“Mándani arhini, tata disoïni japarini uandakuarhintaakachi na engachi jámajka”
“Mándani arhini, tata disoïni japarini uandakuarhintaakachi na engachi jámajka”
“Mándani arhinchi jatsiaka para aianguni Tata Diosïni ambe engachi xáni úka” (ROMA 14:12).
1. ¿Ambeksï erakuspi úni tanimu ebreuecha?
TANIMU tumbi ebreuecha engaksï Babilonia irekaka jatsistiksï para erakuni úni ambe ma paraksï no uándikunhani. ¿Jatsiskiksï para kʼutitsekuni ka kómarhini kʼéri estatuani ísï eska paisirhu anapu lei na uandajka? ¿Oksï no uékaa kʼutitsekuni, ka indeni jimbo jornarhuksï ma kʼuanijpanhani enga kʼéri kurhini jaka? Sadraki, Mesaki ka Abednegu nóksï tiempu jatsisïndi paraksï kurhamarhini nemani ambe úni, ka nójtuksï uétarhinchasïndi eskaksï ísï uaaka. Ka no sáni chéparinksï, uandasïndi: “Oh rei, mítetini ja, eskachi no marhuakuauaka chiiti diosïichani, nijtuchi kómarhiaka orueri estatuani engari tʼu anhaxustaka” (Daniel 3:1-18). Tanimu ebreuechaksï úspti erakukuarhini ambe úni.
2. ¿Néksï arhispi Pilatuni ambe úni Jesúsini jingoni? Ka, ¿i ambe úspi eska Roma anapu juramuti no kulpa jatsipiringa?
2 Sesenta uéxurhini tátsekua. Juramuti kurhaasïndi ambe engaksï jimbo jupikapka acheetini ma, ka enga kurhangupkia ambe enga úkuarhipka, seguru jarhaspti eska inde acheeti no ma ambe no sési úspka. Peru kʼuiripuecha kurhajkuarhisïndi eska uándikunhaaka inde acheeti. Ka nájkiruka juramuti no uéjka ísï úni, tátsekua ísï úsïndi eska kʼuiripu na kurhajkuarhika. Para xarhatani eska no juramutisï uéjka ísï úni, jupajkukuarhesïndi ka arhiasïndi kʼuiripuechani: “Ji no ma ambe míteska enga i achamasï uándikunhaska”. Ka jurajkusïndi eskaksï cháparhataka chkarirhu ma. Ísïisti, enbesi de uandani ambe enga úkuarhiaka Jesukristuni jingoni, Ponsiu Pilatu jurajkusïndi eskaksï máteruecha arhiaka ambe úni. Nájkiruka sési jupajkukuarhepiringa, ima útasï seguiriisïreendi kulpa jatsini jimboka jurajkuspka eska Jesúsi uándikunhapiringa (Mateu 27:11-26; Lukasï 23:13-25).
3. ¿Andichisï no jatsi para jurajkuni eskaksï máteruecha erakuaka ambe engachi jatsika para úni?
3 ¿Ka chaia? Engajtsï jatsijka para erakuni ambe úni, ¿májkuentsï úsïni eska tanimu ebreuecha, ojtsï imani ambe úsïni engaksïni máteruecha arhijka? Ambakiti ambe erakuni úni no fásiliisti, uétarhisïndi eskachi jánhastiuaka. Indeni ambe jimboksïsï taatiicha jatsiti para erakuni imeecheri sapiichani jimbo. Ka sánderu no sáni fásiliisti erakuni ambe úni engachi imani ambe nitamakuarhini jaka enga úkua jukajka ka engachi jatsika para mámaru ambe exeni antede erakuni úni ambe ma. Peru nájkiruka ísïika, no kánikua úkua jukasti erakuni úni ambe ma. Jimbochisï no jatsipiringa para ísï exeni erakuni úni ambe ma komueska “kʼuetsapiti ambe”, o “eska ambe ma engajtsïni uandanhiatajka” ka engachi uétarhinchajka eskaksï imeecha engaksï “újka ambe enga espiritu santu uandajka” jarhuataakajtsïni parachi sési peentani (Galasia 6:1, 2; nota). Sánderu sési, ambe máesti enga “mándani arhinchi jatsiaka para aianguni Tata Diosïni ambe engachi xáni úka” (Roma 14:12). Biblia uandasïndi: “mándani kʼuiripu jatsis[ti] para miákuarhini jarhani ambe enga uaaka” (Galasia 6:5). Jimajkani, ¿nénachi uaa ambakiti ambe erakuni juchaari tsípikuarhu? Jatsiskachi para jiókuarhini eskachi no úsïnga iámindu ambe úni ka eska jarhaska máteru ambe engachi uaaka úni.
