Eska na arhijka 1 Korintu 15:8, Pablu uandaspti: “Últimu úni jámani jíndeni xarhachintaspti komueska ma sapichuni enga kánguarhinhajka enga nótki niárajka tiempu”. Ixú Pablu imani jurhiatikuani uandaxapti enga jánhaskakua ma jimbo exepka Jesúsini auandarhu. Ióntkichi uandasïreenga eska i ambe arhikuekasïreenga eska Pablu sésikua intsïnhaspka para andajpenuni, kánikua tiempu ante de auandarhu ueenani tsíntskua jarhani. Joperu iásï engachi sánderu sési jorhenguarhikia ini karakatani, uétarhisïndi eskachi mójtakuaka na engachi kurhanguenga.

Ísïisti, ini karakatani jimbo Pablu uandaxapti ambe enga úkuarhipka jiáni enga ima kristianu úkuarhipka. Peru ¿ambe arhikuekaxapi enga uandapka eska ‘kánguarhinhaspka enga nótki niárani japka tiempu’? Úpirindi mámaru ambe arhikuekani.

Na enga Pablu kristianu úkuarhipka ísku pakataspti jimboka ma repentku úkuarhispka. Sáno méntkisï enga charhaku ma andajpenujka enga nótki tiempuejka, ma repentku úkuarhisïndi. Enga Saulu, enga tátsekua niárapka arhinhani Pablu, nirani japka Damasku para jima anapu kristianuechani no sési kaani, no erokuarhixapti jánhaskua ma jimbo Jesúsini exeni enga ima tsíntapkia auandarhu. Peru no Pablujkusï ísku pakarapti enga ma repentku kristianu úkuarhipka, ístu Damasku anapu kristianuechaksï ísku pakaraspti indeni ambe jimbo. I ambe enga Pablu nitamakuarhipka xáni kʼéri ambeespti enga niárapka jamberi máru jurhiatikuecha siegu pakarani (Uku. 9:1-9, 17-19).

Nótki tiempuespti paraka kristianu úkuarhipiringa. Uandakua griegu enga ísï tradusirikuarhijka komu ‘sapichu ma enga kánguarhinhajka enga nótki niárajka tiempu’ ístu úpirindi tradusirikuarhini komu “nema enga andajpenujka jiáni enga nótki jatsika para andajpenuni”. Traducción Kadosh Israelita Mesiánica de estudio ísï tradusirisïndi: “Jiáni andajpenuska engani nótkini jatsipka parani andajpenuni”. Enga Pablu kristianu úkuarhipka, Jesúsi tʼuini kʼuanhatsentasptia auandarhu. Pablu no exespti Jesúsini enga tsíntapkia ka enga auandarhu karhanchentani japka, ísï eskaksï imeecha na exepka enga Pablu máteru bersikuluechani jimbo uandaajka (1 Kor. 15:4-8). Nájkiruka Pablu no erokuarhini japka Jesúsini exeni, intsïnhaspti sésikua para exeni, nájkiruka ísï xarhareenga enajki nóteru tiempuepia para ísï úni.

Kaxumbikua jingoni uandaxapti imeeri ambe. Máru espesialistechaksï uandasïndi eska ambe enga Pablu uandapka ini karakata jimbo jindeespka para no kʼéri exekuarhini. Enga Pablu indeni eratsekua jingoni karapka, jiájkani jiókuarhixapti eska no jukanchaspka apostoli máeni. Jimboka ístu uandaspka: “Ji sánderu sapichitu ambeeska ka eska iámindu apostoliicha engani no jukanchaka arhinhani ma apostoli, jimbokani no sési kaasïreenga Diosïiri tánguarhikuarhu anapuechani. Peru Diosïiri kóntperatani jimbo andajkuarhiskani ísï jindeeni eskani na jindeekia” (1 Kor. 15:9, 10).

Jimajkani eskachi na exekia, Pablu arhikuekani japti na enga ísku pakatapka enga Jesúsi ma repentku xarhakupka, ístu enga kristianu úkuarhipka nájkiruka no indeni ambe erokuarhini japka o jimboka exespka Jesúsini nájkiruka ima no jukanchapka exeni. Ambe uéjki arhikuekani, inde ambe enga Pablu nitamanchapka kánikua jukaparhakuespti para ima. Inde ambe xarhatakuspti eska Jesúsi tsíntaspka. Jimbosï mémindu uandanteendi indeni ambe enga máteruechani aianguani jarheenga Jesúsiri tsíntskueri ambe (Uku. 22:6-11; 26:13-18).