“‘Tata Diosï Jeobaeri jurhiatikua axuterku jarhastia’: Ju je sánderu ambakiti kristianu máeni”

“Ju je seguiriini jarhani sánderu jánhaskani.” (EBR. 6:1)

1, 2. ¿Ambe úkuarhispi paraka Jerusaléni anapu ka Judea anapu kristianuecha úpiringaksï sïpakuarhini juáteecharhisï?

 MA UELTA, Jesúsiiri chúxapatiicha andarhierasptiksï ka kurhamarhisptiksï: “[¿]Na jatini úkuarhia i ambe ka nénachi mítea eskari tʼu ixú jarhaskia ka eska nóteru ióni kuerataxakaia para kʼamakurhini tiempu?”. Ima aianguaspti profesieri ma enga primeru siglurhu ueenapka kumplirikuarhini. Arhiaspti ambe enga xáni úkuarhini japiringa enga xarhatapiringa eska kʼamarakua janoxapkia. Ka arhiaspti eska enga i ambe úkuarhini japiringia, “eska imeecha engaksï Judea [japiringa], eskaksï juátarhisï [nipiringa] sïpakuarhini” (Mat. 24:​1-3, 15-22). ¿Úpirinksï imeeri chúxapatiicha jakajkunksï i míndani ka kurhajchanksï ka ísïksï úni eska na arhiapka Jesúsi?

² Uéxurhini 61 jimbo, sáno treinta uéxurhini tátsekua, apostoli Pablu karakuaspti karta ma kristianuechani engaksï ebreu uandeenga Jerusaléni ka engaksï jimeesïsï irekapka. ¿Andi? Para eratsetarantani ambeksï tiempu jimbo irekaxapi. Ni imeecha ni Pablu úndi eranhaskani eska sinko uéxurhintku kuerataxapkia parakaksï xarharapiringa míndeecha ka ueenapirindia ‘kánikua no sési nitamakuarhinhani’ (Mat. 24:21). Uéxurhini 66 jimbo, Roma anapu ejersitu enga Cestio Galo orhekupauenga, uirhiperasptiksï Jerusalénini. Joperu engaksï iretani jatsipkia imeecheri jájki jimbo, Cestio Galo repentku juramukuaspti ejersituechani eskaksï kéndikupiringa, ísï Jerusaléni anapuecha úsptiksï sïpakuarhini.

3. ¿Ambe konseju íntskuaspi Pablu kristianu ebreuechani, ka andisï ísï úpi?

³ Kristianuechaksï uétarhinchasïreendi eskaksï jatsipiringa jánhaskakua paraksï úni míteantani míndeechani enga Jesúsi arhiapka ka exenksï eskaksï jatsispka para sïpakuarhini. Joperu uánikua imeechaksï no na kurhanguni jarhasïreendi. Espiritualmente uandaparini, ísïisptiksï komueska charhakuecha engaksï “lechi” uétarhinchajka (arhinta je Ebreu 5:​11-13). Asta imeecha engaksï uánikua uéxurhini páni japkia marhuakuni Tata Diosïni, ueenasptiksï jarharini “imani Tata Diosïni enga tsípiti jaka” (Ebr. 3:12). Nájkiruka “ima jurhiatikua axuterku ja[pkia]”, jarhasptiksï máru engaksï tsïtakuarhienga tánguarhikuechani (Ebr. 10:​24, 25). Jimbosï Pablu ini konsejuni íntskuapti: “Jimbokachi jorhenguarhiskia ambe enga ma orheta ueenajka jorhenguarhini Kristueri ambe, ju je seguiriini jarhani sánderu jánhaskani” (Ebr. 6:1).

4. ¿Andisï xáni jukaparhakue eskachi jingontku jauaka, ka ambejtsïni jarhuata ísï úni?

