NÉNACHI UÁ NO XÁNI UANDANHIANI
Uákachi no ma uandanhiata jingoni irekani
Ambe enga xáni arhijka Biblia, jarhuatasïndijtsïni parachi no jukari uandanhiani. Juchachi no uáka kʼamajkuni iámindu ambe engajtsïni xáni uandanhiatajka, peru juchari Kuerajpiri jo. Asta niárastia erakuni nemani parajtsïni jarhuatani: tata Jesukristuni. No ióndani, Jesusi sánderu ambakiti ambe uáti interu parhakpini jimbo ka eska jiáni enga ixú Echerirhu irekani japka. Por ejemplu:
JESUSI TSINAUATI PʼAMENCHATICHANI
“Juákuasïrendiksï pʼamenchatichani [...] ka ima ambakerantaasïrendi” (MATEU 4:24).
JESUSIJTSÏNI KʼUMANCHIKUECHANI ÍNTSAUATI KA TʼIREKUA PARA IÁMUNDUECHA
“Uáuatiksï kʼumanchikuechani ka jimaksï irekaati; ka niáraatiksï ubasï jatsikuni ka akuatiksï frutani. Nóksï uáti kʼumanchikuani ka máteru nema irekani; nóksï ikaraati ka máteru nema akuni” (ISAÍAS 65:21, 22).
JESUSI PÍNANDIKUA JUÁTI PARHAKPINIRHU KA ESKA NO NEMA NO SÉSI AMBE ÚMINHAAKA
“Ima jurhiatikua jimbo, uániatiksï kʼuiripu jurhimbiticha, ka kánikua pínandikua jauati astaka luna nóteru jauakia. Ka uánikua kʼuiripuechani juramukuauati marirhu uératini asta máteru marirhu jamberi ka desde Ríurhu uératini asta jima enga sánderu iauanika parhakpinirhu [...] ka imeri enemiguechaksï tʼupurirhu andatseraati” (SALMO 72:7-9).
JESUSI KʼAMAJKUATI NO JURHIMBIKUA AMBE
“Pʼamojkuati imani enga kaxumbitiika ka imani enga no jatsikuarhirika, ka pʼímutantauati imechani engaksï no jatsikuarhirika. Uáti eskaksï nóteru kómu nitamakuarhiakia ni no sési kánhani” (SALMO 72:13, 14).
JESUSI KʼAMAJKUATI KÓMU NITAMAKUA AMBE KA UARHIKUANI
“Nóteru jauatia uarhikua, ka ni uandanhiata, ka nóteru nema ueraati o pʼamenchani” (JAŊASKUECHA 21:4).
