1, 2. a) ¿Náki pínandikuachi úsïni iásï jatsini? b) ¿Andisï iásï no jaki pínandikua iápurisï? (Exe je fotuni enga ueenakuarhu jaka).

 IÁMINDUECHACHI uékasïnga sési irekuarhini ka no ma uandanhiata jatsini. Ísïisti, kánikuachi sési pʼikuarherasïnga engajtsïni Tata Diosï Jeoba íntskujka imeeri “pínandikua”. I ambe máesti enga kuájchakujka juchaari mintsitani ka eratsekuani parachi no xáni uandanhiani (Filip. 4:6, 7). Ka jimbokachi aiakuska juchaari tsípikuani Tata Diosï Jeobani, ístuchi úsïnga sési pájperani imani jingoni (Rom. 5:1).

² Joperu iáiasï, Tata Diosï nótki úxati eska pínandikua jauaka iápurisï, ka jimbokachi irekaxaka últimu jurhiatikuechani jimbo enga xáni úkua jukaka, jimbosï xáni uánikua uandanhiata ambe jati ka ístu kʼuiripuecha engaksï no sési jámajka (2 Tim. 3:1-4). Ístu, kristianuechachi jatsiska para jánguarhintani ka no jurajkuni eskajtsïni Noambakiti andaaka ka nijtu jakajkuni chkuanderakua ambe enga ima jorhentpijka (2 Kor. 10:4, 5). Joperu ístu ambe engajtsïni úpiringa sánderu uandanhiatani, jindeesti engaksï máru juchaari parienticha no Jeobaeri testigueska. Jamberijtsïni máru arhinchaati indeni ambe jimbo engachi jucha jakajkujka ojtsïni arhini eskachi juchasï úni jaka eska familia no májku kʼéri jauaka o jamberijtsïni juchaari familia arhini eskajtsïni jurajkuaka. Engajtsïni juchaari familia niáraska no sési kámani, ¿nénachi jatsiski para exeni? ¿Ambechi uaa úni engachi indeni ambe nitamakuarhini jauaka?

3, 4. a) ¿ambe niárapirini úkuarhini imani ambe jimbo enga Jesúsi jorhentpipka? b) ¿Na jatini sánderu úkua jukapirini para Jesúsini chúxapani?

³ Jesúsi mítespti eskaksï kʼuiripuecha niárapiringa nóteru májku kʼéri jarhania indeni ambe jimbo enga ima jorhentpipka ka ístu mítespti eskaksï imeeri chúxapatiicha uétarhinchapiringa balori jukani jimbokaksï niárapiringa no sési kánhani. I ambe úpirini eskaksï familiecha nóteru úpiringia sési pájperani. Jesúsi uandaspti: “Asï eratsi je eskani jurhaska para pínandikua jarhani parhakpinirhu; no jurhaska para pínandikua jarhani sino espadasïni juáka. Jimbokani jurhaska paraka kʼuiripu no uaaka májku kʼéri jarhani. Tataka no uaati sési pájperani taati jémba jingoni, nanaka no uaati sési pájperani amamba jingoni ka tarhamba no uaati sési pájperani suegra jémba jingoni. Jiájkani, imeeri mismu kʼumanchikuarhu anapuechaksï ikiakuati kʼuiripuni ma” (Mat. 10:34-36).

⁴ ¿Andisï Jesúsi uandapi eska no jurhaspka “para pínandikua jarhani”? Jimboka uékasïreenga eskaksï kʼuiripuecha kurhangupiringa ambe engaksï niárapiringa nitamakuarhini engaksï imeeri chúxapatiipiringa. Jesúsi jurhaspti para “uandantani jurhimbikua ambe” ka no parakaksï kʼuiripuecha nóteru úpiringia sési pájperani (Juanu 18:37). Joperu inde ambesï úpirini úkuarhini, ísï jimbo, tata Jesukristu uékasïreendi jorhendaani kʼuiripuechani eska ménisï úkua jukapiringa imeeri chúxapatiini, sánderia jiáni engaksï amiguecha o familiariicha no uékapiringa míteni jurhimbikua ambe.

5. ¿Jesúsiiri chúxapatiichaksï ambe xáni tekaantaskia?

