Nema enga no chketakuarhijka, kʼuiripu máesti enga sóntku sési niántajka enga no sési ambe úkuarhinchajka. Sánhani arhisïndi ma xásï kʼuiripu máeni. Májkueni eska sapi ma na jorhenguarhijka xanharani nájkiruka ménisï kuarhatseaka, ístu nájkiruka sánderu orhepani ménisï uandanhiata ambe jatsiaka uáti jorhenguarhini orhepani uérani.

Máru sapiichaksï chketakuarhisïndi enga ambe ma no sési uérakuajka, engaksï kʼéri uandanhiata ma jatsiaka o nema jurhimberantaani, ka máruksï nomasi nóteru uékasïndia orhepani uérani. Peru sési jauati eskaksï kurhanguaka arini ambe:

• Nóchi uáka iámindu ambe sési úni (Santiagu 3:2).

• Iáminduchi ménisï no sési jásï ambe nitamanchasïnga (Eclesiastés 9:11).

• Iáminduchi uétarhinchasïnga eskajtsïni jurhimberantaaka. Ísïchi jorhenguarhisïnga ambe ma (Proverbios 9:9).

Enga chári sapi jorhenguarhiaka no chketakuarhini, uáti fásili orhepani uérakuani uandanhiatechani.

Engaksï no sési ambe uáka

BIBLIAERI KARAKATA: “Ima enga jurhimbitiika, uáti asta sieti uelta kuarhatseni ka ménderu jauaraati” (Proverbios 24:16).

Jarhuata je chári sapini na enga jatsika para exeni ambe ma. Por ejemplu, ¿ambe úpirini enga no sési nikupiringa eskuelarhu anapu eksamenirhu ma? ¿Chketakuarhipirini ka uandani: “¡Nórini ambe ma sési uérachesïndi!”?

Para jorhendani chári sapini no chketakuarhini, jarhuata je exeni ambe uá úni máteru jimbo. Ísï úparini, exeati néna sési péntani uandanhiata ma enbesi de solu no sési pʼikuarherani jarhani.

Ka máteru ambe, asï cha sési pékunta je problema ma. Jarhuata je para ima mismu sési péntani. Úpiringajtsï kurhamarhini: “¿Amberi uá úni parari sánderu sési kurhanguni ambe engaksïni jorhendani jauaka eskuela?”.

Enga no sési jásï ambe úkuarhijka

BIBLIAERI KARAKATA: “Nójtsï mítiska ambe enga úkuarhiaka pauani” (Santiagu 4:14).

Nóchi mítiska ambechi úkuarhinchaa. Nema uáti iásï rikueni ka ísï pauandikua pobreni, o iásï sési jarhani ka ísï pauandikua pʼamenchani. Ísï eska na arhijka Biblia, “nóksï méntkisï andasïndi imecha engaksï sánderu uiriijka, niksï andani guerrani imecha  engaksï sánderu uinhapika, [...] jimboka méntkisï úkuarhisïnga o jarhasïnga ambe ma engaksï ima no erokuarhijka” (Eclesiastés 9:11).

Sési jarhasti engajtsï uékajka kuájchakuni chári sapini ima amberi enga no sési úkuaka. Peru para sési eratsintani, nójtsï uáka kuájchakuni iámindu problemecheri enga jatsiauaka.

Jo, jamberi chári sapi jukari sapichueti para ánchikuarhita ma tsïtani o para kueratanchani jarhani tumina, peru jamberi kʼóru jatsiati para orhepani uérakuani máteru uandanhiatechani, komu enga imeri amigu ma jingoni ikiatsperaaka o familiarini ma uarhiranchani. *

Engaksï jurhimberanhantajka

BIBLIAERI KARAKATA: “Kurhaa jarhuajperatani [...] parakari mímixeti úkuarhiaka sánderu orhepatini” (Proverbios 19:20).

Enga nema jurhimberantajka chári sapini, no jindesti para no sési úkuni, sino uékasïndi jarhuatani para mójtakuni ambe ma enga no sési úni jaka.

Engajtsï jorhendaska chári sapini jiókuarhiani konsejuechani, sapi ka cha, nójtsï xáni uandanhiatechani jatsiauaka. Táti ma enga John arhinhajka, uandasïndi: “Engajtsï iámindu problemechani cha sési pékuantauaka, chári sapi no méni uáti jorhenguarhini. Méntku problema ambe jatsini jauati ka cha komu táticha, jatsiakajtsï para méntku sési pékuantaani jarhani problemechani. I ambe uáti eska cha ka sapi, no sáni sési irekaaka”.

¿Nénajtsï jarhuataa chári sapini jiókuarhini jurhimberantskuani? Enga nema jurhimberantaaka eskuela o máteru nani, jánguarhi je no arhini eska inde ambe no sési jarhaska. Sánderu sési, kurhamarhi je:

• “¿Andiksïnisï jurhimberanta?”.

• “¿Nénari uá sánderu sési jámani?”.

• “¿Amberi uá máteru jimbo engari ménderu inde ambe úkuarhinchaaka?”.

Miá je, enga nema jurhimberantaaka chári sapini, no solu jarhuataati para iáiasï enga sapichueka sino preparariuati para jiáni enga kʼériuakia.