⁴ Juchachi inde tiempu irekaxaka enga Jesúsi uandapka profesieri engaksï ini últimu jurhiatikuechani jimbo kumplirikuarhipiringa. “Jeobaeri kʼéri jurhiatikua axuterku jarhastia”, enga Satanásiiri parhakpini kʼamajkunhaaka (Sof. 1:14). Iásïsï uétarhijti eskachi sánderu jingontku jauaka ka eskachi sési pájperaaka Tata Diosïni jingoni (1 Ped. 5:8). Peru ¿ísïchi úxaki? Ambakiti kristianu máeni jarhuatatijtsïni parachi no mirikurhini ambe jurhiatikuechani jimbochisï irekani jaki.

¿Ambeeski ambakiti kristianu máeni?

5, 6. a) ¿Ambe arhikuekasïni ambakiti kristianu máeni? b) ¿Ambechi jatsiski para úni engachi uéjka ambakiti kristianu máeni?

⁵ Pablu arhiaspti kristianu ebreuechani eskaksï jánguarhintapiringa ambakiti kristianu máeni, peru ístu arhiaspti ambe enga arhikuekajka i ambe (arhinta je Ebreu 5:14). Ambakiti kristianuecha nóksï solu “lechi” arhasïndi; imeechaksï uétarhinchasïndi “t’irekua enga xaxanhajka”. Jimboksïsï újti kurhanguni Biblieri jorhenguarhikuechani, asta imeechani jamberi engaksï sánderu úkua jukaka (1 Kor. 2:10). Jimbokaksï úsïnga ambe engaksï mítekia, imeecheri eratsekua sánderu sési jorhendakata jarhasïndi, jimboksïsï sánderu no úkua jukanchajti míteni ambe sési jarhaski ka ambe nómbe. Ísï jimbo, engaksï uékajka úni erakuni ambe ma, uaatiksï exeni náksï prinsipiu uaa úrani.

⁶ Pablu karaspti: “Ísï jimbo, jatsiskachi para sánderu sési eratsentani indeni ambe engachi kurhaakia parakachi no méni jurajkuaka mintsikani” (Ebr. 2:1). Ísïisti, uaakachi jamberi no kuenta íntskukuarheni ka sánhani arhinchi mirikurhini. Parachi no inde ambe úkuarhinchani, jatsiskachi para sánderu pendienti páni engachi jorhenguarhini jauaka Biblieri ambe. Jatsiskachi para kurhamarhikuarhini: “¿Exesïni eska ambe enga mítekia eska imani ambe jingoni sési jarhaskia? ¿Úxaki ambe ma nomasi jimbokani pʼindeskia ísï úni? ¿Ambe uaa úni para meru mintsita jingoni úni ambe ma ka ambakiti kristianu máeni?”. Para ambakiti kristianu máeni, uétarhisïndi para kánikua jánguarhintani: jatsiskachi para sési míteni Tata Diosïiri Karakatani ka jorhenguarhini ísï úni.

Ju je sánderu sési míteni Tata Diosïiri Karakatani

7. ¿Nénajtsïni marhuachesïni sési jorhenguarhini Tata Diosïiri Karakatani?

⁷ Pablu karaspti: “Ima kʼuiripu enga útasï lechi arhani jaka no mítesti Tata Diosïiri uandakuani enga sési jaka, jimboka inde kʼuiripu útasï sapiiska” (Ebr. 5:13). Parachi úni ambakiti kristianu máeni, jatsiskachi para sánderu sési míteni ambe enga uandajka Tata Diosïiri Karakata. Ka jimboka i ambe Bibliarhu jarhaska, jatsiskachi para sési jorhenguarhini ka ístu publikasionichani engajtsïni íntsaajka “jántspiri enga mintsinharhikueka ka jánhaskatiini” (Mat. 24:​45-47). Engachi ísï úska uaakachi jorhenguarhini na enga eratsejka Tata Diosï ka ísï sánderu sési jorhendakata jauati juchaari eratsekua. Ju je exeni Rosaeri ejemplu. a I kristiana ini ambe uandantasïndi: “Ambe engareni sánderu jarhuataka jíndeni jindeesti engani arhinhapka eskani arhintapiringa Bibliani pauani pauani. Tsimani uéxurhini jimbo ísï kʼamakuspka arhintani ka niáraspka ísï pʼikuarherani eskani meru mítespkia juchiiti Kueraajpirini: na enga jásïika, ambe enga tsitijka, ambe enga no tsitijka ka na enga xáni uinhapitiika ka jánhastiini. Pauani pauani arhintani Bibliani, jarhuatastirini para úni orhepani uérakuani uandanhiateechani”.