⁵ Jesúsi uandaspti eskaksï imeeri chúxapatiicha jatsiska para tekaantani jiáni engaksï imeecheeri familia niáraaka no sési kaani ka ístu máteru ambe tekaantani (Mat. 10:38). Para Kristu jaiapanheantani imeeri chúxapatiichani, indeechaksï jatsispti para tekaantani jiáni engaksï máteruecha niárapka arhinchaani ka jamberiksï imeecheeri familiariicha niáraspti jurajkuani. Ka nájkirukaksï tsïtaka máru ambe, niárastiksï sánderu uánikua ambe jatsini (arhinta je Markusï 10:29, 30).

6. ¿Ambechi jatsiski para miáni enga juchaari familia no uéjka eskachi marhuakuaka Tata Diosï Jeobani?

⁶ Nájkiruka juchaari familia no uékaaka eskachi marhuakuaka Tata Diosï Jeobani, juchachi jatsiska para seguiriini jarhani xénchaani, joperu ístuchi jatsiska para miáni eskachi jatsiska para sánderu xénchani Tata Diosïni ka Kristuni (Mat. 10:37). Ka ístuchi jatsiska para miáni eska Satanási indeni ambe úraaka ambe engachi jucha pʼikuarherajka juchaari familiani jimbo parachi jurajkuni Tata Diosï Jeobani. Ju je exeni máru ambe enga niárapiringa úkuarhini ka nénachi uaa orhepani uérani.

7. ¿Ambe jatsiski para úni imeecha enga uámba o témba no Jeobaeri testigueka?

⁷ Biblia uandasïndi eska imeecha engaksï tembuchaaka o uambuchani niáraakaksï “uandanhiata ambe” jatsini (1 Kor. 7:28). Ka enga juchaari uarhiiti o acheeti no Jeobaeri testigueka, jamberi inde ambe uaati eskachi sánderu uandanhiata ambe jatsiaka temungurhirini. Ka nájkiruka inde ambe úkuarhiaka, uétarhisïndi eskachi ísï exeaka ambe ma eska Tata Diosï na exejka. Enga juchaari uarhiiti o acheeti no uékaaka marhuakuni Tata Diosïni, inde ambe no arhikuekasïndi eskachi jatsiska para jurajkuni o diborsiarikuarhini (1 Kor. 7:12-16). Pirenchi jatsisti para janhanharhini uámbani jimboka imeeri orhejtsïkutiiska nájkiruka uámba no jorhendani jauaka Tata Diosïiri ambe familiani. Ístu, erachi jatsisti para xénchani témbani ka sési kámani nájkiruka inde no marhuakuaka Tata Diosï Jeobani (Éfes. 5:22, 23, 28, 29).

8. Engajtsïni juchaari acheeti o uarhiiti no xáni jurajkuska parachi úni máru ambe para marhuakuni Tata Diosïni, ¿ambechi jatsiski para úni?

⁸ Ka engajtsïni juchaari acheeti o uarhiiti no xáni jurajkuska parachi úni máru ambe para marhuakuni Tata Diosïni, ¿ambechi jatsiski para úni? Pori ejemplu, pirenchiiri uámba ma arhispti pirenchini náki jurhiatikuechantku úpirini uérani aianhpini. Engachi ini ambe nitamakuarhini jaka, ju je kurhamarhikuarhini: “¿Juchiiti acheeti o uarhiiti uékasïni eskani meru nóteruni marhuakuakia Tata Diosï Jeobani? Enga no ísïika, ¿uaa úni ambe engareni kurhacheni jaka?”. Sési kurhanguni ini ambe, jarhuataatijtsïni parachi no niárani arhirperani (Filip. 4:5).

9. ¿Néna jatsiski para kristianu ma jorhendaani sapiichani eskaksï jatsiska para janhanharhini taati jémbani o amambani enga no Testigueka?

⁹ Enga juchaari acheeti o uarhiiti no marhuakujka Tata Diosïni, jamberi kánikua úkua jukajti sapiichani kʼuiriperaani, jimbokachi jatsiska para arhistakuani eskaksï jatsiska para janhanharhini taati jémbani o amambani ísï eska Biblia na uandajka (Éfes. 6:1-3). ¿Joperu ambechi uaa úni enga juchaari acheeti o uarhiiti no újka ambe enga Biblia uandajka? Ju je janhanharhini, ísïchi ambakiti ejemplu máeuaka. Ju je exeni na enga ambakiti kʼuiripu máeka ka ístu arhini eskachi sési pʼikuarherasïnga indeni ambe jimbo enga sési újka. Jiáni engachi juchaari sapiichani jingoni jauaka, ju je no no sési ambe uandani juchaari acheetiiri o uarhiitiiri ambe. Sánderu sési, ju je arhiani juchaari sapiichani eska mándani kʼuiripu jatsiska para erakukuarhini sini marhuakua Tata Diosïni o nómbe. Jamberi juchaari acheeti o uarhiiti uékaati míteni Tata Diosï Jeobaeri ambe jimboka exesïnga eskaksï sapiicha sési jámasïnga.

