Biblia jarhuataasti mójtakuni irekua

¿AMBE jarhuataspi acheetini ma para kʼuanhatsentani imani relijioni jimbo enga tʼarhexepka? ¿Nani exentaspi tumbi ma, nemani enga ísïipka komueska imeeri taati? Ju je jurajkuni eskajtsïni indeecha mismu aianguaka.

“Uétarhinchasïreendi kʼuanhatsentani Jeoba jingoni” (ELIE KHALIL)

UÉXURHINI ENGA ANDAJPENUKA: 1976

PAISI: CHIPRE

MÁTERU AMBE: TUMBI MA ENGA TSÏNCHIKATA JAPKA

NA ENGANI IREKAPKA IÓNTKI: Chipre andajpenuska, peruni Australia tʼarhexeska. Juchiiti taatiichaksï Jeobaeri testiguespti ka jánguarhintasptijtsïni jarhuataani parani xénchani Tata Diosïni ka imeeri Uandakuani, Biblia. Peru engani tumbi sapichu máepkia kánikuani no kurhandirasïreenga. Chúrikuechani uérasïreenga juchiniu ka juchiiti amiguecha jingoni engaksï májkueni jatiripka eskani ji ka karruechani sïpasïreenga ka méminduni inchamukusïreenga problemecharisï.

Orheta jimbokani chésïreenga jískakuasïreenga ambe engani ueenga juchiiti taatiichani, peruni sánhani arhispka nóteruni chénia. Juchiiti amiguechaksï iauani sánderu kʼérispti eskani ji ka nóksï xénchasïreendi Tata Diosï Jeobani. Íchaksï úspti eskani ji no sési ambe niátapiringa. Xántsïni no sési paaspti engani ma jurhiatikua arhiapka juchiiti taatiichani eskani nóteruni ma ambe uékasïreenga míteni imeecheeri jakajkukua ambe. Nájkirukaksï jánguarhintapka tékantskua jingontsïni jarhuatani, ji no jiókuarhispka imeecheeri jarhuajperata. Juchiiti taatiichaksï kánikua kómu pʼikuarheraspti indeni ambe jimbo.

Uéntaspka juchiniu ka uénaspka droga ambe kámani. Niáraspka asta jamberi mariuana ambe jatsintani ka kánhachani atarantasïrenga. Ísku jándikua ambe niátasïreenga ka méntkuni diskotekecharisï jámasïreenga. Ístuni uénaspka no sési jámani ka kánikua ikiasïreenga enga nema ueenga o uandani ambe ma engani ji no tsitienga. Ménichani niárasïreenga asta uinhachakuni o atani jamberi. Iámindu imani ambe úsïreenga engani jorhendanhapka eska kristianu ma no jatsiska para úni.

NA ENGARENI BIBLIA MÓJTAKUCHEKA IREKUA: Kánikuani sési pájperasïreenga drogadiktu ma jingoni enga uarhiranchapka imeeri taati jémbani enga sapichuepka. Iauani chúrikuachi uandontskuarhesïreenga. Ka uánikua ueltarini aianguspti na enga xáni jirinhantaenga imeeri taati jémbani. Peru jimbokani ji desde sapichitku míteska eskaksï uarhiriicha tsíntaaka, sóntkuni aianguspka eska Jesúsi tsítantaspka uarhiriicha ka ístu eska aiatspesïnga eska sánderu orhepani tsítantauaka uarhiriichani (Juanu 5:​28, 29). Arhisïreenga: “Eranhaska, uaakari ménderu exentani chiiti taatini, ka iáminduchi uaaka irekani paraisurhu ma ixú Echerirhu”. Inde ambe kánikua sési pʼikuastaspti.

Ka máteru xanharicha juchiiti amigu uékasïreendi míteni últimu jurhiatikuecheri ambe, ka andisï uandanhajki eskaksï tanimu kʼuiripuecha máechakua diosïiska. Ji úrasïreenga imeeri Bibliani parani uánikua tekstuechani exeraani engaksï jurhimbikua ambe uandajka Tata Diosï Jeobaeri ambe, Jesúsiiri ka últimu jurhiatikuecheri ambe (Juanu 14:28; 2 Timoteu 3:​1-5). Engani sánderu uandontskuarhikuenga juchiiti amiguni Tata Diosï Jeobaeri ambe, sánderuni eratsentasïreenga Tata Diosï Jeobani.

