SEMANA 40
Uánikuechaksï pánhasïndi jurhimbikuarhu
“Imeecha engaksï uánikuechani paajka jurhimbikuarhu ísïksï meremerexeati eska jóskuecha, para méntkisï” (DAN. 12:3).
PIREKUA 151 Jeoba uandajpauati
AMBE ENGACHI EXEAKA *
1. ¿Ambe ambakiti ambe úkuarhia enga Kristu Juramuni jauakia Mili Uéxurhini?
¿ÚSÏNCHI eranhaskani na enga xáni ambakitiuaka ima jurhiatikua engaksï uarhiricha ueenaaka tsíntani jiáni enga Kristu Juramuni jauaka Mili Uéxurhini? Iámindu jucha engachi uarhiranchaka nemani ka engachi xéncheenga, uékaxakachia ménderu exentani. Ka ístu Tata Diosï Jeoba uékaxatiia tsítantani (Job 14:15). Ju je eranhaskani na enga xáni tsípinhani jauaka iámu parhakpinirhu engaksï kʼuiripuecha ménderu exejperantaaka. Eskachi na exekia máteru jorhenguarhikua jimbo, imeecha “engaksï sési jámaka” ka engaksï karakata jakaia libru tsípikueri jimbo, “tsíntaatiksï paraksï irekani” (Hech. 24:15, TNM; Juan 5:29, TNM). Jamberi imeechaksï ueenaati tsíntani Echerirhu engachi jucha kánikua xénchaajka. * Ka imeecha “engaksï no káni sési jámaka”, o imeecha engaksï no úka míteni Tata Diosï Jeobani o marhuakuni ante deksï uarhini, “tsíntaatiksï paraksï jusgarinhani”.
2, 3. a) Ísï eska na uandajka Isaías 11:9, 10, ¿ambe jorhenguarhinhaa kʼéri programarhu enga úkuarhiaka? b) ¿Ambechi exea ini jorhenguarhikua jimbo?
2 Iámindu iicha engaksï tsíntaaka uánikua ambeksï jatsiati para jorhenguarhini (Is. 26:9; 61:11). Ísï jimbo, jauati kʼéri programa ma para jorhentpini, ánchikuarhita ma enga no méni úkuarhini jaka (arhinta je Isaías 11:9, 10). Imeecha engaksï no káni sési jámaka, jatsiatiksï para jorhenguarhini tata Jesukristueri ambe, Reinueri, euajpintskueri ka na enga xáni jukaparhakueka eska Tata Diosï Jeobaeri nombri pímbinhajkunhantaaka ka eska imajkusï uaaka juramuni. Asta imeecha engaksï sési jámaka, jatsiatiksï para jorhenguarhini ambe enga Tata Diosï sánhani arhika jorhendani imeeri iretani: ambe enga eratsetini jaka úni. Máru Tata Diosïiri ambakiti marhuarichaksï tʼuini ióni uarhisptia ante de Biblia iámu karanhani. Ísï jimbo, imeecha engaksï no káni sési jámaka ka imeecha engaksï sési jámaka, jatsiatiksï para uánikua ambe jorhenguarhini.
3 Ini jorhenguarhikua jimbochi ini ambe mókuntaaka: ¿néna úkuarhia i xáni kʼéri programa para jorhentpini?, ¿ambe úkuarhia imeechani jingoni engaksï jiókuarhiaka ini jorhenguarhikuani? ka ¿ambe úkuarhia imeechani jingoni engaksï no jiókuarhiaka ini jorhentperakuani? Iásï kánikua jukaparhakuesti míteni ini ambe. Máru profesiecha engachi kánikua tsitiajka ka engaksï libru de Daniel jimbo jaka ka Jaŋaskuecha jimbo, jarhuataatijtsïni kurhanguni ambe enga úkuarhiaka jiáni engaksï uarhiricha tsíntaaka. Ju je orheta exeni ambe enga uandajka ambakiti profesia ma enga Daniel 12:1, 2 jimbo jaka.
TSÍNHARHIATIKSÏ IMEECHA ENGAKSÏ KʼUÍNI JAKA TʼUPURIRHU
4, 5. ¿Ambe uandasïni Daniel 12:1 eska úkuarhiaka últimu jurhiatikuechani jimbo?
