Meta ma no solu jindeesti ambe ma engachi tsitipiringa eska úkuarhipiringa. Para úni ambe engachi eratsetini jaka, uétarhisïndi eskachi sési eratsetini jauaka néna úni, exeni sinchi uaa ísï úni ka kánikua jánguarhintani.

Máru meteechaksï úsïndi máru jurhiatikuecha jimbojku úkuarhini, máteruecha mesiicha o asta uánikua uéxurhini jimbo. Ka parachi úni kumpliriini meta ma sánderu orhepatini, uétarhisïndi úni máru ambe engajtsïni jarhuataaka parachi niárani indeni metani kumpliriini.

Engari újka ambe engari eratsetini jarhajka, sánderuri mintsinharhikuarhisïnga, sánderuri sési pájperasïnga máteruecha jingoni ka sésiri pʼikuarherasïnga.

Sánderuri mintsinharhikuarhiaka. Engari jatsikukuarhiaska imani meteechani engaksï no xáni úkua jukaka ka ísïri úni, tátsekuari uaaka sánderu kʼérati meteechani jatsikukuarhiani. Ísturi uaaka orhepani uérakuani uandanhiateechani, komu engaksïni máteruecha méntku arhini jauaka eskari no sési ambe niátaaka.

Sánderuri sési pájperaaka máteruecha jingoni. Iáminduechaksï tsitisïndi imeecha jingoni jarhani engaksï mítejka ambe engaksï uéjka ka engaksï jánguarhintajka para ísï úni. Ístu, ma úsïndi sánderu sési pájperani nemani jingoni engaksï jarhuajperajka paraksï úni ambe engaksï tsimarhani tsitijka.

Sánderuri sési pʼikuarheraaka. Engari jatsikukuarhiajka meteechani ka ísïri úni, sésiri pʼikuarherasïnga.

“Kánikua tsitisïnga meteechani jatsikukuarhiani, jimbokani ísï jatsisïnga ambe ma parani úni. Kánikua sési pʼikuarherakuarhisïndi engari ísï újka eskari na eratsetini jarhajka. Engari miántajka úsïngari uandani: ‘¡Úska ísï úni!’” (Christopher).

BIBLIERI KARAKATA: “Ima enga tarhiatani exeni jarhajka, no ma ambe ikaraati ka ima enga nubeechani exeani jarhajka no ma ambe pʼikuntaati” (Eclesiastés 11:4).

Parari jatsikukuarhiani meteechani ka ísïri úni, arini ambe ú.

Erakua chiiti meteechani. Karaa iámindu engari xáni eratsekata jatsiaka ka tátsekua ísï peera eskari na úpauaka.

Exe néna engari uaaka ísï úni. Arini ambe ú mándani meta jingoni:

• Jatsiku fecha na engari jatini uaaka kumpliriini.

• Kara ambe ka ambe engari uaaka.

• Eratsenta ambekini úpirini ójkutani ka amberi úpirini úni parari úni orhepani uérani.

Ueena ísï úni. No uétarhisïndi eska iámindu ambe sési jauaka parari ueenani úni ambe ma. Eratsenta ambe engari orheta jatsika para úni ka ísï ú. Exe ambe engari xáni úkia parari imani ambe úni engari eratsetini jaka.

BIBLIERI KARAKATA: “Sési nikuati imani enga ánchikuarhiriika enga sési eratsentaaka ambe enga uaaka” (Proverbios 21:5).