1, 2. a) ¿Neecheri ambe uandasïni Génesis engaksï niárapka arhirperata ambe jatsini? b) ¿Andisï Biblia uandajki imani kʼuiripuechani engaksï niárapka arhirperata ambe jatsini?

 ¿MÉNISÏJTSÏ eratseantaski imani kʼuiripuechani enga Biblia uandaajka ka engaksï niárapka arhirperata ambe jatsini? Pori ejemplu, Génesis jimbo, primeru kapituluecharhu úsïngachi arhintani eska Kaíni uándikuspka Abelini (Gén. 4:3-8); Lameki tumbini ma uándikusïndi jimboka tumbi atasïnga Lamekini (Gén. 4:​23); Abraániiri (Abráni) karichi erangutiichaksï uarhiperasïndi Lotiiri karichi erangutiichani jingoni (Gén. 13:5-7); Agari no xénchasïndi Sarani (Sarai) ka Sara ikiakusïndi Abraánini (Gén. 16:3-6); Ismaeli no nemani jingoni úsïndi sési pájperani ka iáminduechaksï ikiakusïndi (Gén. 16:12).

² ¿Andisï Biblia uandajki imani kʼuiripuecheri ambe engaksï niárapka arhirperata ambe jatsini? Jimboka inde ambejtsïni jarhuatasïnga andichisï jatsi para sési pájperani máteruechani jingoni ka ístujtsïni arhisïndi néna ísï úni. Ísïisti, kánikuajtsïni marhuachesïndi arhintani na engaksï kʼuiripuecha engaksï no perfektuepka ísï eska jucha, kánikua jánguarhintapka sési peentani engaksï arhirperata ambe niárapka jatsini máteruechani jingoni. Ka exesïngachi eskaksï sési uéranchaspka engaksï jánguarhintapka ísï úni ka ístuchi jorhenguarhijatsipka eskachi juchajtu uaaka májkueni úni. Ísïisti, inde ejempluechajtsïni jorhendasïndi ambe engachi jatsika para úni ka ambe engachi no jatsika para úni engachi májkueni ambe nitamakuarhini jauaka (Rom. 15:4).

3. ¿Ambechi exeni jaua ini jorhenguarhikua jimbo?

³ Ini jorhenguarhikua jimbo, exeni jauakachi andichisï Tata Diosïiri marhuariicha jatsi para sési peentani engachi arhirperaska nema jingoni ka nénachi uaa ísï úni. Ístu, exeauakachi Biblieri konsejuechani engajtsïni jarhuataaka sési peentani engachi arhirperaska nema jingoni, ístu para sési pájperani máteruechani jingoni ka para sési pájperani Tata Diosï Jeobani jingoni.

4. a) ¿Nénaksï eratsesïni uánikua kʼuiripuecha? b) ¿Ka ambe niárasïni úkuarhini engaksï ísï eratsejka?

⁴ Noambakitisï újti eskaksï kʼuiripuecha arhirperaaka ka eskaksï no sési pájperaaka. Jardini de Edenirhu, Noambakiti uandaspti eska mándani kʼuiripu jatsiska para uandani ambesï sési jaki para ka ambe nómbe ka eska uaaka ísï úni ka eska no uétarhisïnga kurhajchani Tata Diosïni (Gén. 3:​1-5). Ka exeskachia ambe enga úkuarhijka enga nema ísï eratsejka. Parhakpinirhu, uánikua kʼuiripuechaksï jarhasti engaksï no uéjka kurhandirani ka inde ambe úsïndi eskaksï kʼéramakuarhiaka, eskaksï no pendienti paaka máteruechani jimbo ka eskaksï andaperani jámaaka. Ka iáminduecha engaksï ísï jámajka, xarhatasïndiksï eska ísïiska ambe enga Satanási uandajka, jimboka inde uandasïnga eska sánderu sésiiska jandiajkumindu pendienti pákuarhini ka eska máteruechani jimbo uandanhiani. Ísï jámani kánikua no sési jarhasti ka úsïndi eskaksï kʼuiripuecha arhirperaaka. Ka Bibliajtsïni miátantasïndi eska ima kʼuiripu enga sóntku ikiajka, úsïndi eska arhirperata ambe jauaka ka kánikua no sési ambe niátasïndi (Prov. 29:22).

5. ¿Náki konsejuechani íntspiaspi Jesúsi para sési peentani arhirperata ambe?

