Nasiones Unidas pʼímarhiasïndi kʼuiripuechani parakaksï jarhuajperaaka, eskaksï janhanharhiaka ambe engaksï kʼuiripuecha sésikua jatsika para úni ka paraksï kuidarini planetani. ¿Andi? Jimboka eska na karapka Maher Nasser, rebistarhu Crónica ONU, “na enga mójtakurhini jaka klima, grupu kʼuiripuecheri engaksï no sési ambe niátajka, engaksï máru kʼuiripuecha sánderu rikueni jaka ka máru sánderu pobrini, problemecha engaksï no úni jaka sési pénhantani, engaksï uáni kʼuiripuecha nirajka máteru nanisï irekani, no sési kámberhakua interu parhakpini, kʼérati pʼamenchakuecha ka máteru no sési jásï ambe, iáminduechani no sési úkuasïndi”.

Jarhastiksï máru engaksï sánderu ambe uékajka úni, uékasïndiksï eska juramukua ma jauaka para interu parhakpini. I ambe uékasïrendi úni Dante, Italia anapu enga filosofuepka, poeta ka politiku (1265-1321) ka Albert Einstein (1879-1955). Dante, uandaspti eskachi no méni úpiringa pínandikua jingoni irekani enga kʼuiripu no májku kʼéri japiringa politika jimbo. Tata Jesukristueri uandakuechani máru úrapariani, uandaspti eska “enga ma nasioni anapuecha uarhiperaaka imechajkumindu, inde nasioni sóntku kʼamaraa[ka]” (Lukasʌ 11:17).

Ísï no ióni jimbo engaksï úraapka tsimani bomba atomikechani Segunda Guerra Mundiali jimbo, Einstein karta ma úspti para iáminduecha engaksï japka Asamblea General de las Naciones Unidas jimbo. Ari ambe uandaspti: “Nasiones Unidas, jatsisti para sóntku úni ambe ma enga jarhuajpiaka ambakiti juramukua ma uaxastani para interu parhakpini enga úaka eska iápurisï jauaka seguridadi”.

Peru ¿ambejtsïni asegurarichisïni eskaksï politikuecha inde xáni kʼéri juramukueri iámindu ambe jurhimbitku úpiringa, eskaksï úpiringa úni iámindu ambe ka nóksï kʼéri ambe exekuarhini? ¿Nóksï ísïpirini eska máteru juramuticha? I kurhamarhikuechajtsïni miátantasïndi ambe enga uandapka istoriadori Gran Bretania anapu lord Acton: “No sési útspisïndi uinhapikua jatsini, ka kʼamakʼamasï uinhapikua jatsini, kʼamakʼamasï no sési útspisïndi”.

Peru parakaksï kʼuiripuecha pínandikua jingoni irekaaka, jatsistiksï para májku kʼéri jarhani. Peru ¿néna úni indeni ambe? ¿Úa ísï úkuarhini? Biblia uandasïndi eska jo, eska niáraaka ísï úkuarhini. ¿Néna? No jindeuati juramukua ma jimbo engaksï kʼuiripu imperfektuecha jauaka, sino gobiernu ma jimbo enga Tata Diosï uaxastaaka. I gobiernu xarhataati eska solu Tata Diosïsï jatsiska para juramukuni ambe enga ima kueraaka. Biblia arhisïndi ini gobiernuni, Tata ʻDiosïri juramukuaʼ (Lukasʌ 4:43).

Jesusi ini juramukuani arhikuekaxapti enga uandapka padrenuestru jimbo: “Jaue ixú parhakpinirhu chíti juramukua. Úkuarhie eska tʼu na uékajka ixú parhakpinirhu” (Mateu 6:9, 10). Ísïsti, Tata Diosïri Reinu, úati eska Echerirhu úkuarhiaka ambe enga Tata Diosï uéjka ka no ambe engaksï kʼuiripuecha uéjka, engaksï no uandanhiajka máteruechani ka engaksï solu uinhapikua uéjka jatsini.

Tata Diosïri Reinu, ístu arhinhasïndi “auandarhu anapu reinu” (Mateo 5:3, TNM). ¿Andi? Jimboka nájkiruka parhakpini anapuechani juramukuauaka, no Echerirhu uératini juramuati, sino auandarhu uératini. Eranhaska je ambe enga arhikuekajka i ambe. I gobiernu enga interu parhakpinirhu juramuaka, no uétarhinchaati tumina ambe. ¡Xáni ambakiti ambe para imecha engaksï ini juramukuarhu irekaaka!

Ísï eska na kʼuanijka jatsini reinurhu ma, Tata Diosïri Reinu jatsisti reini ma, ka jindesti tata Jesukristu.  Tata Diosï íntskusti sésikua para juramuni. Biblia ari ambe uandasïndi Jesusiri ambe:

• “Intsïnhasti uinhapikua para juramuni. [...] Iápurisï úati juramuni ka méntkisï pínandikua jauati” (Isaías 9:6, 7, Dios habla hoy).

• “Intsïnhasti uinhapikua, tʼíntskua ka juramukua, parakaksï iretecha, nasionicha, ka mámaru jásï idioma uandaricha iáminduksï imani marhuakupiringa” (Daniel 7:14).

• “Iámindu juramukua i parhakpini anapu, juchari Tateeristia ka imeri Míndakateri, ka ima juramuati para méntkisï” (Jaŋaskuecha [Apocalipsis] 11:15).

Tata Diosïri Reinu úati eska úkuarhiaka ambe enga Tata Diosï uéjka úni ixú Echerirhu ka niáraati úkuarhini ambe enga uandajka padrenuestru jimbo. Jiájkani, parhakpinirhu ambakiti irekua jauati, jimbokaksï iáminduecha jorhenguarhiakia kuidarini Echerini.

Ka sánderu jukaparhakua ambe, Tata Diosïri Reinu jorhendauati kʼuiripuechani. Iáminduenchaksï jánguarhintaati kumpliriuani juramukuechani. No uarhiperanhati ka májku kʼériksï jauati. Isaías 11:9 arhisïndi: “Nóksï ma ambe útspiati, niksï no sési ambe úni [...] jimboka echeri meru uiniaka Jeobaeri mímixekua ísï eska itsï na jaka marirhu”.

Iáminduecha engaksï Echerirhu irekaaka májku kʼériksï jauati ka pínandikua jingoni, ambe ma engaksï Naciones Unidas no úni jaka úni. Salmo 37:11 uandasïndi: “Sésiksï pʼikuarheraati jimboka kánikua pínandikua jauaka”. Tátsekua, nóteruchi úrauakia arini uandakuechani komu atajperakua ambe, no sési úkuni echerini, guerra ka pobresa. Peru ¿káni úkuarhia inde ambe? ¿Káni uénaa juramuni Tata Diosïri Reinu ixú Echerirhu? ¿Néna juramua? ¿Nénaksïni úa marhuachini inde Reinu? Ju je exeni máteru pájinarhu.