksï serbisiu militari úni. Ji arhisïreenga erachini, eska engaksï iámindu Estados Unidos anapuecha no uékapiringa nirani guerrarhu, enemiguechajtsïni úpirindi euakuarhini paisini. Erachi Jeffries tékantskua jingonireni kurhangutarasïreendi indeni ambe. Arhisïreendireni: “¿Amberi uandapirini eska úpiringa Jeoba enga iámindu Estados Unidos anapuecha imanksï marhuakupiringa ka enemiguechaksï jurhani paraksï no sési úkuani?”. Ambe engareni arhipka íri ambe ka máteru ambeeri, jarhuatasptireni exeni eska no ísïispka eskani ji na eratseenga ka inde ambe úspti eskani sánderu uékapiringa jorhenguarhini Biblieri ambe.

Sáno chúskutaspka arhiantani ióntki anapu rebistechani La Atalaya ka ¡Despertad! enga juchiiti naandi patsaani japka sótanurhu. Tiempu jingoni kuenta íntskukuarhespka eskani jurhimbikua ambe jorhenguarhixapka. Ísï jimbo, jiókuarhispka eskarini erachi Jeffries jorhendapiringa Biblieri ambe. Ístu uénaspka nirani tánguarhikuecharhu, kánikua tsitisïreenga ambe engani jorhenguarhini japka ka aianhpiri úkuarhispka para uénani nirani aianguani ambakiti aianhperakuani máteruechani. Ambe engani ji uékeenga úni mójtakurhispti jimbokani kurhanguspka eska “Jeobaeri kʼéri jurhiatikua axuterku jarhaskia” (Sof. 1:14). Nóteruni uékasïrengia nirani unibersidadirhu, iásï uékasïrengia jarhuataani máteruechani parakaksï imeechajtu jorhenguarhipiringa Biblieri ambe.

 Uéntaspka sekundariarhu 13 de juniu de 1956 jimbo, ka tanimu jurhiatikua tátsekua itsï atakuarhispka kʼéri tánguarhikua sirkuitueri ma jimbo. No eranhaskasïreenga eskani xáni uánikua kóntperatechani jatsiapiringa engani erakuka míteni Tata Diosï Jeobani ka jorhendaani máteruechani imeeri ambe.

Engani itsï atakuarhipkia seisi mesi jimbo tátsekua, prekursori regulari úkuarhispka. Ministerio del Reino enga disiembri de 1956 inglesi jimbo uérapka, artikulu ma jataspti enga jimbo pʼímarhiaueenga erachichani paraksï mótsini nani enga sánderu uétarhini japiringa aianhpinhani. Ji eratsesïreenga eskani úpiringa ísï úni; uékasïreenga aianhpini ambakiti aianhperakuani jima engaksï no xáni uánikua aianhpiricha japiringa (Mat. 24:14).

Mótsispka Edgefield (Carolina del Sur), kúnguarhikua ma jimbo enga solu kuatru aianhpiricha japka. Jíndeni jingoni sinkuespkachia. Jatsiasïreengachi tánguarhikuechani erachiiri kʼumanchikua ma jimbo. Mándani mesi 100 ora aianhpisïreenga. Kánikua ánchikuarhita jatsisïreenga aianhpikuarhu, kúnguarhikuarhu ka para sési nitamataraani arhijtsïkperatechani tánguarhikuecharhu. Exesïreenga eska engani sánderuni marhuakuenga Jeobani, sánderuni jorhenguarhisïreenga imeeri ambe.

Uarhiiti ma engani ji jorhendani japka Biblieri ambe funeraria ma jatsispti enga Johnston japka, ireta ma enga jima no iauanipka. Íntskusptireni ánchikuarhita parani jima ánchikuarhini máru jurhiatikuechantku ka sésikuajtsïni íntskuspti parakachi úrapiringa ma imeeri kʼumanchikuani parachi tánguarhikuechani jatsiani.

Erachi Jolly Jeffries, enga imeeri uájpeepka engareni jorhendapka Biblieri ambe mótsispti Brooklyn (Nueva York) jima engani ji irekapka ka niáraspti juchiiti kompanierueni engachi márku prekursoripka. Irekaspkachi remolki ma jimbo engajtsïni erachi ma kuánetapka.