4 (Arhinta je Daniel 12:1). Ambe enga Daniel jimbo karakata jaka, aiangusïndijtsïni na enga úkuarhipaaka máru ambe últimu jurhiatikuechani jimbo. Pori ejemplu, Daniel 12:1 uandasïndi eska Migueli enga tata Jesukristueka, ʻanhandetixaka para kuájpiniʼ Tata Diosïiri iretani. I ambe 1914 jimbo ueenasti úkuarhini, jiáni enga Jesúsi Rei únhaka Tata Diosïiri Reinurhu enga auandarhu jaka.
5 Peru ístu Danieli arhinhaspti eska Jesúsi jauarapiringa imani jurhiatikuechani jimbo “engaksï kánikua uandanhiakuarhiaka, ísï eska na no méni úkuarhini japka desde enga ueenakuarhipka jarhani ireta ma asta imani jurhiatikuechani jamberi”. Inde jurhiatikuecha engaksï kánikua uandanhiakuarhiaka, “kʼéri mískuarhita” arhikuekaxati enga Mateu 24:21 uandajka. Jesúsi jauaraati, o kuájpiati Tata Diosïiri iretani engaksï na kʼamaraakia inde jurhiatikuecha engaksï kánikua uandanhiakuarhiaka, jiáni enga ueenakuarhiakia Armajedoni. Ka libru Jaŋaskuecha uandasïndi eska inde ireta jindeeska ʻuánikua kʼuiripuechaʼ engaksï tsípiti pakaraka jiáni “engaksï xáni no sési kánhaka” (Jaŋ. 7:9, 14).
6. ¿Ambe úkuarhia ísï tátsekua engaksï uánikua kʼuiripuecha na tsípiti pakaraakia kʼéri mískuarhitarhu, ka andichisï ísï uandajki? (Ístu exe je ini rebista jimbo partini “Ambe enga kurhanguarhijka ima enga arhintajka” enga tsíntskueri ambe uandajka Echerirhu).
6 (Arhinta je Daniel 12:2). Engaksï uánikua kʼuiripuecha na tsípiti pakaraakia jiáni engaksï na nitamaakia ima jurhiatikuecha engaksï kánikua uandanhiakuarhiaka, ¿ambe úkuarhia ísï tátsekua? Profesia uandasïndi eskaksï kʼuiripuecha tsíntaaka. Antesichi eratsesïreenga eska inde profesia enga Daniel 12:2 uandajka, arhikuekasïreenga eskachi sánderu aianhpipiringa nájkirukajtsïni juchaari enemiguecha uékeenga pʼínguni 1918 jimbo. * Peru sánderu sési, i profesia tsíntskuani arhikuekasïndi enga jimbanhi parhakpinirhu úkuarhiaka. ¿Andichisï ísï uandajki? Jimboka Job 17:16 ístu uandasïnga ʻtʼupuriniʼ ka ini tekstuni jimbo Tumbanisï arhikuekajti. Ísï jimbo, Daniel 12:2 meru uarhiricheri tsíntskueri ambesï uandani jati ka inde ambe jiáni úkuarhiati engaksï últimu jurhiatikuecha na nitamaakia ka ístu Armajedoni.
7. a) ¿Ambe arhikuekasïni eskaksï máru tsíntaaka paraksï “jatsini tsípikua para méntkisï”? b) ¿Andisï i tsíntskua sánderu ambakitiua?
7 Peru, ¿ambe arhikuekasïni Daniel 12:2 enga uandajka eskaksï máru tsíntaaka paraksï “jatsini tsípikua para méntkisï”? I ambe arhikuekasïndi eska imani 1,000 uéxurhini jimbo, imeecha engaksï tsíntaaka ka niáranksï míteni oksï seguirini jarhani míteni Tata Diosï Jeobani ka Jesúsini ka kurhajchaanksï, intsïnhaatiksï tsípikua para méntkisï (Juanu 17:3). I jindeuati sánderu ambakiti tsíntskua ka eska ima engaksï jatsipka máru ióntki anapuecha (Ebr. 11:35). ¿Andi? Jimboka ima kʼuiripuecha engaksï no perfektuepka, niárasptiksï ménderu uarhini.
8. ¿Ambe arhikuekasïni eskaksï máru tsíntaaka “paraksï kʼuratsetanhani” ka paraksï ʻméntkisï no sési exenhaniʼ?