10. ¿Néna uaa kristianu ma jorhendaani uájpeechani Tata Diosï Jeobaeri ambe nájkiruka uámba o témba no Testigueka?

¹⁰ Jamberi ménisï taati o naandi enga no Testigueka uékaati eskaksï sapiicha kʼuínchikua ambe úntaaka enga no sési jaka o eskaksï imani ambe jorhenguarhiaka enga no jurhimbitiika. Máru acheetiichaksï no uékasïni eska témba, enga Testigueka, Biblieri ambe jorhendauaka uájpeechani. Ka nájkirukaksï máru pirenchiicha ini ambe nitamakuarhini jarhajka, jánguarhintasïndiksï Biblieri ambe jorhendaani uájpeechani (Úku. 16:1; 2 Tim. 3:14, 15). Pori ejemplu, jamberi acheeti no uékaati eska pirenchi Biblieri ambe jorhendauaka o eska tánguarhikuecharhu pájtauaka uájpeechani engaksï nótki kʼériini jaka. Nájkiruka pirenchi kurhajchaaka uámbani, ambe enga kʼóru uaaka úni jiáni enga uaaka ísï úni, jindeesti aianguani uájpeechani ambe enga jakajkujka. Ísï úparini, jorhendaani jauati sapiichani Tata Diosï Jeobaeri ambe ka ambe enga ima juramujka (Úku. 4:19, 20). Tátsekua, sapiichaksï uandakuarhiatia sinksï uékasïni marhuakuni Tata Diosï Jeobani o nómbe (Deut. 30:19, 20). a

11. ¿Andichisï úpirini uandanhiata ambe jatsini juchaari parientiichani jingoni engaksï no Testigueka?

¹¹ Jiáni engachi ueenapka jorhenguarhini Biblieri ambe Jeobaeri testiguecha jingoni, jamberichi no ma ambe aianguapka juchaari parientiichani. Joperu engachi na sánderu mintsikeengia Tata Diosïni, exespkachi eskachi jatsispka para balori jukani ka aianguani ambe engachi iásï jakajkujkia (Mar. 8:38). Joperu engajtsï uandanhiata ambe niáraka jatsini chaari familiarichani jingoni jimbokajtsï uékasïnga kurhajchani Tata Diosï Jeobani, ¿ambejtsï uaa úni parajtsï seguiriini jarhani sési pájperani imeechani jingoni joperu ístujtsï no jurajkuni Tata Diosïni? Ju je exeni máru ambe.

12. ¿Andiksïsï máru parientiicha no uékajki eskachi Jeobaeri testigueuaka ka ambechi uaa úni?

¹² Ju je jánguarhintani kurhangukuani juchaari parientiichani engaksï no Testigueka. Juchachi kánikua sési pʼikuarherasïnga jorhenguarhini Biblieri ambe enga jurhimbitiika, joperuksï máru parientiicha eratsejti eskajtsïni támisï jánhastaskia o eskachi sekta ma jingoni jámaxakaia. Jamberiksï eratsejti eskachi nóteru xénchaasïngia jimbokachi nóteru uaantasïngia máru kʼuínchikuechani ka jamberiksï úpirindi eratseni eskajtsïni Tata Diosï kastigariuaka engachi uarhiaka. Uétarhisïndi eskachi jánguarhintaaka kurhanguni ambeksï eratsesïni, ka jingontku kurhajchaani parachi úni míteni andiksïsï uandanhiajki (Prov. 20:5). Uaakachi májkueni úni eska apostoli Pablu, jimboka ima jánguarhintaspka para “iámindu kʼuiripuechani terukukuani” jimboka ísï úsïreenga aianguani Tata Diosïiri ambe. Engachi juchajtu ísï úska, uaakachi aianguani juchaari parientiichani ambe engachi jakajkujka (1 Kor. 9:19-23).

13. ¿Nénachi jatsiski para uandontskuarhekuani juchaari parientiichani?