Na engaksï xáni jánguarhintapka juchiiti taatiicha parajtsïni jorhendani jurhimbikua ambe Biblieri, engaksï ísïipka komueska semiiecha engaksï juchiiti mintsitarhu pakarapka, úndasptiksï tsikini. Ménichani engani kʼuínchikuarhu ma jarhenga ka droga ambe úrani jarhani juchiiti amiguecha jingoni, mátirkuni miántasïreenga Tata Diosï Jeobani. Nájkirukaksï uánikua juchiiti amiguechani uandeenga eskaksï xénchasïreenga Tata Diosïni, imeecheeri jángua jimbo máteru ambeksï xarhatasïreendi. Jimbokani no uékasïreenga ísïini eska imeecha, kurhanguspka eska uétarhinchasïreenga Tata Diosï Jeoba jingoni kʼuanhatsentani.

Ísïisti, ma ambeesti míteni ambe úni ka máteru ambeesti ísï úni. Sóntkuni úspka jurajkuni máru ambe. Pori ejemplu, no kánikua úkua jukanchaspka droga ambe jurajkuni. Ístuni úspka nóteruni kúrhinia juchiiti amiguechani ka uénaaspka Biblieri ambe jorhenguarhini orhejtsïkuti ma jingoni.

Peru máteru ambe jingoni úkua jukanchaspka mójtakurhini, pori ejemplu no úsïreenga pʼíngukuarhini ka sóntkuni ikiasïreenga. Ménichani úsïreenga pʼíngukuarhini, peruni ménderuni uénasïreenga ísï jámani ka kánikuani no sési pʼikuarherasïreenga, ísï eratsesïreenga eskani no méni úpiringa mójtakukuarhini. Engani no xáni sési pʼikuarherani japka, uandaspka eskani uandontskuarhepiringa imani jingoni engareni Biblieri ambe jorhendani japka ambe. Ka jimboka ima kánikua tékantstiska ka sési kámpini, méntkisïrini uinhaperantasïreendi. Ma xanharirini arhispti eskani jorhenguarhipiringa jorhenguarhikua ma enga rebista Aianhpiri jimbo uérapka enga uandajka na enga xáni jukaparhakueka eskachi no chkétakukuarhiaka. a Jorhenguarhispkachi ambe engani úpiringa úni engani uénapiringa ikiani. Miántaparini ambe engani jorhenguarhipka imani jorhenguarhikua jimbo ka kánikua kómarhiparini Tata Diosï Jeobani, sánhani arhispka nóteruni xáni ikiania. Abrilini 2000 jimbo itsï atakuarhispka komueska Jeobaeri testigu ma. Ka juchiiti taatiichaksï kánikua sési pʼikuarheraxapti.

NÁKI KÓNTPERATECHANI INTSÏNHAASKIA: Iásï kánikuani sési pʼikuarherasïngia ka ambakiti konsiensia ma jatsiska jimbokani nóteruni no sési úkusïngia juchiiti kuerpuni droga ambe jingoni ni ísku jándikua ambe jingoni. Iásï ambe uéjkiini úni jarhani, ánchikuarhini jarhani o tánguarhikuarhu ma jarhani o tsípikuarhini jarhani, kánikuani sési pʼikuarherasïnga ka ambakiti ambe eratsesïnga tsípikueri.

Diosmaiamukua íntskuntasïnga Tata Diosï Jeobani juchiiti taatiichani jimbo, jimbokajtsïni imeecha méntku jánguarhintaspka jarhuatani. Ístuni eratsentasïnga ambe enga Jesúsi uandapka Juanu 6:44 jimbo: “No nemarini úsïndi andarhierani enga no Taatini jimboeuaka”. Kánikuani tsitisïnga eratsentani eskani úska kʼuanhatsentani Tata Diosï Jeobani jingoni jimbokarini imasï andaparateraka.

“Kánikua uékasïreenga taati ma jatsini” (MARCO ANTONIO ALVAREZ SOTO)

UÉXURHINI ENGA ANDAJPENUKA: 1977

PAISI: CHILE

MÁTERU AMBE: BANDA MA JINGONI JÁMASÏREENDI ENGA DEATH-METAL KÚSTAENGA

NA ENGANI IREKAPKA IÓNTKI: Mama juchiitireni tʼarhexeraspti Punta Arenas, ireta ma enga pínandika inde ireta Magallanes ísï jarhaspka enga América del sur ísï jaka. Engani ji sinko uéxurhini jatiripka juchiiti taatiichaksï jurajperaspti ka inde ambe úspti eskani ji kánikua jandiajku pʼikuarherapiringa. Kánikua uékasïreenga taati ma jatsini.

