Ambe enga kurhanguarhijka ima enga arhintajka

Eskaksï na uandajka Biblieri juramukuecha para úrani iurhirini ¿nénaksï exesïni Jeobaeri testiguecha engaksï doktoricha kʼuiripueri mismu iurhirini úraajka prosedimientuecha jimbo?

Iámindu kristianuechaksï jatsisti para sési eratsentani ambe enga Biblia uandajka ka no ambe enga sánderu sési jauaka para imeecha o para doktoricha, jimbokachi Jeobanisï kuenta íntskuntaaka.

Jeoba engajtsïni tsípikua íntskuka, juramusti eskachi no jámaaka arhani iurhirini (Génesis 9:​3, 4). Leirhu enga ióntki anapu ireta Israelini íntskupka, uandasïreendi néna engajku úpiringa úrakuarheni iurhiri enga tsípikuani arhikuekajka, ka uandaspti: “Jimboka kʼuiripeteri tsípikua iurhirirhu jarhaska, ka ji mismuni altarirhu peeraska para chá, parajtsï úni puáminhantani chá”. ¿Ambeksï jatsispi para úni animalini jingoni engaksï uándikuenga para ántani? Tata Diosï uandaspti: “Eska ima jatsispka para tsïtakuni iurhiri ka tʼupurirhu ójchakurani” * (Levítico 17:11, 13). I juramukua uánikua uelta uandanhaspti (Deuteronomio 12:16, 24; 15:23). Judiuecheri libru ma enga arhinhajka The Soncino Chumash uandasïndi: “Iurhiri no jatsisti para patsakuarhini, sino jatsisti para tsïtanhani echerirhu paraka no anhaaka”. No ma Israelita jatsispti para mínguarhini máteru kueraakateri iurhirini nijtu patsani para tátsekua úrani, jimboka tsípikua Tata Diosïriska.

Jiáni kʼamakurhisti Moisésiri lei enga Mesíasi uarhika. Joperu Tata Diosï seguirixati májkueni exeni iurhirini. Apostolichaksï espiritu santu jimbo, juramukuaspti kristianuechani eskaksï ‘no apiringa iurhirini’. I juramukua kánikua jukaparhakuesti. Engaksï ma no ísï úpiringa, ísïipirindi komu ístu jándikua ambe niátani o diosï úkatechani kómarhiani (Ukuecha 15:28, 29; 21:25). Enga siglu XX jimbo iápurisï intsïmperanhani japka iurhiri para jatantani, Jeobaeri testiguechaksï kurhanguspti eska inde ambe no terukuntasïreenga Tata Diosïri uandakua jingoni. *

Ménisïksï máru doktoricha arhiasïndi kʼuiripuechani eskaksï uaaka pʼitaani iurhiri máru semanecha ante deksï operarinhani (donación autóloga preoperatoria) enga niáraaka uétarhini ka ísïksï úni imeeri mismu iurhirini jatantani. Joperu, enga nema pʼitanhaska iurhiri para patsani ka tátsekua jatantani no terukuntasïndi ambe enga Levítico ka Deuteronomio uandajka. Iurhiri no jatsisti para patsanhani, sino jatsisti para tsïtanhani ka engachi ísï úska, íntskuntanchi jarhasïnga Tata Diosïni. Ísïisti eska Moisésiri lei nóteru iásï marhuasïngia. Joperu, Jeobaeri testiguechachi janhanharhiasïnga Tata Diosïri prinsipiuechani engaksï ini lei jimbo jaka ka eratsetixakachia no arhani iurhirini ni jatantani. Ísï jimbo, nóchi íntspisïnga iurhiri, nijtuchi patsajki parachi tátsekua jatantani indeni iurhirini engachi jatsipka para tsïtani. Inde ambe no terukuntasïndi Tata Diosïri leini jingoni.

Jarhastiksï máteru prosedimientuecha o analisicha enga iurhiri úrakuarhejka, engachi ini ambe úpiringa nóchi meru no kurhajchaani japiringa Tata Diosïri prinsipiuechani. Pori ejemplu, uánikuechaksï úkuarhiasïndi iurhiriri análisichani, joperu tátsekuaksï tsïtasïndi. Ístu, ménisïksï doktoricha uandasïndi eska juchaari iurhiri máteru ambe jingoni úrakuarheaka.

