Sési míti je iámindu ambe
Andisï úkua jukajki
Sáno méntkisï, menusi uásïndiksï kʼuiripuechani jimbokaksï imani ambe mítesïnga enga no ísïka. Por ejemplu:
-
Nájkiruka no ísïuaka, máru patronichaksï eratsesïndi eskaksï nanakecha no uáka úni ánchikuarhita ambe engaksï jatsiaka para mákina ambe úraani o komputadora ambe.
-
Uánikua kʼuiripuechaksï no sési ambe uandasïndi imani kʼuiripuecheri ambe engaksï máteru jásï idioma uandajka oksï máteru jásï pʼindekuechani jatsiani.
-
Uánikua kʼuiripuechaksï ísï eratsesïndi eskaksï imecha engaksï no újka exeni, kurhaani o xanharani, kómuksï irekasïnga ka nóksï sáni tsípikuarhini.
Uánikua kʼuiripuechaksï ini ambe jupindaskuarhisïndi paraksï uandani eska ísïska ambe engaksï eratsejka, ka seguruksï jarhasti eskaksï imecha engaksï ménderueni eratsejka nóksï ambe ma míteska.
Bibliaeri karakata
“No sési jarhasti eska kʼuiripu ma no jatsiaka mímixekua” (PROVERBIOS 19:2).
¿Ambe arhikuekasïni? Engachi no iámindu ambe sési míteaka, imani ambechi uáka enga no sési jauaka. Engachi jakajkuska ambe engajtsïni máteruecha aianguaka ka no imani ambe enga meru úkuarhika, ísku jatinchi no sési ambe uandaaka máteruecheri ambe.
Néna jarhuajpisïni sési míteni ambe ma
Engachi sési míteaska kʼuiripuechani, nóchi jakajkuaka chkuanderakua ambe enga uandanhaaka
imecheri ambe. Ka engachi mítejkia eska no ísïska ambe engachi aiangunhaka máru kʼuiripuecheri ambe, jamberichi nóteru jakajkuakia ambe engachi ístu aiangunhaka máteru kʼuiripuecheri ambe.Ambe engajtsï uáka úni
-
Asï májkueni eratsi je iáminduecheri ambe. Na enga jásïika grupuru anapu ma kʼuiripu no arhikuekasïndi eskaksï iámindu májkueni jásïiska.
-
Jiókuarhi je eskajtsï no iámindu ambe míteska máteruecheri ambe.
-
Imani ambe úra je enga mintsinharhikueka parajtsï míteni ambe ma.