Sési pʼikuarherani
Biblia arhisïndi eskachi jánguarhintaaka no imani ambe pʼikuarherani engajtsïni no marhuachiaka, sánderu sési, eskachi imani ambe pʼikuarheraaka engajtsïni marhuachijka.
IKIATAPU
BIBLIAERI KARAKATA: “Ima enga no sóntku ikiajka, sánderu ambakitisti ka eska ima kʼuiripu enga uinhapitiika” (Proverbios 16:32).
AMBE ARHIKUEKASÏNI. Sésisti engachi jorhenguarhiaka pʼíngukuarhini parachi no sóntku ikiani. Nájkirukachi ménisï jatsiaka ambe ma engachi jimbo ikiani jauaka, engachi no pʼíngukuarhiska kánikuajtsïni no sési nicheati. Enga nema iámindu ambe jimbo kururjaxejka, sáno méntkisï imani ambe uandasïndi o úni enga tátsekua pʼamondakuarhijka.
AMBEJTSÏ UÁ ÚNI. Jorhenguarhi je pʼínguni ikiatapuni ante dejtsï tátsekua puru ikiani jámania. Máruksï uandasïndi eska enga nema jukari ikiajka, xarhatasïnga eska no nema úsïnga juramukuni joperu ambe enga xarhatajka jindesti eska ikiatapu juramukusïnga. “Komueska kʼéri ireta ma enga kʼamajkunhaka, enga no jukaka barda, ísïsti ima kʼuiripu enga no újka pʼínguni imeri ikiatapuni” (Proverbios 25:28). Sési míteni nénasï úkuarhi ambe ma, jarhuataatiksïni parajtsï no ikiani. Biblia uandasïndi: “Kʼuiripueri jánhaskakua jarhuatasïndi pʼínguni imeri ikiatapuni” (Proverbios 19:11). Engajtsï jingontku kurhaaska iámindu ambe enga xáni úkuarhika, i ambeksïni jarhuataati kurhanguni ambe ma ka nójtsï ikiani.
DIOSMAIAMUKUA ÍNTSPINTANI
BIBLIAERI KARAKATA: ‘Méntku jauena je diosmaiamukua arhijpini’ (Kolosasi 3:15).
AMBE ARHIKUEKASÏNI. Máruksï uandasïndi eskaksï ima kʼuiripuechajkusï tsípikua jingoni irekajka engaksï diosmaiamukua íntspintajka. Asta imecha engaksï tsïtakuarhika ambe ma mítestiksï eska i ambe ísïska. Exesïndiksï eska agradeserini imani ambe engaksï jatsika ka nóksï uandanhiani jarhani imani ambe jimbo engaksï tsïtakuarhika, jarhuataasïnga paraksï no kómu pʼikuarherani jarhani.
AMBEJTSÏ UÁ ÚNI. Pauani pauani, eratsi je o kara je imani ambe engajtsï jimbo agradesidu jaka. No uétarhisïndi eska kʼéri ambeuaka, uáti sapichitu ambeni, komu enga ménderu erandika, ambakiti uandontskuarheta ma nema jingoni o jimbokajtsï sésikua jatsiska máteru jurhiatikua irekani. Engajtsï jánguarhintaska ini ambe úni, jarhuataatiksïni parajtsï tsípikua jingoni irekani.
Ambe ma engaksïni kánikua jarhuataaka, jindesti diosmaiamukua íntsantaani chári familiarichani ka amiguechani. Eratsi je ambe engajtsï jukaparharajka imecheri ambe ka tátsekua arhia je imechani japarini o karta ma jimbo, korreu elektroniku o mensaji ma jimbo. Ísïjtsï uáka sánderu sési pájperani imecha jingoni ka sésijtsï pʼikuarheraaka jimbokajtsï ambakiti ambe úni jauaka para máteruecha (Ukuecha 20:35).
MÁTERU BIBLIAERI KARAKATECHA
Uákajtsï késkuni Bibliani parajtsï kurhaani, pájinarhu jw.org enga 40 idiomecha jimbo jaka.
NO JÁMANI ARHIRPERANI
“Uénani arhirperani, ísïsti komu kʼéri puerta ma mítani; ante de uénani uarhiperakua, kéndikukuarhi” (PROVERBIOS 17:14).
NO UANDANHIANI SÁNDERU ORHEPANI JIMBO
“Asï jáma je pendienti páni para ambe enga úkuarhiaka pauani, jimboka pauantu jauaka miskuarhita ambe. Ka sésku kánisti miskuarhita mándani jurhiatikueri” (MATEU 6:34).
ERATSINTANI ANTE DE ÚNI AMBE MA
“Chíti eratsikuakini kuidarini jauati, ka jánhaskakuakini niáraati kuájchakuni” (PROVERBIOS 2:11).
Jamberijtsï ístu uéjka ini ambe míteni
¡TSÍNHARHI!
Néna no xáni uandanhiani
Exea je máru ambakiti konsejuechani engaksïni jarhuataaka orhepani uérakuani uandanhiatechani ka nóterujtsï xáni uandanhiania.
