¿Méntkisï uétarhisïni eskajtsïni Biblia arhiaka ambe engachi jatsika para úni?

SEGURUCHI jarhaska eskajtsïni juchaari taaticha arhiska ambe engachi úpiringa úni ka ambe nómbe engachi sapichku japka. Ka engachi na kʼépani japka, kurhanguskachi eskajtsïni arhisïreenga i ambe jimbokaksï uékasïreenga eskachi jucha sési japiringa. Ka jamberi iásï engachi kʼérikia útasïchi újka máru imani ambe engajtsïni ima jorhendaka.

Juchaari taati auandarhu anapu Jeoba, ístujtsï arhisïndi ambe engachi uaaka úni ka ambe nómbe imeeri Karakata Bibliarhu. Pori ejemplu, uandasïndi eskachi no jatsiska para kómarhiani diosï úkatechani, ísku jándikua ambe niátani, apondini acheeti o uarhiti ma jingoni enga no imeeri témbeuaka o uámbeeni ka ni sïpani (Éxodo 20:​1-​17; Ukuecha 15:28, 29). Engachi na sánhani arhika jorhenguarhini Tata Diosï ambe “iámindu ambe jimbo”, niáraskachi kurhanguni eska Tata Diosï Jeoba uékasïnga eskachi jucha sési jauaka ka eska ima ambe engajtsïni juramuchijka no kʼuetsapeti ambeeska (Efesu 4:​15; Isaías 48:​17, 18; 54:13).

Joperu jarhasti mámaru ambe enga jimbo no jaka ambechi jatsi para meru úni. Ísï jimbo, máruksï eratsesïndi eska enga Biblia no uandajka meru ambechisï jatsi para úni, eskachi jucha uaa úni ambe engachi jucha uékaka; uandasïndiksï eska enga Tata uékapiringa eskachi mítepiringa ambe úni eska meru karakata jurajkupiringa ambe engachi jatsipiringa para úni.

Imeecha engaksï ísï eratsejka úsïndiksï imani ambe engaksï jimbo tátsekua pʼamondakuarhini jarhajka. Nóksï kurhangusïndi eska Tata Diosïiri karakata no solu jataska juramukuechani, sino ístu imani ambe enga újka eskachi jucha kurhanguaka ambesï eratsejki Tata Diosï. Jorhenguarhini Bibliani ka míteni na enga eratsejka Tata Diosï, jarhuatasïndijtsïni parachi jorhendani juchaari konsiensiani ísï eska na uandajka Biblia ka jarhuatasïndijtsïni parachi imani ambe erakuni úni enga Tata Diosï eratsejka. Ini ambe úni, sési pʼikuastasïni Tata Diosïni ka úsïndi eskachi juchajtu sési pʼikuarheraaka ka ambakiti ambe úni (Efesu 5:⁠1).

Bibliarhu anapu ejempluecha engaksï ambakitiika

Engachi exejka ambe enga Biblia uandajka Tata Diosïiri marhuaricheri engaksï ióntki marhuakupka, exesïngachi eskaksï ima úspka máru ambe méntkisï eratseparini ambe enga Tata Diosï Jeoba eratsejka, nájkiruka no japka juramukua ma. Ma ejemplu, jindeesti José enga Potifariri témba uékeenga apondini imani jingoni, no ma juramukua jarhaspti enga Tata Diosï uaxastapka nani enga uandaenga eska no sési jarhaspka apondini nema jingoni enga no imeeri témbepiringa. Joperu nájkiruka no ma juramukua japka enga i ambe uandaenga, José úspti kurhanguni eska apondini nemani jingoni enga no témbepiringa o uámbeeni no solu no sési úkuni japirindi imeeri konsiensiani sino ístu “pekarini Tata Diosïni japarini” (Génesis 39:9). Ísï jimbo, José kurhangusïreendi eska apondini imani jingoni enga no témbepiringa, jindeepirindi no kurhajchani imani ambe enga Tata Diosï uaxastapka Jardini de Edénirhu (Génesis 2:​24).