Ambe ma engajtsïni méntkisï jarhuataaka
4. Engachi erakuni jámaaka úni ambe ma, ¿ambe jukaparhakua ambejtsïni jorhendasïni engaksï juchaari orhetku taatiicha ísï no kurhajchapka Tata Diosïni?
4 Enga ueenapka kʼuiripu jarhani, juchaari orheta taatiichaksï erakuspti úni ambe ma enga úpka eskaksï uánikua uandanhiateecha japiringa: arhasptiksï anhatapueri frutani enga jindeepka para míteni ambe sési jarhaski ka ambe no sési jarhaski (Génesis 2:16, 17). ¿Andiksïsï indeni ambe erakupi úni? Biblia uandasïndi: “Uarhiiti exespti eska anhatapu ambakitiispka para arhani, ka eska para éskuecha kánikua anhenchakuarhispka, jo, anhatapu kánikua sési xarharasïrendi para exeni jarhani. Ísï jimbo, ueenaspti pʼikuni frutani ka arhani. Tátsekua, ístu íntskuspti uámbani enga ima imani jingoni japka, ka imajtu ueenaspti arhani” (Génesis 3:6). Ísïisti, Eba úspti indeni ambe jimboka imajku uandanhiakuarhisïreenga, ka úspti eska Adánijtu májkueni úpiringa. Indeni ambe jimbo engaksï úka “iámindu kʼuiripuechaksï” pekadu jukarasti ka niárasïndiksï uarhini (Roma 5:12). Engaksï Adáni ka Eba ísï no kurhajchapka Tata Diosïni, jukaparhakua ambejtsïni jorhendasïndi ima ambeeri engaksï kʼuiripuecha no újka úni: eska engachi no kurhajchaska ambe engajtsïni Tata Diosï arhijka, nóchi uaaka ambakiti ambe erakuni úni.
5. ¿Ambe úrasïni Tata Diosï Jeoba parajtsïni jorhendani, ka ambechi jatsiski para úni parajtsïni marhuacheni?
5 ¡Kánikuachi sési pʼikuarherasïnga engajtsïni Tata Diosï Jeoba íntskujka ambe ma parajtsïni jorhendani! Imeeri Karakatarhu uandasïndi: “Engari niáraaka jurhijkandani ladu jimbo nirani o uikixkandani, chiiti kutsïkuechandi jimbo kurhauaka arini uandakuechani chiiti tátsepani jimbo: ‘I jindeesti xanharu. Jimini jáma’” (Isaías 30:21). Jeobajtsïni uandajpasïndi Biblia jimbo, ísï jimbo jatsiskachi para jorhenguarhini ka sési míteni ambe enga arhijka. Engachi uéjka sési ambe erakuni úni, jatsiskachi para imani ambe jorhenguarhini engaksï jorhenguarhijka “ima kʼuiripuecha engaksï eratsekua jukariika”. Ístuchi ‘pʼindesïnga eratsentani ka engachi ísï eratsentajka, úsïngachi jánhaskani ambesï sési jaki ka ambesï no sési jaki’, inde ambe arhikuekasïndi, eskachi úsïnga imani ambe engachi jorhenguarhijka Tata Diosïiri Karakatarhu (Ebreu 5:14).
6. ¿Ambe uétarhisïni úni parakajtsïni juchaari konsiensia sési marhuacheaka?
6 Ma ambe engajtsïni jarhuatajka parachi ambakiti ambe erakuni úni jindeesti kasu úkuni juchaari konsiensiani. Inde ambejtsïni jarhuatasïni parachi exekuarhini sinchi ‘ambakiti ambe úxaki o nómbe’ (Roma 2:14, 15). Joperu paraka juchaari konsiensia sési marhuauaka, uétarhisïndi eskachi jorhendaaka Tata Diosïiri Karakata jimbo ka ísï úni eskachi na jorhenguarhijka, engachi ísï úska sóntkuchi kuenta íntskukuarheaka engachi no sési ambe úni jauaka. Enga konsiensia ma no sési jorhendakata jauaka sóntku jiókuarhiasïndi úkuechani ka pʼindekuechani engaksï iretarhu pʼindenhajka. Nani engachi jauaka ka ambe enga uandanhaaka ístuksï uaati úni eskachi no sési ambe uaaka. Ka, ¿ambe úkuarhisïni engachi no kurhajchaska juchaari konsiensiani ka engachi no újka ambe engaksï uandajka Tata Diosïiri juramukuecha? Tiempu jingoni konsiensia nóteru ambe ma pʼikuarherasïndia, jimboka ísï pakarasïnga eska pʼinderi ma na pakarajka kʼuiripetarhu “tiámu” tʼirakata jimbo (1 Timoteu 4:2). Joperu konsiensia ma enga sési jorhendakata jauaka Tata Diosïiri Uandakua jimbo, jarhuatasïndijtsïni parachi sési ambe úni.
