1. ¿Andijtsïnisï no ísku pakatajki engaksï kʼuiripuecha no újka mintsinharperani?

 SATANÁSIRI parhakpini jimbo, uánikua kʼuiripuechaksï no mítesti néni mintsikani. Méminduksï no sési pʼikuarherasïndi imani ambe jimbo engaksï újka imeecha engaksï kʼérati negosiuechani jatsiaka, politikuecha ka relijioniri orhejtsïkutiicha, ístu imani ambe jimbo engaksï újka imeecheri amiguecha, besinuecha ka asta imeecheri familiariicha. I ambe no jatsipirindi parajtsïni ísku pakatani. Biblia uandasptia eska “últimu jurhiatikuechani jimbo”, kʼuiripuechaksï no mintsinharhikuepiringa, chkuanderakua ambeksï uandapiringa ka eskaksï traisionarpepiringa, májkuenksï jámapirindi eska i parhakpini anapu diosï, enga no sáni jukanchaka eskachi mintsikaaka (2 Tim. 3:1-4; 2 Kor. 4:4).

2. a) ¿Nénchi uaa iámu mintsita jingoni mintsikani? b) ¿Ambe úpirini kurhamarhikuarhini nema?

² Joperuchi jurhimbiti kristianuechachi míteska eskachi uaaka iámu mintsita jingoni mintsikani Tata Diosï Jeobani (Jer. 17:7, 8). Seguruchi jarhaska eskajtsïni ima xénchasïnga ka eska no méni jurajkuauaka imeeri amiguechani (Sal. 9:10). Ístuchi uaaka mintsikani tata Jesukristuni jimboka ima íntspiska imeeri tsípikuani juchantsïni jimbo (1 Ped. 3:18). Ka míteskachi eskachi uaaka mintsikani ambe enga Biblia uandajka (2 Tim. 3:16, 17). Ísï jimbo, seguruchi jarhaska eskachi uaaka mintsikani Tata Diosï Jeobani, Jesúsini ka Bibliani. Peru jamberi nema úpirindi kurhamarhikuarhini sini uaa méntkisï mintsikaani kúnguarhikuarhu anapu erachichani. Enga mókuntskua jindeeka eska jo, ju je exeni andi.

3. ¿Náki kʼéri kóntperatachi jatsiski? (Markusʌ 10:29, 30).

³ Tata Diosï Jeobajtsïni kʼéri kóntperata ma íntskusti parachi kuenta úkuarhini imeeri marhuaricha jingoni engaksï interu parhakpini jaka. Ini ambe jimbochi úsïnga uánikua kóntperatechani jatsiani (arhinta je Markusʌ 10:29, 30). Iámu parhakpinirhu jarhastiksï  erachicha ka pirenchicha engaksï kánikua xénchajka Tata Diosïni ísï eska jucha ka engaksï jánguarhintajka kurhajchaani imeeri juramukuechani. Jamberi juchaari idioma, pʼindekuecha ka na engachi xukuparhajka, ménderueniiti, peru desde jiánchi ueenasïnga xénchaani erachichani engachi míteajka. Ka kánikuachi tsitisïnga májku kʼéri kómarhini ka kʼéri ambe arhini juchaari Taati auandarhu anapuni (Sal. 133:1).

4. ¿Andichisï uétarhinchaajki erachichani?

⁴ Iásï sánderu uétarhisïndi eskachi májku kʼéri jauaka juchaari erachicha jingoni. Imeechajtsïni jarhuatasïndi orhepani uérakuani uandanhiatechani (Rom. 15:1; Gal. 6:2). Ístu, uinhaperantasïndijtsïni parachi seguirini Tata Diosï Jeobani marhuakuni ka parachi seguirini imeeri amigueni (1 Tes. 5:11; Ebr. 10:23-25). Kánikuachi kómu pʼikuarherapiringa engajtsïni kúnguarhikua no jarhuatapiringa parachi úni andaani juchaari enemiguechani: Satanásini ka imeeri parhakpinini enga xáni no sési ambe újka. No ióni jimbo, Satanási ka imeecha engaksï imeeri jájki jimbo jaka, no sésiksï káuati Tata Diosïiri marhuarichani. Enga i ambe úkuarhiaka, kánikuachi agradesidu jauaka engaksï erachicha juchantsïni jingoni jauaka.

5. ¿Andiksïsï máru úkua jukanchajki erachichani mintsikaani?