⁵ Joperu Jesúsi jorhendaaspti imeeri chúxapatiichani paraksï sési pájperani máteruechani jingoni, nájkirukaksï nóteru úpiringia imani ambe engaksï imeecha uékeenga úni. Jiáni enga Juátarhu Arhijtsïkpipka, ambakiti konsejuechani íntsaaspti kʼuiripuechani paraksï sési peentani ambe ma ka nóksï niárani arhirperata ambe jatsini. Pori ejemplu, arhiaspti eskaksï kaxumbitiipiringa, eskaksï jánguarhintapiringa sési pájperani máteruechani jingoni, eskaksï no jámapiringa sóntku ikiani, eskaksï jirejiresï sési peentapiringa ambe ma ka engaksï xénchaapiringa imeechani engaksï no sési káuenga (Mat. 5:5, 9, 22, 25, 44).

6, 7. a) ¿Andichisï jatsi para jirejiresï sési peentani engachi arhirperaska nema jingoni? b) ¿Ambechi jatsiski para kurhamarhikuani jucha engachi marhuakujka Tata Diosï Jeobani?

⁶ Engachi no jánguarhintaska sési pájperani máteruechani jingoni, ískueuati na uéjkichi xáni jánguarhintani jarhani marhuakuni Tata Diosïni, komueska kómarhini, tánguarhikuecharhu nirani ka aianhpini (Mar. 11:​25). Nóchi uaaka Tata Diosï Jeobaeri amigueni engachi no uékaska máteruechani puákuantani (arhinta je Lukasï 11:4; Éfesu 4:32).

⁷ Jatsiskachi para exekuarhini ka iatsitakuarhu exekuarhini sinchi meru uékasïni puákuantani máteruechani ka seguiriini jarhani sési pájperani imeechani jingoni. ¿Úkua jukanchasïnchi puákuantaani juchaari erachiichani? ¿Sésichi pʼikuarherasïni imeechani jingoni jarhani nájkirukajtsïni no sési pʼikuastaka? Tata Diosï Jeoba erokuarhisïndi eskachi jorhenaaka puátspentani. Ka engachi jucha exejka eskachi jatsiska para sánderu sési úni ini ambe, ju je kómarhini Tata Diosï Jeobani, juchaari Taati auandarhu anapuni, eskajtsïni jarhuataaka. Ima kurhauati engachi jucha mintsita jingoni kómarhiska ka mókuchintaatijtsïni (1 Juanu 5:​14, 15).

8, 9. ¿Ambechi jatsiski para úni engajtsïni nema úchiska ambe ma?

⁸ Jimboka no nema perfektueska, ménisï jauati engajtsïni nema no sési pʼikuastaaka jimboka uandaaka o uaaka ambe ma (Ecl. 7:20; Mat. 18:7). ¿Ambechi uaa enga inde ambe úkuarhiska? Ju je exeni ambe enga úkuarhipka reunioni sosiali ma jimbo, nani engaksï uánikua Jeobaeri testiguecha japka ka pirenchi ma uandajpaaspti tsimani erachiichani joperu erachi ma no sési pʼikuarheraspti imani ambe jimbo enga pirenchi uandapka. Enga pirenchi na kéndikurhipkia, ima erachi enga no sési exepka ueenaspti no sési ambe uandani imeeri ambe enga pirenchi uandapka, jimajkani máteru erachi arhispti eska ima pirenchi 40 uéxurhini sési marhuakuspkia Tata Diosï Jeobani nájkiruka no sési nitamakuarhipka ka arhispti eska ima pirenchi no ísï uandaspka para no sési pʼikuastani imani erachini. Tátsekua ima erachi enga no sési exepka ambe enga pirenchi uandapka, eratsentani pakaraspti ka arhispti: “Ísïisti ambe engari uandajka”. Ka tátsekua mirikurhispti ambe enga úkuarhipka.

⁹ ¿Ambechi jorhenguarhisïni? Eskachi jatsiska para exeni ambe úni enga nema úska ambe ma engajtsïni úpiringa no sési pʼikuastani. Xénchaani máteruechani, jarhuatasïndijtsïni parachi no sóntku no sési pʼikuarherani engajtsïni nema úchiska ambe ma (arhinta je Proverbios 10:12; 1 Pedru 4:8). Tata Diosï Jeoba uandasïndi eska kánikua sési jásï ambeeska engachi jucha puátspentajka (Prov. 19:11; Ecl. 7:9). Ísï jimbo, engajtsïni nema no sési uandajpaska ojtsïni no sési kámani, ambe engachi orheta jatsika para úni, jindeesti kurhamarhikuarhini: “¿Uaa mirikurhini ini ambe? ¿Merurini kánikua no sési ambe úchiski?