No kánikua maiampinhasïreendi Estados Unidos surirhisï. Tsimani o tanimu dólarijkuchisï andeenga ma jurhiatikua jimbo. Ma xanhari iámu sentabuni úraspkia parani tʼirekua piáratarani, ka engani tiendarhu uératini uéntani japka, acheetirini ma kurhamarhispti: “¿Ánchikuarhitari jirinhaxaki? Ma dólarikini maiamuaka ora jimbo”. Tanimu jurhiatikua ánchikuarhikuspka, echerini ma sési jántskantani nani enga konstruksioni ma únhani japka. Seguru jarhaspka eskarini Jeoba jarhuataxapka parani úni Edgefield pakarani. Nájkirukani i ambe nitamanchani japka, úspka nirani kʼéri tánguarhikua internasionalirhu enga úkuarhipka 1958 jimbo Nueva York.

Segundu jurhiatikua kʼéri tánguarhikueri, úkuarhispti ambe ma. Mítespka Rubyni Wadlington, enga prekursorepka Gallatin (Tennessee). Tsimarhanchi uékasïreenga misionerueni, jiájkani niraspkachi tánguarhikuarhu enga úkuarhijka para imeecha engaksï Galaadirhu uéjka nirani. Sánderu orhepatini úndaspkachi kartechani axatsperaani. Ma xanhari pʼímarhisptijtsïni arhijtsïkperata ma íntspini jini Gallatin, ka jiáni kurhamarhispka Rubyni sini uékasïreeni jíndeni jingoni uambuchani. Imeeri kúnguarhikuarhu mótsispka ka tembuperaspkachi 1959 jimbo.

Jí 23 uéxurhini jatirispka engani niárapka sierbu únhani Gallatin (enga iásï ísï mítenhaka komueska orhejtsïkuti enga orhekupajka máteru orhejtsïkutichani). Juchaari kúnguarhikuani uénapirindi pʼorhembini jimbanhi sirkuitueri orhejtsïkuti ma enga arhinheenga Charles Thompson. Erachi kánikua  eksperiensia jatsispti, peru nájkiruka ísïipka, imarini kurhamarhispti ambeksï uétarhinchaxapi erachicha ka ambeksï úspia máteru sirkuitueri orhejtsïkuticha paraksï úni jarhuataani. Kánikua ambe jorhenguarhispka imeeri ambe, pori ejemplu, eska jukaparhakueska kurhamarpini para sési míteni iámindu ambe ante de úni ambe ma.

Maiu 1964 jimbo, pʼímarhisptijtsïni parani nirani Eskuelarhu para Reinueri Ánchikuarhita enga ma mesi durarienga ka enga South Lansing (Nueva York) úkuarhipiringa. Jorhentpirichajtsïni kánikua jarhuataspti parakani tsitipiringa seguirini jorhenguarhini Jeobaeri ambe ka parani seguirini sési pájperani imani jingoni.

Eneru de 1965 jimbo, pʼímarhisptijtsïni parani sirkuitueri orhejtsïkutini Rubyni jingoni. Axasptijtsïni sirkuitu ma jimbo enga kánikua kʼépka, desde Knoxville (Tennessee) asta Richmond (Virginia) niárapanisï. Pʼorhembiasïreenga kúnguarhikuechani engaksï Carolina del Norte japka, Kentucky ka Virginia Occidental. Imani kúnguarhikuechani pʼorhembiasïreenga engaksï rasa turhipitipka, jimboka jiánisï jini suri de Estados Unidos nóksï úsïreenga sési pájperani ni márku jarhani kʼuiripu urapitichani jingoni. Erachicha nóksï kánikua jatsikuarherispti, ísï jimbo, íntsaasireengachi ambe engachi jatsikuarhienga. Sirkuitueri orhejtsïkuti ma enga kánikua eksperiensia jatsipka jorhendasptireni jukaparhakua ambe. Arhisptirini: “Ísï jáma eska náki uéjki erachi ma. Asï ísï niára kúnguarhikuecharhu komueska tʼu juramukua jatsini jima. Uaakari sánderu jarhuajpeni engaksïni ísï exeaka eska ambakiti erachi ma”.

Ma xanhari engachi kúnguarhikua sapichu ma pʼorhembini japka, Ruby uénaspti jorhendani Biblieri ambe uarhiiti sapichuni ma enga nanaka sapichuni ma kánguarhienga ma uéxurhini jatiri. Kúnguarhikuarhu no nema úsïreendi nirani pʼorhembini, jimbosï Ruby seguiripti karta jimbo jorhendani. Engachi ménderu pʼorhembipka kúnguarhikuani uarhiiti iámindu tánguarhikuecharhu niraspti. Tátsekua tsimani prekursora espesialichaksï mótsispti jima ka imeechaksï seguirispti jorhendani uarhiitini astaka itsï atakuarhipka. Máru 30 uéxurhini ísï tátsekua, 1995 jimbo, engachi Beteli de Patterson jimbo japka, uátsï ma andarhieraspti Rubyni ka uandajpaspti. Uarhiitiri uájpeespti enga Ruby jorhendapka Biblieri ambe. Iásï ima ka imeeri acheeti jorhenguarhixaptiksï Jorhentperakuarhu Galaadiri, klase 100 jimbo.

