Eskuelarhu anapu biajirhu ma, tumbiichaksï máru arhinhaspti eskaksï ikichakueni jásï ambe úkuspka kompanieruni ma. Iáminduksï ambakiti eskuela ma jimbo estudiarixapti jini Canadá. Enga i ambe úkuarhipkia: Leonard Stern, ari ambe karaspti periodikurhu Ottawa Citizen: “Jánhaskakua, estudiuecha o rikueni no úsïndi eskaksï tumbiicha no no sési ambe úaka”.

Stern útasï karaspti: “Ambe engaksï táticha sánderu jukaparharapiringa jindesti jorhendaani imeri sapiichani ambe enga sési jaka ka ambe nómbe. Peru ambe enga sánderu uandanhiataajka uánikuechani, jindesti eskaksï imeri sapiicha ambakiti kalifikasionichani jatsiauaka ka eskaksï ambakiti ánchikuarhita ma jatsiaka”.

Ísïsti eska jukaparhakueska estudiarini, peru jorhentperakuecha eskuelarhu anapu, na uéjki xáni ambakitini, no jarhuatasïndi kʼuiripuni ma paraka no no sési jásï ambe tsitiaka o no no sési ambe úni. ¿Náki jorhentperakuajtsïni úa jarhuatani parachi ambakiti ambe úni?

Biblia ísïsti komu espeju ma. Engachi arhintajka, úsïngachi exeni ambe engachi no újka sési úni ka ambe engachi újka úni ka ambe nómbe (Santiagu 1:23-25). Ístujtsïni Biblia jarhuatasïndi parachi mójtakurhini ka parachi ambakiti kʼuiripueni, sési kámpini, tekaantstini, pʼíngukuarhini ka parachi uékpini, i ambe úsïndi eskachi májku kʼéri jauaka ka pínandikua jingoni. Jo, Biblia arhisïndi eska uékperakua “jindeska enga újka májku úantani iáminduechani” (Kolosasi 3:14). ¿Ambe úsïni eska uékperakua xáni jukaparhakueuaka? Exe je ambe enga arhijka Biblia uékperakueri ambe.

• “Ima enga uékpijka, tekaantasïndi ka sési útspini, no embidiarpisïndi ka nójtu uékasïndi eska kʼéri ambe exenhaaka ka níjtu méni teparakuarhini. Ima enga uékpijka, no úsïndi ambe enga no sési p’ikuastpijka, ka no uékasïndi imeri ambejku, ka níjtu sóntku no sési exeni enga máteruecha újka, ka nójtu pakarasïndi ikiatspini. Ima enga uékpijka, no tsípisïndi enga nema no sési újka, solu enga nema jurhimbitku jámajka. Iámindu ambe tekaantasïndi, [...] uinhapikuarhisïndi para úni tekaantani. Uékperakua no méni kʼamara[sïndi]” (1 Korintu 13:4-8).

• “Enga nema uékajka máteruni, no úsïndi no sési úkuni” (Roma 13:10).

• “Enga sánderu uétarhijka, jindesti eskajtsï kánikua uékperaaka, jimboka ima enga uékpijka puátspiantasïnga uánikua pekaduechani” (1 Pedru 4:8).

¿A no eskachi sési pʼikuarherasïnga ka seguru, engachi imechani jingoni jarhajka engajtsïni uékajka? Jimboesti jimbokachi mítiska eskaksï imecha ambakiti ambe uékasïnga para jucha ka eskajtsïni no méni no sési ambe úchiaka.

Uékperakua jimbo, ístuchi úsïnga imani ambe enga úkua jukajka ka mójtakuanchi juchari pʼindekuechani. Por ejemplu, acheeti ma engachi George arhiraaka, kánikua uékaxapti imeri nimakua jingoni jarhani enga apenasi andajpenupka. Peru problema jindespti eska George kánikua itsutasïrenga, ka imeri tarhamba no uékasïrendi eska charhaku japarini itsutapiringa. ¿Ambe úspti George? Nájkiruka sinkuenta uéxurhini páni japkia itsutani, jurajkuspti imani ambe para úni imeri nimakua jingoni jarhani. ¡Ambe enga xáni újka nema uékperakua jimbo!, ¿a no?

 Uétarhisïndi jorhenguarhini xénchpini, ka tátichaksï jindesti engaksï sánderu sési jorhendauaka imeri sapiichani néna xénchpini. Tʼireraasïndiksï, kuájchakuani ka jarhuataasïndiksï engaksï atakuarhijka o pʼamenchani. Ambakiti tátichaksï uandontskuarhisïndi imeri sapiicha jingoni ka jorhendaani. Ístuksï jurhimberantaasïndi ka exeraani nénaksï úa mítini ambe sési jarhaski ka ambe nómbe. Ka jánguarhisïndiksï ambakiti ejemplu ma íntsaani.

Peru máru tátichaksï no úsïndi imecheri ánchikuarhita, xáni no sési ambe. ¿Arhikuekasïni i ambe eskaksï sapiicha no méni úaka ambarhati kʼuiripueni? Nómbe. Asta uánikua engaksï imani familiarhu tʼarhexeka engaksï no márku jaka, ústiksï mójtakurhini ka niárastiksï kʼuiripuecheni engaksï sési kámpijka ka ánchikuarhirini. Asta imecha engaksï kʼuiripuecha ísï exeauenga eskaksï nóteru úpiringuia sési niántani, ústiksï mójtakurhini, ísï eskachi na exeaka sánderu orhepani.