Sési úrani tumina
Uánikua kʼuiripuechaksï ústia exeni néna no xáni uandanhiata ambe jatsini tumina ambe jimbo, Bibliaeri karakatechani úrapariani.
ERATSINI AMBE ÚNI
BIBLIAERI KARAKATA: “Sési nikuati imani enga ánchikuarhirika enga sési eratsintaaka ambe enga uáka; joperu ima enga jirejiresï uáka ambe ma, niáraati pobri pakarani” (Proverbios 21:5).
AMBE ARHIKUEKASÏNI. Para sési uérani ambe ma, uétarhisïndi sési eratsikuntani ambe enga uáka ka ísïmindu úni. Miá je eskajtsï no uáka piáni iámindu ambe engajtsï uéjka. Ísï jimbo, sési eratsi je nénajtsï uá úrani chári tuminani.
AMBEJTSÏ UÁ ÚNI
-
Exe je na xántsï ataraa. Kara je ambe engajtsï xáni piáka ka ambe enga sánderu uétarhiaka. Tátsekua, arhuta je na xántsï ataraa para mándani ambe. Engajtsï uétarhinchaaka sánderu tumina para imani ambe maiampini engajtsï no andangutaka, máteru nani pʼikurhuku je. Por ejemplu, engajtsï jukari úraka para gasolina, imani tumina jimbo pʼikurhuku je engajtsï arhutapka para imani ambe enga no xáni jukaparhakueka, komu uérakua ísï tʼireni.
-
Jánguarhi je no kántspeni. Asï ísku jatini jópcha je. Sánderu sési, ante de piáni ambe ma, orheta tána je tuminani. Engajtsï tarjeta de kréditu úrajka, jánguarhi je mándani kutsï maiampini na engajtsï xáni kántspeni jauaka parajtsï no tátsekua andakua jingoni maiampini. Ka engajtsï kántspini jakaia, exe je nénajtsï maiampinta ka jánguarhi je ísï úni.
Exenhastia eska sáno méntkisï sánderu tumina úrakuarhisïnga enga nema tarjeta de kréditu jimbo maiampijka. Ísï jimbo, jánguarhi je sési úrani.
JÁNGUARHINI AMBAKITI AMBE ÚNI
BIBLIAERI KARAKATA: “Ima enga xépejka no uékasïndi tarheni imani tiempu jimbo enga iauajka; ísï jimbo kómu nitamakuarhiati jiáni enga pʼikuntskueuaka, enga no ma ambe jatsikuarhiaka” (Proverbios 20:4).
AMBE ARHIKUEKASÏNI. Xépekua, niárasïndi nemani pobri pakatani. Ísï jimbo, jánguarhi je ánchikuarhirini ka sési úrani chári tumina parajtsï jatsini ambe enga uétarhiaka sánderu orhepani.
AMBEJTSÏ UÁ ÚNI
-
Ánchikuarhirini. Engajtsï ánchikuarhiriska ka mintsinharhikueni, sánderu fásiliuati eskajtsï ióni jamberi jatsiaka ánchikuarhita ma. Patronichaksï jukaparharaasïndi imechani engaksï uinhamu ánchikuarhijka.
-
No sïpani. Engajtsï sïpaska ambe ma ánchikuarhitarhu, máteru kʼuiripuechaksï niáraati míteni ka tátsekuaksïni no nema uékaati íntskuni ánchikuarhita.
-
No jukari tsitini tumina jatsini. Engajtsï uékaaka sánderu ka sánderu tumina andani, sánhani arhiakajtsï pʼamenchakua ambe pʼirani ka no sési pájperani máteruecha jingoni. Miá je: jarhasti máteru ambe enga sánderu jukaparhakueka eska tumina.
MÁTERU BIBLIAERI KARAKATECHA
Uákajtsï arhintani Bibliani pájinarhu jw.org enga uánikua idiomecha jimbo jaka.
NO ÚRANI TIEMPU NI TUMINA PARA BISIU AMBE
“Kauicha ka ima enga ísku jatini jukari tʼirejka, niáraatiksï pobri pakarani ka kʼuínchakua jimbo, niáraatiksï imani ambe jukantani enga iámu jiánguarhikia” (PROVERBIOS 23:21).
NO JUKARI UANDANHIANI TUMINA JIMBO
“Asï jáma je jaakuarhini [o uandanhiani] na engajtsï nitamaaka, ambe engajtsï tʼireaka o ambe engajtsï itsïmaaka, ka ni para kuerpu, ambe engajtsï xukuparaaka” (MATEU 6:25).
NO ENBIDIARPINI
“Ima kʼuiripu enga iámindu ambe enbidiarijka, uarhisïndi jatsikuarhikua ambe xáni tsitini, no míteparini eska niáraaka pobri pakarani” (PROVERBIOS 28:22).