Máteru sirkuituni engachi pʼorhembienga Florida sentrurisï pakarasïreendi. Imani tiempu jimbo trokanchi ma uétarhinchasïreenga. Ísï jimbo, piáspkachi ma no xáni jukaparhakua jimbo. Peru ma semana jimbojku bomba itsïri xerekuarhespti ka nóchi jatsikuarhespka sentabu parachi arreglarintani. Miáspka erachini ma engajtsïni úpiringa jarhuatani, jiájkani uandajpaspka. Ima arhispti imeeri ánchikuarhirini ma eska arreglarintapiringa trokani ka no jiókuarhispti eskachi maiamupiringa. Arhisptijtsïni: “Nójtsïni ambe ma kánchexaka”. Ka astajtsïni intsïkuarhispti sentabu. I ejemplu jingoni, Jeobajtsïni xarhatachespti na enga xáni kuidariajka imeeri marhuarichani ka i ambejtsïni miátantasïndi na enga xáni jukaparhakueka intsïmpitini.

Méntkisï engachi pʼorhembiauenga kúnguarhikuechani erachicheeri kʼumanchikuarhuchi pakarasïrenga ka ísïchi úspka uánikuechani jingoni sési pájperani. Ma xanhari, jurajkuspka kúnguarhikueri informini engani nótkini kʼamareenga juchiiti mákinarhu, engani jimbo karaenga. Ima jurhiatikua engani kʼuanhatsentapka, exespka eska tataka sapichu ma enga tanimu uéxurhini jatiripka erachicheeri uájpa, jima anapu engachi pakarani japka “jarhuatasptireni” kʼamarani informini. Ima ka ji, ióni jamberichi tsípispka indeni ambe jimbo.

Uéxurhini 1971 jimbo, axachesptijtsïni karta ma engajtsïni arhienga eskani distritueri orhejtsïkutipiringia jini siudadi de Nueva York jimbo. I ambejtsïni ísku pakataspti. Ji apenasi 34 uéxurhini jatirispka engachi mótsipka. Ji jindeepiringa primeru distritueri orhejtsïkuti rasa turhipiticheri engani pʼorhembiapiringa Nueva York anapuechani, peru erachichajtsïni kánikua tsípikua jingoni erokaspti.

Engani distritueri orhejtsïkutiipka kánikua tsitisïreenga jorhentpini Jeobaeri ambe kʼéri tánguarhikuecharhu sirkuitueri fini de semanechani jimbo. Uánikua sirkuitueri orhejtsïkuticha sánderuksï eksperiensia jatsispti eskani ji. Asta ma imeecheri, íntspispti arhijtsïkperatani jiáni engani ji itsï atakuarhipka. Máteru erachi, Theodore Jaracz, niáraspti Grupurhu jarhani enga Orhejtsïkuajka iámindu kúnguarhikuechani. Ístuksï jarhaspti máteru erachicha engaksï kánikua eksperiensia jatsipka engaksï Beteli de Brooklyn marhuani japka. Kʼéri kóntperata máespti engaksï i sirkuitueri orhejtsïkuticha ka betelitecha úpkaksï eskani ji agustu ánchikuarhipiringa. Exespka eskaksï i orhejtsïkuticha kánikua sési kámpisïreenga, mintsïkasïreendiksï Tata Diosïiri Uandakuani ka kurhandisïreendiksï ambe enga kúnguarhikua arhiauenga. Jimbokaksï erachicha kaxumbitiispka, no úkua jukanchaspka distritueri orhejtsïkutini.

Uéxurhini 1974 jimbo, Grupu enga orhejtsïkuajka iámindu kúnguarhikuechani erakuaspti máru sirkuitueri orhejtsïkutichani paraksï distritueri orhejtsïkutini. Ísï jimbo, úspka ménderu sirkuitueri orhejtsïkutini, peru iásï Carolina del Sur. Para jiánisï kúnguarhikuecha ka sirkuituecha nóteruksï arhukukata jarhasptia rasa jimbo, ka erachichaksï kánikua sési pʼikuarherasïreendi indeni ambe jimbo.

