¿Exesïntsï eska ma jurhiani kʼuiripu sési péntaaka uandanhiatechani engajtsïni no sési pʼikuastajka ka enga újka eskachi no seguru irekaaka? Parachi sési péntaani juchari uandanhiatechani, jatsiskachi para mítini nénaksï uénakuarhiski.

Ju je ejemplu ma jatsikuni. Achati ma enga Tom arhinhajka pʼamenchasïndi ka uarhini. ¿Andisï uarhi? “Enga uénapka no sési pʼikuarherani, no nema exespti ambe jimbosï no sési pʼikuarherani japi”, ísï karaspti ospitalirhu anapu doktori enga Tom niárapka antede uarhini. Peringa imecha engaksï uénakuarhu atenderipka, soluksï sïpiati íntskuspka para nóteru xáni no sési pʼikuarherania.

Inde ambe úkuarhixati kʼuiripuecheri uandanhiatecha jingoni. Por ejemplu, para úni eska nóteru jauakia no sési úricha, gobiernuechaksï leichani uaxastaasïndi, kamarechani paraksï kuidarpini ka sánderuksï uáni polisiauechani jatsiani. Nájkiruka i ambe jarhuajpijka, nóksï sési péntasïndi problemani: ambe engaksï tsitijka, na engaksï jámajka ka ambe engaksï jakajkujka kʼuiripuecha, inde ambesï manataajti paraksï úni ambe ma.

Daniel, enga paisirhu ma irekani jaka jini Sudamérica enga kánikua pobrinhaka, uandasïndi: “Sésichi irekaxapka. Nochi chésïrenga jimboka no jánhasïrenga sïpatsperanhani, peru nóteru nani seguruestia para irekani. Enga ísï no sési jánhaskuarheni jaka paisirhu, xarharasïndi na engaksï uánikua kʼuiripuecha jukari uékajka jatsikuarhini ka nóksï janhanharhini kʼuiripuecheri tsípikua ni ambe engaksï jatsikuarhika”.

Elías enga Oriente Medio irekapka ka enga jini uératini sïpakuarhipka jimboka jima uarhiperakua ma jarhaspka, ka enga ísï tátsekua Jeobaeri testigu úkuarhika, uandantasïndi: “Nani engani irekaka, familiecha, politika ka relijioni, afuersa uékasïrendi eskaksï tumbiicha guerrecharhu nipiringa ka ísïksï kʼéri ambe exenhani. Ka imecha engaksï jingoni uarhiperapiringa májkuenksï ambe úsïrendi. Kuenta íntskukuarhispka eska no marhuasïnga mintsikani kʼuiripuecheri juramukuani”.

Exe je ambe enga uandajka Biblia:

• “Kʼuiripueri mintsita desde sapichku uénasïndi no sési ambe uékani úni” (Génesis 8:21).

• “Mintsita sánderu enganiarpisïndi eska ambe uéjki, ka sóntku uékasïndi ambe ma. ¿Né úa mítini?” (Jeremías 17:9).

• “Jimboka mintsitarhusï uérajka no sési járhati eratsikuecha komueska para uándikpini ka ísku jándi úkuarhini [...] sïpatspini ka chkuanderakua ambe kʼamanharhitpintani ka xukajchpini” (Mateu 15:19).

Kʼuiripuechachi no úsïnga juchari no sési járhati pʼindekuechani kʼamajkuani. Sánderu no sési jánhaskuarhixatia, ísï eska na xarharajka imani problemecha jimbo engachi antesi exeakia (2 Timoteo 3:1-5). Ka nájkirukachi iásï sánderu informasioni jatsikia ka engachi újka uandontskuarhini mámaru ambe úraparini. Ini ambe jimbo, ¿andichisï no újki seguru irekani ka pínandikua jingoni? ¿Kʼuiripu no méni úa úni eskachi seguru irekaaka ka pínandikua jingoni? ¿Úachi ísï irekani?

Nájkiruka milagru ma úkuarhipiringa ka únchi mójtakuani kʼuiripueri no sési járhati pʼindekuechani, i parhakpini seguirini japirindi lugari máeni enga no seguruepiringa. ¿Andi? Jimbokaksï kʼuiripuecha no úsïnga úni iámindu ambe.

 Biblia uandasïndi “eska kʼuiripu no sésikua jatsiska [...] para xanharakuarhini” (Jeremías 10:23). Jo, nochi kueranhaska parachi jandiajku orhepani uérani, ísï eskachi na no kueraanhaka parachi úni itsïrhu irekani.

Por ejemplu, ¿exesïntsï eska kʼuiripu tsitisïnga eskaksï máteruecha arhiaka néna irekani o na járhati jánguechani jatsiani? ¿O nénaksï jatsiski para exeni abortuni o néna tʼarhexeraani sapiichani? Íksï jindesti solu máru ambe engaksï kʼuiripuecha mámaru ambe eratsijka. Jiájkani, ambe enga Biblia uandajka ísïsti. Juchachi no úaka, nichi sésikua jatsi parachi jandiajku orhepani uérani. Jimajkani, ¿néjtsïni úa jarhuatani?

Mókuntskua jindesti, Tata Diosï, jimboka ima jindeska juchari Kuerajpiri. Ka miáxatijtsïni, no ísïsti eskajtsïni mirikurhiskia. Bibliaeri ambarhati konsejuechajtsïni xarhatachisïndi na enga xáni uandanhiajka juchantsïni jimbo. Sési kurhanguni ini ambakiti libruni, jarhuatasïndijtsïni exeni ambe engachi újka úni ka ambe nómbe ka kurhanguni andichisï no újki sési irekani. Alemania anapu jánhaskati ma uandaspti: “Nasionicha ka gobiernuechaksï no ma ambe úsïndi jorhenguarhini ambe enga xáni úkuarhikia tiempu jingoni, jimboksïsï no újti mójtakurhini”.

Jesusi, Tata Diosïri Uájpa, uandaspti eska ʻmímixekua jánguarhu xarhatanhasïngaʼ, o sea, eska úkuecha jingoni xarharasïnga (Lukasʌ 7:35, TDU). Ju je exeni ejemplu ma. Isaías 2:22 arhisïndi: “Chíti sési jimbo, asï mintsika achatini ma”. I konsejujtsïni jarhuatasïndi no ísku jatini mintsikani o erokuarhini jarhani ambe ma enga kʼuiripu no úaka úni. Kenneth, enga Norteamérica irekaka, nani engaksï uánikua no sési úricha jaka, uandasïndi: “Iámindu politikuechaksï aiatspesïndi eskaksï sési péntaka ambe ma, peruksï no úsïndi. Engaksï ísï no újka, xarharasïndi eska ambe enga Biblia uandajka jurhimbikueska”.

Daniel, engachi uénakuarhu uandaka, karasti: “Pauani pauani sánderu seguru jarhasïnga eska no ma kʼuiripu úaka ambakiti juramuti máeni. Bankurhu jatsirini jarhani tumina o engajtsï ánchitani jauaka tuminani, no arhikuekasïndi eskajtsï méntkisï sési jauaka. Mítiaska máru kʼuiripuechani engaksï no erokuarhienga eska xáni no sési nikuapiringa”.

Biblia no solu úsïndi eskachi no mintsikaaka imani ambe enga no úkurhiaka, sinojtsïni íntskusïndi erokuarhikua ma, eskachi na exeni jauaka sánderu orhepani.