Ambe enga Biblia uandajka

¿Sési japirini úni deporti ma nájkiruka ma úpiringa no sési ambe úkuarhinchani?

“SÁNDERUKSÏ UÁNISTIA ENGAKSÏ NO SOLU EXEJKA SINOKSÏ NIRANI ABIONIRI UÉRATINI MA KUÁNIJPIKUARHINI, IAUANI UÉRATINI ÍSÏ KÉJPINI SÏNDARI MA JINGONI, KANOA JIMBO NIRANI KASKADECHARHISÏ KA ÍTSÏRI JÁMANI TIBURONICHA JINGONI.” (P’ITAKATA JARHASTI PERIÓDIKURHU THE WILLOW GLEN RESIDENT.)

I KOMENTARIU xarhatasïni eska parhakpinirhu sánderu ka sánderu únhaxaka deporti ambe. Deporticharhuksï sánderu únhaxati parakaidismu, ia sea iauanikua uératini o no xáni iauani, ielurhisï karharakunhani ka parapenti jimbo kárani *. Ini járhati deportichaksï xarhatasïndi eskaksï kʼuiripuecha no chésïnga ambe ma úkuarhinchani. Ka ístuksï, jarhasti máru deportistecha engaksï úrajka tablechani paraksï niebirisï nirani, bisikletechani paraksï juátarhisï kéjpintani, patinetechani ka patinechani paraksï mámaru ambe úni enga kánikua úkua jukaJka komueska juáteecharhisï kétseni. Jinisïsï enga kánikua iótakuarhu jaka ka sánderu ka sánderu iótakuarhusïndi engaksï kéjpijka. Ísï eska na uandajka rebista Time, na enga xáni chʼanani jaka ini járhati deporticha xarharasïnga eskaksï uánikua kʼuiripuecha uékaxaka indeni jásï ambe úni, “nájkirukaksï solu máru jurhiatikuechanksï uaaka ini deporti oksï meru jorhendatichani, iámindu inde ambe úsïndi eskaksï chéni pʼikuarheraaka, eskaksï pʼikuarheraaka eskaksï ambe ma úkuarhinchaaka, ka eskaksï kánikua jorhendaska ka inde ambe eratsetaraasïndi eskaksï uaaka sánderu ambe úni”.

Joperu nájkirukaksï sánderu uánikua engaksï újka ini járhati deportichani, ístuksï kánikua no sési úkuasïndi. Pauani pauani sánderuksï kánikua no sési úkuarhinchasïndi kʼuiripuecha engaksï ini deportichani jukariksï úkua jatsikuauaka. Uéxurhini 1997 jimbo, ospitalicha Estados Unidos anapuechaksï uandaspti eskaksï niáraspka 33% kʼuiripuechaksï no sési úkuarhinchani monopatini jimbo, máteru 31% kʼuiripuechaksï no sési úkuarhinchaspti tablecha jingoni engaksï niebirhisï kétsepka ka máteru 20% jimbokaksï juáteecharhisï kétsespka. Ka máteruechaksï niárasti sánderu no sési jásï ambe úkuarhinchani, engaksï jamberi niáraka uarhini ini deporticha jimbo engaksï újka no sési útspini. Joperu imeecha engaksï ini deportichani chʼanajka mítestiksï eskaksï uaaka niárani no sési úkuarhinchani. Ísï eska na uandajka kʼuiripu ma enga deporti eskí újka: “Méntkisï miáni jarhasïnga eskani uaaka niárani uarhini”. Ka máteru jorhendati ma enga tabla jimbo kétsejka niebirhisï uandasïndi eska engari “no ma ambe úska nóri xáni jánguarhintani jarhasïnga chiiti deportirhu”.

Iámindu ini ambe exeparini, ¿nénachi exesïni Jeobaeri testiguecha ini járhati deportichani uaani? ¿Náki jarhuajperatajtsïni íntskusïni Biblia parachi úni exeni sinchi uaa ini deportichani uaani? Parachi mókuantani ini kurhamarhikuechani, ju je exeni na enga xáni jukaparharajka Tata Diosï tsípikuani.

Na enga Tata Diosï exejka tsípikuani

Bibliajtsïni jorhendasïndi eskachi Jeoba jimbo úsïngachi tsípikua jatsini (Salmo 36:⁠9). Engajtsïni na kueraapkia, ístu jánguarhintaspti exeni ambe ka ambechi uétarhinchapirini parachi úni sési irekani (Salmo 139:14; Úkuecha 14:​16, 17; 17:​24-​28). Ísï jimbo, uaakachi exeni eska ima erokuarhisïnga eskachi sési kuidariaka ambe engajtsïni ima xáni uékperakua jingoni íntskuka. Juramukuecha ka prinsipiuecha enga íntsaapka Israeliiri iretani, úsïndijtsïni jarhuatani kurhanguni ini ambe.