8. ¿Nénajtsïni uaa jarhuatani juchantsïni Tata Diosïiri Karakata?

⁸ Engachi arhintaaka Tata Diosïiri Karakatani pauani pauani, kánikuajtsïni marhuacheati (arhinta je Ebreu 4:12). Jarhuatatijtsïni mójtakuni na enga jásï kʼuiripueskachi ka sánhani arhiakachi sánderu ambakiti kʼuiripu máeni para Jeoba. ¿Exesïntsï eska uétarhisïnga sánderu tiempu arhutani para arhintani Bibliani ka eratsentani?

9, 10. ¿Ambe arhikuekasïni sési míteni Tata Diosïiri Karakatani? Uanda je ma ejemplu enga ísï xarhatajka.

⁹ Ísïisti, no solu uétarhisïndi eskachi sántku ambe míteaka Biblieri ambe; jatsiskachi para sési míteni. Kʼuiripu ma enga útasï ísï jámaska eska sapi ma enga Pablu uandapka jamberiksï mítepti sánisï Karakateri ambe. Joperuksï no úsïreendi exeni na enga xáni jukaparhakuepka, jimbokaksï no úsïreenga ambe engaksï jorhenguarhienga. Nóksï jánhaskatispti jimbokaksï no úrasïreenga Biblieri konsejuechani paraksï erakuni ambakiti ambe úni.

¹⁰ Eskachi na exekia, ma no uaati míteni eska sési míteska Tata Diosïiri Karakatani enga no ísï uaaka eska na jorhenguarhiaka. Ísï xarhatasïndi kristiana ma enga Kyle arhinhajka. Inde pirenchi arhirperaspti imeeri kompaniera ma jingoni ánchikuarhitarhu. Joperu uékasïreendi sési peentani ambe. ¿Ambe úspi? Ima mismu uandasïndi: “Primeru tekstu engani miápka jindeespti Roma 12:​18, enga arhijka: ‘Engajtsï uaaka ísï úni, jánguarhinta je xáni eskajtsï xáni uaaka parajtsï sési pájperani iáminduechani jingoni’. Ísï jimbo arhispka juchiiti kompanierani eska uékasïreenga uandontskuarheni imani jingoni engachi na uéntapiringia ánchikuarhitarhu”. Sésichi uandontskuarhespti, ka imeeri kompaniera ísku pakaraspti enga Kyle indeni ambe úpka. “Jorhenguarhiska eska enga ma ísï újka eskaksï na arhijka Biblieri prinsipiuecha, méntkisï sési uérasïnga ambe ma”, ísï kʼamarhukusïndi pirenchi.

Ju je jorhenguarhini kurhandini

11. ¿Náki ejemplu xarhatasïni eska úkua jukasïnga kurhandirani jiáni engachi kánikua no sési nitamakuarhini jarhajka?