Ju je exeni máteru ejemplu. Ukuecha 16:3 uandasïndi, eska ante de Timoteu nirani pámbetani Pabluni paraksï pʼorhembiani kúnguarhikuechani ima sirkunsidarispti. Peru bersikulu 4 jimbochi arhintasïnga eskaksï ísï tátsekua niraspka iretecharhu ísï paraksï aianguani “erachichani ambe engaksï pakatperapka apostolicha ka orhejtsïkuticha engaksï Jerusaléni japka”. Ambe engajtsï ísku pakatajka, jindeesti eska i ambe engaksï apostolicha ka orhejtsïkuticha pakatperapka jindeespka eskaksï erachicha nóteru jatsispkia paraksï afuersa sirkunsidarhikuarhini (Ukuecha 15:​5, 6, 28, 29). Jiájkani ¿andisï Pablu eratseni eska Timoteu jatsispka para sirkunsidarhikuarhini? “Jimbokaksï jimeesïsï judiuecha irekaspka ka iáminduechaksï mítespti eska taati jémba grieguespka”. Pablu no uékasïreendi no sési pʼíkuantaani erachichani. Uékasïreendi eskaksï kristianuecha seguiripiringa úni ambe ma para ‘Tata Diosï exeani eskaksï sési ambe úxaka paraksï ístu iámindu kʼuiripuecha exeni’ (2 Korintu 4:2; 1 Korintu 9:​19-​23).

Pablu ka Timoteu meruksï ísï eratsesïreendi. Ambe enga uandajka Roma 14:15, 20, 21 ka 1 Korintu 8:​9-​13; 10:23-​33, xarhatasïndiksï na enga Pablu kánikua uékeenga eskaksï iáminduecha úpiringa sési marhuakupiringa Tata Diosïni ka sánderu imeecha engaksï úpiringa ma repentku no sési exeni ambe ma enga no no sési japka. Ístu, Pablu i ambe uandaspti Timoteueri ambe: “Jimboka no nema jarhaska ixú enga ísï jámajka eska inde, jimboka inde kánikua uandanhiasïnga chánksïni jimbo. Jimbokaksï máteruecha imeecheri ambe jimbojkusï uandanhiajti ka nóksï uandanhiasïndi tata Jesukristueri ambe jimbo. Joperujtsï chá sési mítetixaka eska ima no ísï jámasïnga, jimboka ima jíndeni jingoni jámaska ánchikuarhini para uandantani ambakiti aianhperakuani ísï eska sapi ma na jámajka imeeri taati jémba jingoni” (Filipusʌ 2:​20-​22). ¡Xáni ambakiti ejemplu engajtsïni íntskuka i tsimani kristianuecha! Nóksï méni jámaspti sánderu sési exeni imani ambe engaksï ima tsitienga, jiáni enga no japka juramukua ma enga meru uandeenga ambeksïsï jatsipi para úni, sánderu sési ísïksï xarhataspti xénchperakua eska Tata Jeoba ka tata Jesukristu eratseparini eska ima ambe engaksï imeecha úpiringa no jámapiringa no sési úkuani máteruechani.

Ju je iásï eratsentani Tata Jesukristuni enga jindeeka sánderu ambakiti ejemplu engachi jatsika para chúxapani. Sermoni del Monte jimbo, sési uandaspti eskaksï ima kʼuiripuecha engaksï újka jánhaskani ambe enga eratsejka Tata Diosï, nóksï erokuarhini jarhasïndi eska ambe ma meru uandaaka ambeksïsï uaa úni ka ambe nómbe (Mateu 5:​21, 22, 27, 28). No ma i ejempluecheri engachi exeka —José, Pablu, Timoteu y Jesúsi⁠— eratsesptiksï eska jiáni enga no japka meru juramukua ma enga uandeenga ambeksïsï meru úpirini úni ka ambe nómbe, eskaksï úpiringa úni ambe engaksï imeecha eratseenga, sánderu sési úsptiksï ambe enga Tata Diosï eratsejka ka ísïksï úspti úni ambe enga tata Jesukristu uandapka: xénchani Tata Diosïni ka xénchaani kʼuiripuechani (Mateu 22:​36-​40).