⁵ Peru, máruksï úkua jukanchasïndi mintsikaani erachichani. ¿Andi? Jamberiksï aiangukuarhipti imeecheri ambe erachini ma ka í tátsekua máteruechani aianguani. O jamberi, nema aiakuapti ambe ma, peru no ísï úni eska na uandapka. O jamberi erachi ma úni o uandani ambe ma enga no sési pʼikuastaapka. Jiájkani, ¿ambejtsïni jarhuataa parachi sánderu mintsikaani máteruechani?

6. ¿Nénajtsïni jarhuatasïni uékperakua parachi sánderu mintsikaani erachichani? (1 Korintu 13:4-8).

⁶ Uékperakuajtsïni jarhuatasïndi parachi máteruechani mintsikaani. Primera a Korintu kapitulu 13, uandasïndi ambe enga újka ima enga uékpijka ka engajtsïni jarhuatajka mintsikaani máteruechani o parachi ménderu ueenani  mintsikaani (arhinta je 1 Korintu 13:4-8). Pori ejemplu, bersikulu 4 uandasïndi: “Ima enga uékpijka tekaantasïndi ka sési útspini”. Tata Diosï Jeobajtsïni tekaachintasïndi, nájkirukachi ménichani imani ambe újka enga ima no jaiapanhentajka. Ísï jimbo, juchajtuchi jatsiska para tekaakuantani juchaari erachichani engaksï niáraaka úni o uandani imani ambe engajtsïni no sési pʼikuastaaka o ikiatani. Ka bersikulu 5 ístu uandasïndi eska ima enga uékpijka, no ʻsóntku no sési exesïnga ambe engaksï máteruecha újkaʼ ka “nójtu pakarasïndi ikiatspini”. Nóchi uékasïnga ikiani pakarani o méntku miáni jarhani ambe engajtsïni erachicha úchika. Eclesiastés 7:9 uandasïndi eskachi no jatsiska para sóntku ikiani. Ísï jimbo, sánderu sésisti ísï úni eska Efesu 4:26 na uandajka: “Asï inchajtsïkue jurhiata ka chá útasï ikiani jarhani”.

7. ¿Nénajtsïni jarhuatasïni Biblieri prinsipiuecha engaksï Mateu 7:1-5 jimbo jaka, parachi sánderu mintsikaani erachichani?

⁷ Máteru ambe engajtsïni jarhuataaka sánderu mintsikaani erachichani, jindeesti ísï exeani eska Tata Diosï Jeoba na exeajka. Ima xénchaasïndi ka no méntku miáni jarhasïndi imeecheri pekaduechani. Ka juchajtuchi jatsipiringa para májkueni úni (Sal. 130:3). Enbesi de puru imani ambe exekuani jarhani engaksï no sési újka, jatsiskachi para exekuani imeecheri kualidadichani ka jánguarhintani imani ambe exekuani engaksï sési újka (arhinta je Mateu 7:1-5). Eratsesïngachi eskaksï imeecha uékasïnga ambakiti ambe úni ka no no sési ambe, jimboka ima enga uékpijka iámindu ambe jakajkusïnga (1 Kor. 13:7). Peru i ambe no arhikuekasïndi eska Tata Diosï Jeoba uékasïnga eskachi jirejiresï mintsikauaka máteruechani. Sánderu sési, erokuarhisïndi eskachi mintsikauaka jimbokaksï xarhataskia eskaksï mintsinharhikueska. *

8. ¿Ambejtsï uaa úni parajtsï sánderu mintsikaani máteruechani?

⁸ Tiempu uétarhisïndi parachi úni mintsikaani erachichani. ¿Ambejtsï uaa úni parajtsï úni mintsikaani máteruechani? Sési mítea je. Uandontskuarhi je imeecha jingoni tánguarhikuecharhu. Márku aianhpi je. Tekaakuanta je ka jurajku je eskaksïni xarhatacheaka eskajtsï uaaka mintsikaani. Engajtsï nótki sési mítejka nemani, jamberijtsï ueenani nójtsï xáni aiangukuarhiaka ambe ma, peru engajtsï sánderu míteni jauakia, sánderu fásiliuati aiangukuarhini na engajtsï pʼikuarherajka (Luk. 16:10). Peru, ¿ambejtsï uaa úni engajtsï nóteru mintsikajkia erachini ma? Asï sóntku eratsi je jarharini, jurajku je eska tiempu nitamaaka. Ka asï jurajku je eska ambe engaksï máru újka, uaaka eskajtsï nóteru mintsikauakia máteruechani. Ambe ma engajtsïni kánikua jarhuataaka, jindeesti exeani máru Tata Diosï Jeobaeri marhuaricheri ejempluni engaksï seguiripka mintsikaani máteruechani, nájkirukaksï no sési ambe úminhapka.

