Tarhiata kontaminarikuarhixati ka uaati kánikua no sési úkuni imani ambe enga tsípiti jaka Echerirhu. Organización Mundial de la Salud exesti eska solu 1% iámu kʼuiripuecheri ma parhakpinirhu jirejtaxati sési jásï tarhiata.

Enga tarhiata kontaminarikuarhijka úsïndi úni eskaksï kʼuiripuecha kánseri p’iuaka pulmonirhu o eskaksï niáraaka pʼamenchakua ambe jatsiani engaksï úkua jukanchaaka jirejtani o mintsitarhu o benecharhu. Ístu, mándani uéxurhini, i jásï kontaminasioni úsïndi eskaksï ma siete miioni kʼuiripuechaksï sánderu no ióni irekaaka.

Juchaari planeta úkata jarhasti paraka méntkisï jauaka sési jásï tarhiata engaksï uaaka jirejtani iámindu imeecha engaksï tsípiti jaka. Peru inde ambe solu úsïndi úkuarhini engaksï kʼuiripuecha no xáni kontaminarhijka planetani. Ju je exeani máru ejempluechani:

• Mítekateesti eskaksï juáteecha úkata jarhaska parakaksï kánikua dióxido de karbonu antsitaaka. Peru ambe enga uánikua kʼuiripu no míteka jindeesti eskaksï anhatapu manglaricha engaksï kostecharisï jaka enga kánikua itsï jaka sánderuksï sési úsïndi indeni ánchikuarhitani. Jimboksïsï xáni jukaparhakueti jimbokaksï úsïnga asta sinko uelta sánderu dióxido de karbonu antsitani eska selbecha.

• Ini jurhiatikuechani jimbo exenhasti eskaksï máru makroalgasi, komu ima enga arhinhajka quelpo o kelp, no soluksï jupikasïndi dióxido de karbonuni, sino eskaksï ístu inchaskusïnga. Quelpueri chkurhichaksï úsïndi iauani ísï biajariini jimbokaksï bolsa sapirhatini járhati jukarhikuarheska engaksï gasi jataka ka inde jarhuatasïndi parakaksï no inchamiaka. Engaksï na iauanisï nirajkia itsïirhu inde bolsa sapirhatiichaksï charasïndi ka tátsekua ueenasïndiksï inchameni astaksï andarhierani marirhu ka jiniksï jurajkusïndi dióxido de karbonuni uánikua uéxurhiniichani jimbo.

• Imani tiempu jimbo enga no xáni uéranhapka jimboka COVID-19 jarhaspka, xarharasti eska juchaari atmósfera úsïnga jandiajku sési niántani. Jimboka 2020 jimbo uánikua fábrikechaksï no ánchikuarhispti ka ístu nóksï xáni jámaspti karruecha ka indeni ambe jimbo tarhiata nóteru xáni kontaminarikuarhisptia. Eska na uandajka Informe mundial sobre la calidad del aire 2020, jukari 80% ima paisicheri enga exenhapka tarhiateri ambe, exesptiksï eska tarhiata nóteru xáni kontaminadu jarhaspkia.

Juramutiichaksï kurhakuaxati fábrikechani parakaksï nóteru xáni kontaminariuakia ka sientifikuechajtuksï exekuntaxati na engaksï jámaaka paraka kontaminasioni no no sési útspiaka. Pori ejemplu, úraxatiksï mikroorganismuechani engaksï mójtakuntajka kontaminasionini parakaksï no no sési útspiaka. Ístu, imeecha engaksï sési mítekuka kontaminasioniri ambe, uandasïndiksï eska sánderu sésiiska eskachi xanharaaka o eskachi bisikleta jimbo niuaka nani ka nóteruchi xáni úrania karruni ka eskachi jánguarhintaaka no xáni úrani enerjiani kʼumanchikuarhu.

Peru no inde ambejkusï uétarhijti. Ísï uandasïndi aianhperakua ma enga 2022 jimbo uéraka ima ofisinecharhu uératini engaksï ma parhakpinirhu ambe exejka komu Organización Mundial de la Salud ka el Banco Mundial.

I aianhperakua xarhatasïndi eska 2020 jimbo, ma tersera parti ma parhakpiniiri úmanhantasïreendi imani ambe úraparini enga tarhiatani kontaminarijka. Uánikua lugariicha jimbo, nóksï úsïndi jimbanhi estufechani jatsiani o imani ambe úrani enga no xáni kontaminariuaka.

“I ambesï uandajti Tata Diosï Jeoba enga jurhimbitiika, ima enga kueraaka auandani […], ima enga kueraaka echerini ka ambe enga xáni jimini andarajka, ima enga tsípikua íntskuajka imeechani engaksï echerirhu irekaka” (Isaías 42:5).

Tata Diosï kueraasti tarhiatani ka sikluechani engaksï újka eska jandiajku pímbinhasïntaaka. Ístu, imeeri uinhapikua no méni kʼamakurhisïndi ka kánikua xénchasïndi kʼuiripuechani. Ísï jimbo, ¿chá eratsesïni eska Tata Diosï ísku pakaraaka ka no ma ambe úni tarhiatani jimbo enga kontaminarikuarhini jaka? Exe je jorhenguarhikuani “Tata Diosï aiatspesïndi eska ménderu sési jándentaaka”.