Ju je exeni ambe enga Biblia uandajka.

Hechos 24:15 TNM, uandasïndi eskaksï tsíntaaka “imeecha engaksï sési jámaka ka ístu imeecha engaksï no káni sési jámaka”. Imeecha engaksï sési jámaka, imeechestiksï engaksï kurhajchapka Tata Diosïni ante deksï uarhini. Ísï jimbo, imeecheri nombrichaksï karakata jarhasti libru tsípikuerirhu (Mal. 3:16). Indeni grupu jingoni engaksï no káni sési jámaka, ístuksï imeecha jarhasti engaksï no andajkuarhika sési míteni Tata Diosï Jeobani ante deksï uarhini. Ísï jimbo, imeecheri nombrichaksï no karakata jarhasti libru tsípikuerirhu.

Juan 5:28, 29, TNM ístu uandasïndi indeni tsimani grupuechani enga Hechos 24:15, TNM, uandajka. Jesúsi uandasïndi eska “imeecha engaksï ambakiti ambe úka tsíntaakaksï paraksï irekani; ka imeecha engaksï no sési ambe niátaka tsíntaatiksï paraksï jusgarinhani”. Imeecha engaksï sési jámaka, ambakiti ambeksï úspti ante deksï uarhini. Ísï jimbo, tsíntaatiksï paraksï irekani jimboka imeecheri nombricha útasï karakata jarhaska libru tsípikueri jimbo. Joperu imeecha engaksï no káni sési jámaka, no sési ambeksï úspti ante deksï uarhini. Ísï jimbo, imeechaksï tsíntaati paraksï jusgarinhani. Ka iicheeri nombrichaksï nótki karakata jarhasti libru tsípikuerirhu. Ka i kʼuiripuechaksï ma tiempu jimbo exenhaati na engaksï jásï kʼuiripueka. Indeni tiempu jimbo, sésikuaksï jatsiati paraksï jorhenguarhini Tata Diosï Jeobaeri ambe ka paraka imeecheri nombri karanhaaka libru tsípikueri jimbo.

Jaŋaskuecha 20:12, 13 uandasïndi eskaksï iámindu imeecha engaksï tsíntaaka jatsiatiksï para kurhajchani ambe enga karakata jauaka libruecharhu, jimbanhi leicharhu engaksï jimbanhi parhakpinirhu jauaka. Ka imeecha engaksï no kurhajchauaka ini leichani, kʼamajkunhaatiksï (Is. 65:20).

Daniel 12:2 uandasïndi eska máru imeecha engaksï kʼuíni jaka uarhikuarhu, tsínharhiakaksï paraksï “jatsini tsípikua para méntkisï ka máteruecha paraksï kʼuratsetanhani ka méntkisïksï no sési exenhani”. I bersikulu uandasïndi ambe engaksï úkuarhinchaaka imeecha engaksï tsíntaaka: uaatiksï jatsini “tsípikua para méntkisï” o para “méntkisïksï no sési exenhani”. Ísï jimbo, enga na nitamakia 1,000 uéxurhini, máruksï intsïnhaati tsípikua para méntkisï ka máteruechaksï kʼamajkunhaati para méntkisï (Jaŋ. 20:15; 21:3, 4).

Uaakachi terukutantani ini tsimani grupuechani engaksï tsíntaaka, imani kʼuiripuecha jingoni engaksï uéjka máteru paisi jimbo irekani. Imeecha engaksï sési jámaka, ísïistiksï komueska ima kʼuiripuecha engaksï permisu ma intsïnhajka paraksï nirani máteru paisi jimbo ánchikuarhini o irekani ka jatsiasïndiksï máru jima anapu derechuechani ka jurajkunhasïndiksï paraksï úni máru ambe. Peru, imeecha engaksï no káni sési jámaka, ísïistiksï eska ima kʼuiripuecha engaksï permisu ma intsïnhajka paraksï nomasi nirani miiuni o paraksï jima pakarani ma ratu. Paraksï seguirini jima irekani, jatsistiksï para xarhatani eskaksï kurhajchaasïnga jima anapu juramukuechani. Sáno májkueni, parakaksï uaaka seguirini irekani Paraisurhu imeecha engaksï no káni sési jámaka, jatsiatiksï para kurhajchaani Tata Diosï Jeobaeri leichani ka xarhatanksï eskaksï sési jámasïnga. No arhiparini na engaksï jásï permisu intsïnhajka imeecha engaksï máteru paisirhu mótsijka, tiempu jingoni, máruksï sésikua intsïnhasïndi paraksï jima pakarani irekani, peru máteruechaksï petanhantasïndi. Ka paraksï úni pakarani o nómbe, exenhasïndi na engaksï jámaka i kʼuiripuecha imani paisi jimbo. Ka májkueni úkuarhiati iámindu imeecha jingoni engaksï tsíntaaka. Paraksï úni pakarani jimbanhi parhakpinirhu o nómbe, exenhaati sinksï i kʼuiripuecha kurhajchasïni Tata Diosïni ka ístu exenhaati na engaksï jámajka.

Tata Diosï Jeoba no solu pʼamojpesïndi, sino ístu iámindu ambe jurhimbikua jingoni úsïndi (Deut. 32:4; Sal. 33:5). Ima xarhataati na enga xáni xénchpejka enga tsítantauaka imeechani engaksï sési jámaka ka ístu imeechani engaksï no káni sési jámaka. Peru ístu erokuarhiati eskaksï iáminduecha kurhajchauaka imeeri ambakiti juramukuechani engaksï uandajka ambe enga sési jaka ka ambe enga no sési jaka. Solu imeechajkuksïsï uaati jimbanhi parhakpinirhu pakarani irekani engaksï xénchaaka Tata Diosïni ka engaksï kurhajchauaka imeeri juramukuechani.