9. a) ¿Ambe úspi Ana nájkirukaksï no sési ambe niátapka imeecha enga Tata Diosï erakuapka paraksï orhejtsïkuni imeeri iretani? b) ¿Ambejtsï jorhenguarhisïni chá Anaeri ejemplu jingoni? (Exe je dibujuni).

⁹ Erachi ma enga responsabilidadichani jatsiaka, ¿úspi ambe ma engaksïni no sési pʼikuastapka? Enga ísïika Anaeri ejempluksïni uaati jarhuatani. Jiáni enga Ana irekapka, kʼéri saserdoti Elí jindeespti enga orhejtsïkuenga paraka Tata Diosï ísï kómarhinhapiringa eska ima na uéjka. Peru imeeri familia no ambakiti ejemplu máespti. Nájkirukaksï imeeri uájpeecha saserdotipka, ísku jándikua ambeksï niátasïreendi ka Elí no xáni jánguarhintasïreendi jurhimberantaani. Nájkiruka ísï úkuarhini japka, Tata Diosï Jeoba no sóntku euantaspti Elíni imeeri responsabilidadini. Peru, ¿ambe úspi Ana? Nájkiruka Elí útasï kʼéri saserdotiipka, Ana seguirispti tabernakulurhu nirani para kʼéri ambe arhini Tata Diosïni. Enga kánikua  kómu pʼikuarheraparini kómarhini japka, Elí jirejiresï eratsespti eska Ana kauirixapka ka uinhamarhikuparini uandajpaspti (1 Sam. 1:12-16). Ana aiakuspti Tata Diosï Jeobani eska enga kánguarhipiringa sapini ma, tabernakulurhu pápiringa. Ka ísï úspti eska na uandapka nájkiruka Elí exeni japiringa imeeri uájpani (1 Sam. 1:11). ¿Uétarhisïreeni eskaksï Elíri uájpeecha jurhimberanhantapiringa? Jo. Ka Tata Diosï Jeoba ísï úspti jiáni enga sánderu sési japka (1 Sam. 4:17). Peru ístu Tata Diosï íntskuspti Anani sapini ma, Samuelini (1 Sam. 1:17-20).

10. ¿Néna xarhataspi Dabidi eska seguirixapka mintsikaani máteruechani?

¹⁰ ¿Niáraskiksïni traisionarini chaari amigu ma? Enga ísïika eratsenta je rei Dabidiri ejempluni. Enga imeeri uájpa Absalóni uékapka reinuni euani, Aitofeli enga Dabidiri amiguepka jarhuataspti Absalónini paraka reipiringa. Dabidi kánikua no sési pʼikuarherapti enga mítepka eska imeeri uájpa ka ima enga imeeri amigu arhikuarhienga, nóteruksï imani jingonispkia. Nájkirukaksï Dabidini traisionaripka, inde ambe no úspti eska ima nóteru mintsikaapiringia máteruechani. Ima seguirispti mintsikani Usáini, ambakiti amigu ma enga no apoiaripka Absalónini. Usái xarhataspti eska ambakiti amigu máespka jimboka jarhuataspka Dabidini, nájkiruka indeni ambe jimbo úpiringa uarhini (2 Sam. 17:1-16).

11. ¿Néna xarhataspi Nabaliri jántspiri ma eska mintsikaasïreenga máteruechani?

¹¹ Ístu eratsenta je Nabaliri jántspiriri ejempluni. Nabali israelita máespti enga kánikua jatsikuarheripka. Dabidi ka ima achamasïicha engaksï imani jingoni jámeenga, kánikuaksï sési kaaspti Nabaliri jántspirichani ka kuájchakuasptiksï. Ísï tátsekua, Dabidi kurhakuspti Nabalini eska íntsaapiringa tʼirekua sáni imeeri jántspirichani. Nabali no uékaspti ísï úni ka Dabidi xáni ikiaspti enga uandapka eska uándikuapiringa iámindu tatakechani engaksï Nabaliri kʼumanchikuarhu anapuepka. Nabaliri jántspiri ma aianguspti ambe enga úkuarhini japka Abigaílini enga Nabaliri témbeepka. Inde jántspiri mítespti eska enga Abigaíli úpiringa ambe ma, ima úpiringa tsípiti parakani. Ka no sïpakuarhispti. Sánderu sési, mintsikaspti eska Abigaíli úpiringa sési peentani indeni uandanhiatani, jimboka ima ísï mítekateespka komueska uarhiiti ma enga jánhastiipka. Ambe enga tátsekua úkuarhipka xarhataspti eska jántspiri sési úspka enga ísï mintsikapka imani. Abigaíli balori jukantaspti ka úspti eska Dabidi no úpiringa  ambe enga eratsetini japka úni (1 Sam. 25:2-35). Abigaíli ístu mintsikaspti eska Dabidi no no sési ambe úpiringa.