Moisésiiri Lei uandasïreendi eska mándani kʼuiripu jatsipiringa para máru ambe úni para máteruechani kuájchakuani. Enga no ísï úkuarhipiringa ka nema uarhini, úpirindiksï imani kulparini enga úpiringa ambe ma úni paraka no niárapiringa ísï úkuarhini. Pori ejemplu, kʼumanchikuarhu anapu ma, jatsipirindi para iótakuarhu jatsijtsïtani tabikichani nani enga irekani japiringa. Jimboka enga nema niárapiringa uekorheni, úpirindiksï imani kulparini (Deuteronomio 22:⁠8). Enga toru ma atapiringa nemani no kulpa jatsipirindi torueri dueniu, joperu enga ima mítepiringa eska i animali úpiringa no sési útspini ka niáranksï ísï arhini ka ima no kasu úni, úpirindi ima kulpablini ima kʼuiripueri enga niárapiringa uarhini ka jamberiksï úpirindi uándikuni (Éxodo 21:​28, 29). Jimboka tsípikua kánikua jukaparhakueska para Jeoba, imeeri lei xarhatasïreendi eska ma jatsipiringa para kánikua jánguarhintani kuájchakuni.

Tata Diosï marhuariichaksï ini juramukuecha jingoni kurhangusïreendi eskaksï jatsispka para kuidadu jingoni jámani. Bibliarhu uandasïndi eska Dabidi uandaspka “sikiera engani úpiringa sanititu itsïmani posurhu anapu itsïni enga Beléniiri puertarhisï jaka”, iretani engaksï filisteuecha juramukuni japka. Tanimu imeeri sondaduechaksï niraspti inchaakuni filisteucheri kampamenturhu, pʼitasptiksï itsï Beléniiri posurhu ka pákusptiksï Dabidini. ¿Ambe úspi Dabidi? No uékaspti itsïmani, tájpataspti ka uandaspti: “¡Míteparini na enga exejka Tata Diosï ambe ma, ji no méni úpiringa indeni ambe! ¿Ji néna úpirini arhani i achamasïicheri iurhirini, engaksï ini ambe jimbo sáno uarhika? Jimbokaksï úpiringa uándikunhani engaksï juáni japka” (1 Crónicas 11:​17-19). Dabidi no sési exesïreendi eska ma úpiringa niárani uarhini nomasi para ambe ma jatsini.

Jesúsi májkueni ambe úspti, jiáni enga Noambakiti jánhaskua ma jimbo, tsʼéjkupka enga arhipka eska kʼuanijpikuarhintapiringa templurhu uératini para exeni sinksï ánjelicha úpirini kuájchakuni. Jesúsi mókukuntaspti: “Asï jáma tsʼéjkuni chiiti Tata Diosï Jeobani” (Mateu 4:​5-7). Sési xarharasïndi eska Dabidi ka Jesúsi sésiksï mítespka eska Tata Diosï no sési exesïreenga eskaksï ísku jatini imeecheeri tsípikua peligrurhu peerapiringa.

Ini ejempluechani exepariani, úpiringachi kurhamarhikuarhini: “¿Nénachi uaa exeni sini deporti ma uaajtsïni no sési jásï ambe úchini? Nájkirukaksï máru deporticha engaksï no peligrosueka uaakajtsïni no sési úchini, ¿nénachi uaa míteni náki deportijtsïni no uaa no sési ambe úchini?”.

¿Ambechi andaa engachi juchaari tsípikua peligrurhu peeraaka?

Parachi úni míteni mókuntskuani, jatsiskachi para iámindu ambe míteni ini deportiri ambe. Pori ejemplu, úpiringachi kurhamarhikuarhini: “¿Namunksï aksidenticha jarhaskia ini deporti jimbo? ¿Iámindu ambe míteski ka iámindu ambe jatsiski para no no sési úkuarhinchani? ¿Ambe úpirini úkuarhinchani enga kuarhatseska, ambe ma no sési uérani, o ambe ma no sési úni? ¿Sapichu ambejku úkuarhinchapirini o niárapirini kʼéri ambe úkuarhinchani o asta jamberi niárani uarhini?”.

Ambakiti pájperakua enga ma jatsijka Jeobani jingoni, ka ístu pribilejiuechani engaksï kúnguarhikuarhu jatsijka, úpiringachi tsïtani ka no sési ambe úkuarhinchani enga ma indeni jásï ambe erakuska para tsípikuarhini (1 Timoteo 3:​2, 8-​10; 4:​12; Titu 2:​6-8). Jimbosï jukaparhakueti eska enga erachi ma erakuska mámaru ambe úni para tsípikuarhini, eska miáuaka eska para Kueraajpiri kánikua jukaparhakueska tsípikua.

[Nota]