Iásï anapu kristianuecha

Jiájkani, sési xarharasïndi eskachi no jatsiska para ísï exeni Bibliani komu dokumentu ma enga leicheri ambe uandajka eratseparini eska jima jataaka iámu ambe enga jucha jatsika para úni. Jiáni enga no jauaka juramukua ma enga meru uandaaka ambechi jatsi para úni, ambe enga Jeoba tsitijka jindeesti eska jucha uaaka imani ambe enga ima eratsejka, ísï jimbo, jatsiskachi para kurhanguni “ambesï uéjki Tata Diosï Jeoba”, ka no erokuarhini eska méntkisï jauaka ambe engajtsïni arhiaka ambechisï jatsi para úni (Efesu 5:​17; Roma 12:⁠2). ¿Andisï Tata Diosï Jeoba sési exejki ini ambe? Jimbokachi ini ambe jimbo xarhatasïnga eska sánderu jukaparhakua ambe para jucha, jindeeska sési pʼikuastani imani ka no ambe engachi jucha tsitijka ka eskachi diosmaiamukua arhisïnga imeeri uékperakua jimbo ka eskachi juchajtu uékasïnga iámu mintsita jingoni uékasïnga ini ambe xarhatatspeni (Proverbios 23:15; 27:11). Ístu, nóchi jatsiska para mirikurhini eska iámu ambe engachi jucha újka ka enga Biblia uandajka, úsïnga eskachi jucha sési marhuakuaka Tata Diosïni ka eskachi sési pʼikuarheraaka.

Ju je exeni na engachi uaaka úrani ini prinsipiuni juchaari irekuarhu

Engachi erakuni jauaka néna tsípikuarhini

Ju je eratsentani eska tumbi ma eratsexaka disku ma piáni ka eska kurhaaskia máru pirekuechani ka kánikua tsitiasïndi, peru ambe enga uandanhiatajka jindeesti eska tátsepani uandasïnga eskaksï máru pirekuecha no sési járhati uandakuechani úraasïnga ka eska seksueri ambe uandasïnga. Ístu, mítesti eska i pireri o eska i grupu sáno méntkisï no sési járhati uandakuechani úraasïnga ka ikiatapu ambe. Tumbi xénchasïndi Tata Diosï Jeobani, uandanhiasïndi imani ambe jimbo enga Jeoba eratsejka ka pʼikuarherani. Joperu iásï, ¿néna uaa kurhanguni ambesï uéjki Tata Diosï Jeoba eska uaaka?

Karta ma jimbo enga apostoli Pablu Galasia anapuechani axakuapka, Pablu karaspti lista ma enga jindeeka enga kʼuiripu niátajka ka ima ambe enga espiritu santu újka. Jamberichi míteka ambe ka ambesï újki espiritu santu komu úni eskachi jucha: xénchpeaka, kánikua tsípini, pínandikua jatsini, tekaantani, ambakiti kʼuiripueni, sési kámpini, mintsikani, iatsitakuarhu jámani ka pʼíngukuarhini. Peru, ¿ambeeski enga kuerpu niátajka? Pablu uandasïndi: “Ka juchachi mítetixaka ambe enga kuerpu niátajka, ka jindeesti ísku jándikua ambe niátani, ikichakueni jásï ambe, ka no sáni kʼuratsekua jingoni niátani no sési jásï ambe, diosï úkatechani kómarhiani, sïkuamikua ambe kámani, no úni sési pájperani máteruecha jingoni, uarhipeni jámani, jatanhetspini jámani, no sési jásï ikiani, no sési arhirperani máteruecha jingoni, inchaakukuani kʼuiripuechani paraksï no májku kʼéri jarhani, imani ambe jámani jakajkuni ambe engaksï kʼuiripuecha jorhentpijka, enbidiarpini jámani, kauini jámani, ka tsïnchentani kʼuínchikuecharhisï ka ístu máteru i jásï ambe. Jíksïni mátirku arhixaka eskaksïni na arhipkia, eskaksï ima kʼuiripuecha engaksï ini ambe niátajka, nóksï pʼiuaka Tata Diosïiri Reinuni (Galasia 5:​19-​23).

