Biblia jarhuataasti mójtakuni irekua

¿Ambe úski eska nema enga kánikua tsitienga chʼanani ka kʼumanchikuecharhu inchatspini para sïpani, úpiringa jurajkuni chʼanakuni ka mójtakuni imeeri irekuani? Ju je jurajkuni eskajtsïni ima mismu aianguaka.

“Kánikua tsitisïreenga jima nirani engaksï kabaiuecha uiriauenga” (RICHARD STEWART)

UÉXURHINI ENGA ANDAJPENUKA: 1965

PAISI: JAMAICA

MÁTERU AMBE: TSITISÏREENDI CHʼANANI KA SÏPANI

NA ENGANI IREKAPKA IÓNTKI: Kingston tʼarhexeska, Jamaica nani engaksï kʼuiripuecha kánikua pobrika ka uánikuaksï irekani, jima no sáni jarhasïreendi ánchikuarhita ka uánikua no sési úrichaksï jarhaspti. Kʼuiripuechaksï kánikua chérhiasïreendi imeechani engaksï no sési úripka. Pauani pauani kurhakuarhisïrendi na engaksï chareenga armecha.

Mama kánikua jánguarhintasïreendi ánchikuarhini parajtsïni úni íntskuni juchiiti ermanuechani ka jindeeni ambe engachi uétarhincheenga —jindeespti tataka ka ma nanaka⁠— ka jánguarhintaspti parakachi jucha úpiringa eskuelarhu nirani. Joperuni ji no tsitisïreenga eskuela nirani, sánderuni tsitisïreenga kabaiuechani nirani exeani engaksï uiriauenga. Someni no nirasïreenga eskuela parani úni nirani kabaiuechani exeani. Niáraska jamberi jataani máru kabaiuechani.

No sáni ióndaspka uénani apostarhini ka uarhiiticha jingoni jámani. Ístuni mariuana itsutasïreenga. Ka parani úni ini ambe úni, jatsisïreenga parani sïpani ka i ambe úspti eskani uánikua armechani jatsiapiringa. ¡No méni uándikuska nemani, nájkirukani mémindu sïpakuapka kʼuiripuechani!

Tátsekuajtsïni jupikaspti ka ónhasptijtsïni. Peru engani na uéntapka ménderuni uénaspka no sési jámani. Iásï sánderuni no sési jámasïreengia. Ísï xarhanharhisïreenga enajki no ma ambe ueeni, peruni kánikua no sési jámasïreenga, sóntkuni ikiasïreenga ka kánikua no sési kámpisïreenga. Méntkuni no nema jimbo uandanhiasïreenga.

NA ENGARENI BIBLIA MÓJTAKUCHEKA IREKUA: Engani xáni no sési jámeenga mama uénaspti jorhenguarhini Bibliani ka Jeobaeri testigu úkuarhispti. Engani exepka na enga xáni mójtakurhipka uénaspka jíjtuni tsitini. Uékasïreenga míteni ambesï úni japi eska mama ísï mójtakurhipiringa, jimbosïni uénapka uandontskuarheni Biblieri ambe Jeobaeri testiguecha jingoni.

Sóntkuni kuenta íntskukuarhespka eskaksï no májkueni ambe jorhentpisïnga eska máteru relijionicha ka eska iámindu ambe engaksï uandeenga Bibliarhuksï pʼitasïrenga. Imajkuksïsï jindeepti engaksï nireenga kʼumanchikuecharhu paraksï uandantani Biblieri ambe ísï eskaksï na uénga primeru kristianuecha (Mateu 28:19; Ukuecha 20:20). Ambe enga úpka eskani seguru japiringa eskaksï Jeobaeri testiguecha jindeeska relijioni jurhimbiti, jindeespti na engaksï xénchperajka (Juanu 13:35).

Engani uénapka jorhenguarhini Bibliani, uénaspka kurhanguni eskani jatsispka parani mójtakuni ambe ma. Tata Diosï Jeoba kurhunhisïndi ísku janikuani ka ji uékasïreenga sési pʼikuastani, jimbosïni jatsipka parani jurajkuni iámu ambe enga no sési úkujka juchiiti kuerpuni (2 Korintu 7:1; Ebreu 13:4). Mintsitarhurini niárachespti míteni eska Jeoba pʼikuarherasïnga eska ambe engani ji újka úsïnga sési pʼikuastani o no sési pʼikuastani (Proverbios 27:11). Ísï jimbo, eratsespka nóteru itsutania mariuana ka jurajkuani armechani ka jánguarhintani parani sánderu ambakiti kʼuiripu máeni. Ambe engani sánderu úkua jukanchapka, jindeespti jurajkuani uarhiitichani ka sentabu jimbo chʼanani.

Orheta no uékasïreenga eskaksï juchiiti amiguecha mítepiringa eskani jorhenguarhixapka Bibliani Jeobaeri testiguecha jingoni. Peru i ambe mójtakuspti engani arhintapka ambe Jesúsi uandapka ixú Mateu 10:​33 jimbo: “Joperu enga nema kʼuiripuechani japarini uandaska eskarini no míteska, jíjtuni juchiiti Taatiri orhepani jimbo, enga auandarhu jaka, uandaaka eskani no míteska”. Sóntkuni arhiaspka juchiiti amiguechani ambe engani úni japka. Ískuksï pakaraspti: nóksï úsïreendi jakajkuni eska nema enga ísïipka eskani ji, uékapiringa kristianu úkuarhini. Joperu útasï ísï arhiaspka eskani meru uékasïreenga mójtakurhini.

NÁKI KÓNTPERATECHANI INTSÏNHAASKIA: Mama kánikua tsípispti enga exepka na engani ji jánguarhintani japka úni ambe enga Biblia uandajka. Iásï nóteru uandanhiasïndia imani ambe jimbo engani ji úni jaka. Tsimaranchi tsitisïnga uandontskuarheni imeeri ambe engachi májkueni úni jaka: xénchani juchaari Tata Diosï Jeobani. Ménisï engani miántajka ambe engani ióntki úpka, úkua jukanchasïnga jakajkuni na engari xáni jarhuataka Tata Diosï parani úni mójtakurhini. Nóteruni tsitisïngia ísku jándikua ambe káni sentabu engani na tsitienga ióntki.

Seguru jarhaska eskani iásï ónhakata japiringa o uarhiri engani no úpiringa ambe engani jorhenguarhika Bibliarhu. Joperu indeni ambe jimbo engani jorhenguarhika, iásï tsípikua jingoni irekasïngia. Jatsiska uarhiitini ma engareni kánikua jarhuatajka ka nanakani ma enga kánikua kurhandijka ka iáminduchi márku tsípikua jingoni marhuakusïnga Tata Diosï Jeobani. Kánikua diosmaiamukua íntskuntasïnga imani engareni jorhendaka Biblieri ambe. Jimbosïni ji jánguarhintajka parani jorhendani máteruechani ambe Biblia uandajka. Diosmaiamukua arhisïnga Tata Diosï Jeobani, jimbokarini jurajkuska parani ini ireta jimbo jarhani engaksï xáni xénchperajka, peruni sánderuni diosmaiamukua íntskuntasïnga jimbokarini jurajkuska parani úni andarhierani imani.

[Komentariu]

“Mintsitarhurini niárachespti míteni eska Jeoba pʼikuarherasïnga eska ambe engani ji újka úsïnga sési pʼikuastani o no sési pʼikuastani”

[Imajeni]

Juchiiti uarhiiti jingoni ka juchiiti sapi jingoni

[Imajeni]

Engani exepka na enga xáni mójtakurhipka uénaspka jíjtuni tsitini.