Uéxurhini 1976 kʼamarhukunisï, Georgia ísïjtsïni axaspti, sirkuitu ma jimbo enga Atlanta ka Columbus ísï japka. No úsïnga mirikurhini imani arhijtsïkperatani engani íntspipka jiáni engaksï sinko sapiicha turhipiticha uarhipka, jimbokaksï kurhirakuaspka imeecheri kʼumanchikuani. Sapiicheri naandi ospitalirhu pánhaspti jimboka kurhispka. Ospitalirhu méntkuksï niáraxapti erachicha xáni urapiticha ka turhipiticha paraksï sési pʼikuastantaani sapiicheri taatichani. Úspka exeni na enga xáni kánikua uékperanhajka Jeobaeri kúnguarhikuarhu. Inde jásï pʼamojperakua kánikua jarhuataasïndi Tata Diosïiri marhuarichani paraksï úni orhepani uérakuani kʼérati uandanhiatechani.

Uéxurhini 1977 jimbo, arhisptijtsïni eskachi nipiringa Brooklyn anapu Betelirhu máru mesicha parachi jarhuajpeni ánchikuarhita ma úni. Enga kʼamarani japka ima ánchikuarhita, tsimani erachicha Grupueri enga orhejtsïkuajka iámindu kúnguarhikuechani kurhamarhisptijtsïni sinchi uékapirini Beteli pakarani. Arhiaspkachi eska jo.

Ánchikuarhispka 24 uéxurhini Grupurhu enga exejka na enga Aianhpinhani jaka, jima engaksï erachicha kurhamarhikuechani mókuantajka engaksï kánikua úkua jukaka. Desde iónisï, Grupu enga orhejtsïkuajka iámindu kúnguarhikuechani petaapaxati instruksionichani engaksï Biblieri prinsipiuecha jimbo pʼitakata jaka. I instruksionichaksï úrakuarhesïndi para kurhamarhikuechani mókuantani, peru ístu para jorhendaani sirkuitueri orhejtsïkutichani, orhejtsïkutichani ka prekursorichani. I ambe uánikuechani jarhuataasptia paraksï sánderu sési marhuakuni Tata Diosï Jeobani, ka ísï úxati eska Jeobaeri kúnguarhikua sánderu uinhapiti jauaka.

Uéxurhini 1995 uératini asta 2018 jamberi, Beteli nani engaksï Jeobaeri ánchikuarhitani exejka axasptireni parani máteru Betelichani pʼorhembiani. Tánguarhintasïreenga grupuechani jingoni engaksï Betelichani orhejtsïkuajka, betelitecha ka misioneruechani jingoni para uinhaperantaani ka jarhuataani uandanhiatechani jingoni engaksï jatsipiringa. Joperu ístu ima eksperiensiecha engajtsïni imeecha aianguenga uinhaperantasïrendijtsïni. Pori ejemplu, uéxurhini 2000 jimbo Ruandachi niraspka, mintsitarhujtsïni niárachespti eksperiensiecha engajtsïni erachicha ka Beteli anapuecha aiangupka na engaksï nitamakuarhipka jiáni engaksï xáni uánikuecha uándikunhapka 1994 jimbo. Uánikua erachichaksï uarhiranchaspti nemani. Joperu nájkirukaksï i ambe nitamanchapka seguirisïreendiksï mintsikani Tata Diosïni, erokuarhikua ma jatsini ka tsípikua jingonksï jámani.

Iásïchi jukari 80 uéxurhini jatiriskia. Ini últimu 20 uéxurhinicha jimbo Grupurhu marhuaxaka enga Estados Unidos anapu Betelini Orhejtsïkujka. No méni niraspka unibersidadirhu, joperu sánderu sési jorhendanhaska Jeobaeri kúnguarhikuani jimbo. I amberini jarhuatasti parani úni jorhendaani máteruechani Biblieri ambe, enga kánikua marhuakuauaka para méntkisï (2 Kor. 3:5; 2 Tim. 2:2). Exesïnga eska ambe enga Biblia uandajka kánikua jarhuataasïnga kʼuiripuechani paraksï úni sési irekani ka únksï Jeobaeri amigu úkuarhini (Sant. 4:8). Méntkisï engachi újka Ruby ka ji, arhiasïngachi máteruechani eskaksï jukaparharaaka kóntperatani engaksï jatsika, jorhenguarhini Jeobaeri ambe ka Biblieri ambe jorhentpini... jimboka i jindeeska sánderu ambakiti kóntperata enga jatsika Jeobaeri marhuari ma.