Néna no sési úkusïni selulari chaari eratsekuani
Kʼuiripuechachi méntkisï jorhenguarhini jarhasïnga ambe ma: engachi eskuelarhu jarhajka o ánchikuarhitarhu ka engachi máteru ambe úni jarhajka. Ka selulari ambe jarhuajpesïndi para ma úni sánderu ambe jorhenguarhini. No méni xáni fásilispti juchaari kʼumanchikuarhu exentani xáni kánikua informasioni.
Peru kʼuiripuecha engaksï jukari úrajka selularini uaatiksï arini problemechani jatsiani:
-
Úkuaksï jukanchasïndi kurhanguni ambe engaksï arhintani jarhajka.
-
Nóksï úsïndi májku ambe úni.
-
Sóntkuksï kuatantasïndi engaksï jandiajku jarhajka.
AMBE ENGAJTSÏ JATSIKA PARA MÍTENI
ENGAKSÏ ARHINTANI JARHAJKA
Máru kʼuiripuechaksï sóntku arhintasïndi ambe ma enbesi de iatsitakuarhu paraksï úni kurhanguni ambe engaksï arhintajka.
Jirejiresï arhintani ambe ma, marhuasïndi para sóntku exentani mókuntskua kurhamarhikueri ma. Joperu no marhuasïndi enga ma jatsijka para sési kurhanguni ambe enga arhintani jarhajka.
ERATSI JE ARINI AMBE: ¿Úkuajtsï jukanchasïni arhintani tekstu ma enga kánikua kʼéjka? ¿Andijtsïsï exejki eska jánguarhintani ísï úni jarhuatakaksïni parajtsï sánderu ambe míteni? (PROVERBIOS 18:15).
NO ÚNI MÁJKU AMBE ÚNI
Máru kʼuiripuechaksï eratsesïndi eska selulari jimbo, uaakaksï uánikua ambe úni májku tiempu jimbo: pori ejemplu, mensajichani axakuani amiguechani ka ístu estudiarini jarhani. Joperu enga ma no jingontku úska ambe ma ka sánderia enga uétarhiaka eska sési uaaka, tátsekua no ma ambe sési uérasïndi.
Jingontku úni ambe ma, kánikua marhuasïndi ka para úni ísï úni uétarhisïndi pʼíngukuarhini. Uátsï ma enga Grace arhinhajka uandasïndi: “Engari jingontku úska ambe ma, sánderu sési uérasïndi ka nóri xáni uandanhiani jarhasïnga. Kuenta íntskukuarheska eska sánderu sésiska ma ambejku úni jarhani ka eska uánikua ambe májku tiempu jimbo”.
ERATSI JE ARINI AMBE: Engajtsï uánikua ambe újka májku tiempu jimbo, ¿nójtsï úni jarhasïni kurhanguni ka ni miántani ambe engajtsï jorhenguarhijka? (PROVERBIOS 17:24).
ENGA MA JANDIAJKU JARHAJKA
Máru kʼuiripuechaksï no tsitisïndi jandiajku jarhani ka jimboksïsï úrajti selularini paraksï no jandiajku pʼikuarherani. Uarhiiti ma enga Olivia arhinhajka uandasïndi: “Jimbokani kuatantasïnga, no úsïnga ni sikiera 15 minutu jurajkuni juchiiti telefonuni, tabletani o no étskuntani teleni”.
Joperu iáminduecha, tumbiicha ka kʼératicha, uétarhinchasïngachi ménichanisï jandiajku jarhani parachi úni eratsentani ambe engachi jorhenguarhijka. I ambe kánikua jukaparhakuesti parachi úni jorhenguarhini ambe ma.
ERATSI JE ARINI AMBE: ¿Sésijtsï úrasïni imani tiempuni engajtsï jandiajku jarhajka para eratsentani? (1 TIMOTEO 4:15).
AMBE ENGAJTSÏ UAAKA ÚNI
ERATSENTA JE NA ENGAJTSÏ ÚRAJKA SELULARINI
¿Nénaksïni uaa jarhuatani selulari parajtsï sánderu sési jorhenguarhini ambe ma? ¿Ka nénaksïni uaa ójkutani engajtsï jorhenguarhini jauaka ambe ma?
BIBLIERI KARAKATA: “Kuájchaku jánhaskakuani ka eratsekuani” (PROVERBIOS 3:21).