10. a) ¿Néna pʼikuarheraspi pirenchi ma engaksï máteruecha no sési ambe uandapka imeeri ambe? b) ¿Náki Biblieri konseju jarhuataspi para ima sési pʼikuarherantani?

¹⁰ Ménisï úkua jukasïndi ísku exeni engajtsïni nema arhinchaska. Ju je exeni ambe enga nitamakuarhipka prekursora ma enga Lucy arhinhajka. Máruksï no sési ambe uandaspti na enga aianhpienga ka na enga úreenga imeeri tiempuni. Lucy kánikua no sési pʼikuarheraspti, ísï jimbo, arhispti máru erachiichani engaksï sési marhuakuni japka Tata Diosïni eskaksï konsejuechani íntsaapiringa. Ima uandasïndi: “Bibliarhu anapu konsejuechani engajtsïni íntsaapka jarhuatasptijtsïni parani ji no no sési exeni ambe engaksï máteruecha uandeenga ka parani jánguarhintani sánderu imani ambe eratseni ambe enga Tata Diosï Jeoba uandajka”. Lucyni kánikua jarhuataspti enga arhintapka Mateu 6:​1-4 (arhinta je). Íksï karakateecha jarhuataspti Lucyni para ima miántani eska jatsispka para jaiapanherantani Tata Diosï Jeobani. Ima uandasïndi: “Nájkirukaksï máteruecha no sési ambe uandaaka na engani aianhpijka, ji sési pʼikuarherasïnga jimbokani míteska eskani kánikua jánguarhintaxaka jaiapanherantani Tata Diosï Jeobani”. Enga Lucy kurhangupka ini ambe, jarhuataspti para no sési pʼikuarherani nájkirukaksï máteruechani no sési ambe uandapiringa imeeri ambe.

11, 12. a) ¿Ambechi jatsiski para úni engachi eratsejka eska erachi ma jatsiska ambe ma juchantsïni jingoni? b) ¿Ambechi jorhenguarhisïni na enga Abraáni sési peentapka arhirperata ma? (Exe je dibujuni enga ueenakuarhu jaka)

¹¹ Biblia uandasïndi eskachi “iáminduecha someni no sési ambe úsïnga” (Sant. 3:2). Eranhaska je eskajtsï niáraska míteni eska erachi ma no sési pʼikuarheraska jimbokajtsï chá uandaska ambe ma o jimbokajtsï úska ambe ma. ¿Ambejtsï jatsipirini para úni? Jesúsi uandaspti: “Engari páni jauaka kéjtsïtakua ma altarirhu ka jimari miáni eska chiiti erachi jatsiska ambe ma tʼungini jingoni, jurajku chiiti kéjtsïtakuani altarirhu orhepani, ka ní kókuani. Orheta sési peenta ambe ma chiiti erachini jingoni ka tátsekua kʼuanhatsenta ka íntspi chiiti kéjtsïtakuani” (Mat. 5:23, 24). Ísï ú je eska Jesúsi na uandapka ka uandontskuarhi je erachini jingoni. Asï mirikurhi je ambe engajtsï uéjka úni, no uétarhisïndi eskajtsï máteru nemani kulparini jauaka, sánderu sési, chájtu jiókuarhi je ambe engajtsï no sési úka ka sési pájperanta je. Sánderu jukaparhakuesti sési pájperani erachiichani jingoni.

¹² Biblieri karakateecha engachi antesi exeaka, uandasïndiksï na enga Abraáni ka sobrinu jémba Loti, sésiksï uandontskuarhepka paraksï sési peentani ambe ma. Tsimarhanksï karichi erangutiichani kaasïreendi ka peekaksï imeecha uarhiperapka imani echeriichani jimbo nani enga uitsakua jukapka. Paraka Abraáni seguiriini japiringa sési pájperani Loti jingoni, arhispti eska ima ueenapiringa erakuni nani uékasïreeni irekani imeeri familia jingoni (Gén. 13:1, 2, 5-9). ¡Ambakiti ejemplu máesti Abraáni! Ima sánderu uékaspti sési pájperani máteruechani jingoni ka eska imani ambe úni ambe enga ima uékeenga. ¿Tsïtani uéraspi Abraáni enga xáni ambakiti kʼuiripu máepka? Enga Abraáni apenasi nitamakuarhipka ini ambe, Tata Diosï aiakuspti eska uánikua kóntperateechani íntsaapiringa (Gén. 13:14-17). Tata Diosï no méni jurajkuati eskaksï imeeri marhuariicha tsïtaka ambe ma para méntkisï jimbokaksï úsïnga ambe enga Biblia uandajka ka jimbokaksï xénchperakua jingoni sési peentasïnga ambe ma engaksï arhirperajka nema jingoni. ^[1]

13. a) ¿Ambe úspi departamenturhu anapu orhejtsïkuti ma jiáni enga erachi ma arisantku kurhakupka? b) ¿Ambechi uaa jorhenguarhini ini ejempluni jingoni?

