AMBE ENGA BIBLIA UANDAJKA
Sentabu jimbo ch’anani
Máru kʼuiripuechaksï eratsesïni eska sentabu jimbo chʼanani tsípikuarhita máesti enga no no sési útspijka, ka máteruechaksï uandasïndi eskaksï no sési útspisïnga.
¿No sési jarhaski sentabu jimbo chʼanani?
AMBE ENGAKSI KʼUIRIPUECHA UANDAJKA.
Uánikua kʼuiripuechaksï eratsesïndi eska sentabu jimbo chʼanani no no sési útspisïnga enga ma ísï chʼanaaka enga lei na uandajka. Loteriecha engaksï gobiernuecha uaajka astaksï úrasïndi sáni sentabu para kʼuiripuecheri programecheru jarhuajpeni.
AMBE ENGA BIBLIA UANDAJKA.
Biblia no uandasïndi sentabu jimbo chʼanakueri ambe. Joperu íntspiasïndi konsejuechani engajtsïni jarhuatajka kurhanguni na enga exejka indeni ambe Tata Diosï.
Sentabu jimbo chʼanani jindeesti máteruecheri sentabu andani, ka inde ambe no terukuntasïndi imani ambe jingoni enga Jesúsi uandapka: “Asï jáma je jukari tsitini jatsikuarhekuekani” (Lukasï 12:15). Kʼuiripuechaksï chʼanasïni, jimbokaksï uékasïndi sánderu sentabu jatsikuarheni. Nájkiruka iauani ma andaaka, imeecha engaksï loteria ambe jatsijka k’erati premiuechaksi jatsiasïndi. Ka jimbokaksï kʼuiripuecha uékasïnga rikueni kánikua sentabuksï ch’anarasïndi kasinuecharu. Sentabu jimbo chʼanani no jarhuatasïndi k’uiripuechani parakaksï no tsitiaka jatsïkuarhikuekani, sánderu sési parakaksï fasilku sentabu andaaka.
Sentabu jimbo ch’anani úsïndi eska ma jandiajku pendienti pákuarhiaka, jimboka úsïndi eska ma imani sentabuni andaaka engaksï máteruecha tsïtajka. Joperujtsïni, Biblia arhisï pʼímarhisïndi “ju je úni ambe enga jarhuatauaka máteruechani ka no para juchajku sési uéranchani” (1 Korintu 10:24). Juramukua ma diesi mandamientuecheri uandasïndi: “Asï tsiti [...] ni ma ambe enga máteru nemerika” (Éxodo 20:17). Enga ima enga sentabu jimbo chʼanajka uéjka meru andani, erokuarhisïndi eskaksï máteruecha tsïtajka imeecheri sentabu paraka ima pakaraaka imani sentabu jingoni.
Bibliajtsïni ístu arhisïndi eskachi no exeaka suertini komu ambe ma engajtsïni uaaka jarhuatani orhepani uerani . Ióntki jini Israeli, jarhasptiksï máru engaksï no mintsikeenga Tata Diosïni ka ueenasptiksï kómarhini “diosï Buena Suertiriini”. ¿Ka na exepti Tata Diosï indeni ambe? Ima uandaspti: “Seguirispkajtsï úni ambe engani ji no sési exejka, ka erakuspkajtsï imani ambe engani ji no sáni tsitienga” (Isaías 65:11, 12).
Ísïisti eska máru paisicharhu ma parti sentabu enga tánguarhijka chʼanakuecharu maiampisïndiksï para jarhuataani kʼuiripuecheri programeecheru; pori ejemplu, jorhentperakueri programeecha ka paraksï iretecha sési jauaka, Joperu néna enga úrakuarhika inde sentabu no mójtakusïndi nani enga uératini jurhajka: jimboka inde ambe úsïnga eskaksï kʼuiripuecha tsitiajka jatsïkuaririni, imajkumindu pendienti pákuarhiaka ka eskaksï eratseaka pʼirani ambe ma no ma ambe íntspiparini.