8 Imeecha engaksï tsíntaaka nóksï iáminduecha uékaati jorhenguarhini Tata Diosï Jeobaeri ambe. Danieliiri profesia uandasïndi eskaksï máru tsíntaaka “paraksï kʼuratsetanhani ka méntkisïksï no sési exenhani”. Ka jimbokaksï no uékaaka kurhajchani Tata Diosï Jeobani, imeecheri nombrichaksï no jauati libru tsípikueri jimbo ka nóksï intsïnhaati tsípikua para méntkisï. Ka ʻméntkisïksï no sési exenhaatiʼ, i ambe arhikuekasïndi eskaksï kʼamajkunhaaka para méntkisï. Ísï jimbo, Daniel 12:2 indeni ambesï uandani jati ambe engaksï úkuarhinchaaka últimu imeecha engaksï tsíntaaka, seguni ambe engaksï uaaka ísï tátsekua engaksï na tsíntaakia * (Jaŋ. 20:12). Máruksï intsïnhaati tsípikua para méntkisï ka máteruecha nómbe.
UÁNIKUECHAKSÏ PÁNHASÏNDI JURHIMBIKUARHU
9, 10. a) Eska na uandajka Daniel 12:3, ¿ambe máteru ambe úkuarhia ísï tátsekua enga na nitamakia k’éri mískuarhita? b) ¿Neechaksï ʻísï meremerexea eska auandaʼ?
9 (Arhinta je Daniel 12:3). ¿Ambe úkuarhia ísï tátsekua engaksï na nitamakia ima jurhiatikuecha engaksï kánikua uandanhiakuarhiaka ka enga axuterku jakaia para ísï úkuarhini? Exeskachia máru ambe Daniel 12:2 jimbo, peru bersikulu 3 ístu uandasïndi máteru ambe enga úkuarhiaka ísï tátsekua enga na nitamakia k’éri mískuarhita.
10 ¿Néksï jindeeski engaksï ʻísï meremerexeaka eska auandaʼ? Ambe enga uandapka Jesúsi ixú Mateu 13:43 jimbo, jarhuatasïndijtsïni míteni. Ima uandaspti: “Jimajkani imeecha engaksï jurhimbitku jámaaka, meremerejkuatiksï ísï komueska jurhiata, imeecheri Taati jémbeeri Juramukuarhu”. Enga Jesúsi ini ambe uandapka, imeecheri ambe uandaxapti engaksï Tata Diosïri “juramukuarhu anapueka”, engaksï jindeeka Jesúsiri ermanuecha, engaksï erakunhaka paraksï imani jingoni juramuni Tata Diosïiri Reinurhu (Mat. 13:38). Ísï jimbo, Daniel 12:3 erakukatechanisï arhikuekaajti ka imani ánchikuarhitani engaksï uaaka jiáni enga Jesúsi Juramuni jauaka Mili Uéxurhini.
Íksï 144,000 erakukatecha ánchikuarhiati tata Jesukristu jingoni paraksï Tata Diosïiri ambe jorhentpini 1,000 uéxurhini jimbo. (Exe je párrafu 11).
11, 12. ¿Náki ánchikuarhitaksï uaa 144,000 erakukatecha indeni 1,000 uéxurhini jimbo?
11 Kristianu erakukatechaksï uánikuechani paauati jurhimbikuarhu. ¿Ka nénaksï uaa ini ambe? Ánchikuarhiatiksï tata Jesukristuni jingoni paraksï jorhentpini Tata Diosïri ambe jiáni engaksï 1,000 uéxurhini juramuni jauaka. Indeksï 144,000 erakukatecha no solu reiuati sino ístuksï saserdotiuati (Jaŋ. 1:6; 5:10; 20:6). Ísï jimbo, jarhuatauatiksï kʼuiripuechani parakaksï sánhani arhiaka perfektueni ka ísï úparini sésiksï pʼikuastaantani jauati kʼuiripuechani (Ezeq. 47:12; Jaŋ. 22:1, 2). ¡Erakukatechaksï meru kánikua sési pʼikuarheraati engaksï ini ambe uaaka!
12 ¿Neechaksï jaua imani ʻuánikuechaʼ jingoni engaksï “jurhimbikuarhu” pánhajka? Imeecha engaksï tsíntaaka, engaksï tsípiti pakaraaka Armajedonirhu ka sapiicha engaksï jimbanhi parhakpinirhu andajpenuaka. Enga na nitamakia 1,000 uéxurhini, iámindu imeecha engaksï Echerirhu irekaaka, perfektueuatiksïa. Jimajkani, ¿kánksï karanhaa imeecheri nombricha libru tsípikueri jimbo lapiseru jingoni ka nóteru lápisi jingonia?
ÚLTIMU TSʼÉJKUKUA
13, 14. Kʼuiripuecha engaksï Echerirhu irekaaka ka engaksï perfektueuakia, ¿ambeksï jatsia para xarhatani ante deksï intsïnhani tsípikua para méntkisï?
