¿Andisï nóteru xáni respetarinhajkia tsípikuani?

KURHAANI INI IDIOMA JIMBO

ANDISÏ XÁNI JUKAPARHAKUE ESKACHI RESPETARIUAKA TSÍPIKUANI

Imani ambe úni engajtsïni no sési úchiaka ka pʼamenchatani xarhatasïndi eskachi no respetariisïnga juchaari tsípikuani ka nijtu máteruecherini.

Sigarru itsutani no solu úsïndi eska ma kánseri pʼiuaka, sino ístu eska juchaari kuerpu no uaaka kuájpikuarhini indeni pʼamenchakueri. Ma 90% engaksï kánseri jimbo uarhijka jindeesïndi jimbokaksï itsutasïreenga oksï jimeesïsï jarhani enga itsutanheenga.
Mándani uéxurhini uánikua kʼuiripuechaksï no sési úkuarhinchasïndi tiroteuecha jimbo. Aianhperakua ma enga Universidad de Stanford (Estados Unidos) úka, uandasïndi: “Exenhasti eska asta ima kʼuiripuecha engaksï no no sési úkuarhinchajka [tiroteuecharhu engaksï eskuelecharhu jarhajka] ióni jamberiksï no sési pʼikuarhenhisïndi”.
Enga nema kauirini o drogadu manejarini jarhajka niárasïndi peligru máeni para imeecha engaksï karreterarhu ísï nirani jarhajka o xanharani jarhani. Uánikuechanksï no sési úkuasïndi jimbokaksï no sáni respetarisïnga tsípikuani.

AMBE ENGAJTSÏ UAAKA ÚNI

Kuidarikuarhi je parajtsï no pʼamenchani. Útasïjtsï uaaka nóteru itsutani, ni bapearini, níjtu kauini o droga ambe úrani. I no sési járhati pʼindekuechaksï no sési úkusïndi chaari kuerpuni ka xarhatasïndiksï eskaksï no respetariisïnga máteruecheri tsípikuani nijtu chaari familiani.

“Ju je jurajkuni iámindu indeni ambe enga jájkujka juchaari kuerpuni” (2 Korintu 7:1).

Jukaparhara je chaari seguridadini ka máteruecherini. Paraka no no sési ambe úkuarhiaka chaari kʼumanchikuarhu, sési jatsi je ambe. Jingontku manejari je ka exe je eska karru sési jauaka. Asï kurhajchaa je máteruechani engaksïni arhini jauaka eskajtsï imani ambe uaaka engaksïni no sési ambe úchiaka o engajtsï jimbo uaaka uarhini.

“Engari kʼumanchikua ma uaaka, jatsiskari para karhakua barda sapichu ma jatsirhukuni iámu uirhipandani. Para no chiiti kʼumanchikua kulpa jatsini enga nema niáraska uarhini jimboka jima uératini uékorhintaska” (Deuteronomio 22:8). a

Sési kaa je máteruechani. Ístuchi xarhatasïnga eskachi jukaparharasïnga tsípikuani engachi sési kaajka máteru kʼuiripuechani. Náki uéjkiksï raseeni, nani uéjkiksï anapueni, na uéjkiksï xáni jatsïkuaririini oksï eskuela jatsini. Jimboka enga ma menusi újpijka o kurhunhpini, inde ambesï újti eska no sési kámberanhaaka ka guerra ambe jarhani.

“Asï jáma je jatanhekuani máteruechani, asï jáma je no sési jásï ikiani, asï jáma je ikiani, asï jáma je uinhachatspini ka asï jáma je no sési pʼikuastpeni ka ístu asï jáma je no sési útspini. Sánderu sési, sési kámbera je” (Éfesu 4:31, 32).

AMBE ENGACHI JEOBAERI TESTIGUECHA ÚJKA

Jarhuataasïngachi kʼuiripuechani paraksï jurajkuni imani ambe enga no sési úkuajka. Engachi Biblieri ambe jorhendaajka imani kʼuiripuechani engaksï antesi bisiuechani jatsiapka, jarhuataasïngachi paraksï jurajkuni imani ambe enga no sési úkuauenga ka únksï mójtakurhini.

Juchaari konstruksioniicharhu jarhastiksï juramukuecha parachi no no sési úkuarhinchani. Imeecha engaksï jarhuajpejka konstruksionirhu paraksï uaani kʼumanchikuechani parachi tánguarhini, jorhendanhasïndiksï paraksï sési ánchikuarhini ka no ma ambeksï úkuarhinchani. Inde kʼumanchikuecha engaksï únhaka, someni exenhani janhasïndi parakaksï ísï jauaka eska jimeesïsï anapu leicha na uandajka.

Jarhuajpesïngachi nani enga desastresi ambe jarhajka. Nótki xáni ióniisti enga juchaari organisasioni, ma uéxurhini jimbojku, jarhuataaka imani kʼuiripuechani engaksï ma 200 desastresiicha jimbo no sési úkuarhinchaka iámu parhakpinirhu. Sáno 12 miioni dolarichi úraska para jarhuataani imani kʼuiripuechani engaksï no sési úkuarhinchaka.

Enga birusi enga arhinhajka Ébola ueenapka no sési útspini África Occidentali (2014 jimbo) ka ístu República Democrática del Congo (2018 jimbo), Jeobaeri testiguechachi uánikua kʼuiripuechani jorhendaaska néna jámani paraksï no kérikuarhini. Axaaspkachi máru kʼuiripuechani parakaksï nitamatarapiringa arhijtsïkperata ma enga arhinheenga “La obediencia salva vidas”. Jatsispkachi nani engachi úpiringa jupajkukuarheni ante de inchani imani lugariicha jimbo engachi tánguarhijka. Ístuchi exeraaspka na enga xáni jukaparhakueka jupajkuni ka imani ambe úni enga uétarhijka para no kérikuarhini.

Sierra Leona, radiu ma jimbo aianhperakua ma etsakunhaspti enga felisitariuapka Jeobaeri testiguechani jimbokaksï jarhuataaspka imeeri relijionirhu anapuechani ka ístu máteru kʼuiripuechani parakaksï mítepiringa nema jámani para no kérikuarhini birusini enga arhinhajka Ébola.

Lugari ma para jupajkuni Kʼumanchikua Reinuerirhu Liberia jiáni enga birusi Ébola japka 2014 jimbo

a Inde juramukua enga Mediu Orienterhu japka, xarhataspti eska kánikua jukaparhakueska eska no pʼamenchaaka familia ka ni máteru kʼuiripuecha.

¡TSÍNHARHI!