“Jingontku je, jimbokajtsï no míteska káni o na jatini” (MATEU 25:13).

“Xeparini ka jingontku je [...] jimbokajtsï no míteska na enga jatini niáraaka ima jurhiatikua” (MARKUSʌ 13:33).

Ísï jimbo, no nema mítesti káni enga kʼamajkunhaaka i parhakpini, joperu Tata Diosï jatsikutixati “jurhiatikua ka ora” enga kʼamajkunhaaka iámindu no sési jásï ambe (Mateu 24:36). ¿Arhikuekasïni i ambe eskachi no uaaka míteni sini nóteru ióni kueratajkia para parhakpini kʼamarani? Nómbe. Tata Jesukristu arhiaspti imeeri chúxapatichani eskaksï exepiringa máru ambe enga xarhatapiringa eska nóteru ióni jimbo kʼamajkunhapiringia iámindu no sési jásï ambe.

Ambe enga úkuarhini japiringa xarhatapirindi eska “kʼamarani jámapiringia i tiempu”. Tata Jesukristu uandaspti: “Ma nasioni anapuecha jauaraa[ti] paraksï uarhiperani máteru nasioni anapuechani jingoni, ka ístu ma juramukuarhu anapuecha máteru juramukuarhu anapuechani jingoni, ka jauati [...] kʼarhingua ambe, ka naninterkisï jencheati” (Mateu 24:3, 7). Ka ístu uandaspti eskaksï japiringa “pʼamenchakuecha” (Lukasʌ 21:11). ¿Úsïntsï exeni eska ísï úkuarhixaka eska tata Jesukristu na uandapka?

Iásï uánikua kʼuiripuechaksï no sési nitamakuarhisïndi guerrecha, kʼarhingua, jénchekuecha ka pʼamenchakuecha jimbo engajtsïni méntku no sési úchini jarhajka. Pori ejemplu, 2004 jimbo, jini oseanu Índico kʼéri jénchakua ma úspti eska tsunami ma úkuarhipiringa enga uándikuapka ma 225,000 kʼuiripuechani. Tanimu uéxurhini jimbo, pʼamenchakua COVID-19 jukari 6.9 miioni kʼuiripuechani uándikuasti iámu parhakpinirhu. Tata Jesukristu uandaspti eska i jásï ambe úkuarhini japiringa enga na niárani japiringia jurhiatikua para kʼamajkunhani iámindu no sési jásï ambe.

Biblia uandasïndi eska ante de parhakpini kʼamarani, japiringa tiempu ma enga arhinhapiringa “últimu jurhiatikuecha” (2 Pedru 3:3, 4). Eska na arhijka 2 Timoteo 3:1-5, últimu jurhiatikuechani jimbo kʼuiripuechaksï sánderu no sési jámapirindia (exe je rekuadruni “ Ante de parhakpini kʼamarani”). ¿Exesïntsï eskaksï ini jurhiatikuecha jimbo kʼuiripuechaksï imajkumindu pendienti pákuarhisïnga, eskaksï atajpini jámasïnga ka sánderuksï sentabuni tsitini ka nóksï sési kaani máteruechani? Í ambejtu xarhatasïndi eska nóteru ióni jimbo parhakpini kʼamajkunhaakia.

¿Na xáni ióndaa kʼamarani últimu jurhiatikuecha? Biblia uandasïndi eska no ióndaaka. Tátsekua, Tata Diosï kʼamajkuauati imeechani engaksï “ikichakua újka parhakpinini” (Jaŋaskuecha [Apocalipsis] 11:15-18; 12:12).

Tata Diosï uandastia káni enga jindeuaka ka jandora enga kʼamajkuaka iámindu no sési jásï ambe (Mateu 24:36). Joperu jarhasti sánderu ambe: Tata Diosï no uékasïndi “eska nema tsïncheaka [o kʼamajkunhaaka]” (2 Pedru 3:9). Ísï jimbo, jurajkuxatijtsïni parachi míteni ka kurhajchani. ¿Andi? Jimboka ima uékasïnga eskachi tsípiti pakaraaka enga parhakpini kʼamajkunhaaka ka eskachi irekaaka jimbanhi parhakpinirhu ma enga paraisu máeuaka.

Tata Diosï jánguarhintaxati parakaksï iámindu kʼuiripuecha jorhenguarhiaka Biblieri ambe paraksï míteni ambe engaksï jatsika para úni, paraksï úni irekani jimbanhi parhakpinirhu enga Tata Diosïri Reinu juramuni jauaka. Tata Jesukristu uandaspti eska ambakiti aianhperakua Tata Diosïri Reinueri aianhpinhapiringa “iápuru parhakpinirhu” (Mateu 24:14). Interu parhakpinirhu, Jeobaeri testiguechaksï kánikua joperu kánikua tiempu úrasïndi paraksï aianhpini ka jorhentpini ambakiti ambe enga Biblia uandajka. Tata Jesukristu uandaspti eska iámu parhakpinirhu aianhpinhapiringa ante de parhakpini kʼamarani.

Jorhenguarhiskachi eskaksï kʼuiripuecheri juramukuecha nóteruksï ióni jauakia. Joperu ambakiti ambe, jindeesti eskachi uaaka tsípiti pakarani enga parhakpini kʼamajkunhaaka ka eskachi uaaka Paraisurhu ma irekani enga Tata Diosï aiatspika. Máteru jorhenguarhikuarhuchi exeaka ambe engachi jatsika para úni parachi úni irekani jimbanhi parhakpinirhu.