¹¹ Ísï úni eskajtsïni na arhijka Tata Diosïiri Karakata uaati úkua jukani jiáni engachi no sési ambe nitamakuarhini jauaka. Ju je exeni ejemplu ma, ambe engaksï nitamakuarhipka israeliteecha ísï tátsekua enga na Tata Diosï Jeoba petaantapkia Ejiptu uératini engaksï jántspiripka, ueenasptiksï “no sési arhini Moisésini” ka “Tata Diosï Jeobani tsʼéjkuni”. ¿Andiksïsï no sési arhipi Moisésini? Jimbokaksï no jatsispka itsï (Éxo. 17:​1-4). Tsimani mesi tátsekua engaksï na úpkia pakatperakua ma Tata Diosï Jeoba jingoni eskaksï méntkisï kurhajchapiringa imeeri uandakuechani, nóksï kurhajchaspti jimbokaksï niáraspka diosï úkatechani kómarhiani (Éxo. 24:3, 12-18; 32:​1, 2, 7-9). ¿Andiksïsï no kurhandipi? ¿Jindee jimboka Moisési ióni páxapkia juáta Orebi jima enga Tata Diosï arhini japka ambe enga úpiringa ka chénksï jimboka nema no sési úkuapiringa? Ma uelta amalekitechaksï uékasïreendi no sési úkuani, joperu Moisési jarhuataasptia andani enga imeeri jájkiichani tarhatatini jatsiapka. Peru iásï no imeecha jingoni jarhaspti. ¿Ambeksï úpirini engaksï ménderu uékapiringa no sési úkuani? (Éxo. 17:​8-16.) Náki uéjki ambe jimbo, ambe enga kʼóru ísïika jindeesti eskaksï israeliteecha “no uékaspti kurhajchani” (Uku. 7:​39-41). Ísï tátsekua nóksï kurhajchaspti Tata Diosï Jeobani, jimbokaksï chéspka inchani imani Echeri jimbo enga aiakuani japka. Ísï jimbo, Pablu arhiaspti kristianuechani eskaksï no jámapiringa májkueni úni, no kurhandini ísï eska israeliteecha (Ebr. 4:​3, 11).

12. ¿Néna jorhenguarhispi Jesúsi kurhandini, ka inde ambe néna jarhuataspi?

¹² Parachi úni ambakiti kristianu máeni, jatsiskachi para kánikua jánguarhintani para kurhajchani Tata Diosï Jeobani. Ísï eska na úpka Jesúsi, para ma úni kurhandirani ménichanchi jiáni jorhenguarhisïnga engachi no sési nitamakuarhini jarhajka (arhinta je Ebreu 5:​8, 9). Auandarhu, Jesúsi méntkisï kurhajchasïreendi imeeri taati jémbani, joperu enga jupka Echerirhu úkua jukanchaspti imani ambe úni ambe enga Tata Diosï uéjka; kánikua no sési pʼikuarherasïreendi ka kómu nitamakuarhini. Jiáni enga kurhandipka enga sánderu no sési nitamakuarhini japka, ima ambe jarhuataspti paraka úpiringa úni imani ánchikuarhitani enga Tata Diosï íntskupiringa: jindeeni Juramuti ka Kʼéri Saserdoti.

13. ¿Nénachi uaa xarhatani eskachi jorhenguarhiskia kurhandini?

¹³ ¿Ka juchaia? ¿Eratsetixakichi kurhajchani Tata Diosï Jeobani nájkirukachi no sési nitamakuarhini jauaka? (Arhinta je 1 Pedru 1:​6, 7.) Tata Diosïiri konsejuechajtsïni kánikua sési arhistachisïndi iiri ambe, jurhimbitku jámani, sési uandani, arhintani ka estudiarini Bibliani, nirani tánguarhikuecharhu o aianhpini (Jos. 1:8; Mat. 28:​19, 20; Efe. 4:​25, 28, 29; 5:​3-5; Ebr. 10:24, 25). ¿Kurhajchasïnchi Tata Diosï Jeobani iámindu i ambe jimbo nájkirukachi no sési nitamakuarhini jauaka? Engachi ísï úska, xarhatanchi jauaka eskachi jánguarhintaxaka ambakiti kristianu máeni.

¿Nénajtsïni marhuachesïni ambakiti kristianueni?

14. ¿Néna úspi kuájchakuni erachini ma jimboka ima ambakiti kristianu máespka?