Ju je exeni últimu uandakuechani i listeeri enga arhijka: “máteru í jásï ambe”. Pablu no íntspispti lista ma iámindu ima ambeeri enga jindeepka ambe enga kuerpu niátajka. No arhikuekasïndi eska nema úpiringa uandani: “Bibliajtsïni sési íntskusïndi parachi jucha imani ambe úni enga no jauaka ini lista jimbo enga apostoli Pablu uandapka”. Xarharasïndi eska ima enga arhintapiringa ini listani jatsipiringa para úrani imeeri eratsekuani para úni míteni ima ambe enga no jaka ini lista jimbo, peru enga jindeeka ístu máteru ”i jásï ambe”. Imeecha engaksï ini ambe niátajka engaksï no jaka ini lista jimbo, engaksï ístu jindeeka máteru “i jásï ambe”, nóksï niáraati jatsiani kóntperatechani enga Tata Diosïiri Reinu juáuaka

Ísï jimbo, jatsiskachi para kurhanguni o míteni ambesï no sési exejki Tata Diosï Jeoba. ¿Úkua jukasïni i ambe úni? Ju je eratsentani eskajtsïni doktori ma arhisïnga eskachi uaaka fruta arhani ka berdura, peru eskachi no jámaaka pasteli arhani, eladu ambe o máteru i jásï ambe. ¿Úkua jukapirini eratseni eska ixú inchasïnga no jámani arhani kurhinda? Eratsentaparini ménderu imani ambe enga espiritu santu uéjka eskachi uaaka ka imani ambe enga kuerpu niátajka: ¿nani inchapirini ima disku enga tumbi uékani jaka piáni ka engachi tʼuintki uandapka? No xarhataxati xénchperakua, eska pínandikua jatsiaka ka eska pʼíngukuarhisïnga ka ístu máteru ambe enga Tata Diosïiri espiritu uéjka eskachi uaaka, no uétarhipirindi juramukua ma nani enga uandapiringa eska i jásï kústakua no terukuntasïnga Tata Diosïiri eratsekua jingoni. Ka májkuenchi úpiringa úraani ini prinsipiuechani para imani ambe engachi uékapiringa arhintani, para pelikulecha engachi uékapiringa exeani, para programecha engaksï telebisionirhu uérajka, para bideojuejuecha, para pájinecha internetirhu ka para máteru ambe.

Na engachi mórhekuarhiaka ka arreglarikuarhini

Biblia ístu uandasïndi máru prinsipiuechani enga jarhuajpejka enga ma uékaka mórhekuarhini ka arreglarikuarhini. I prinsipiuecha jarhuatasïndi kristianuechani engaksï uékaka sési mórhekuarhini ka eska sési xarharaaka. Ima kʼuiripu enga xénchajka Tata Diosï Jeobani ménderu exeati eska ini ambe jingoni uaaka sési pʼikuastani imeeri Taati auandarhu anapuni ka no úni imani ambe enga ima tsitijka. Eskachi na exekia, enga Jeoba no uandajka meru ambe engachi jatsika para úni ambe máeri, no arhikuekasïndi eska no uandanhiasïnga imani ambe jimbo engaksï imeeri marhuaricha uaaka. Na engaksï mórhekuarhijka ka arreglarikuarhini mámaruesti nani engaksï irekaaka ka niárasïndi ménisï mójtakurhini i ambe asta iretecha jimbo. Joperu Tata Diosï íntskusïndi imeeri iretani prinsipiuechani engaksï méntkisï jarhuatauaka ka nani uéjkisïksï jarhani.

Pori ejemplu, 1 Timoteo 2:​9, 10 uandasïndi: “Ka ístu, nanakechaksï jatsisti para sési mórhekuarhini, ka engaksï sési jáxentaaka, jatsistiksï para xarhatani eskaksï janhanharhiasïnga máteruechani ka eskaksï sési eratsesïnga; nóksï jatsisti para tepeni jauirini ka oru ambe jukajtsïni o perlechani o imani takusï jukantani enga kánikua jukaparhaka, sánderu sési, jatsistiksï para sési ambe úni ísï eskaksï na jatsika para úni ima nanakecha engaksï uandajka eskaksï sési marhuakuxaka Tata Diosïni”. Kánikua jukaparhakuesti eskaksï kristianecha —ka kristianuecha— eratsentaaka ambe engaksï eratseaka máteru kʼuiripuecha imeecheri ‘engaksï sési marhuakujka Tata Diosïni’ imani ambe jingoni engaksï jukajka (2 Korintu 6:⁠3). Ima kristianu enga ambakiti eratsekua jukaka no jukari uandanhiauati imani ambe jimbo enga ima tsitijka o na enga uéjka xarharani, sánderu sési exeati eska ima ambe enga jukaaka no uaaka eskaksï máteruecha no sési ambe eratseaka o eska no sési pʼikuastauaka (Mateu 18:6; Filipusʌ 1:​10).

