Ima kʼuiripu enga ánchikuarhiriijka, tsitisïndi ánchikuarhini para ima kéndakuarhini ka para jarhuataani máteruechani, nájkiruka ima ambe enga ánchikuarhijka no xáni kʼéri ambeuaka.

Nájkirukachi no tsitijka, iáminduechachi jatsiaska responsabilidadiichani. Ístu, iásï kánikua marhuasïndi ánchikuarhiriini, jimboka uánikua kʼuiripu nóteru tsitisïngia ánchikuarhini (Eclesiastés 3:13).

“Engani kánikua ánchikuarhijka sési pʼikuarherasïnga, ísï jimbosïni sánderu tsitijka ánchikuarhini. Ístu, engari ánchikuarhiriijka máteruechaksïni kánikua sési exesïndi” (Reyon).

BIBLIERI KARAKATA: “Iámindu ambe jimbo enga jánguarhinhantajka kóntperatechaksï jarhasïndi” (Proverbios 14:23).

Ari konsejuechaksïni jarhuataati parakari tsitiaka ánchikuarhini.

Jorhenguarhi sési úni ambe ma. Asï máteru ambe eratseni ja engari ambe ma úni jauaka kʼumanchikuarhu, eskuelarhu o ánchikuarhitarhu, exe nénari uaa sánderu sési úni o sánderu kókuani. Engari sánderu sési úska chiiti ánchikuarhitani, sánderuri sési pʼikuarheraaka.

BIBLIERI KARAKATA: “Exeskiri kʼuiripuni ma enga sési újka imeeri ánchikuarhitani, reiicheeri orhepani jimbo niáraati jarhani ka no né uéjki kʼuiripuni jingoni” (Proverbios 22:29).

Pendienti paa máteruechani. Sáno méntkisï engari újka ambe engari arhinhajka, máteruechantu marhuakuasïndi. Pori ejemplu, engari újka ambe engari arhinhajka kʼumanchikuarhu, jarhuatani jarhasïngari iámu familiani.

BIBLIERI KARAKATA: “Sánderu sésiisti intsïmpini, ka eska intsïmbinhani” (Ukuecha 20:35).

Jánguarhinta sánderu ambe úni. Asï xántku ú eskari xántku kurhaminhaaka. Jánguarhinta sánderu ambe úni, ísïkeni no nema arhini jauati ambe engari jatsika para úni. Ísïisti eskari sánderu ánchikuarhiaka, joperu no jimbokaksïni máteruecha arhiaka (Mateu 5:41).

BIBLIERI KARAKATA: “No komu siengaksïni nema uinhamarhichipiringa, sino jimbokajtsï chámindu uékasïnga ísï úni ” (1 Pedru 5:2).

No jukari ánchikuarhini. Ánchikuarhiriini no arhikuekasïndi eska ma méntku ánchikuarhini jauaka ka no mintsikuarhini. Sánderu sési, ma jatsisti para sésku ánchikuarhini ka ístu mintsikuarhini.

BIBLIERI KARAKATA: “Sánderu sésiisti mintsikuarhini sáni ka eska jukari kánikua ánchikuarhini ka ísku xáni jánguarhintani” (Eclesiastés 4:6).