NÓTKI XÁNI IÓNISTI ENGA UEENANHAKA INBESTIGARINHANI AMBE ENGA UAAKA ÚNI IMA ENGA UARHIRANCHAKA NEMANI PARA NIÁRANI SÉSI PʼIKUARHERANTANI. Joperu eskachi na exekia, máru konsejuecha engaksï imeecha íntspijka engaksï mítekuka íri ambe, sáno méntkisï terukuntasïndi imani ambe jingoni enga Biblia uandajka. I ambe xarhatasïndi eskaksï Biblieri konsejuecha útasï marhuasïnga. Joperuchi Bibliarhu no solu ambakiti konsejuechani exeantasïnga. Ístujtsïni íntskusïndi informasioni engachi no uaaka máteru nani exentani ka enga kánikua uinhaperantaajka imeechani engaksï uarhiranchaka nemani.

• Aiangusïndijtsïni eskaksï juchaari parienticha engaksï uarhikia, nóksï kómu nitamakuarhixaka.

  Eclesiastés 9:5 jimbo, Biblia uandasïndi eskaksï uarhiricha “méntku nóteru ambe ma mítes[k]ia”. Niteruksï újkia eratseni (Salmo 146:4). Ísï jimbo, Biblia terukutantasïndi uarhikuani komueska uinhamu kʼuíni jarhani (Juanu 11:11).

• Aiangusïndijtsïni eskajtsïni Tata Diosï xénchasïnga.

  Biblia uandasïndi: “Tata Diosï Jeobaeri * éskuechaksï exeaxati imeechani engaksï jurhimbitku jámajka ka kurhaasïndi engaksï uinhachaparini jarhuajperata kurhajkuarhijka” (Salmo 34:15). Aiangukuarhini Tata Diosïni na engachi pʼikuarherani jarhajka, no solu jindeesti parachi sési pʼikuarherani o parachi ambakiti ambe eratseni jarhani. Sánderu sési, jarhuatasïndijtsïni parachi sési pájperani juchaari Kuerajpiri jingoni engajtsïni uaaka jarhuatani parachi sési pʼikuarherantani.

• Aiangusïndijtsïni eska sánderu orhepani ambakiti ambe jauaka.

  Biblia uánikua xanhari uandasïndi eskaksï uarhiricha tsíntaaka. Pori ejemplu enga uandajka na engaksï irekaaka kʼuiripuecha Echerirhu sánderu orhepatini, uandasïndi eska Tata Diosï “kutsunharhikuaua[ka] [iámindu kʼuiripuechani] iámindu uekua, ka nóteru jauatia uarhikua, ka ni uandanhiata, ka nóteru nema ueraati o pʼamenchani” (Jaŋaskuecha [Apocalipsis] 21:3, 4). ¿Úsïntsï eranhaskani na enga irenhaaka?

Uánikua kʼuiripuecha engaksï jakajkujka Jeobani, Tata Diosïni enga Biblia uandajka, niárasïndiksï nóteru xáni no sési pʼikuarherania jimbokaksï míteska eskaksï uaaka ménderu exeantani imeechani engaksï uarhiranchaaka. Pori ejemplu, Ann enga uarhiranchaka imeeri uámbani ísï tátsekua engaksï 65 uéxurhini páni japkia temungurhirini, uandantasïndi: “Bibliarini aiachisïndi eska iámindu imeecha engachi uarhiranchaaka, nóksï kómu nitamakuarhixaka ka eska Tata Diosï tsítantauaka iámindu imeechani enga ima imeeri eratsekuarhu jatsiaka. Engani miántajka juchiiti acheetini, eratsentasïnga ambe enga Tata Diosï aiatspejka ka ísï nóteruni xáni no sési pʼikuarherasïngia”.

Tina engachi antesi uandaka, uandasïndi: “Desde jiáni uératini enga Timo uarhipka, exeska na engareni jarhuatani jaka Tata Diosï. Exesïnga na engareni xáni jarhuatajka Tata Diosï Jeoba engani kánikua no sési pʼikuarherani jarhajka. Kánikua mintsikasïnga enga Tata Diosï Jeoba uandajka eska tsítantauaka uarhirichani, inde amberini jarhuatasïndi parani seguirini orhepani uérani asta jiáni engani ménderu exentaaka Timoni”.

I ambe xarhatasïndi ambe engaksï eratsejka uánikua kʼuiripuecha engaksï mintsikajka Bibliani. Engajtsï chá eratsejka eska ambe enga Biblia uandajka no niáraaka ísï úkuarhini, ¿andijtsïsï no exejki máru ambe enga xarhatajka eskaksï imeeri konsejuecha marhuasïnga ka eska ambe enga aiatspijka niáraaka ísï úkuarhini? Kuentajtsï íntskukuarheaka eska ambe enga Biblia uandajka, sánderu ambakiti jarhuajperata máeska para imeecha engaksï uarhiranchaka nemani.

Juchaari pájinarhu Internetiri jw.org, exeantauakajtsï bideuechani engaksï íri ambe uandajka.

 ¿NÉNAKSÏ JARHASKI UARHIRICHA?

¿UÉKAPIRINTSÏ KURHAANI AMBAKITI NOTISIECHANI?