¹³ Ju je iatsitakuarhu uandani. Biblia arhisïndi: “Jatsiskajtsï para méntkisï sési uandani” (Kol. 4:6). Uaakachi kómarhini Tata Diosï Jeobani eskajtsïni íntskuaka imeeri espiritu santu parachi sési uandontskuarheni juchaari parientiichani jingoni ka iatsitakuarhu ísï úni. Nóchi jatsiska para mémindu úndani arhiani eska chkuanderakua ambeeska ambe engaksï xáni jakajkujka imeecha. Engajtsïni úchiska ambe ma ójtsïni arhini ambe ma ka no sésijtsïni pʼikuastani, ju je májkueni úni eskaksï apostoliicha. Apostoli Pablu karaspti: “Engajtsïni kʼuiripuecha no sési arhijka, juchachi sési arhiasïnga; engajtsïni no sési kámajka, juchachi tekaantskua jingoni tekaantasïnga; engajtsïni uandakua ambe jauatachejka, juchachi no no sési mókukuarhisïnga” (1 Kor. 4:12, 13).

14. ¿Andisï sési jaki eskachi sési jámaaka?

¹⁴ Ju je sési jámani. Ísïisti, iatsitakuarhu uandontskuarhekuani uaatijtsïni jarhuatani parachi sési pájperani juchaari parientiichani jingoni, joperu engachi sési jámaska uaatijtsïni sánderu jarhuatani (arhinta je 1 Pedru 3:1, 2, 16). Engachi sési jámaska, juchaari parientiichaksï uaati exeni eska temungurhiriicha engaksï Jeobaeri testigueka tsípikua jingonksï irekasïnga, eskaksï kuidariuasïnga imeecheri uájpeechani ka eskaksï no no sési ambe niátasïnga ka eskaksï kánikua tsípikua jingoni irekasïnga. Ka nájkirukaksï juchaari parientiicha no méni niáraaka Jeobaeri testigueni uaakachi sési pʼikuarherani jimbokachi seguiriixaka sési marhuakuni Tata Diosï Jeobani.

15. ¿Ambechi jatsiski para úni parachi no niárani arhirperani juchaari parientiichani jingoni?

¹⁵ Ju je tʼuini exenia ambe enga niárapiringa úkuarhini. Ju je eratseni imani ambe enga úpiringa úni eskachi arhirperaaka juchaari parientiichani jingoni ka ístu exeni ambechi úpirini úni (Prov. 12:16, 23). Australia anapu pirenchi ma uandantasïndi: “Juchiiti suegru no sáni tsitisïreendi jurhimbikueri ambe kurhaani. Jiáni engachi uékeenga uandajpani parachi kurhanguarhini, juchiiti acheeti ka ji kómarhisïreengachi Tata Diosï Jeobani eskajtsïni jarhuatapiringa parachi no ikiani jiáni engajtsïni ima arhipiringa ambe ma. Tʼuinchi exesïreengia ambeeriksï uandontskuarhekupirini parachi sési uandontskuarheni. Ka ménichani engachi ióni sáni uandontskuarhienga niárasïreengachi relijioniiri ambe uandani ka inde ambe úsïreendi eskachi arhirperapiringa. Ísï jimbo, jánguarhintasïreengachi no xáni ióni uandontskuarheni”.

16. Engachi niáraska arhirperani parienti ma jingoni, ¿ambejtsïni jarhuataa no no sési pʼikuarherani?

¹⁶ Ísïisti, jauati ménisï engachi arhirperaaka juchaari parientiichani jingoni engaksï no Jeobaeri testigueka. Jamberichi no sési pʼikuarheraaka indeni ambe jimbo jimbokachi xénchaasïnga ka nóchi méni uékasïnga no sési pʼikuastaani. Engachi niáraska ísï pʼikuarherani, ju je miáni eskachi jatsiska para sánderu kurhajchani Jeobani ka eska xénchani juchaari familiani. Engachi ísï úska, jamberichi jarhuatauaka juchaari parientiichani paraksï exeni eska uétarhisïnga úni ambe enga Biblia uandajka paraksï úni tsípiti pakarani. Joperu ístu ju je miáni eskachi no nemani uaaka obligariini para Tata Diosï Jeobani marhuakuni. Ambe engachi kʼóru uaaka úni jindeesti eskaksï exeaka na engajtsïni marhuachejka engachi kurhajchajka Tata Diosï Jeobani. Ka jimboka Tata Diosï xénchpesïnga, íntsaaxati sésikua paraksï erakuni sinksï marhuakua imani o nómbe, ísï eska na úka juchantsïni jingoni (Is. 48:17, 18).

17, 18. ¿Ambechi uaa úni enga juchaari familiarhu anapu ma nóteru marhuakuskia Tata Diosï Jeobani?