Mama Jeobaeri testiguecheri jingoni jorhenguarhixapti Biblieri ambe ka pájtasïndireni tánguarhikuecharhu Kʼumanchikua Reinuerirhu. Peruni ji no sáni tsitisïreenga nirani ka mémindu ikiasïreenga xanharisï. Engani 13 uéxurhini jatiripkia, nóteruni niraspkia tánguarhikuecharhu.

Para jiánisï kánikua tsitisïrengia kústani ka exesïreenga eskani jorhenaspka indeni ambe úni. Engani 15 jatiripkia heavy-metal ka death-metal kústasïreenga kʼuínchikuecharisï, baricharisï ka engajtsïni kʼuiripuecha arhienga eskani nipiringa kústaani. Imeecha jingoni kúnguarhisïreenga engaksï jingoni jorhenaka sési kústani, ka inde ambe úspti eskani tsitipiringa músika klásikani kústani. Ísï jimbo, ueenaspka unibersidadirhu nirani jorhenguarhini kústakueri ambe. Engani 20 jatiripkia, Santiago mótsispka enga kapitalika parani seguiriini jorhenguarhini, peruni ístu seguirisïreenga heavy-metal ka death-metal kústani.

Nájkirukani indeni ambe ueenga, útasïni jandiajku pʼikuarherasïreenga. Ka parani nóteruni xáni ísï pʼikuarherania kauisïreenga ka droga ambe úrasïreenga imeecha jingoni engani jingoni kústaenga, ka engani ísï exeauenga komueska juchiiti familia. Na engani jásïipka, xarhatasïreendi eskani no kurhandirasïreenga, puru turhipiti ambe xukuparhasïreenga, tisïnharispka ka asta sinturarhu jamberi iórhataspka jauirini.

Na engani jásïipka úsïreendi eskani uarhiperapiringa máteruechani jingoni ka eskani problemechani jatsiapiringa polisia jingoni. Ma jurhiatikua, grupu ma enga droga ataranteenga mámaru ambejtsïni arhixapti jíndeni ka juchiiti amiguecha. Jimbokani kauirixapka uarhiperaspka imeechani jingoni ka imajtsïni kenchendirakua kuarhakuchespti.

Peru ma ambe engareni sánderu no sési pʼikuastapka, jindeespti ambe engareni juchiiti nobia úchipka. Mítespka eskarini ima enganiarixapka juchiiti sánderu ambakiti amigu jingoni ka máteru juchiiti amiguechajtsïni jískachispti indeni ambe. Inde amberini kánikuani no sési pʼikuastaspti.

Punta Arenas kʼuanhatsentaspka ka ueenaspka ánchikuarhini kústakua jorhentpini ka ístuni bioloncheluni kústasïreenga. Ístuni seguirispka bandecha jingoni grabarini heavy-metal ka death-metal. Jiánisï mítespka Sussan, sési uátsï ma ka ueenaspka imani jingoni irekani. Ísï tátsekua, Sussan mítespti eska imeeri amamba jakajkusïreenga eskaksï tanimu kʼuiripuecha máechakua diosïiska ka ji nómbe, ísï jimbo kurhamarhisptireni: “¿Ambe meru ísïiski?”. Arhispka eska inde jorhenguarhikua no ísïispka ka eska nájkirukani ji no úpiringa Biblia jingoni xarhatakuni míteaspka né engaksï úpiringa ísï úni. Arhispka eskaksï Jeobaeri testiguecha úpiringa Biblia jingoni xarhatakuni. Ísï jimbo úspka ambe ma engani jimbo ióni nóteruni úpkia: kómarhispka Tata Diosïni parakarini jarhuatapiringa.

Máru jurhiatikuecha tátsekua exespka acheetini ma engani mítentani japka ka kurhamarhispka sini Jeobaeri testiguespi. Nájkirukarini chérhini japka jimbokani no sési xarharaxapka, aiangusptireni iámindu ambe engani kurhamarhini japka tánguarhikuecheri ambe. Ji seguru jarhaspka eskarini Tata Diosï mókuchintaspka juchiiti kómarhikuani indeni ambe jingoni. Niraspka Kʼumanchikua Reinuerirhu ka asta tátsepani uaxakaspka parareni no nema exeni. Perujtsïni uánikuecha mítentaspti engani sapichuetini nireenga tánguarhikuecharhu. Sésijtsïni erokaspti ka uékperakua jingontsïni kamapakuspti, inde amberini kánikua sési pʼikuastaspti, ísïispti enajkini ménderuni juchiniu kʼuanhatsepi. Engani exepka imani engareni Biblieri ambe jorhendapka engani sapichuepka, arhispka eskarini ménderu jorhendapiringa.

