Ambe enga uáka kénditani
Uánikua kʼuiripuechaksï ísï úxatia eskaksï na uandajka Bibliaeri karakatecha engachi exeakia ka niárastiksïa nóteru menusi újpini. Joperu ambe enga ísïka, jindesti eskachi jandiajku no uáka méntku nóteru menusi újpinia. Jiájkani, ¿ambejtsïni jarhuataa kénditani?
Ambakiti juramukua ma
Ambe enga xáni úkuarhikia iónisï, xarhatasïndi eskaksï juramuticha no úxaka úni eskaksï kʼuiripuecha nóteru menusi újperaakia. ¿Arhikuekasïni i ambe eska no ma juramukua uáka ísï úni?
Paraka nóteru méni menusi újperanhaakia, juramukua ma arini ambe jatsisti para úni:
-
1. Jarhuatani kʼuiripuni paraka uékaaka mójtakuni ambe enga eratsejka ka pʼikuarherani máteruecha jimbo.
-
2. Nóteru imani ambe pʼikuarherania enga újka eska ma no sési kaauaka máteruechani.
-
3. Juramutichani jatsiani engaksï no menusi újpiaka.
-
4. Úni eskaksï interu parhakpini anapuecha májku kʼéri jauaka.
Biblia uandasïndi eska Tata Diosï uaxastaskia juramukua ma enga iámindu ini ambe uáka. Jindesti Tata “Diosïri Juramukua” (Lukasʌ 4:43).
Exe je ambe enga uáka i juramukua juchantsïni jimbo.
1. Eska jauaka sánderu ambakiti jorhentperakua
Iámindu parhakpini anapuechaksï jorhenguarhiati jurhimbitku úni ambe ma (ISAÍAS 26:9).
“Jurhimbikua jingoni úni ambe ma pínandikua jarhasïndi, ka ambe enga jarhajka jurhimbikua jimbo sési pʼikuarherakua ka seguridadi para méntkisï” (ISAÍAS 32:17).
¿Ambe arhikuekasïni? Tata Diosïri Juramukua, jorhendauati kʼuiripuechani ambe enga meru ambakiti ambeka. Engachi niárajka exeni ambe enga sési jaka, ambe enga no sési jaka, ambe enga jurhimbitkueka ka ambe enga no jurhimbitkueka, niárasïngachi ménderueni exeani kʼuiripuechani. Iáminduechaksï niáraati míteni eska ambe enga sési jaka, jindeska uékaani iámindu jásï kʼuiripuechani.
2. Eskachi sési pʼikuastanhantaaka
Tata Diosï, “kutsunharhikuauati iámindu uekua ka nóteru jauatia uarhikua ka ni uandanhiata ka nóteru nema ueraati ka ni pʼamenchani jimboka nitamaakia iámindu uénani anapu ambe” (JAŊASKUECHA 21:4).
¿Ambe arhikuekasïni? Eska Tata Diosïri Juramukua kʼamajkuaka iámu kómu nitamakua ambe enga niárajka jarhani jimboka kʼuiripu no jurhimbikua jingoni jámasïnga. Imecha engaksï niáraka no sési kánhani, nóteruksï kurhunhpiatia.
3. Eskachi ambakiti juramutini ma jatsiaka
“No jusgarpeati seguni eska na jáxeaka ma kʼuiripu ni seguni eska na kurhajchpiaka. Jurhimbikua jingoni jusgariauati pobrichani, ka jurhimbikua jingoni jurhimberpintaati para echerirhu anapu kaxumbitichani marhuakuani” (ISAÍAS 11:3, 4).
¿Ambe arhikuekasïni? Eska tata Jesukristu enga Juramutika Tata Diosïri Juramukuarhu, jurhimbikua jingoni juramuaka parhakpinirhu auandarhu uératini ka no nemani sánderu sési kámaati. Jesusi no sánderu xénchasïndi ma nasionini o lugarini ma eska máteruni ka uáti eska iámu parhakpinirhu kurhajchanhaaka imeri juramukuecha engaksï jurhimbitkueka.
4. Eskachi májku kʼéri jauaka
Tata Diosïri Juramukua úsïndi eska kʼuiripu “májkuentstini jauaka para[ksï] májku ambe eratseni ka ístu májku ambe pʼikuarherani” (1 KORINTU 1:10).
¿Ambe arhikuekasïni? Kʼuiripuecha engaksï Tata Diosïri Juramukuarhu jauaka, meruksï májku kʼéri jauati. Májku kʼériksï jauati jimbokaksï sési jimbo uékperaaka.