“Asï jáma je pendienti páni para ambe enga úkuarhiaka pauani, jimboka pauantu jauaka mískuarhita ambe” (MATEU 6:34).

Ambe arhikuekasïni. Méntkisïchi jatsiauaka uandanhiatechani. Peru no sési jarhasti kúndantaani ma jurhiatikua anapu uandanhiatechani imecha jingoni engaksï ísï pauandikua úkuarhiaka. Ju je jánguarhini no uandanhiani sánderu orhepani anapu ambe jimbo.

• Jukari uandanhiani uáti eskachi no nani máru pʼikuarheraaka. Jiájkani, ¿ambechi uá úni? Orheta, jiókuarhini eskachi no uáka no uandanhiani, peru engachi jukari uandanhiaska imani ambe jimbo enga no juchari jájki jimbo jaka, sánderuchi uandanhiauaka. Tsimani úni jámani, ju je miáni eska sáno méntkisï no xáni no sési ambe úkuarhisïnga eskachi na eratseni japka.

“Auandarhu anapu mímixekua” kurhangutspisïndi (SANTIAGU 3:17, TDU).

Ambe arhikuekasïni. Ju je no erokuarhini eska iámindu ambe meru sési uéraaka. Ju je no jukari jamberi erokuarhini juchari ambe ni máteruecheri.

• Ju je kaxumbitiini, jucha mismu kurhangukuarhini ka imani ambe úni engachi uáka úni ka ístu ambe engaksï uáka úni máteruecha. Engachi ísï úska, sésichi pʼikuarheraaka ka ístu imecha engaksï juchantsïni jingoni jauaka ka ambe ma sánderu sési uéraati. Ístu, ju je seguirini tsípeparini jámani. Engachi tsípijka, asta jiáni enga ambe ma no sési uérajka, úndasïngachi nóteru xáni uandanhiania ka nóteruchi xáni no sési pʼikuarherasïnguia.

“Kʼuiripu enga eratsekua jukarika no sóntku jámasïndi ikiani” (PROVERBIOS 17:27).

Ambe arhikuekasïni. Kurhurjaxeni jarhani úsïndi eskachi no uáka sési eratseni, ísï jimbo, ju je jánguarhini no xáni ikiani.

• Ju je exeni ambejtsïni uandanhiatasïni ka na engachi jámajka. Por ejemplu, engachi uandanhiani jauaka, ju je exeni ambechi eratsesïni, pʼikuarherani ka úni. Astachi uáka karani máru ambe. Engachi tʼuini mítetini jauakia ambe engachi újka engachi uandanhiani jarhajka, uákachi orhepani uérani. Ístu, ju je eratseni nénachi uá kénditaani máru uandanhiatechani. Engachi no uáka kénditaani, ju je exeni ambejtsïni jarhuataa parachi nóteru xáni uandanhiania. Por ejemplu, ju je exeni nénachi uá sánderu sési úni ánchikuarhita ma ka sési úrani juchari tiempuni.

• Nóchi iáminduecha májkueni jásï uandanhiatechani jatsiasïnga, jimbokachi iáminduecha ménderueni exesïnga ambe ma. Ísï jimbo, ju je jánguarhintani mójtakuni na engachi exejka ambe ma. Uákachi arini ambe úni:

  1. Ju je no jirejiresï no sési exeni ambe engaksï újka máteruecha. Engachi filarhu ma jauaka ka nema ísku jatini inchaakuni juchari orhepani jimbo ka jucha sóntku ísï exeni eska no sáni janhanharpisïnga, ikiauakachi. Sánderu sési jauati eratseni eska no uékaparini indeni ambe úska. Jamberi ísïti.

  2. Ju je ambakiti ambe exeni. Engachi jatsiaka para ióni jamberi erokuarhini para jurhani transporti o parajtsïni doktori atenderini, uákachi úrani imani tiempuni para arhintani o imani ambe úni engachi uétarhinchani jauaka.

