Biblia jarhuataasti mójtakuni irekua

¿AMBE jarhuataspi uátsïni ma para sánderu tsípikua jingoni irekani nájkiruka sapichutini no sési nitamakuarhipka? ¿Ambe jarhuataspi politikuni ma enga no sési kámpienga para iásï aianhpiri máeni? Ju je exeni na engaksï uandantajka imeecha.

“Uékasïreenga eskajtsïni xénchapiringa ka sési kámani” (INNA LEZHNINA)

UÉXURHINI ENGA ANDAJPENUKA: 1981

PAISI: RUSIA

MÁTERU AMBE: NO SÉSI NITAMAKUARHIPKA ENGANI SAPIPKA

NA ENGANI IREKAPKA IÓNTKI: Juchiiti taaticha ka ji nóchi úsïreenga kurhaani. Seisi uéxurhini kánikua tsípikua jingoni irekuarhispka, peru tátsekua juchiiti taatichaksï diborsiarikuarhispti. Nájkirukani sapichu japka, kurhangusïrenga ambe enga úkuarhini japka ka kánikua no sési pʼikuarheraspka. Juchiiti nándirini páspti imani jingoni Cheliabinsk, juchiiti taati ka juchiiti ermanu k’éri pakarasptiksï Troick. Sánderu tátsekua, juchiiti nándi ménderu uambuchantaspti ka juchiiti padrastruni kánikua kauisïrendi ka somentsïni atasïreendi juchantsïni tsimarhani.

Uéxurhini 1993 jimbo, juchiiti ermanu enga sánderu kʼéripka uarhispti, jimboka aogarispka. I ambe úspti eskachi kánikua no sési p’ikuarherapiringa. Ka juchiiti nándi úndaspti kauini ka uénasptireni kánikua no sési kámani. Ji tsánharhisïreenga sési jásï irekua ma, engajtsïni xénchapiringa ka sánderu sési kámani. Uánikua iglesiecharhu niraspka para úni sési pʼikuarherakua exentani, peru no nani exentaspka.

NA ENGARENI BIBLIA MÓJTAKUCHEKA IREKUA: Engani 13 uéxurhini jatiripka, kompaniera eskuelarhu anapu ma enga Jeobaeri testiguepka, aiangustireni máru uandantskuecha Bibliarhu anapu. Kánikua tsitisïreenga kurhaani Noéri ka Jobueri ambe engaksï niárapka marhuakuni Tata Diosïni nájkirukaksï kánikua no sési ambe nitamakuarhipka. Ka no ióni jimbo, uénaspka jorhenguarhini Jeobaeri testiguecha jingoni ka nirasïrenga imeecheri tánguarhikuecharhu.

Tata Diosïri Karakatarhu uánikua ambakiti ambe jorhenguarhispka. Mintsitarhureni niárachesti míteni eska Tata Diosï jatsiska nombri ma (Salmo 83:18). Ískurini pakataspka exeni na enga Biblia sési uandantajka na enga jánhaskuarhipiringa “últimu jurhiatikuechani jimbo” (2 Timoteo 3:​1-5). Kánikua tsípispka exeni eska jauaka tsíntskua ma. Eranhaska je: ¡uaaka ménderu exentani juchiiti ermanuni! (Juanu 5:​28, 29.)

Peru no iáminduecha jaiapanhentasti ambe engani jorhenguarhini japka. Juchiiti nándi ka juchiiti padrastruni nóksï xénchasïreendi Jeobaeri testiguechani ka arhisptijtsïni eskani jurajkupiringa jorhenguarhini Biblieri ambe. Peruni ji tsitisïreenga ambe engani jorhenguarhini japka ka no uékasïreenga jurajkuni seguirini jorhenguarhini.

Para ji úkua jukanchaspti engani juchiiti familia no uékeenga eskani jorhenguarhipiringa Biblieri ambe. Peru ísï tátsekua kánikua no sési ambe úkuarhispti: juchiiti ermanu enga sapichuepka engareni ístu niárapka pámbeni Jeobaeri testiguecheri tánguarhikuecharhu niáraspti uarhini, jimboka imajtu aogarispka. Peru Jeobaeri testiguechajtsïni no méni jurajkuspti ka niárasptijtsïni xarhatacheni eskajtsïni kánikua xénchasïreenga ka kánikuajtsïni sési kámasïreendi. Indeni ambe enga desde iónisï jirinhani japka, segura jarhaspka eska i jindeespka relijioni jurhimbiti, ísï jimbo 1996 jimbo itsï atakuarhispka komu Jeobaeri testigu.

NÁKI KÓNTPERATECHANI INTSÏNHAASKIA: Seisi uéxurhini paxakaia uambuchatini ambakiti uámba ma jingoni enga arhinhajka Dmitry. Tsimarhanchi jarhuajpesïnga San Petersburgo anapu Betelirhu. Tiempu jingoni, juchiiti taatichaksï jiókuarhispti engani Jeobaeri testigu úkuarhipka.

¡Sési pʼikuarherasïnga míteni Jeobani! Imani marhuakuni úspti eskani tsípikua jingoni irekaaka.

“Uánikua ambe kurhamarhikuarhisïrenga” (RAUDEL RODRÍGUEZ RODRÍGUEZ)

UÉXURHINI ENGA ANDAJPENUKA: 1959

PAISI: CUBA

MÁTERU AMBE: POLÍTIKU MA ENGA NO SÉSI KÁMPIENGA

NA ENGANI IREKAPKA IÓNTKI: Andajpenuspka jini La Habana (Cuba) ka kʼuiripespka jimeesïsï enga no kánikua jatsikuarhinhajka ka enga kánikua uarhiperakua ambe jarhajka. Engani tumbiipka kánikua tsitisïreenga iudo ka ístu máteru deporticha enga uarhiperakuerhika.

