Engachi sánderu imani ambe exeska na engaksï máteruecha ménderueni jásïika, jamberi inde ambe uáti eskachi no sési exeauaka máteruechani. Astachi úpiringa eratseni eskaksï imecha no xáni jukaparhakueska. Engachi niárapiringa ísï eratseni, úkua jukapirindi kurhangukuani máteruechani. Ka i ambe úpirindi xarhatani eskachi uénaxakaia menusi uáni máteruechani.

“Tsípi je imechani jingoni engaksï tsípijka, ka uera je imechani jingoni engaksï uerajka” (ROMA 12:15).

¿Ambe arhikuekasïni? I karakatajtsïni jorhendasïndi eskachi jatsiska para kurhangukuani máteruechani. Ka para ísï úni, jatsiskachi para eranhaskani eskachi juchasï ísï nitamakuarhini jaka ka pʼikuarherani na enga pʼikuarherajka kʼuiripu.

Engachi kurhangukuaska máteruechani, exesïngachi na engachi májkueni jásïika. Kuentachi íntskukuarhisïnga eskaksï májkueni pʼikuarherasïnga eska jucha ka eskaksï májkueni kurhakuarhisïnga ambe ma jimbo. Engachi kurhangutspinijka, jarhuatasïndijtsïni exeni eska nani uéjkichi anapueni, iáminduechachi kʼéri familia máeska. Engachi sánderu jánguarhintaska exeni eskachi májkueni járhatiska sánderuchi no jámaaka arhinchpeni.

Kurhangutspini, ístujtsïni jarhuataati janhanharhiani máteruechani. Anne-Marie, Senegal anapu, pʼindespti menusi uáni imani kʼuiripuechani engaksï uánikuecha ísï exeauenga eskaksï mesusispka. Imajtsïni aiangusïndi na enga jarhuatapka kurhangukuani máteruechani: “Engani exeapka na engaksï kómu nitamakuarhienga ima kʼuiripuecha, eratsentaspka na engani pʼikuarherapiringa engani ji ísï nitamakuarhini japiringa. Ka uénaspka exeni eskani ji no sánderu kʼéri ambespka eska imecha ka eskani no ma ambe úspka parani sánderu sési exenhani eska máteruecha”. Ísï jimbo, engachi jánguarhintaska exeni na engaksï járhati uandanhiatechani jatsiajka kʼuiripuecha, sánderuchi kurhangukuauaka ka nóchi jámaaka arhinchaani.

Engajtsï no sési exeajka máru kʼuiripuechani, jánguarhinta je imani ambe exeni engajtsï jimbo májkueni újka ambe ma. Por ejemplu, eranhaska je na engaksï pʼikuarherajka inde kʼuiripuecha arini ambe jimbo:

• Engaksï májku kʼéri tʼireni jarhajka familia jingoni.

• Engaksï kuataratini kʼamarajka ánchikuarhini.

• Engaksï imecheri amigu jémbecha jingoni jarhajka.

• Engaksï imani pirekua kurhaajka engaksï sánderu tsitijka.

Iásï, ísï exe je eska cha ima kʼuiripueska. Ka kurhamarhikuarhi je:

• ¿Ambe úpirini engarini nema ísï pʼikuastapiringa eskani no ma ambe marhuasïnga?

• ¿Néna pʼikuarherapirini engaksï máteruecha no sési ambe uandapiringa juchiti ambe ka jinijtsïni no míteni?

• Engani ji imani grupuru japiringa, ¿néna tsitipirini eskajtsïni kámapiringa?