Enga kristianu ma kuenta íntskukuarheska eska na enga xarharajka o eska na enga mórhekuarhijka no sési pʼikuastasïnga máteruechani o eska úsïnga eskaksï no uaaka agustu marhuakuaka Tata Diosïni, sési uáti enga májkueni úska eska apostoli Pablu ka sánderu uandanhiani paraksï máteruecha sési marhuakuaka Tata Diosïni ka no imani ambe jimbo uandanhiani enga ima tsitijka. Pablu uandaspti: “Májkueni jáma je eskani ji, ísï eskani ji na májkueni jámajka eska Kristu” (1 Korintu 11:⁠1). Ka Jesúsiri ambe i ambe karasti: “Jimboka Kristujtu no úska ambe enga imajkumindu tsitienga”. Ambe engajtsïni jorhendajka ixú sési xarharasïndi: “Jucha engachi uinhapiti jaka, jatsiskachi para tekaakuantani imeechani engaksï no xáni uinhapiti jaka, jimboka jarhaska máru ambe engaksï imeecha no káni sési exejka ka nóchi jatsiska para imani ambe úni ambe engachi juchajku tsitijka. Eska mándani arhini jánguarhintaaka imani ambe úni enga sési pʼikuastaaka máteru kʼuiripuni para jarhuatani ka uinhaperantani” (Roma 15:​1-3).

Ju je jorhendani juchaari eratsekuani

¿Nénachi uaa sánhani arhini eska juchaari eratsekua listu jauaka parachi míteni ambesï tsitijki Jeoba, asta jiáni enga no jauaka meru juramukua ma enga indeeri ambe uandaaka? Juchaari eratsekua sánhani arhiati jorhenguarhini engachi arhintaska Tata Diosïiri karakatani pauani pauani, engachi pʼindeska jorhenguarhini Bibliani ka engachi eratsentaska ambe engachi arhintaaka. Peru ísï úrani eratsekuani no úkuarhisïndi sóntku. Májkueni eska na úkuarhijka tataka ma jingoni enga sánhani arhijka tʼarhexeni ka kʼéni, juchajtuchi sánhani arhiaka jorhenguarhini parachi úni sánderu sési marhuakuni Tata Diosïni. Jimbosï uétarhijti eskachi tekaantaaka ka eskachi no ikiauaka engachi no exeaka eskachi jorhenguarhixakaia ini ambe úni. Ístu jurajkuni nomasi eska tiempu nitamaaka no arhikuekasïndi eskajtsïni i ambe jarhuataka parachi jucha úni jorhendani juchaari eratsekuani. Eskachi na exekia, tiempu jatsisti para úrakuarheni parachi jorhenguarhini Tata Diosïiri ambe, parachi jorhenguarhini Tata Diosïiri karakatani ka parachi ísï úni indeeni ambe eskachi na jorhenguarhipani jauaka seguni eskachi na xáni kurhanguaka (Ebreu 5:​14).

Uaakachi uandani eska kurhajchani Tata Diosïiri juramukuechani úsïnga eskachi xarhataaka eskachi kurhandisïnga, peru úraani prinsipiuechani úsïndi eskachi xarhataaka na engachi xáni mintsikajka Tata Diosïni ka eskachi uékasïnga sési pʼikuastani. Engachi sánhani arhijka sánderu sési kurhanguni Tata Diosïiri ambe, ambe engachi sánderu uékaaka, jindeuati ísï úni ambe ma eska Tata Diosï Jeoba ka tata Jesukristu ka uékaakachi úni iámu ambe paraka terukuntaaka imani ambe jingoni enga Tata Diosï eratsejka ambe enga jaka Bibliarhu. Engachi sési pʼikuastaaka juchaari Taati auandarhu anapuni iámu ambe jingoni engachi újka, exeakachi eskachi juchajtu sánderu sési pʼikuarheraaka.

[Imajeni]

Nájkirukaksï no iápurisï májkueni mórhekuarhijka, jiáni engachi jucha jámaka erakuni néna mórhekuarhini, jatsiskachi para úraani Biblieri prinsipiuechani