13 Ju je miáni eska enga nema perfektueuakia, no arhikuekasïndi eska intsïnhaaka tsípikua para méntkisï. Ju je eratsentani Adáni ka Ebani. Nájkirukaksï perfektuepka jatsisptiksï para xarhatani eskaksï kurhajchasïreenga Tata Diosï Jeobani paraksï úni intsïnhani tsípikua para méntkisï. Peru xáni no sési engaksï imeecha no uékapka kurhajchani (Rom. 5:12).
14 Eskachi na exekia, enga na nitamaakia 1,000 uéxurhini, iámindu imeecha engaksï Echerirhu irekaaka, perfektueuatiksïa. ¿I kʼuiripuechaksï apoiariua Tata Diosï Jeobaeri juramukuani para méntkisï? ¿Oksï máru ísï jámaa eska Adáni ka Eba engaksï no kurhajchapka Tata Diosïni nájkirukaksï perfektuepka? ¿Ambeksï uaa?
15, 16. a) ¿Kánksï uaa iámindu kʼuiripuecha xarhatani eskaksï no méni jurajkuaka Tata Diosïni? b) ¿Ambe úkuarhia últimu tsʼéjkukua jimbo?
15 Satanási 1,000 uéxurhini ónhakata jauati. Ka indeni tiempu jimbo nóteru nemani uaatia enganiarini. Peru enga na nitamaakia 1,000 uéxurhini, jurajkunhaati ka jánguarhintaati para támisï paani uánikuechani engaksï perfektueuakia. Enga inde ambe úkuarhiaka, iáminduechaksï jatsiati para xarhatani sinksï janhanharhisïni Tata Diosïiri nombrini ka apoiarini imeeri juramukuani (Jaŋ. 20:7-10). Seguni ambe engaksï uaaka, imeecheri nombricha uaati karakata pakarani para méntkisï libru tsípikuerirhu o nómbe.
16 Nóchi míteska namuniuaksï, joperuksï máru ísï jámaati eska Adáni ka Eba ka nóksï jiókuarhiati Tata Diosï Jeobaeri juramukuani. ¿Ambe úkuarhia imeecha jingoni? Jaŋaskuecha 20:15 arhisïndijtsïni: “Imeecha engaksï no exenhantaka karakata libru tsípikueri jimbo, imeechajtuksï kʼuanijpanhasti japondarhu enga méntku kúrhini jaka chpiri”. Jo, íksï no kurhandireecha kʼamajkunhaati para méntkisï. Peru sáno iámindu kʼuiripuecha engaksï perfektueuaka, uaatiksï orhepani uérakuni últimu tsʼéjkukuani. Ka imeecheri nombrichaksï karakata pakaraatia para méntkisï libru tsípikueri jimbo.
“ÚLTIMU JURHIATIKUECHANI JIMBO”
17. ¿Ambe arhinhaspi Danieli eska úkuarhini japiringa juchaari jurhiatikuechani jimbo? (Daniel 12:4, 8-10).
17 ¡Kánikuachi sési pʼikuarherasïnga eratsentani iámindu ambe enga úkuarhiaka sánderu orhepani! Peru ánjeli ma ístu jukaparhakua ambe aianguspti Danielini eska úkuarhipiringa juchaari jurhiatikuechani jimbo, engaksï jindeeka ʻúltimu jurhiatikuechaʼ (arhinta je Daniel 12:4, 8-10; 2 Tim. 3:1-5). Ánjeli arhispti: “Jurhimbiti jánhaskakua kánikua úkuarhintaati”. Ísï jimbo, Tata Diosïri ireta sánderu sési kurhanguapirindia profesiechani engaksï libru de Daniel jimbo jaka. Ka ístu ánjeli arhispti máteru ambe enga úkuarhini japiringa últimu jurhiatikuechani jimbo. Uandaspti: “No sési úriichaksï kánikua no sési jámaati ka iámindu no sési úriichaksï no kurhanguati”.
18. ¿Ambeksï úkuarhinchaa no ióni jimbo iámindu no sési úriicha?
18 Ini jurhiatikuechani jimbo, no sési úrichaksï úsïndi ambe engaksï imeecha uéjka (Mal. 3:14, 15). Peru no ióni jimbo, Jesúsi jusgariuauati imeechani engaksï ísïika eska chibuecha ka támu peerauati imeechani engaksï ísïika eska karichicha (Mat. 25:31-33). No sési úrichaksï no tsípiti pakaraati k’éri mískuarhitarhu nijtuksï tsíntaa paraksï irekani jimbanhi parhakpinirhu. Ka imeecheri nombrichaksï no karakata jauati librurhu “para miánhani” enga Malaquías 3:16 uandajka.