¹⁴ Para kristianu ma kuájchakukua máesti sési jorhendakata jatsini eratsekuani, jimboka i ambe úsïnga eska uaaka exeni ambe enga sési jaka ka ambe enga no sési jaka ini parhakpini jimbo ‘engaksï nóteru kʼuratsekia’ (Efe. 4:19). Pori ejemplu, Jorge, enga kristianu máeka arhiantasïndi pauani pauani Bibliarhu anapu publikasionichani ka jukaparharasïndi ambe enga arhintajka, jiókuarhispti ánchikuarhita ma nani engaksï sáno iáminduecha nanakecha ánchikuarhienga. Ima uandantasïndi: “Uánikua juchiiti kompanieraecha ísku jándikua ambeksï niátasïreendi ka nóksï sáni kʼuratsesïreendi; peru ma imeecheri kánikua respetarijpisïreendi ka uékaspti jorhenguarhini Biblieri ambe. Ma uelta, engachi jandiajku japka ofisinarhu ma, ima uékasïreendi eskachi ísku jándikua ambe niátapiringa. Ueenakuarhu eratsespka eska ískusï ísï jámani japka, joperu ueenaspti sánderu ka sánderu andarhierani, ka ji no jánhaskasïreenga néna pʼínguni. Jiáni miántaspka eksperiensia ma enga rebista La Atalaya jimbo uérapka erachiiri ma enga sáno májkueni ambe nitamakuarhipka imeeri ánchikuarhitarhu. Artikulurhu uandasïreendi Joséeri ejempluni ka Potifariri témbeeri ambe. b Ísï jimbo, kénditaspka ka ima uéntaspti” (Gén. 39:​7-12). Jorge kánikua sési pʼikuarheraspti jimboka no úspka imani ambe enga no sési japka ka úspti seguiriini ambakiti konsiensia ma jatsini (1 Tim. 1:5).

15. ¿Néna uinhapintasïni juchaari mintsita engachi jánguarhintajka ambakiti kristianu máeni?

¹⁵ Máteru ambe engajtsïni marhuachejka ambakiti kristianu máeni jindeesti jimboka uinhaperantasïnga mintsitani, enga jindeeka na engachi jásïika incharinisï ka inde ambe uaati eskachi no jurajkutakuarheaka eskajtsïni “támisï jánhastaaka indeni jimbo engaksï kʼuiripuecha mámaru ambe jorhentpijka ka imani ambe jingoni engachi jamberi no méni kurhandini japka” (arhinta je Ebreu 13:9). Engachi jánguarhintaska sánderu ambakiti kristianu máeni, juchaari eratsekua sánderu imani ambe eratseati ‘ambe enga sánderu uétarhijka úni’ (Fili. 1:​9, 10). Inde ambe uaati eskachi sánderu jukaparharaaka Tata Diosï Jeobani ka agradeserikuni iámindu imani ambe jimbo engajtsïni íntskuka (Rom. 3:24). Kristianuecha engaksï ísï ‘eratsejka eska kʼératiicha’ agradeserisïndiksï ka ambakiti pájperakuaksï ma jatsisïndi Tata Diosï Jeoba jingoni (1 Kor. 14:20).

16. ¿Ambe jarhuataspi pirenchini ma para ima ‘uíuinhasï jatsini imeeri mintsitani’?

¹⁶ Pirenchi ma enga Luisa arhinhajka uandasïndi eska orheta ima iámindu úsïreenga imani ambe enga kristianu ma újka, joperu solu paraksï erachiicha sési ambe uandapiringa imeeri ambe. Ima uandantasïndi: “No ma ambe imani ambe úxapka enga no sési japka, peru ístuni no pʼikuarhinhesïreenga mintsitarhu uékani marhuakuni Tata Diosï Jeobani. Ísï tátsekua, exespka eska enga uékeenga sánderu ambakiti ambe íntskuni Tata Diosï Jeobani jatsispkani para mójtakuni ambe; ma ambe engani mójtakuka jindeesti aiakukuarheni sési jimbo ka marhuakuni iámu mintsita jingoni Tata Diosïni”. Indeni ambe jimbo enga úpka, Luisa úspti ‘uíuinhajkuntani imeeri mintsitani’, ísï tátsekua enga na niárapka kʼéri pʼamenchakua ma pʼirani inde ambesï úpti jarhuatani para úni orhepani uérani (Sant. 5:8). Ima ini uandakuecha jingoni kʼamarasïndi: “Kánikua no sési nitamakuarhispka, joperu Jeoba méntkisï jíndeni jingoni jarhaspti”.