¹⁷ Enga familiari ma petanhantajka kúnguarhikuarhu o uandani eska nóteru uékasïngia Jeobaeri testigueni, kánikuachi no sési pʼikuarherani, ísïchi pʼikuarherasïnga enajkijtsïni espada ma jingoni atajki mintsitarhu. ¿Ambechi uaa úni enga ísï úkuarhiska?

¹⁸ Ju je seguiriini indeni ambe úni enga jindeeka para kómarhini Tata Diosïni. Parachi seguiriini sánderu mintsikani Tata Diosïni, jatsiskachi para pauani pauani arhintani Bibliani, prepararikuarhini para tánguarhikuecha ka nirani, ístu uérani aianhpini ka kurhakuni Tata Diosïni eskajtsïni íntskuaka uinhapikua parachi úni tekaantani (Jud. 20, 21). Joperu engajtsï ísï pʼikuarheraska enajkijtsï ísku úni jaki pori úni ini ambe jimbokajtsï kánikua no sési pʼikuarheraxaka, ¿ambejtsï uaa úni? Asï jáma je chkétakuarhini. Ju je jánguarhintani sánderu marhuakuni Tata Diosï Jeobani, inde ambejtsïni jarhuataati parachi jucha no no sési eratseni ka no no sési pʼikuarherani. Ju je exeni ambe enga nitamakuarhipka ima kʼuiripu enga karaka Salmo 73. Ima ueenaspti no sési exeni máru ambe ka inde ambe úspti eska kánikua uandanhiapiringa. Joperu nóteru ísï eratsespti enga jánguarhintapka sési marhuakuni Tata Diosï Jeobani (Sal. 73:16, 17). Ini ambe úni, ístujtsïni jarhuataati juchantsïni.

19. ¿Nénachi xarhatasïni eskachi respetariisïnga enga Tata Diosï Jeoba xukajka nemani?

¹⁹ Ju je respetariini enga Tata Diosï Jeoba niáraska xukani nemani. Nájkiruka ueenani jámani no sési pʼikuarherakuarhijka enga inde ambe úkuarhijka, kánikuajtsïni marhuachesïndi iáminduechani, asta imani jamberi enga no sési ambe niátaka (arhinta je Ebreu 12:11). Pori ejemplu, Tata Diosï Jeobajtsïni arhisïndi eskachi nóteru jatsiskia para uandajpani imani enga no sési ambe niátaka ka enga no móantaka (1 Kor. 5:11-13). Ísïisti, no sésichi pʼikuarherasïnga, joperu imani familiari jingoni enga petanhantaka kúnguarhikuarhu nóteruchi jatsiskia para uandajpani telefonu jimbo, mensaji, karta, korreu elektroniku jimbo o redesi sosiali ambe jimbo.

20. ¿Ambechi jatsiski para méntkisï erokuarhini jarhani?

²⁰ Asï jáma je kuatantani. Jimbokachi xénchpesïnga, méntkuchi erokuarhini jarhasïnga ambe ma, jimbochisï seguiriini jarhajka erokuarhini eskaksï kʼuanhatsentaaka imeecha engaksï jurajkuka Tata Diosï Jeobani (1 Kor. 13:7). Engachi exeska eska familiari mójtakurhixakaia, uaakachi kurhakuni Tata Diosïni eska Biblia jarhuataaka para ima úni ambe enga Tata Diosï arhijka: Jurini andarhientani (Is. 44:22).

21. ¿Ambechi uaa úni engachi no újka sési pájperani juchaari familia jingoni, enga ísïika komueska espada ma jarhani, jimbokachi chúxapasïnga Jesúsini?

²¹ Jesúsi uandaspti eskachi jatsiska para sánderu xénchani imani ka eska náki uéjki kʼuiripuni. Ima mintsikasïreendi eskaksï imeeri chúxapatiicha balori jukapiringa paraksï no méni jurajkuni nájkirukaksï imeecheri parientiicha no sési kaapiringa. Engachi no újka sési pájperani juchaari familia jingoni, enga ísïika komueska espada ma jarhani, jimbokachi chúxapasïnga Jesúsini, ju je kurhakuni Tata Diosï Jeobani eskajtsïni jarhuataaka parachi úni orhepani uérakuani indeni uandanhiateechani (Is. 41:10, 13). Ju je eratseni na enga xáni tsípijka Tata Diosï Jeoba ka Jesúsi juchantsïni jimbo ka eskajtsïni kóndentaaka jimbokachi seguiriixaka sési marhuakuni. ¿A no eska i ambe úsïnga eskachi kánikua sési pʼikuarheraaka?