“Asï tsiti [...] ni ma ambe enga máteru nemerika.” (Éxodo 20:17)
¿Néna no sési úkuasïndi kʼuiripuechani sentabu jimbo chʼanani?
AMBE ENGA BIBLIA UANDAJKA.
Biblia uandasïndi eska “imeecha engaksï jánguarhintani jaka jatsikuarheriini, méntkuksï tsʼéjkunhani jarhasïndi ka ísïksï nirasïndi enajkiksï sïndari ma jingoni jupinha. Ka no sési nikuasïndi jimbokaksï ísku ambe ma tsitisïnga ka enga no sési útspijka, ka inde ambe úsïndi eskaksï no sési nitamakuarhiaka ka eskaksï uarhiaka” (1 Timoteo 6:9). Tsitini jatsïkuaririni usïndi eskaksï kʼúiripuecha sentabu jimbo chʼanaka. Kánikua no sési útspisïndi ísï jimbo Tata Diosïiri uandakua listaru ma jatsijti imani ambeeri engachi no jatsika para úni.(Efesu 5:3).
Sentabu jimbo chʼanani úsïndi eskaksï kʼuiripuecha uékaka fasilku andani sentabu, ka indeni jimbo “sánderuksï tsitisïndi sentabuni”. Biblia uandasïndi eska inde ambe úsïndi “eska nema ueenaaka no sési ambe niátani”. Uékani sánderu sentabu jatsini úsïndi eska ma nóteru uaakia pʼíngukuarhini. Úpirindi úni eska jukari uandanhiapiringa ka eska nóteru mintsinharhiakia Tata Diosïni. Biblia uandasïndi eska imeecha engaksï niárakia tsitini jatsïkuaririni “jandiajkuksï jirinhakuarhisïndi engaksï xáni no sési nitamakuarhijka” (1 Timoteo 6:10).
Uékani sánderu jatsïkuarini ambe ma, úsïndi eska ma no konforme jauaka imeecheri sentabu jingoni ka úsïndi eskaksï no tsípini pʼíkuareraka. Eclesiastés 5:10 uandasïndi: “Ima enga kánikua tsitijka sentabuni no méni konforme jauati imeeri sentabuni jingoni, ni ima enga kánikua tsitijka jatsikuarhekua ambe, uaa konforme jarhani na enga xáni andajka”.
Uánikua kʼuiripuecha engaksï tsitijka chʼanani sentabu jimbo iásïksï nóteru úsïndia kurhakuni. Solu Estados Unidos uánikua kʼuiripuechaksï jarhasti engaksï bisiu úkia indeni chʼanakuani.
Proverbios 20:21 jorhendasïndijtsïni eska ima kʼuiripuecha engaksï tsitijka sánderu ambe jatsini úpirindiksï niárani riku úkuarhini, joperuksï no jatsiati Tata Diosïiri kóntperatani. Ístu, ima enga bisiu újka chʼanakueri ambe úpirindi kántspeni pakarani o no sési úkuarhinchani ka tsïtani imeeri amiguechani, ánchikuarhitani ka asta imeeri familiani. Joperu ísï úni eskajtsïni Biblia na arhijka kuájchakusïndijtsïni parachi no no sési ambe úkuarhinchani jimbokaksï sentabu jimbo chʼanaka.
“Imeecha engaksï jánguarhintani jaka jatsikuarherini, méntkuksï tsʼéjkunhani jarhasïndi ka ísïksï nirasïndi enajkiksï sïndari ma jingoni jupinha. Ka no sési nikuasïndi jimbokaksï ísku ambe ma tsitisïnga ka enga no sési útspijka, ka inde ambe úsïndi eskaksï no sési nitamakuarhiaka ka eskaksï uarhiaka.” (1 Timoteo 6:9)
