Biblia jarhuataasti mójtakuni irekua

¿Ambe úspi eska rastafari ma nóteru ísï irekapiringia ka nóteru menusi uaania kʼuiripu urapitiichani? ¿Andisï tumbi ma enga kánikua no sési jámeenga ka ánchikuarhikuani imeechani engaksï droga ataranteenga erakupi mójtakuni imeeri irekuani? Ju je jurajkuni eskajtsïni imeecha mismu aianguaka.

“Nóteruni menusi uaasïngia máteru kʼuiripuechani” (HAFENI NGHAMA)

EDADI: 34 UÉXURHINI

PAISI: ZAMBIA

MÁTERU AMBE: NÓTERU RASTAFARISTIA

NA ENGANI IREKAPKA IÓNTKI: Guerra jimbo, juchiiti naandi Namibia uératini sïpakuarhispti ka grupu ma jingoni úkuarhispti enga arhinhajka la Organización del Pueblo de África del Suroeste (SWAPO, enga inglesi jimboeka). I grupu no jaiapanhentasïreendi ambe enga ueenga Namibia anapu juramuti. Jiáni ísï juchiiti naandi niáraspti Zambia irekani nani engaksï kʼuiripuecha kuájchakukuarhijka ka ji jima andajpenuspka.

Kinse uéxurhini mámaru járhati lugaricha jimbo irekaspka nani engaksï kʼuiripuecha kuájchakukuarhijka. Imani lugaricharhu, jorhendasïreendiksï tumbiichani politikeri ambe ka eskaksï jatsiska para úni eskaksï máteruechajtu májkueni jámapiringa ka ístu jorhendasïreendiksï kurhunhiani kʼuiripu urapitiichani.

Engani 11 jatiripka, uékasïreenga konfirmarikuarhini ísï eska kristianu ma, jimbosïni nípka pastori ma jingoni iglesiarhu ma enga japka nani engachi kuájchakukuarhienga jimaksï tánguarhintasïreendi katolikuecha, luteranuecha ka anglikanuecha ka ístu máteruecha. Joperu pastori no uékaspti eskani ísï úpiringa. Jimbosïni niárapka nóteru jakajkunia Tata Diosïni. Ísï jimbo engani 15 jatiripkia, kúnguarhispka imani grupuni jingoni enga arhinhajka rastafaris. Ísï úspka jimbokani tsitisïreenga kústakuani enga arhinhajka reggae, joperu ístu, parakaksï nóteru no sési kaapiringuia Áfrika anapu kʼuiripu negrituechani. Jauirirhu újtsïaspka rastechani —ísï eskaksï rastafaricha na tepejtsïjka—, ueenaspka mariuana itsutani, bejetarianu úkuarhispka ka jánguarhintasïreenga úni parakaksï nóteru no sési kaapiringuia kʼuiripu negrituechani. Nájkirukani ísï ueenga no mójtakurhispka, seguiriispka ísï irekani ka exeasïreenga pelikula atajperakuecheri ambe. Ka ístuni seguirispka no sési járhati uandakuechani úraani.

NA ENGARINI BIBLIA MÓJTAKUCHEKA IREKUA: Uéxurhini 1995 jimbo, engani ma 20 ísï jatiripka, ueenaspka sési eratseni ambe engani úpiringa juchiiti tsípikua jingoni. Sáni ióni páxapkia engani jorhenguarhiani japka iámindu publikasionichani rastafariri ka nájkirukaksï máru Bibliarhu pʼitakateenga no seguru jarhaspka ambe engaksï eksplikariuenga. Ísï jimbo, eratsespka jandiajkuni jorhenguarhini Bibliani.

Juchiiti amigueri jarhuajperata jimbo enga ístu rastafaripka, úspka jatsini Jeobaeri testiguecheri libru ma. Ka jirejiresï uénaspka jorhenguarhini Biblia jingoni. Ísï tátsekua, míteaspka máru Jeobaeri testiguechani ka imeecheri jarhuajperata jimbo, úspkani seguiriini jorhenguarhini. Joperu antede jorhenguarhini imeechani jingoni uánikua mójtakukuechani uaaspka.