Por ejemplu, máru operasionicharhuksï úrasïndi hemodilución. Ixú, ma parti iurhiririksï uérakua pásïndi ka imani enga pakarajka ambe ma jingonksï jeuetasïndi. Tátsekuaksï kʼuanhaskuntasïndi iurhirini engaksï uérakua paka paraka ménderu sáno májkueni normalintaaka. Ístu, ménisïksï juparhintasïndi iurhirini enga tsïncheni jarhajka ka ménderuksï kʼuanhaskuntasïndi kʼuiripurhu parakaksï globulos rojos no tsïncheaka (recuperación de células). Ménichanksï iurhirini makinarhu ma jimbo ísï pásïndi enga ísï marhuani jarhajka (eska mintsita, pulmoni ma o rinioni ma). Ka tátsekuaksï kʼuanhaskuntasïndi kuerpurhu. Jarhasti máteru prosedimientu engaksï iurhirini makinarhu ma jimbo peerajka enga arhinhajka separadori (centrifugador) para limpiarini imeeri ambe enga no sési útspijka o enga no sési jaka. O ístuksï úpirindi arhutani iurhirirhu uératini máru ambe enga kuerpu támisï uétarhinchapiringa. Ístu, uaasïndiksï pruebechani engaksï iurhiri sáni pʼitaajka ka medisina jingonksï jeuetani ka tátsekuaksï ménderu jatsirantani pasientini.

Mámaru úrakuarhesïndi, joperuksï meru jauati máteru prosedimientuecha, tratamientuecha ka pruebecha engaksï nótki uérani jaka. Ka nóchi juchasï jatsika para míteani ka exeanchi sinchi uaa úraani. Kristianusï jatsiti para exeni néna enga úrakuarheaka imeeri iurhiri enga operasioni ambe jauaka, analisisi ambe o terapia ambe. Jatsisti para antesi uandontskuarheni doktorini jingoni para míteni néna enga úrakuarheaka imeeri iurhiri prosedimientu ma jimbo. Tátsekua, jatsisti para erakuni ambe enga uáka imeeri konsiensiani úraparini (exe je rekuadruni).

Kristianuechachi jatsiska para miáni jarhani eskachi aiakukuarhitixaka Tata Diosïni ka eskachi jatsiska para ‘xénchani iámu mintsita jingoni, iámu alma jingoni, iámu uinhapikua jingoni ka iámu eratsekua jingoni’ (Lukasʌ 10:27). Jeobaeri testiguechachi no májkueni eratsesïnga eska sáno iámindu parhakpini anapuecha, juchachi kánikua jukaparharasïnga sési pájperakua ma jatsini Tata Diosïni jingoni. Ima engajtsïni tsípikua íntskujka pʼímarhisïndijtsïni eskachi mintsikaaka imani iurhirini enga tata Jesukristu íntspika juchantsïni jimbo. Biblia arhisïndi: “I achamasïjtsïni (tata Jesukristu) piántasti imeeri iurhiri jimbo parachi jucha nóteru jántspirinia, jo, ústi eskachi puáminhantapiringa ambe engachi no sési úka”(Efesu 1:7).

[Notecha]

[Rekuadruecha/Imajeni]

KURHAMARHIKUECHA ENGACHI UÁKA ÚKUARHIANI

¿Jurajkupirindini juchiiti konsiensia parani no tsïtani juchiiti iurhirini echerirhu ka sánderu sési jurajkuni eskaksï iurhirini uérakua peerapiringa paraksï tátsekua kʼuanhaskuntani juchiiti kuerpuerhu nájkiruka nóteru sirkularini japiringuia ma tiempu?

¿Nóreni sési pʼikuastapirini juchiiti konsiensia enga Bibliani jimbo jorhendakata jaka engajtsïni analisisi o terapia ma jimbo iurhiri sáni pʼitapiringa paraksï ambe ma jatsikuni ka tátsekuajtsïni ménderu jatsirantani?