Komu méntkisïrini sési nichenga eskuelarhu, juchiiti taatichajtsïni animarispti para seguirini estudiarini unibersidadirhu. Jiájkani uénaspka exeni eska jima anapu paisi no sési juramuxapka, ka niáraspka no kurhajchaani. Eskuela anapu kompanieru ma ka ji euakuarhispkachi arma polisiani ma ka niáraspkachi éjpu atakuni. Indeni ambe jimbo engachi úpka ónhasptijtsïni ka arhisptijtsïni eskajtsïni uándikupiringa. ¡Apenasi 20 uéxurhini jatirispka ka uarhipiringia!

Engani jandiajku japka seldarhu ensaiarispka para ísï xarhatakuani eska no chéxapka imeechani engajtsïni fusilaripiringa. Peru ístu uánikua kurhamarhikuechani úkuarhispka, komu, ¿andisï jaki xáni no sési nitamakua ixú parhakpinirhu ka si i ambejkueski tsípikuarhu?

NA ENGARENI BIBLIA MÓJTAKUCHEKA IREKUA: Tiempu jingontsïni arhispti eskajtsïni nóteru uándikupiringia, peru eskachi ónhakuarhetini japiringa treinta uéxurhini. Jiáni míteaspka máru Jeobaeri testiguechani engaksï ónhakuarhetini japka imeecheri jakajkukua jimbo. Ískurini pakataspti exeni na engaksï no chénga ka na engaksï no ikiauenga ni niárani nóteru tsípini jimbokaksï ónhanhaspka imeecheri jakajkukua jimbo.

Jeobaeri testiguechajtsïni jorhendaspti eska Tata Diosï ambakiti ambe eratsetixaka para iámindu kʼuiripuecha. Biblia jimbojtsïni jorhendasti eska Tata Diosï mójtakuaka echerini ka eska uaaka eska paraisu máeuakia nani enga nóteru jauaka atajperakua ka ni no sési kámberakua ka engaksï tsípikua jingoni irekaaka para méntkisï ambakiti kʼuiripuecha (Salmo 37:29).

Tsitisïreenga ambe engajtsïni jorhendaenga, peruni jatsispka para mójtakuni máru ambe. Eratsesïrenga eskani no úpiringa no ma politiku jingoni úkuarhini o eskani no úpiringa no kuájpikuarhini, ísï jimbo erakuspka jandiajku arhintani Bibliani. Engani na kʼamarapkia arhintani exespka eskaksï Jeobaeri testiguechajkuksï jánguarhinteenga ísï úni eskaksï orheta anapu kristianuecha.

Biblieri ambe jorhenguarhini úspti eskani exepiringa ambe jatsispi para mójtakuni. Jatsispka para mójtakuni na engani uandaenga, jimbokani kánikua maldisioni ambe uandasïreenga. Ístuni jatsispkia para nóteru itsutani ka jánguarhintani nóteru inchamukuni politikarhisï. Úkua jukaspti, peru Jeobaeri jarhuajperata jingoni úspka sánhani arhini jurajkuni indeni ambe.

Kánikua úkua jukanchasïnga pʼíngukuarhini parani no sóntku ikiani, jimbosïni kurhakupka Tata Jeobani eskarini jarhuataka parani pʼíngukuarhini. Kánikuarini jarhuatasti ambe enga arhijka Proverbios 16:​32: “Ima enga no sóntku ikiajka sánderu ambakitisti ka eska ima kʼuiripu enga uinhapitiika, ka ima enga újka pʼínguni imeeri ikiatapuni sánderu ambakitisti eska ima enga andajka iretani ma”.

Uéxurhini 1991 jimbo itsï atakuarhispka komu Jeobaeri testigu jini enga ónhakuarhetini japka, tamburhu ma enga itsï jatapka. Ma uéxurhini tátsekua, máru engachi ónhakuarhetini japka uéraspkachi ka axanhaspkachi España, jimbokachi jima jatsiaspka parientichani. Engani na niárapkia España, uénaspka niárani tánguarhini Jeobaeri testiguecha jingoni, imajtsïni kánikua sési erokaspti enajkijtsïni ióni mítepia, jarhuatastijtsïni mójtakuni juchiiti irekua.

NÁKI KÓNTPERATECHANI INTSÏNHAASKIA: Iásï kánikua tsípikua jingoni irekaskia ka marhuakuxakachi Tata Diosïni juchiiti uarhiiti ka juchiiti uájpeecha jingoni. Iásï úrasïngia sánderu juchiiti tiempu para jorhendani Biblieri ambe máteru kʼuiripuechani. Ménichani miántasïnga na engani jásïipka engani tumbiipka ka engani sáno uarhipka ka agradeserisïnga ambe engani xáni úka para mójtakurhini. No solu tsípiti jarhaska, sino jatsiska erokuarhikua ma. Uékaxakaia eska niáraka ima jurhiatikua enga echeri Paraisu máeuakia, ka enga jauaka sési kámberakua ka ístu “nóteru jauatia uarhikua” (Jaŋaskuecha [Apocalipsis] 21:​3, 4).

[Komentariu]

“Mintsitarhureni niárachesti míteni eska Tata Diosï jatsiska nombri ma”

[Imajeni]

Juchiiti acheeti ka ji kánikuachi tsitisïnga jorhendani Biblieri ambe imeechani engaksï no újka kurhaani