Kánikua úkua jukanchaspka nóteru itsutania ni kauini (2 Korintu 7:1). Ístuni mójtakuspka na engani xarhareenga —ka astani kuinakuarhispka—, nóteruni exeasïreenguia pelikula atajperakueri ni pornografieri ambe ka mójtkuspka na engani uandeenga (Efesu 5:​3, 4). Ístuni niáraspka nóteru menusi uaania kʼuiripu urapitiichani (Ukuecha 10:​34, 35). Para ini ambe úni, jatsispka parani nóteruni kurhaania imani kústakuani enga ueenga eskani menusi uápiringa máteruechani ka nóteru pájperani imani amiguecha jingoni engaksï ueenga eskani no sési ambe úpiringa.

Ísï tátsekua engani jurajkuapkia indeni no sési járhati úkuechani, jirinhaspka kʼumanchikua ma Reinueri Jeobaeri testiguecheri. Jiáni ísï uénaspka jorhenguarhini Biblieri ambe ka eratsespka itsï atakuarhini. Juchiiti familia no xáni sési exespti ini ambe. Asta juchiiti naandirini niárapti arhini eskani úpiringa náki uéjki relijioni jingoni úkuarhini enga jindeepiringa “kristiana”, peru menusi Testiguecha jingoni. Ka ma familiarhu anapu ma —enga kʼéri ánchikuarhita ma jatsispka gobiernurhu— méntkurini teresmarhuni jarhasïreendi imani ambe jimbo engani erakupka úni.

Nájkirukajtsïni no sési kámeenga ka teresmarhuni juchiiti familiarichani, úspkani orhepani uerani, jimbokani ísï úspkani eskani na jorhenguarhipka Jesúsiiri ejemplu jingoni ka ima ambeeri enga ima jorhentpipka. Ístuni seguru jarhaspka eskaksï testiguecha jindeeska relijioni jurhimbitiika, jimboka ambe engajtsïni jorhendeenga terukuntasïreenga Biblia jingoni. Ka Jimbokaksï méntkisï úsïnga ambe enga Tata Diosïiri karakata arhijka, imeechaksï aianhpisïndi (Mateu 28:​19, 20; Ukuecha 15:14). Ístuksï no inchamukusïndi politikarhu ísï (Salmo 146:​3, 4; Juanu 15:​17, 18).

NÁKI KÓNTPERATECHANI INTSÏNHAASKIA: Ísï irekani eska Biblia na uandajka kánikuarini jarhuatastia. Pori ejemplu, nóteru itsutania mariuana úspti eskani nóteru xáni sentabu gastaripirhinguia mándani mesi. Ísï úparini nóteru alusinarisïnguia ka sési pʼikuarherasïnga.

Desde engani sapichuepka uékasïreenga míteni ambe úni juchiiti tsípikua jingoni ka iásï kʼóruni míteskia. Joperu sánderu jukaparhakua ambe jindeesti eskani iásï sánderuni andarhieraskia Tata Diosïni (Santiagu 4:8).

“Úskani nóteru xáni uinhamu ikiania” (MARTINO PEDRETTI)

EDADI: 43 UÉXURHINI

PAISI: AUSTRALIA

MÁTERU AMBE: NARKOTRAFIKANTI

NA ENGANI IREKAPKA IÓNTKI: Engani sapichuepka juchiiti familia méntku mótsini jarhasïreendi, irekaspkachi mámaru járhati kʼéri ireta ka sapirhatiicharhu ka ma tiempu komu relijioni ma paisirhu ma jimbo. Ambakiti ambe miántasïnga jiáni engani juchiiti primuecha ka tiuecha jingoni irekapka. Nirasïreengachi kurucha pʼitamani, animali jupiani ka bumeranichanchi uaasïreenga ka ístu máteru ambe.

Desde engani sapichuepka, juchiiti taati enga jindeepka bokseadori, jorhendasptireni uarhipeni jimbosï xáni no sési jámeenga. Ka engani na tumbipkia, uénaspka méntkuni nirani jarhani baricharhu kauini. Juchiiti amiguecha ka ji tsitisïreengachi uarhipeni. Engachi uarhipepirhinga beinte o sánderu kʼuiripuecha jingoni, paasïreengachi nabaja o bates de beisbol.

Parachi sentabu andani, íntspikuarhisïreengachi droga ka imani ambe engaksï ánchikuarhiricha sïpeenga engaksï mueicharhu ánchikuarhienga. Ístuni ánchikuarhisïreenga, sentabu kobrarijpini imeechani engaksï kánguani jarheenga trafikantichani ka cherasïreenga armecha jingoni. Ji uandasïreenga: “Uándikpini o uarhini”. Ambe engani ji uékeenga jindeespti niárani uándikpiti máeni.