NA ENGARENI BIBLIA MÓJTAKUCHEKA IREKUA: Ma xanhari arhintaspka Proverbios 27:​11, enga arhijka: “Mímixekua xarhata, juchiiti uátsï, ka tsípera juchiiti mintsitani”. Ískurini pakataspti eratsentani eska kʼuiripu ma úsïnga sési pʼikuastani imani enga unibersuni kueraaka. Jiájkani kurhanguspka eska Tata Diosï Jeoba jindeespka indeni taati engani xáni uékaxapka jatsini.

Ji uékasïreenga jaiapanherantani juchiiti Taatini auandarhu anapuni ka úni ambe enga ima uéjka, peruni ióni úraspka droga ambe ka alkoli ambe. Niáraspka sési kurhanguni ambe enga Jesúsi uékapka jorhentpini indeni ambe jingoni enga Mateu 6:​24 uandajka, enga arhijka eska “no nema úsïnga tsimani patronichani marhuakuani”. Engani jánguarhintani japka mójtakukuarhini ambe enga arhijka 1 Korintu 15:33 mintsitarhurini niárachespti, enga uandajka: “Engajtsï chá no ambarhati kʼuiripuechani kúrhiaska, chájtsï nóteru uaakia ambe engajtsï iásï jamberi sési úni jaka”. Kurhanguspka eskani no úpiringa jurajkuni no sési jásï ambeni engani seguiriini japiringa nirani imani mismu lugarichani jimbo ka engani seguiriini japiringa imani mismu kʼuiripuechani kúrhiani. Ísïispti ambe enga Biblieri konseju uandeenga: jatsispka parani úni ambe ma parani jurajkuni imani ambe engareni ójkutani japka (Mateu 5:30).

Peru jimbokani kánikua tsitienga kústani, kánikuani úkua jukanchaspka nóteruni kurhaani ni kústani heavy-metal. Peru juchiiti amiguecheeri jarhuajperata jingoni engaksï kúnguarhikuarhu anapuepka, úspka jurajkuni. Nóteruni kauisïreengia níjtuni droga ambe úrani, kuinakuarhispka, tisïmukua pʼiraspka ka nóteru xukuparhasïreengia puru turhipiti ambe. Engani arhipka Sussanini eskani uékasïreenga kuinakuarhini, ima uékaspti míteni andi ka arhisptireni: “Tʼungini jingoni niuaka Kʼumanchikua Reinuerirhu. Uékasïnga exeni ambe únhasïni jima”. Kánikua tsitispti ambe enga exepka jima ka no ióndaspti Biblieri ambe jorhenguarhini. Tátsekua tembuperaspkachi ka 2008 jimbo tsimarhanchi itsï atakuarhispka komueska Jeobaeri testiguecha. Iásïchi kánikua tsípikua jingoni marhuakusïnga Tata Diosï Jeobani juchiiti naandi jingoni.

NÁKI KÓNTPERATECHANI INTSÏNHAASKIA: Iásï nóteruni ísï irekaskia eska kʼuiripuecha parhakpinirhu anapuecha engaksï ísï xarharajka enajkiksï tsípikua jingoni irekajka ka nóteruni kúrhiasïngia imeechani engaksï traisionarpijka. Útasïni tsitisïnga kústakuani, peruni iásï sési erakusïngia náki kurhaani. Ambe engani ji xáni nitamakuarhika, úrasïnga parani jarhuatani juchiiti familiani ka máteru kʼuiripuechani, peru sánderu tumbiichani. Uékasïnga jarhuataani parakaksï imeecha kurhanguaka eska ambe enga i parhakpini aiatspejka ísï xarharasïndi enajki ambakiti ambe, peru eska inde ambe ísku ambe máeska (Filipusï 3:⁠8).

Engani ísï andarhieraka Tata Diosïni, úska ambakiti amiguechani exeantani kúnguarhikuarhu, nani enga ambakiti uékperakua jaka ka pínandikua. Peru ístuni exentaska imani taatini engani xáni uékani japka jatsini: Tata Diosï Jeobani.

[Nota]

[Komentariu]

“Úska kʼuanhatsentani Tata Diosï Jeobani jingoni jimbokarini imasï andaparhateraka”