7. ¿Ambechi uétarhinchani úni parachi ambakiti ambe erakuni úni?
7 Eskachi na exekia, ambe ma engachi uétarhinchajka parachi jandiajku erakukuarhini úni, ka parachi ambakiti ambe erakuni úni, jindeesti sési míteni ambe enga arhijka Tata Diosïiri Karakata ka ísï úni eskachi na jorhenguarhiaka. Enbesi dechi sóntku úni ambe ma, uétarhisïndi eskachi orheta exeaka ambeksï uandasïni Biblieri prinsipiuecha ka eratseantani nénajtsïni marhuachea. Engachi sési míteaka ambe enga arhijka Tata Diosïiri Uandakua ka juchaari konsiensia sési jorhendakata jarhani Biblia jimboni, preparaduchi jauaka para erakuni ambe úni ísï eskaksï na úpka Sadraki, Mesaki ka Abednegu. Iásï ju je exeni tsimani ambe engajtsïni xarhatachejka eska ima kristianuecha engaksï jánhastiika nóksï xáni úkua jukanchasïnga erakuni ambakiti ambe úni.
¿Néksï jindeeski juchaari amiguecha?
8, 9. (a) ¿Náki Biblieri prinsipiuechaksï xarhatasïni eskachi no jatsiska para imani kʼuiripuechani kurhiani engaksï no sési ambe niátajka? (b) ¿Soluksï imeecha engaksï no sési ambe niátajka no ambarhati amigueski? Uanda je andijtsïsï ísï uandajki.
8 Apostoli Pablu karaspti: “Asï jurajku je eskaksïni nema támisï paaka. Engajtsï chá no ambarhati kʼuiripuechani kúrhiaska, chájtsï nóteru uaakia ambe engajtsï iásï jamberi sési úni jaka” (1 Korintu 15:33). Ka Jesukristu arhiaspti imeeri chúxapatiichani: “Chájtsï no ísï jámasïnga eska parhakpini anapuecha” (Juanu 15:19). Engachi arhiantajka ini karakateechani, sóntkuchi exesïnga eskachi no jatsiska para kurhiani imeechani engaksï ísku jándikua ambe niátajka, engaksï ísku irekajka, sïpariichani, kauicheechani o engaksï ini jásï ambe (1 Korintu 6:9, 10). Peru engachi sési mítejkia ambe enga Biblia jorhentpijka, kuentachi íntskukuarhesïnga eska májkueni no sésiska engachi indeeni járhati kʼuiripuechani: exeauaka sinirhu, telebisionirhu o komputadorarhu, o arhintani indeecheri ambe. Ístu no sési jarhasti uandontskuarheni Internetirhu “imeecha jingoni engaksï jískajka na engaminduksï jásïika” (Salmo 26:4).
9 Joperu, ¿sési japirini eskachi kúnguarhipiringa imeecha jingoni engaksï jamberi no no sési ambe niátajka, joperu engaksï no jakajkujka Tata Diosï jurhimbitini? Biblia arhisïndi: “Iámu parhakpini Noambakitiiri jájki jimbo jarhasti” (1 Juanu 5:19). Ísïisti no ambarhati amiguechaksï nóksï solu imeecheesti engaksï no sési ambe niátajka o engaksï no no sési exejka no sési ambeni. Ísï jimbo, sánderu sésiisti sési pájperakua jatsini imeechantku jingoni engaksï xénchajka Tata Diosï Jeobani.
10. ¿Ambejtsïni jarhuataa jánhaskakua jingoni exeni na xánchi jatsiski para jarhani kʼuiripuecha jingoni?