NA ENGARINI BIBLIA MÓJTAKUCHEKA IREKUA: Engani sapichuepka miásïnga kurhaani Jeobaeri testiguecheri ambe. Joperu engani beinte ísï jatiripkia kurhamarhispka juchiiti naandini imeecheeri ambe. Ka tsimani jurhiatikua tátsekua, niáraspti juchiniu Jeobaeri testigu ma enga arhinhajka Dixon. Uandontskuarhespkachi ma ratu ka tátsekuarini pʼímarhispti imeecheri tánguarhikua ma jimbo. Ima primeru xanharispti engani nípka ka desde jiáni beinte uéxurhini paxakaia nirani tánguarhini. Tsitisïreenga eska ambe engani ji kurhamarhiauenga imeechajtsïni Biblia jingoni mókuchintasïreendi.

Jorhendastijtsïni eska Tata Diosï Jeoba pendienti pásïnga iámindu kʼuiripuechani ka asta imeechani engaksï no janhanharhijka imani (2 Pedru 3:9). Ístuni jorhenguarhispka eska ima jindeeska Taati uékpiti ma engareni kuidaripiringa nájkirukaksï máteruecha no ísï úpiringa ¡Kánikuari sési pʼikuastaspti míteni eska engani mójtakurhipiringa imarini puáchintapirindi iámindu juchiiti pekaduechani! Ambe Efesu 4:​22-24 jimbo uandajka, ískurini pakataspti. Jimini arhisïndi eskachi “nóteru jatsiska para ísï jámani eska[k]sï ióntki na jámeenga” ka “iásïjtsï jatsiskia para mójtakurhini, enga ísïika komueska xukuparhakua ambe jukantani, indeni jimbanhi jángua jingoni enga Tata Diosï kueraaka ka enga ísï terukuntajka eska Tata Diosï na uéjka”.

Jatsiskani para uandantani eska úkua jukaspka jurajkuni na engani irekani japka. Úsïreenga no drogarikuarhini jarhani uánikua jurhiatikua, joperu enga na niáreenguia fin de semana ka tánguarhikuani juchiiti amiguechani jingoni, ménderueni ueenasïreenga ísï úni. Kuenta íntskukuarhespka eskani no úpiringa mójtakuni juchiiti irekuani engani seguiriini japiringa imeechani jingoni jámani, ísï jimbo eratsespka nóteru imeechani jingoni kúnguarinia ka niraspka máteru estadu jimbo irekani. Jiókuarhispka eskajtsïni máru pámbetapiringa, joperujtsïni ueenaspti aiachini mariuana. Ji arhiaspka eskani nóteruni itsutapiringuia ka engachi na niárapkia jurajperaspkachia. Ísï tátsekua mítespka eska ísï no ióni jimbo, bankunksï ma asaltarispti eskapetecha jingoni.

NÁKI KÓNTPERATECHANI INTSÏNHAASKIA: Engani na jurajkuapkia imani amiguechani, sánderu fasilispti uaani mójtakukuechani. Ka 1989 itsï atakuarhispka komu Jeobaeri testigu. Ísï tátsekua, juchiiti taati ka juchiiti ermana májkuenksï úspti.

Diesisiete uéxurhini paxakaia engani témbuchaka ka tanimu uájpeechani kaasïnga. Iásï úsïnguia uandani eskani pʼíngukuarhisïnga parani nóteru xáni uinhamu ikiania, asta jiáni engajtsïni úchiaka ambe ma. Ístuni jorhenguarhiska xénchaani iámindu járhati kʼuiripuechani no arhiparini nani engaksï anapueka oksï náki idiomani uandani (Jaŋaskuecha [Apocalipsis] 7:9). No méni mirikurhiaka imani uandakuechani enga Jesúsi uandaapka ka engaksï meru ísïika: ““Engajtsï chá méntkisï úska ambe engani ji jorhentpijka, chájtsï sési jimbo juchiiti chúxapatiuaka; chájtsï míteaka imani ambe enga jurhimbikueka, ka jimbokajtsï míteaka ambe enga jurhimbikueka, chájtsï nóteru jántspiriuakia” (Juanu 8:​31, 32).

[Komentariu]

Para ini ambe úni, jatsispka parani nóteruni kurhaania imani kústakuani enga ueenga eskani menusi uápiringa máteruechani

[Komentariu]

Engachi uarhipepirhinga beinte o sánderu kʼuiripuecha jingoni, paasïreengachi nabaja o bates de beisbol