19. ¿Ambechi jatsiski para úni iásï, ka andi? (Malaquías 3:16-18).
19 Iásïchisï jatsika para xarhatani eskachi no imani grupu jingoni jarhaska engaksï no sési úriicha jaka (arhinta je Malaquías 3:16-18). Tata Diosï Jeoba tánaantaxati iámindu imeechani enga ísï exeajka eskaksï imeeriska, o imeechani enga ima kánikua jukaparharaajka. ¿A no eskachi uékasïnga indeni grupu jingoni jarhani?
¡Kánikuachi sési pʼikuarheraaka engachi exeaka eska Danieli, imeecha engachi jucha xénchaajka ka uánikua máteruecha, jauaraakaksï paraksï jatsini tsípikua para méntkisï! (Exe je párrafu 20).
20. ¿Ambe aiaminhaspi Danieli ka andijtsïsï uékani jakiia eska ísï úkuarhiaka?
20 Irekaxakachi jurhiatikuechani jimbo enga ambakiti ambe úkuarhini jaka. Peru no ióni jimbo, sánderu ambakiti ambe úkuarhiati. Niáraxatiia jurhiatikua enga iámindu no sési jásï ambe kʼamajkunhaaka. Tátsekua, exeakachi na enga úkuarhiaka ambe enga Tata Diosï Jeoba aiakupka Danielini. Ima arhispti: “Jauaraakari últimu jurhiatikuechani jimbo parari maiamunhantani” (Dan. 12:13). ¿Uékaxakijtsïa eska niáraaka ima jurhiatikua enga tsíntaaka Danieli ka imeecha engajtsï chá xénchaajka? Enga ísïika, jánguarhinta je parajtsï no méni jurajkuni Tata Diosïni, ka ísï chaari nombri karakata pakaraati libru tsípikueri jimbo enga Tata Diosï Jeoba karani jaka.
PIREKUA 80 Exe je na enga xáni sési kámpijka Jeoba
^ I jorhenguarhikua uandasïndi na engachi kurhangujkia iásï sánderu kʼéri jorhentperakuani enga Daniel 12:2, 3 uandajka. Exeakachi káni úkuarhia i jorhentperakua ka neechaksï partisipariua. Ístuchi exeaka na enga i jorhentperakua preparariuauaka imeechani engaksï Echerirhu irekaaka jiáni engaksï últimu tsʼéjkunhaaka, i ambe jiáni úkuarhiati enga Kristu na kʼamaraakia Juramuni Mili Uéxurhini.
^ Jamberi tsíntskua jenerasionicha jimbo úkuarhiati. Pori ejemplu, Tata Diosï Jeobaeri marhuaricha engaksï últimu jurhiatikuechani jimbo uarhika orhetaksï tsíntaati ka tátsekua máteru jenerasioni engaksï antesi uarhipka ka ísï nipapaati, astakaksï tsíntaaka iámindu imeecha enga Tata Diosï Jeoba miáuani jaka. Enga ísïiuaka, jimajkani imeecha engaksï orheta tsíntaaka uaatiksï eroantani imeechani engaksï míteapka ka engaksï orheta uarhipka eska imeecha. Biblia uandasïndi eska imeecha engaksï auandarhu tsíntajka, mándani arhisïngaksï tsíntani, jimbochisï újka uandani eska Echerirhu májkueni tsínhantaaka, ordeni jimbo (1 Kor. 14:33; 1 Cor. 15:23, TNM).
^ I eksplikasioni mójtakusïndi ambe enga uandajka kapitulu 17 librueri Prestemos atención a las profecías de Daniel ka ístu ambe enga uandajka rebista La Atalaya 1 de juliu 1987 anapu, pájinecha 21 a 25.
^ Joperu ari uandakuecha: imeecha “engaksï sési jámaka” ka imeecha “engaksï no káni sési jámaka” enga Hechos 24:15, TNM uandajka, ka “imeecha engaksï ambakiti ambe úka” ka “imeecha engaksï no sési ambe niátaka” enga Juan 5:29, TNM uandajka, arhikuekasïndi ambe engaksï úpka ante deksï uarhini ima kʼuiripuecha engaksï tsíntaaka.