10 Nóchi uaaka méntku jarhariani kʼuiripuechani nijtu uétarhijki eskachi ísï uaaka (Juanu 17:15). Kristianuechachi uerasïnga aianhpini, nirasïngachi eskuela o ánchikuarhitarhu, ka parachi ísï úni jatsisïngachi para uandajpaani kʼuiripuechani. Ístu, imeecha engaksï no tembuchatini jaka o uambuchatini jaka Jeobaeri testigu ma jingoni, jamberi sánderu ióni jarhajti imeecha jingoni engaksï no marhuakujka Jeobani. Joperu engachi sési jorhendakata jatsiaka juchaari konsiensiani parachi úni míteni ambe sési jarhaski ka ambe nómbe, míteakachi eska no májkueniska uandajpaani kʼuiripuechani jimbokachi ménisï uétarhinchaaka ka eska amigu úkuarhini imeecha jingoni (Santiagu 4:4). Ísïchi uaaka jánhaskakua jingoni uandani sinchi partisipariua imeeri ambe engaksï eskuela únhajka, komu uarhakuecha ka deportiicha, o sinchi niua kʼuínchikuecharhu ka tʼirekuecharhu enga únhajka para ánchikuarhiriicha.
Engachi ánchikuarhita ma erakuni jauaka
11. ¿Ambechi jatsiski para orheta exeni engachi erakuni jámaaka ánchikuarhita ma?
11 Engachi jánhaskakua jingoni uaaka ísï eskaksï Bibliarhu anapu prinsipiuecha na arhijka, ístuchi uaaka ambakiti ambe erakuni engachi ánchikuarhita ma jámani jauaka jirinhani, jimboka ánchikuarhita jindeeska enga jimbo ma ‘kéndaani jauaka kʼumanchikuarhu anapuechani’ (1 Timoteo 5:8). Orhetachi jatsika para exeni ambe engachi uaaka ánchikuarhitarhu. Ka nóchi jatsiska para uaani imani ánchikuarhiteechani engaksï újka imani ambe enga Biblia uandajka eska no sési jarhaska. Ísï jimbo, jurhimbiti kristianuechachi no jiókuarhiasïnga ánchikuarhiteechani engaksï jindeuaka para idoluecha ambe, o para sïpani, no sési úrani iurhiri o máteru i jásï ambe enga Biblia uandajka eska no sési jarhaska. Ka nájkirukajtsïni patroni arhiaka eskachi chkuanderaaka o enganiarpini, nóchi jámasïnga ísï úni (Úkuecha 15:29; Apokalipsisi 21:8).
12, 13. Engachi ánchikuarhita ma jámani jauaka jirinhani, ¿ístuchi ambe jukaparhakua ambe jatsipirini para exeni para úni sési erakuni?
12 ¿Ka ambechi uaa úni enga ánchikuarhitarhu no únhajka ima ambe enga Biblia uandajka eska no sési jarhaska? Sánderu sési míteni jurhimbikua ambe Biblieri ka sési jorhendakata jatsini juchaari konsiensiani, jarhuatasïndijtsïni parachi ístu máteru ambe exeni antede jiókuarhini ánchikuarhita ma. Por ejemplu, ¿ánchikuarhitarhu únhaasïni ima ambe engaksï Biblia prinsipiuecha uandajka eska no sési jarhaska, komu ánchikuarhini kasinurhu ma para telefunuecharhu jámani kurhakuarhini? Ístuchi jatsiska para eratsentani nani uérasïni sentabu engaksï ánchikuarhiricha maiamunhajka ka naniiski engachi ánchikuarhiaka. Ka enga kristianu ma imeeri kuenta jimbo ánchikuarhini japiringia, ¿nipirini atantani iglesiarhu ma nájkiruka jarhuajpeni japiringa relijioni no jurhimbitiirhu? (2 Korintu 6:14-16.)
