¡No ióni jimbo jimbanhi parhakpini ma jimbochi irekaakia!
Tata Diosï kueraasti Echerini parakaksï kʼuiripuecha engaksï kurhajchajka, ixú irekaaka para méntkisï (Salmo 37:29). Ísï jimbosï peeraapti orheta kʼuiripuechani, Adáni ka Ebani, jardini de Edénirhu ka arhiaspti imeechani ka imeecheri uájpeechani eskaksï ánchitapiringa Echerini ka eskaksï kuidaripiringa (Génesis 1:28; 2:15).
Iásï i Echeri no ísï jarhasti eska Tata Diosï na eratsekata jatsipka. Joperu Tata Diosï útasï májkueni eratsexati úni. ¿Ambe uaa paraka i Echeri paraisu máeuaka? Eskachi na exekia Tata Diosï no kʼamajkuati Echerini, sánderu sési, uaati eskaksï ima kʼuiripuecha engaksï imani kurhajchaaka ixúksï irekaaka. ¿Néna irenhaa Echerirhu enga Tata Diosï uaaka ambe enga aiatspika?
Juramukua ma enga interu parhakpinirhu juramuaka
No ióni jimbo Tata Diosïri Reinu enga auandarhu jaka, juramuati interu parhakpinirhu ka iámindu kʼuiripuechaksï tsípikua jingoni irekaati, pínandikua jingoni ka sésiksï pʼikuarheraati imeecheri ánchikuarhita jingoni. Tata Diosï, tata Jesukristuni erakusti parajtsïni juramuchini. Ima no ísïisti eska parhakpinirhu anapu juramuticha. Tata Jesukristu méntkisï uékasïndi eskaksï sési jauaka máteruecha. Ima uékperakua jingoni juramuati, méntkisï sési káuati máteruechani, jurhimbikua ka pʼamojperakua jingoni (Isaías 11:4).
Iáminduechaksï sési pájperaati interu parhakpini
No arhiparini nani engachi anapueuaka o na engachi jáxeaka iáminduechachi sési pájperaaka (Jaŋaskuecha [Apocalipsis] 7:9, 10). Iámindu kʼuiripuecha engaksï Echerirhu irekaaka xénchaatiksï Tata Diosïni ka ístuksï mándani arhini xénchperaati. Iáminduechachi márku ánchikuarhiaka ka pínandikua jingoni paraka úkuarhiaka ambe enga Tata Diosï eratsekata jatsikia: kuidarini ini Echerini enga juchaari kʼumanchikueka (Salmo 115:16).
Nóteru no sési jánhaskuarhiatia klima jimbo ka kʼuiripuecha ka animalicha pínandikua jingonksï irekaati
Enga Tata Diosïri Reinu juramuni jauakia Echerini, Tata Kueraajpiri nóteru jurajkuati eska no sési jánhaskuarhiaka klima jimbo (Salmo 24:1, 2). Enga tata Jesukristu Echerirhu japka ka enga anhaxustapka kʼéri janikua ma, xarhataspti ambe enga uaaka Tata Diosïri uinhapikua jingoni (Markusʌ 4:39, 41). Engajtsïni Kristu juramuchini jauakia, nóteru nema chéatia eska no sési jánhaskuarhiaka Echerirhu desastre naturali ma jimbo. Ístu, Tata Diosïri Reinu uaati eskaksï kʼuiripuecha ka animalicha márku irekaaka pínandikua jingoni ka eska nóteru nema no sési úkuakia Echerini (Oseas 2:18).
Nóteru nema pʼamenchaati ka iáminduechaksï jatsikuarhiati tʼirekua
Iáminduechachi sési jauaka, nóteru nema pʼamenchaati, tʼarhepini ni uarhini (Isaías 35:5, 6). Sési jásï lugari ma jimbochi irekaaka májkueni eska Adáni ka Eba. Jimbanhi parhakpinirhu, Echeri kánikua tʼirekua íntspiati ka iáminduechachi jatsikuarheaka uánikua ambe parachi arhani, ísï eska naépka jardini de Edénirhu (Génesis 2:9). Paraisurhu úkuarhiati ambe enga Tata Diosï aiakupka ióntki anapu ireta Israelini: “Auakajtsï tʼirekua astakajtsï uiniarhaaka” (Levítico 26:4, 5).