12. ¿Néna xarhataspi Jesúsi eska mintsikaasïreenga imeeri chúxapatiichani nájkirukaksï ménichani no sési ambe ueenga?

¹² Jesúsi mintsikaaspti imeeri chúxapatichani, nájkirukaksï no ueenga iámindu ambe sési úni (Juanu 15:15, 16). Engaksï Santiagu ka Juanu kurhakupka ambakiti lugari ma Jesúsini imeeri Reinurhu, ima no kurhamarhiaspti ambe jimboksïsï marhuakuni japi Tata Diosï Jeobani, nijtu arhiapi eskaksï nóteru jindeepiringia imeeri apostolicha (Mar. 10:35-40). Ka ima chúri enga Jesúsi jupinhapka, iámindu imeeri chúxapatiichaksï jurajkuspti (Mat. 26:56). Joperu Jesúsi seguirispti mintsikaani. Nájkiruka mítepka eskaksï no méntkisï sési úsïreenga ambe ma, xénchaaspti “asta kʼamarhutani jamberi” (Juanu 13:1). Ka enga Jesúsi na tsíntapkia arhiaspti imeeri 11 apostolichani engaksï no méni jurajkupka, eskaksï orhejtsïkupiringa ánchikuarhitani paraksï imeeri chúxapatiichani uaani ka paraksï kuidariuani imeeri chúxapatiichani enga ima xáni xénchauenga (Mat. 28:19, 20; Juanu 21:15-17). Ka kánikua sési úspti enga ísï mintsikaapka ini achamasïchani nájkirukaksï ícha no perfektuepka. Kánikuaksï sési marhuakuspti Tata Diosïni asta jiáni jamberi engaksï uarhipka. Eskachi na exekia, Ana, Dabidi, Nabaliri jántspiri, Abigaíli ka Jesúsi, mintsikaasptiksï kʼuiripuechani engaksï imperfektuepka. Indeecheri ambakiti ejemplujtsïni jarhuatasïndi parachi juchajtu májkueni úni.

13. ¿Andichisï úpirini úkua jukanchani mintsikaani máteruechani?

¹³ ¿Aianguskichi juchaari ambe erachini ma ka tátsekuachi míteni eska i máteruechani aianguaska? Inde ambejtsïni úpirindi kánikua no sési pʼikuastani. Ma xanhari pirenchi ma aiangukuarhispti imeeri ambe orhejtsïkutini ma mintsikaparini eska ima no nemani aiangupiringa. Pauandikua orhejtsïkutiri témba uandajpaspti pirenchi para uinhaperantani ka ísï úspti jimboka orhejtsïkuti aianguspka pirenchiri ambe. Ka ini ambe jimbo, pirenchi nóteru mintsikasïrendia orhejtsïkutini. Peru pirenchi jarhuajperata kurhajkuarhispti. Máteru orhejtsïkuti jingoni uandontskuarhespti ka ima jarhuataspti paraka pirenchi úpiringa ménderu mintsikaani orhejtsïkutichani.

14. ¿Ambe jarhuataspi erachini ma para ménderu mintsikaani erachichani?

¹⁴ Erachi ma ióni ikiakuaspti tsimani orhejtsïkutiichani jimboka ima eratsesïreenga eskaksï no mintsinharhikuespka. Peru tátsekua miántaspti ambe enga uandapka erachi ma enga ima kánikua janhanharhienga. Ari uandakuechaksï kánikua ísku pakataspti: “Juchaari enemigu Satanásisti ka no juchaari erachicha”. Erachi eratsentani pakaraspti ini ambe ka kómarhispti Tata Diosïni paraka jarhuatapiringa. Ka tátsekua, sési pájperantaspti imani tsimani orhejtsïkuticha jingoni.

15. ¿Andisï tiempu uétarhijki parachi ménderu úni mintsikaani máteruechani? Uandanta je Greteriri ejempluni.