13 Iásï ju je eranhaskani eska patronisï újka kontratu ma para atantani kʼumanchikua ma relijioni no jurhimbitiiri. Enga ísïika, kristianu jatsisti para exeni na xáni juramukua jatsia ánchikuarhitarhu ka sini ima ánchikuarhia jima. ¿Ka ambechi úpirini enga juchaari ánchikuarhitarhu no únhaajka ima ambe enga no sési jaka, komu kartechani etsakuantani iretarhu, ka engachi jatsipiringa para asta imani lugaricha jimbo ísï nirani engaksï no sési ambe újka? ¿No sési japirini eskachi orheta exepiringa ambe enga arhijka prinsipiu enga Mateu 5:45 jimbo jaka? Ístuchi jatsipiringa para eratsentani sini ima ánchikuarhita engachi pauani pauani uaaka jarhuataani jaua juchaari konsiensiani o nómbe (Ebreu 13:18). Ísïisti, parachi úni erakukuarhini ambe úni ka jánhaskakua jingoni erakuni ánchikuarhita ma, jatsiskachi para jorhenguarhini míteni ambe sési jarhaski ka ambe nómbe ka ístu sési jorhendani juchaari konsiensiani engajtsïni Tata Diosï íntskuka.
“Iámindu ambe engari uaaka, u imani eratseparini”
14. ¿Ambe ka ambechi uaa úni antede erakuni ambe ma?
14 ¿Ka ambechi uaa úni engachi erakuni jámaaka na xánchi ióni jamberi jorhenguarhia eskuela, ka sinchi jiókuarhiaua iámindu tratamientuechani? Engachi erakuni jámaaka ambe ma, jatsiskachi para exeni ambeksï uandasïni Biblieri prinsipiuecha indeeri ambe ka tátsekua úrani juchaari eratsekuani parachi úni míteni néna sési úraani prinsipiuechani. Jánhaskati rei Salomóni enga Israeli anapuepka uandaspti: “Mintsika Tata Diosï Jeobani iámindu chiiti mintsitani jingoni, ka asï mintsika chiiti eratsekuani. Iámindu ambe engari uaaka, ú imani eratseparini, ka ima jurhimberaauati chiiti xanharuechani” (Proverbios 3:5, 6).
15. ¿Ambejtsïni jorhendasïni eskachi jatsiska para úni primeru siglurhu anapu kristianuecha engachi erakuni jámaaka ambe ma?
15 Jatsiskachi para no méni mirikurhini, eska ambe engachi erakujka úni úsïnga sési úkuani máteruechani o nómbe. Pori ejemplu, primeru siglurhu anapu kristianuechaksï, nóteru kurhajchapirindia Moisésiiri Leini enga tʼirekueri ambe uandeenga. Iásïksï úpirindia tʼireni imani ambe enga Lei uandeenga, eska no sési jarhaspka jimboka máteru ambe jimbo sési jarhaspka. Enga apostoli Pablu uandapka ima animaliiri kʼuiripeteeri engaksï úreenga para templurhu diosï úkatechani kéjtsïtakuani, karaspti: “Enga tʼirekua ambe újka eska juchiiti erachi no sési ambe uaaka, jimajkani nóteruchkani méni auakia kʼuiripeta ambe parani no no sési ambe úrani juchiiti erachini” (1 Korintu 8:11-13). Primeru anapu kristianuechaksï pʼímarhinhaspti paraksï uandanhiani máteruecheri konsiensia jimbo parakaksï imeecha no niárapiringa no sési ambe úni. Ísï jimbo, ima ambe engachi erakuaka úni no jatsisti para ‘no sési ambe úraani’ máteruechani (1 Korintu 10:29, 32).
Ju je jirinhantani Tata Diosïiri jánhaskakuani
16. ¿Nénajtsïni jarhuatasïni kómarhikua engachi erakuni jámaaka ambe úni?
16 Jarhuajperata ma enga kánikua jukaparhakueka para engachi erakuni jámaaka ambe ma jindeesti kómarhikua. Santiagu uandaspti: “Enga nema kueratani jaka jánhaskani, eska méntku kurhakuni jauaka Tata Diosïni ka ima jarhuataati para jánhaskani, jimboka ima kánhachani íntsaasïnga ambe ma iáminduechani ka mintsita jingoni, ka no jámasïndi tátsekua méntku arhiani jarhani eska íntsaaska” (Santiagu 1:5). Uaakachi no sáni chéparini kómarhikuni Tata Diosï Jeobani ka kurhakuni eskajtsïni íntskuaka jánhaskakua engachi uétarhinchajka parachi úni sési ambe erakuni. Engachi aiangujka Tata Diosï jurhimbitiini juchaari uandanhiateechani ka engachi jánguarhintajka míteni ambe enga ima uékajka eskachi uaaka, Tata Diosïiri espiritu santujtsïni uaati jarhuatani parachi sési kurhanguani Bibliarhu anapu tekstuechani engachi exeani jaka ka parajtsïni miátantaani imani prinsipiuechani engachi mirikurhiapka.
