No xáni pʼamenchani
Biblia, no libru máesti enga sïpiatiri ambe uandajka perujtsïni kʼóru arhisïndi nénachi uá no xáni pʼamenchani. Ju je exeani máru karakatechani engajtsïni jarhuataaka no xáni pʼamenchani.
KUIDARINI JUCHARI KUERPUNI
BIBLIAERI KARAKATA: “No nema jarhasti enga no exenchajka imeri mismu kuerpuni, sino mejori sési tʼirerasïndi ka kuidarini” (Efesu 5:29).
AMBE ARHIKUEKASÏNI. I karakatajtsïni pʼímarhisïndi parachi jánguarhintani kuidarini juchari kuerpuni. Exenhastia eska enga nema jukari pʼamenchajka jindeska jimboka no pʼindeska kuidarikuarhini. Jiájkani, engachi pʼindeaka kuidarikuarhini, nochi xáni pʼamenchaaka.
AMBEJTSÏ UÁ ÚNI
-
Sési tʼireni. Jánguarhi je imani ambe tʼireni engaksïni marhuachiaka ka kánikua itsïmani.
-
Ánchitani kuerpuni. Na uéjkijtsï xáni jatirini, engajtsï ánchitaaka chári kuerpuni uáti úni eskajtsï sési pʼikuarheraaka, nájkirukajtsï uinhamu pʼamechani jauaka o chári kuerpu no sési jarhani. Chári familia o doktori ma, uátiksïni jarhuani ejersisiu úni, joperu chásï jatsika para jánguarhintani.
-
Sési kʼuíni. Ima kʼuiripuecha engaksï no ióni kʼuíjka, uátiksï uinhamu pʼamenchani. Uánikua kʼuiripuechaksï no ióni kʼuísïndi jimbokaksï uékasïnga máteru ambe úni jarhani. Joperu imecha engaksï sési kʼuíjka, sésiksï pʼikuarherasïndi.
JURAJKUNI NO SÉSI JÁSÏ AMBE
BIBLIAERI KARAKATA: “Jaue pímbinhasïntani para iámindu indeni no sési jásï ambe jingoni enga kuerpu újka” (2 Korintu 7:1).
AMBE ARHIKUEKASÏNI. Nójtsï xáni pʼamenchaaka engajtsï no úraaka imani ambe enga chári kuerpuni no sési úkuaka komu itsutani, ma ambe engaksï jimbo uánikua kʼuiripuecha pʼamenchajka ka uarhini.
AMBEJTSÏ UÁ ÚNI. Péra je jurhiatikua ma káni engajtsï uékajka nóteru itsutania. Ante de ima jurhiatikua, kʼuanikua je iámindu sigarruechani, sigarru jatakuechani, ima ambe enga sigarruni érutajka o ambe uéjki máteru i jásï ambe. Asï ní je jima enga kʼuiripu itsutajka. Arhia je chári amiguechani ka familiarichani eskajtsï nóteru uékasïnguia itsutani paraksïni jarhuatani.
MÁTERU BIBLIAERI KARAKATECHA
Engajtsï uékajka Biblia ma, kurhaku je Jeobaeri testiguni ma enga chári iretarhu anapueka.
ERATSIKUA JUKARIINI
“Engari kʼumanchikua ma uáka, jatsiskari para karhakua, barda sapichu ma jatsirhukuni iámu uirhipandani. Para no chíti kʼumanchikua kulpa jatsini enga nema niáraska uarhini jimboka jima uératini uékorhintaska” (DEUTERONOMIO 22:8).
NO SÓNTKU IKIANI
“Ima enga no sóntku ikiajka kánikua jánhaskatisti, peru ima enga no tekaantajka xarhatasïndi eska tontu máeska” (PROVERBIOS 14:29).
NO JUKARI ARHANI AMBE MA
‘Asï ja imecha jingoni engaksï ísku jatini jukari tʼirejka’ (PROVERBIOS 23:20).