¹³ Ju je exeni iásï anapu ejemplu ma. Erachi ma arhinhaspti para departamentuni ma orhejtsïkuni kʼéri tánguarhikua ma jimbo. Ma jurhiani, i erachi telefonu jimbo uandajpaspti máteru erachini para kurhamarhini sini úpirini jarhuatani, joperu inde erachi arisantku kurhakuspti ka kolgarikuspti. Peeka i erachi arhirperaka imani erachini jingoni enga orhejtsïkuenga indeni departamentuni ka jimbosï no sési pʼikuarherani japti. Joperu erachi enga iásï arhinhapkia para orhejtsïkuni departamentuni, no no sési exespti ambe enga i erachi úpka joperu ístu no ísku pakaraspti. Íksï tsimani erachiicha nótkiksï mítperaxapti, ísï jimbo enga na i ambe úkuarhipkia, erachi ísï ma ora jimbo ménderu uandajpaspti erachini para arhini sinksï úpirini exejperani nani paraksï uandontskuarheni indeeri ambe enga úkuarhipka. Ka máteru semana jimbo, Kʼumanchikua Reinueri jimboksï exejperaspti, kómarhikuaksï ma úspti ka ma oraksï uandontskuarhespti indeeri ambe. Ima erachi enga no sési pʼikuarherani japka, aianguspti departamenturhu anapu orhejtsïkutini ambe enga nitamakuarhipka, ísï jimbo, i erachi kurhajchaspti, kurhangukuspti ka májku kʼériksï arhiantaspti máru Biblieri karakateechani. Tátsekua, sésiksï peentaspti iámindu ambe ka erachi úspti jarhuajpeni kʼéri tánguarhikuarhu. Iásï, i erachi kánikua sési pʼikuarherasïndi enga departamenturhu anapu orhejtsïkuti tekaakuntapka ka enga sési kámapka.

14, 15. a) ¿Kánchi jatsipirini para úni ambe enga Mateu 18:15-17 uandaka? b) ¿Náki tanimu ambe uandaspi Jesúsi eskachi jatsiska para úni? c) ¿Andichisï jatsi para ini tanimu ambe úni?

¹⁴ Sáno méntkisï no uétarhisïndi eskachi máteruechani aianguauaka, sánderu sési, jatsiskachi ka uaakachi juchajku sési peentani engachi arhirperaska nema jingoni. Joperu Jesúsi uandaspti eska ménisï uétarhiaka eskaksï orhejtsïkutiicha míteaka (arhinta je Mateu 18:15-17). ¿Joperu ambe úkuarhisïreeni imani kʼuiripu jingoni enga no uékapiringa kurhajchani ermanu jémbani, testiguechani ka nijtu kúnguarhikuani ísï eska Jesúsi na uandapka? Enga inde ambe úkuarhienga, jatsisïreendiksï para ísï exeni komueska kʼuiripuni ma enga no Israeli anapuepiringa ka komueska impuestu kobrarpitini ma. Iásï, inde ambe ísïipirindi komueska kúnguarhikuarhu petantani nemani. Ka enga inde ambe úkuarhipiringa, jiájkani arhikuekasïndi eska erachi no sési ambe úska ka eska no arhirperata ambejkueska. Ixú Jesúsi uandaxapti eska enga niárapiringa no sési ambe úkuarhini, uétarhisïreenga tsimani ambe úni 1) jatsisptiksï para imeechajku uandontskuarheni engaksï arhirperapiringa ka sésiksï peentani ambe ma, joperu 2) enga inde ambe sánderu kʼéri ambeepiringa ka nóksï úni sési peentani ambe ma, jiájkani ima kʼuiripu enga no sési ambe niátapka jatsipirindi para petanhantani kúnguarhikuarhu. Inde ambe enga nema úpiringa no sési niátani, úpirindi jindeeni fraude ambe o chkuanderakua ambe jauatakuni nemani para no sési pakatani. Ka inde tanimu ambe enga Jesúsi uandapka, jiántkusï jatsiti para úkuarhini enga nema ini ambe úpiringa, jimboka méntku máteru ambeeska ísku jándikua ambe niátani, omoseksualidadi, apostasia ka diosï úkateechani kómarhiani, i ambe ka ístu máteru ambe, méntkisï uétarhisïndi eskaksï kúnguarhikuarhu anapu orhejtsïkutiicha exeaka enga nema ini ambe úska.