Pínandikua jauati ka nóteru nema chétapu jingoni irekaati
Enga Tata Diosï juramuni jauakia parhakpinirhu, pínandikua jauati iámu Echerirhu, nóteru nema no sési kánhaati ka uékperakua jingonksï kámberaati iáminduecha. Nóteru jauatia guerrecha, nóteru nema no sési káuati máteruechani nomasi jimboka juramukua jatsiska ka iáminduechachi jatsikuarheaka ambe engachi uétarhinchajka. Biblia aiatspesïndi: “Mándani kʼuiripuechaksï uaxandukuati jima enga ubasï jukajka ka jima enga jigusï jukajka, ka no nema chérauati” (Miqueas 4:3, 4).
Iáminduechaksï jatsikuarheauati kʼumanchikua ka ánchikuarhita enga sési pʼikuastauaka
Iáminduechaksï jatsikuarheati kʼumanchikua ma ka nóteruksï chéatia eska nema euakuarhiauaka ka iáminduechachi sési pʼikuarheraaka imani ambe jingoni engachi uaaka. Ísï jimbo, Biblia uandasïndi eska iámindu imeecha engaksï jimbanhi parhakpinirhu irekaaka “nóksï xáni ísku ánchikuarhiaka” o para no ma ambe (Isaías 65:21-23).
Sánderu ambakiti jorhenguarhikua
Bibliajtsïni aiachisïndi: “Echeri meru uinia[ti] Tata Diosï Jeobaeri mímixekua” (Isaías 11:9). Jorhenguarhiakachi juchaari Kueraajpiriri ambe enga xáni jánhastiika ka imeeri xáni ambakiti kueraakateri ambe. Nóchi úraaka ambe engachi jorhenguarhiaka parachi armechani uaani o parachi máteruechani no sési úkuani, sino parachi pínandikua jingoni irekani ka parachi kuidarini Echerini (Salmo 37:11; Isaías 2:4).
Tsípikua para méntkisï
Tata Diosï kánikua jánguarhintasti para prepararini ini Echerini jimboka uékasïnga eskachi ixú irekaaka para méntkisï ka eskachi kánikua tsípikua jingoni irekuarhiaka pauani pauani (Salmo 37:29; Isaías 45:18). Para ísï úkuarhini, Tata Diosï “kʼamajkuati uarhikuani para méntkisï” (Isaías 25:8). Ka Biblia aiatspesïndi eska “nóteru jauakia uarhikua ka ni uandanhiata ka nóteru nema uéraati o pʼamenchani” (Jaŋaskuecha 21:4). Tata Diosï sésikua íntskuauati paraksï irekani para méntkisï imani kʼuiripuechani engaksï tsíntaaka jimbanhi parhakpinirhu ka ístu imeechani engaksï tsípiti pakaraaka jiáni enga ima kʼamajkuaka iámindu no sési jásï ambe (Juanu 5:28, 29; Ukuecha [Hechos] 24:15).
Iásï, uánikua kʼuiripuechaksï prepararikuarhixatia paraksï jimbanhi parhakpinirhu irekani enga Tata Diosïri Reinu juramuni jauakia Echerirhu. Nájkirukaksï pekadorika, kánikuaksï jánguarhintasïndi paraksï ima jásï kʼuiripueni enga Tata Diosï uéjka eskaksï irekaaka jimbanhi parhakpinirhu. ¿Nénaksï úsïni i ambe? Míteparini Tata Diosï Jeobani ka ístu imani enga ima axaka, tata Jesukristuni (Juanu 17:3).
Nóteru ióni kueratasïndia paraka i parhakpini kʼamakurhiaka. Engajtsï uéjka míteni ambejtsï jatsika para úni parajtsï tsípiti pakarani ka parajtsï ísï úni irekani jimbanhi parhakpini ma jimbo, pʼímarhisïngaksïni parajtsï jorhenguarhini Biblieri ambe Jeobaeri testiguecha jingoni úraparini libruni ¡Méntkisï tsípikua jingoni ireka je!
Jamberijtsï ístu uéjka ini ambe míteni
AIANHPIRI
¿Ambe uá Tata Diosïri Reinu?
Jesusi mítespti eska Tata Diosïri Reinujkusï uáka iámu ambe sési péntani ixú Echerirhu. ¿Ambe xáni úskia Tata Diosïri Reinu parakachi uáka mintsikani?