  3. Ju je iámindu ambe sési exeni. Ju je kurhamarhikuarhini: “¿Pauani o máteru semana jimbo májkueni exea eska jukari kʼéska i problema?”. Ju je jorhenguarhini exeni náki problema jukari kʼéski ka náki nómbe.

“Ú je iámindu ambe eska na terukuntajka ka eska námindu jindeka” (1 KORINTU 14:40).

Ambe arhikuekasïni. Ju je jánguarhintani ordeni jimbo úni ambe ma.

• Iáminduechachi uétarhinchasïnga eska ambe ma ordeni jimbo úkuarhiaka. Jurajkuni ambe ma para tátsekua, úsïndi eskachi no uáka sési úni ambe ma ka uandanhiani, ka eskachi sánderu uánikua ambe jatsiaka para úni. ¿Andichisï no arini ambe újki?

  1. Ju je orariu ma úni enga no xáni úkua jukaaka ka ísï úni.

  2. Ju exeni ka mójtakuni imani ambe enga újka eskachi jurajkuaka ambe ma para tátsekua.

“Sánderu sésisti mintsikuarhini sáni ka eska jukari kánikua ánchikuarhini ka ísku xáni jánguarhintani” (ECLESIASTÉS 4:6).

Ambe arhikuekasïni. Jamberi imecha engaksï pʼindeka jukari ánchikuarhini, nóteruksï jatsijtia tiempu ni uinhapikua paraksï tsípikuarhini imani ambe jimbo engaksï xáni ánchikuarhika.

• Ju je séskisï jukaparharani ánchikuarhitani ka tuminani. Sánderu tumina jatsini no úsïndi eskachi sánderu tsípikua jingoni irekaaka ni eskachi no xáni uandanhiauaka. Sánderu sési, jamberi uáti ménderueni úkuarhini. Eska na arhijka Eclesiastés 5:12, “ima enga jatsikuarhirika no úsïndi kʼuíni imani ambe jimbo enga xáni jatsikuarhika”. Ísï jimbo, ju je jánguarhintani sési úrani tuminani.

• Ju je arhutani tiempu parachi mintsikuarhini. Engachi imani ambe úska engachi tsitijka, jarhuataatijtsïni parachi nóteru xáni uandanhiania. Peru ju je miáni eska imani ambe jingoni tsípikuarhini engachi no manakuarhijka komu telebisioni exeni, jamberijtsïni no xáni jarhuataati.

• Ju je no jukari úrani juchari selularini o tabletani. Ju je no méntku exeani jarhani mensajichani o redesi sosialicharhu ísï inchani. Enga no meru uétarhiaka, ju je no exeni ánchikuarhitarhu anapu ambe enga no jindeuaka ora para ánchikuarhini.

‘Uinhaperantani kuerpuni, sánisï marhuasïndi’ (1 TIMOTEO 4:8).

Ambe arhikuekasïni. Jánguarhini ejersisiu úni, jarhuatasïndijtsïni parachi no xáni pʼamenchani.

• Ju je imani ambe úni engajtsïni marhuachiaka. Ejersisiu úni, jarhuataatijtsïni parachi tsípekua jingoni jámani ka eska juchari kuerpu uinhapiti jauaka parachi úni orhepani uérakuni uandanhiata ma. Ju je imani ambe arhani engajtsïni marhuachiaka ka no jámani no tʼireni ma xanharisï. Ju je jánguarhintani sési mintsikuarhini.

• Ju je no jámani etsutani, droga ambe úrani o alkooli arhani nomasi parachi “uékani mirikurhiani” uandanhiatechani, jimboka sánderu orhepani inde ambe úsïnga eskachi sánderu uandanhiauaka ka no sési úkuni juchari kuerpuni ka eskachi ísku ambenharhiaka tumina.

• Uákachi doktori ma jingoni nirani engajtsïni uandanhiatecha pʼamenchatarani jauakia. Nóchi jatsiska para kʼuratseni doktorini ma jarhuajperata kurakuni.