Ju je “mintsita jingoni kurhajchani Tata Diosïni”

17. ¿Andisï xáni jukaparhakuepi eskaksï primeru siglurhu anapu kristianuecha kurhandipiringa?

¹⁷ Ambe enga Pablu arhiapka Jerusaléni ka Judea anapuechani eskaksï jatsispka para seguiriini ambakiti kristianueni, inde ambe jarhuataspti parakaksï no uándikunhapiringa. Imeecha engaksï kasu úkupka Pabluni ambe enga arhiapka, úsptiksï jánhaskakua jatsini ka míteantani imani míndeechani engaksï erokuarhiani japka paraksï “juátarhisï nirani sïpakuarhini”. Engaksï exepka “anhandetini jarhani jima enga pímbinhasïika [...] enga iámindu ambe kʼamajkujka” ima ikichakueni jásï ambe enga jindeeka Roma anapu ejersituni engaksï uirhipandapka Jerusalénini ka afuersaksï inchaakuni iretarhu, mítesptiksï eska niáraspkia jurhiatikua (Mat. 24:​15, 16). Miántasptiksï Jesúsiiri profesiani, uéakusptiksï Jerusaléni ante de kʼamajkunhani ka eska na uandapka Eusebio enga istorieri ambe exejka, ka jimaksï pakaraspti Pela (o Pella), juátarhisï engaksï Galaadi jaka. Ísï, ima kristianuechaksï úspti tsípiti pakarani jiáni enga xáni no sési kʼamajkunhapka Jerusaléni.

18, 19. a) ¿Andisï jukaparhakueski kurhandini ini jurhiatikuechani jimbo? b) ¿Ambechi exeni jaua máteru jorhenguarhikuani jimbo?

¹⁸ Ambakiti kristianuechaksï kurhandisïndi, ka engaksï ísï újka uaatiksï pʼímutantskateeni jiáni engaksï kumplirikuarhiaka juchaari jurhiatikuecha jimbo ambe enga Jesúsi uandapka, eska “kánikua no sési nitamakuarhinhaa[ka]” ma ambe enga no méni ísï úkuarhini jaka (Mat. 24:21). ¿Kurhajchaachi “jántspiri enga mintsinharhikueka” ambe uéjki engajtsïni arhiaka eskachi uaaka? (Luk. 12:42.) ¡Kánikua jukaparhakuesti eskachi méntkisï mintsika jingoni kurhandiaka! (Rom. 6:17.)

¹⁹ Para ambakiti kristianu máeni, uétarhisïndi jorhendani juchaari eratsekuani, ka ambe engajtsïni jarhuataaka jindeesti sési jorhenguarhini Tata Diosïiri Karakatani ka jorhenguarhini kurhandini. Para tumbiicha sánderu úkua jukasïndi paraksï niárani ambakiti kristianu máeni. Máteru jorhenguarhikua jimbo exenchi jauaka nénaksï uaa ísï úni.

[Noteecha]

¿Ambejtsï jorhenguarhiski?

• ¿Ambe arhikuekasïni ambakiti kristianu máeni, ka nénachi uaa ísï úni?

• ¿Andichisï jatsi para sési míteni Bibliani engachi uéjka ambakiti kristianu máeni?

• ¿Nénachi uaa jorhenguarhini kurhandini?

• ¿Nénajtsïni marhuachesïni ambakiti kristianueni?

[Jorhenguarhikueri kurhamarhikuecha]

[Imajeni]

Ísï úni eska Biblieri konsejuecha na arhijka jarhuatasïndijtsïni parachi úni orhepani uérakuani uandanhiateechani

[Imajeni]

Imeecha engaksï kurhajchapka ambe enga Jesúsi arhiapka tsípitiksï pakaraspti