Xáni no sési engaksï ambakiti kʼuiripuecha kómu nitamakuarhijka. Indeni kʼuiripuechani exepariani, nema úpirindi eratseni eska no uétarhisïnga jánguarhintani sési úni ambe ma.

Máru kʼuiripuechaksï ísï jakajkusïndi eskachi uánikua xanhari niárasïnga uarhini ka ménderu andajpenuni. Eratsesïndiksï eska engachi ambakiti ambe uáka iásï engachi irekani jaka, niáraakachi ambakiti irekua ma jatsini jiáni engachi ménderu andajpenuakia, peru eska engachi no sési ambe úska, kánikuajtsïni no sési nicheaka. Seguni i jakajkukua, kʼuiripu ma uáti kómu nitamakuarhini enga no sési ambe úpka imani tiempuni jimbo enga antesi irekapka. Peru kurhamarhikuarhi je:

• ¿Para ambejtsïni marhuachipirini iásï kómu nitamani ambe ma jimbo engachi imani tiempu jimbo úpka engachi antesi irekapka ka engachi ni miájka?

• ¿Para ambe xáni jánguarhintani úni ambe ma parachi no pʼamenchani ka parachi no no sési ambe úkuarhinchani ka kʼóru tʼuini uaxastakata jarhania na engachi irekaaka seguni ambe engachi úpka ima tiempu jimbo engachi antesi irekapka?

  PARAJTSÏ SÁNDERU MÍTENI

  Exe je pájinarhu jw.org bideuni ¿Andisï Tata Diosï jurajkuni jaki eska jauaka kómu nitamakua ambe?

Kómu nitamakua no Tata Diosïri kastiguesti

Uánikua xanhari i ambe úkuarhisïndi jimbokachi jimesï jarhasïnga ka jiáni enga no sési ambe úkuarhijka.

“Ima enga sánderu uiriijka, no méntkisï andasïn[di], ka níjtu enga sánderu uinhapika, andajki guerrani, ka niksï mímixeticha jatsijki méntkisï tʼirekua, ka niksï jánhaskaticha jatsijki méntkisï tumina, ka niksï méntkisï sési exenhani imecha engaksï jorhenaka, jimboka méntkisï úkuarhisïnga o jarhasïnga ambe ma enga ma no erokuarhijka” (ECLESIASTÉS 9:11).

Kómu nitamakuarhisïngachi jimbokachi kʼamanharhintskua jingoni andajpenusïnga

Sáno méntkisï, kʼuiripuechaksï úrasïndi uandakuani kʼamanharhintskua paraksï imani ambe arhikuekani engachi no sési ambe újka. Joperu Bibliarhu ístu úrakuarhisïndi para arhikuekani imani kʼamanharhintskuani enga Adani ka Eba kéritaka iámindu kʼuiripuechani, nájkiruka nema ambakiti kʼuiripu máeka o nómbe.

“Exe, engani andajpenupka tʼuini no sési úrispkia ka jiáni uératini kʼamanharhintstiska desde engarini juchiti nándi kánguarhika” (SALMO 51:5).

Kʼamanharhintskua jimbo, kʼuiripuechaksï kánikua no sési jásï ambe úkuarhinchasïndi

Kʼamanharhintskua, no solu ústi eskachi nóteru sési pájperaakia juchari Kuerajpiri jingoni, sino ístu iámindu imani ambe jingoni enga ima kueraaka, komu máteru kʼuiripuecha jingoni. I ambe úsïndi eskachi iáminduecha kánikua kómu nitamakuarhiaka.

“Engani uékani jarhajka úni ambakiti ambe, [...] solu no sési jásï ambe jarhas[sïndi] juchiti mintsitarhu” (ROMA 7:21).

“Ka míteskachi eska iámindu ambe enga kueraakateka, asta iásï jamberi kánikua tekaantaxaka ka asta uerani jamberi” (ROMA 8:22).