¹⁵ Ambe engajtsïni Jesúsi uékeenga jorhendani, jindeesti eskachi jatsiska para uékperakua jingoni jarhuatani imani erachini engajtsïni no sési ambe úchika (Mat. 18:12-14). Orheta, jatsiskachi para imani erachini jingoni uandontskuarheni engachi jingoni arhirperaka ka no nemani aianguni. Ka para ísï úni, jamberi uétarhiati eskachi someni uandontskuarheaka imani jingoni engajtsïni no sési ambe úchika. Ka engachi no úska sési peentani arhirperatani, jiájkanchi jatsiska para uandontskuarheni imeechani japarini engaksï exepka ambe enga úkuarhipka o máteruechani japarini engajtsïni jarhuataaka exeni sini pekadu ma úkuarhiski. Engachi máteruecheeri jarhuajperatani jingoni úkua sési peentani arhirperatani, jiájkanchi jarhuataska juchaari erachi para ménderu ambakiti ambe úni. Ísï jimbo, jiántkuchisï jatsika para orhejtsïkutiichani nirani aianguani engachi someni uandontskuarhekia imani jingoni engajtsïni no sési ambe úchika ka útasïchi no úni jarhani sési peentani arhirperatani.

16. ¿Andisï xáni marhuajki ka xarhatanchi eskachi xénchpesïnga engachi újka ambe enga Jesúsi uandapka eskachi jatsiska para úni?

¹⁶ Sáno méntkisï no uétarhisïndi iámindu ambe úni ambe enga Mateu 18:15-17 uandajka. Ka kánikua sési jarhasti, jimbo inde ambe arhikuekasïnga eska iámindu ambe sési jarhaskia ka eska no sánderu kʼéri ambe úkuarhiska enga jamberi uétarhipiringa kúnguarhikuarhu petantani imani enga no uékapiringa móantani. Sáno méntkisï, ima enga no sési ambe niátajka kuenta íntskukuarhesïndi eska no sési ambe úska ka mójtakurhisïndi, jimajkani ima kʼuiripu enga no sési pʼikuarherani japka jamberi exeati eska nóteru ma rasoni jarhaskia para uandani eska máteru erachi no sési ambe niátaska ka uékaati puákuntani. Ambe uéjki úkuarhini, ambe enga Jesúsi uandapka xarhatasïndi eskachi no jatsiska para jirejiresï aianguani orhejtsïkutiichani ambe enga úkuarhipka engachi arhirperata ambe jatsiaka. Kúnguarhikuarhu anapu orhejtsïkutiichaksï uaati exeni ambe enga úkuarhipka joperu solu jiántku enga úkuarhikia tsimani ambe ima tanimu ambeeri enga uétarhijka para úni ka engaksï jauaka pruebeecha engaksï meru xarhatajka eska no sési ambe úkuarhiska.

17. ¿Náki kóntperateechanchi jatsiaua engachi méntkisï jánguarhintaska sési pájperani iáminduechani jingoni?

¹⁷ Enga jamberi útasï i parhakpini jauaka, seguiriinchi jauaka imperfektueni ka seguiriinchi jauaka no sési pʼikuastaani máteruechani, disipulu Santiagu uandaspti: “Ima enga méntkisï sési uandajka, iámindu ambe sési úsïndi ka ístu úsïndi iámu imeeri kuerpuni pʼínguni” (Sant. 3:2). Parachi úni sési peentani arhirperata ma, jatsiskachi para jánguarhintani sési pájperani máteruechani jingoni ka seguiriini jarhani ísï úni (Sal. 34:14). Engachi úska ambe ma paraksï erachiicha sési pájperani, juchajtuchi sési pájperaaka imeechani jingoni ka jarhuajpenchi jauaka paraka kúnguarhikua májku kʼéri jauaka (Sal. 133:1-3). Ka ambe enga sánderu jukaparhakueka, jindeesti eskachi uaaka sési pájperani Tata Diosï Jeobani jingoni, “Tata Diosï enga pínandikua íntspijka” (Rom. 15:33). Iáminduechachi uaaka ini kóntperateechani jatsiani engachi xénchperakua jingoni sési peentaaka arhirperata ambe.