Sési pájperani familia ka amiguecha jingoni
Uánikua kʼuiripuechaksï no úsïndi sési pájperani máteruecha jingoni. Ju je exeani máru Bibliaeri karakatechani engajtsïni jarhuataaka sési pájperani máteruecha jingoni.
UANDANHIANI MÁTERUECHANI
BIBLIAERI KARAKATA: Jánguarhi je “no solu pendienti páni para chájkumindu sési uérani, sino ístu pendienti páni para máteruecha” (Filipusʌ 2:4).
AMBE ARHIKUEKASÏNI. Parachi sési pájperani máteruecha jingoni, jatsiskachi para intsïmpitini ka no solu uékani eskachi intsïmbinhaaka ambe ma. No eratsiani máteruechani, kʼamajkusïndi ambakiti pájperakua ma. Por ejemplu, temungurhirikuarhu, enga acheeti o uarhiiti imajku eratsikuarhiska, jamberi niáraati ísku jándikua ambe niátani. Ka ima enga méntku ima amberi uandani jarhajka ambe enga xáni jatsika o míteni, no ma amigu jingoni pakaraati. Jimbanhi libru ma uandasïndi eskaksï ima kʼuiripuecha engaksï imechajku eratsikuarhijka, uánikua problemechanksï jatsiasïnga.
AMBEJTSÏ UÁ ÚNI
-
Jarhuajpini. Ambakiti amigu ma mintsinharhikuesti ka listu jarhasïndi para jarhuajpini. Seguni informi ma, ima kʼuiripuecha engaksï uandanhiajka máteruechani, nóksï xáni jandiajku pʼikuarherasïndi ka jukaparharakuarenksï.
-
Kurhangutspini. I ambe arhikuekasïndi eskajtsï chári mintsitarhu pʼikuarhinhiaka na engaksï pʼikuarherajka máteruecha. Engajtsï kurhangutspiska, sánderujtsï no úrauaka imani uandakuechani engaksï ísïka komueska chiste ma peru engaksï úrakuarhijka para no sési pʼikuastpini.
Kurhangutspini, ístu jarhuajpisïndi parajtsï jaiapanhiantaani máteruechani. Jiájkani, i ambeksïni jarhuataati parajtsï úni iáminduecha jingoni sési pájperani ka uápurisï anapu amiguechani jatsiani engaksï mámaru jásï pʼindekuechani jatsiaka.
-
Arhutani tiempu para máteruecha. Parajtsï úni míteani máteruechani, jatsiskajtsï para imecha jingoni jarhani. Parajtsï úni ambakiti amiguechani jatsiani, jatsiskajtsï para ima amberi uandaxeni enga uandanhiataajka ka engaksï imecha jukaparharajka. Ísï jimbo, jorhenguarhi je jingontku kurhajchaani chári amiguechani ka uandanhiani imecha jimbo. Jimbanhi informasioni ma uandasïndi eska “ima kʼuiripuecha engaksï sési uandontskuarhejka, sánderuksï sési irekasïnga”.
SÉSI ERAKUANI AMIGUECHANI
BIBLIAERI KARAKATA: “Enga nema kúrhiaska no sési úrichani, ikichakua úkuarhiatiksï imeri ambarhati úkuecha” (1 Korintu 15:33).
AMBE ARHIKUEKASÏNI. Imecha engajtsï jingoni kúnguarhijka, uátiksïni ambakiti ambe úrani o no sési ambe. Imecha engaksï kʼuiripueri jánguani estudiarijka (sociólogos) uandasïndiksï eska i ambe ísïska. Por ejemplu, uandasïndiksï eska imecha engaksï imani kʼuiripuechani kúrhiaska engaksï itsutajka o engaksï ísku jatini jurajkujka uámbani o témbani, jámberiksï niáraati májkueni ambe úni.
AMBEJTSÏ UÁ ÚNI. Imani amiguechani jirinhaa je engaksï imani ambarhati pʼindekuechani ka úkuechani jatsiaka engajtsï cha jukaparharaajka ka uékantsï terokukuantaani. Por ejemplu, imechani engaksï jánhaskakua jingoni jámajka, janhanharpini, intsïmpitini ka engaksï sési kámpijka.
MÁTERU BIBLIAERI KARAKATECHA
Exea je bideuechani engaksï Bibliarhu pʼitakata jaka para jarhuataani temungurhirichani, tumbiichani ka sapiichani paraksï sánderu sési pájperani familia jingoni.
NO UANDANI IMANI AMBE ENGA NO SÉSI PʼIKUASTPIJKA
“Jarhasti ima enga no eratsiparini uandajka enga ísïka eska espada jimbo chʼurhurpini jarhani” (PROVERBIOS 12:18).
INTSÏMPITIINI
‘Ima kʼuiripuni enga intsïmpitika, sési nikuati’ (PROVERBIOS 11:25).
ÍSÏ KÁMPINI ESKACHI NA UÉJKA ESKAJTSÏNI KÁMAAKA
“Eska cha na uékajka eskaksïni kámaaka kʼuiripuecha, chájtu ísï kaa je imechani iámindu ambe jimbo” (MATEU 7:12).