Ju je exeni “ambe enga sánderu” jukaparhakueka (FILIPUSΛ 1:10).

Ambe arhikuekasïni. Ju je jingontku exeni ambe enga sánderu jukaparhakueka.

• Ju je ordeni jimbo karani imani ambe engachi uáka, exeparini náki sánderu jukaparhakueski. I ambejtsïni jarhuataati parachi imani ambe orheta úni enga sánderu jukaparhakueka ka exeni náki ambechi uá tátsekisï úni, máteruechani jurajkukuani o asta nóteru únia.

• Ma semana jimbo, ju je karani imani ambe engachi újka ka na xánchi tiempu úrasïni. Tátsekua, ju je exeni nénachi uá sánderu sési úrani tiempuni. Engachi úska sánderu sési úrani tiempuni, nóteruchi xáni uandanhiauakia.

• Ju je arhutani tiempu parachi mintsikuarhini. Ma ratu mintsikuarhini, nájkiruka sánititueuaka, uáti eskachi sési pʼikuarherantaaka ka nóteruchi xáni uandanhiania.

“Uandanhiata ambe no sési pʼikuastasïndi kʼuiripueri mintsitani, peru ambakiti uandakuechaksï uinhaperantasïndi” (PROVERBIOS 12:25).

Ambe arhikuekasïni. Engajtsïni máteruecha uékperakua jingoni uandaxechejka ka pʼamojperakua jingoni, uinhaperantasïndijtsïni.

• Ju je aianguni amiguni ma enga kurhangutspijka, na engachi pʼikuarherajka. Nema engachi mintsinharhijka, jarhuataatijtsïni ménderueni exeni ambe ma o astajtsïni exerani imani ambe engachi jucha no eratsepka parachi úni sési péntani ambe ma. Asta solu uénhikuarhini, uátijtsïni sési pʼikuastantani.

• Ju je kurhajkuarhini jarhuajperata. ¿Uáchi máteru nemani jurajkukuni ánchikuarhita ma o arhini nemani eskajtsïni jarhuataaka?

• Enga juchari ánchikuarhitarhu anapu kompanieru ma újka eskachi no agustu ánchikuarhiaka, ju je exeni ambechi uá. Por ejemplu, ¿úpirinchi janhanharhikua jingoni arhini ka iatsitakuarhu andijtsïnisï no sési pʼikuastajki? (Proverbios 17:27). Enga i ambe no marhuaska, ¿úpirinchi nóteru xáni kúrhinia imani?

“No solu kurhinda jimbojku uáti irekani ma kʼuiripu, sino iámindu uandakua jimbo enga Diosï uandaka” (MATEU 4:4).

Ambe arhikuekasïni. Kʼuiripuechachi no solu tʼirekua, xukuparhakua ka kʼumanchikua ma uétarhinchasïnga, sino ístuchi uétarhinchasïnga Tata Diosïri ambe jorhenguarhini. Parachi tsípikua jingoni irekani, jatsiskachi para jiókuarhini ka jánguarhintani jorhenguarhini Tata Diosïri ambe.

• Kánikuajtsïni jarhuataati kómarhini. Tata Diosïjtsïni pʼímarhisïndi parachi aiangukuarhini ambe engajtsïni uandanhiatajka, jimboka ima uandanhiasïnga juchantsïni jimbo (1 Pedru 5:7). Kómarhini ka ambakiti ambe eratseni, uáti eskachi agustu pʼikuarheraaka (Filipusʌ 4:6, 7).

• Ju je imani ambe arhintani engajtsïni jarhuataaka andarherani Tata Diosïni. Karakatecha engachi exeaka ini rebistarhu, Bibliarhuksï jarhasti engaksï karanhaka parachi Tata Diosïri ambe jorhenguarhini. I karakatechajtsïni ístu jarhuatasïndi jánhaskakua jatsini ka parachi eratsekua jukariini (Proverbios 3:21). Sési japirindi engajtsï arhintapiringa Bibliani. Úpiringajtsï libru de Proverbios jingoni uénani.