17. ¿Nénajtsïni uaa máteru kʼuiripuecha jarhuatani parachi sési ambe erakuni úni?
17 ¿Uaajtsïni jarhuatani máteru kʼuiripuecha engachi erakuni jámaaka ambe úni? Jo, Jeoba úsïndi eskaksï kúnguarhikuecharhu jauaka erachiicha engaksï jánhastiika (Éfesu 4:11, 12). Uaakachi jarhuatakua kurhakuani sánderia jiáni engachi uékaaka erakuni ambe ma enga kánikua jukaparhakueka. Jimbokaksï imeecha sánderu mítekuska Tata Diosïiri ambe, ka jánguarhintasïndiksï ísï úni ka ístuksï sánderu mítekusti irekueri ambe, ka uaatijtsïni exeraani máteru Biblieri prinsipiuechani engajtsïni jarhuataaka parakachi “exeaka ambesï sánderu uétarhijki úni” (Filipusï 1:9, 10). Joperu ístu jarhasti ma ambe engachi no jatsika para mirikurhini: nóchi jatsiska para jurajkuni eskaksï máteruecha erakuaka ambe engachi jucha jatsika para úni, jimboka inde ambe juchaari responsabilidadiiska.
¿Méntkisï sési uérasïni ambe engachi erakujka úni?
18. ¿Ambe uaa úkuarhini engachi ambakiti ambe erakuska úni?
18 ¿Méntkisï sési uérasïni ambe engachi erakujka úni engachi sési eratsentaska ambe ma ka úraani Bibliarhu anapu prinsipiuechani? Úpirindi ísï xarharani enajki ima ambe engachi erakuka úni no sésijtsïni úchini jaki, joperu tátsekua, ima ambe engachi erakujka kánikuajtsïni marhuachesïndi. Sadraki, Mesaki ka Abednegu mítesptiksï eskaksï úpiringa uándikunhani engaksï no kómarhipiringa kʼéri estatuani (Daniel 3:16-19). Májkueni, engaksï apostoliicha arhiapka Judá anapu juesiichani eskaksï jatsispka para kurhajchani Tata Diosïni komu juramuti ka no kʼuiripuechani, antedeksï jurajkuani ataasptiksï (Úkuecha 5:27-29, 40). Ístu, ménisï ‘úkuarhisïndi o jarhasïndi ambe ma engachi no erokuarhijka’ ka inde ambe úpirindi úni eska ménderueni uéraaka ambe ma (Eclesiastés 9:11). Ka engachi no sési nitamakuarhini jauaka nájkirukachi sési ambe erakuka úni, uaakachi seguru jarhani eskajtsïni Tata Diosï Jeoba jarhuataaka tekaantani ka eskajtsïni újchakuraaka (2 Korintu 4:7).
19. ¿Ambejtsïni jarhuataa parachi no chéparini ambakiti ambe erakuni úni?
19 Ísï eskachi na exekia, engachi erakuni jámaaka ambe úni uétarhisïndi eskachi jirinhantauaka Bibliarhu anapu prinsipiuechani, eratseantani ka úraani. ¡Kánikuachi agradesidu jarhaska jarhuajperata jimbo engajtsï Jeoba íntskujka imeeri espiritu santu jimbo ka erachiicha jimbo engaksï sési marhuakuni jaka! Ju je sési úraani ini jarhuajperateechani ka ístu máteru ambe engajtsïni Tata Diosï íntskuka parajtsïni jarhuatani, ka ju je no sáni chéparini imani ambe erakuni úni enga sési jaka.
¿Ambejtsï jorhenguarhiski chá?
• ¿Ambechi jatsiski para úni engachi uéjka ambakiti ambe erakuni úni?
• No kurhiani imeechani engaksï no sési ambe niátajka ¿nénajtsïni jarhuatasïni parachi sánderu jánhastiini?
• ¿Ambe jukaparhakua ambechi jatsiski para míteni ante dechi erakuni ánchikuarhita ma?
• ¿Ambe ka ambejtsïni uaa jarhuatani parachi úni erakuni ambe úni?
[Study Questions]
[Imajeni]
Engaksï Adáni ka Eba no kurhajchapka Tata Diosïni jukaparhakua ambejtsïni jorhendasïndi
[Imajeni]
Ante dechi erakuni ambe ma enga jukaparhakueka, ju je exeni ambe engaksï uandajka Biblieri prinsipiuecha