¹⁵ ¿Ménisïjtsï niáraski kúnguarhikuarhu euanhantani pribilejio ma? Inde ambeksïni úpirini kánikua no sési pʼikuastani. Ju je exeni ambe engaksï nitamakuarhipka Grete ka imeeri amamba. Íksï tsimani pirenchicha sési marhuakuxapti Tata Diosï Jeobani uéxurhini 1930 jimbo ísï. Pirenchichaksï Alemania irekaspti, nani enga gobiernu nasi no jurajpienga parachi juchaari ánchikuarhitani úni. Greteri arhinhaspti eska jarhuajpepiringa kopiechani uaani rebisteeri Aianhpiri parakaksï erachicha úpiringa jatsiani. Peru erachichaksï kuenta íntskukuarhespti eska Greteriri taati jémba no tsitisïreenga jurhimbikueri ambe. Ka kánikuaksï chéspti jimbokaksï eratsesïreenga eska Greteriri taati jémba úpiringa aianguni gobiernuni ambe enga kúnguarhikua úni japka. Ísï jimbo, euantasptiksï Greterini indeni responsabilidadini. Peru Grete ístu máteru uandanhiatechani jatsiaspti. Enga Segunda Guerra Mundiali úkuarhini japka, erachichaksï no íntsaasïreendi  rebistechani Greterini ni amambani jimbokaksï no mintsinharhiasïreenga, nijtuksï uandajpaueni engaksï xanharu jimbo exeauenga. I ambe kánikua no sési pʼikuastaspti Greterini ka tiempu uétarhispti paraka úpiringa puákuantaani erachichani ka ménderu mintsikaani. Tiempu jingoni, Greteri kurhanguspti eska Tata Diosï Jeoba puákuantaspkia erachichani ka eska imajtu jatsispka para májkueni úni. *

16. ¿Andichisï jatsi para jánguarhintani ménderu mintsikaani máteruechani?

¹⁶ Engajtsï chájtu májkueni ambe nitamanchaka eska inde erachicha, jánguarhinta je parajtsï ménderu mintsikaani erachichani. Jamberi tiempu uétarhiati peruksïni kánikua marhuacheati engajtsï ísï úska. Ju je eratsentani ini ejempluni: engajtsïni tʼirekua ma no sési úchika, inde ambe no úsïndi eskachi nóteru ueekaakia tʼireni. Sánderu sési, jingontkuchi jámasïnga imani ambe jingoni engachi arhajka. Sáno májkueni, ju je no jurajkuni eska ambe enga úka erachi ma, uaaka eskachi nóteru ma erachini mintsikaakia jimbokachi jucha míteska eskaksï imeecha imperfektueska. Engachi ménderu mintsikaaska erachichani, sánderuchi sési pʼikuarheraaka ka jarhuatatijtsïni exeni ambe engachi jucha uaaka úni paraka kúnguarhikuarhu mintsikperanhaaka.

17. a) ¿Andisï xáni jukaparhakue eskachi mintsikauaka máteruechani? b) ¿Ambechi exea máteru jorhenguarhikua jimbo?

¹⁷ Satanásiri parhakpini jimbo no nema mintsinharperasïndi. Peru juchaari familiarhu enga interu parhakpinirhu jaka, iáminduechachi mintsinharperasïnga jimbokachi kánikua xénchperasïnga. Ini ambe jimbo, iáminduechachi sési pʼikuarherasïnga ka májku kʼérichi jarhaska. Ka imani jurhiatikuecha jimbo enga xáni no sési jánhaskuarhiaka, mintsikaani máteruechani, kuájchakuatijtsïni. Peru, ¿ambechi uaa úni enga nema úka ambe ma engachi jimbo nóteru mintsikpijkia? Uaakachi ménderu mintsikaani máteruechani engachi ísï exeska ambe ma eska Tata Diosï Jeoba na exejka, engachi úska ambe engaksï Biblieri prinsipiuecha uandajka, engachi mintsita jingoni xénchaaska juchaari erachichani ka engachi jorhenguarhiska ima kʼuiripuecheri enga Biblia uandaajka. Engachi ísï úska, ambakiti amiguechanchi jatsiauaka engaksï “sánderu uékpijka eska ermanu ma” (Prov. 18:24). Peru, no solu uétarhisïndi eskachi mintsikauaka máteruechani, juchaari erachichajtuksï jatsisti para míteni eskajtsïni uaaka mintsikani. Máteru jorhenguarhikua jimbo, exeakachi ambechi uaa úni parajtsïni máteruecha mintsikani.