Biblia jarhuataasti mójtakuni irekua

¿AMBE sánderu tsitispti Escocia anapu empresariu ma ka eska imeeri ambakiti ánchikuarhitani? ¿Néna úspi Brasili anapu acheeti ma jurajkuni imeeri no sési járhati úkuechani ka ístu nóteru úraania kokaina? ¿Ambe jarhuataspi Eslovenia anapuni ma para úni jurajkuni kauikua? Ju je exeni ambe engaksï imeecha mókuntajka.

“Ísï xarharasïreendi enajkini sési irekani japi” (JOHN RICKETTS)

UÉXURHINI ENGA ANDAJPENUKA: 1958

PAISI: ESCOCIA (REINO UNIDO)

MÁTERU AMBE: EMPRESARIU MA ENGA SÉSI NIKUNI JAPKA

NA ENGANI IREKAPKA IÓNTKI: Engani sapiipka no méni uétarhinchaspka sentabu. Juchiiti taati ofisiali máespti ejersitu britanikurhu, ísï jimbo juchiiti familia ka ji somenchi mótsini jarhasïreenga. Irekaspkachi Escocia, ístuchi jarhaspka Inglaterra, Alemania, Kenia, Malasia, Irlanda ka Chipre. Engani ochu uéxurhini jatiripka uánikua internaduecharhu mótsispka Escocia, joperu Cambridge anapu Unibersidadirhu graduarikuarhispa.

Engani 20 uéxurhini andangutapka, ueenaspka ánchikuarhini ochu uéxurhini industria petrolerarhu ma. Orhetku ueenaspka ánchikuarhini América del Sur, tátsekua África ka, kʼamarani jámani, Australia Occidental, nani engani úpka úni empresa ma engani sánderu tátsekua atarantapka.

Indeni sentabu jimbo úspka jubilarikuarhini jiáni engani 40 uéxurhini jatiripka. ¿Ambe úpirinia iásï engani xáni tiempu jatsipka? Biajarini jámaspka. Tsimani uelta niraspka Australia motosikleta jimbo ka iámu parhakpinirhisï uanotantaspka parani miiuntskani. Ísï xarharasïreendi enajkini sési irekani japi.

NA ENGARINI BIBLIA MÓJTAKUCHEKA IREKUA: Ante de jubilarikuarhini, ísï pʼikuarherasïreenga enajkini jatsipi para diosmaiamukua íntskuntani Tata Diosïni juchiiti irekua jimbo. Ísï jimbo ueenaspka nirani Iglesia Anglikanarhu, nani engani kʼuiripepka, joperuksï no kánikua jorhentpisïreendi Tata Diosïiri Karakateri ambe. Tátsekua ueenaspka jorhenguarhini mormonicha jingoni, joperu ístuni no kánikua tsitispka jimbokaksï no jukaparhasïreenga Bibliani.

Ma jurhiani, Jeobaeri testiguechaksï kústaspti juchiiti puertani. Sóntku kuenta íntskukuarhespka eska ambe engaksï jakajkuenga iámindu ambe Bibliarhu pʼitakata jarhaspka. Ma tekstu engajtsïni exerapka jindeesti 1 Timoteo 2:​3, 4, jima enga arhijka eska Tata Diosï uékasïnga eskaksï “iámindu kʼuiripuecha pʼímutantskateaka, ka andajkuarhinksï míteni enga ísïika”. Ambe engani tsitipka jindeesti eskaksï Jeobaeri testiguecha nóksï solu jukaparharasïreenga Biblieri ambe, sino eska ísïiska ambe enga jima arhijka.

Engani jorhenguarhini japka imeecha jingoni, úspka jorhenguarhini ambakiti ambe Biblieri. Ístuni, tsípispka engani jorhenguarhipka eska Tata Diosï ka Jesúsi nóksï máechakueska ka eskaksï no kuenta úkuarhisïnga trinidadirhu (Juanu 14:28; 1 Korintu 11:3). Miántaspka na enga xáni ióni jánguarhintapkia parani úni kurhanguni trinidadiri ambe. ¡Joperu para úni kurhanguni no úkua jukasti!

Sánderu tátsekua ueenaspka nirani Jeobaeri testiguecheri tánguarhikuecharhu. Ískurini pakataspti na engaksï xáni sési kámpieenga ka ístu na engaksï xáni sési jámeenga. Exespka eskaksï ambakiti kʼuiripuechespka. Engani exepka eskaksï ambakiti xénchperakua xarhatasïrenga, seguru jarhaspka eskani relijioni jurhimbitirhu jarhaspka (Juanu 13:35).

NÁKI KÓNTPERATECHANI INTSÏNHAASKIA: Engani na itsï atakuarhipka mítespka Dianeni, ambakiti kʼuiripuni ma enga kʼuiripepka komueska Jeobaeri testigu. Kánikua tsitispka jimboka ambakiti kualidadichani jatsiaspka, jimbochisï tiempu jimbo tembuperapka. Jeobaeri kóntperata máesti engani jatsika Dianeri sési pájperakua ka jarhuajperata.

Kánikuachi uékasïreenga nirani nani engaksï uetarani japiringa aianhpiricha, ísï jimbo uéxurhini 2010 jimbo mótsispkachi Belice, Centroamérica. Ixúchi predikarikuasïnga kʼuiripuechani engaksï xénchaajka Tata Diosïni ka engaksï uékajka sánderu ambe míteni imeeri ambe.

Iásï engani mítekia jurhimbikua ambe Tata Diosïiri ka Biblieri, kánikuani sési pʼikuarherasïnga. Ka engani jindeeni aianhpiri tiempu kompletueri, úskia uánikuechani jarhuatani paraksï míteni Tata Diosïiri Karakateri ambe. Kánikuani sési pʼikuarherasïnga engani úni jaka exeni eska ima ambe enga Biblia arhijka úxaka mójtakuni kʼuiripuecheri irekuani májkueni eska na úka jíndeni jingoni. Iásï k’oruni míteskia na engani uaaka diosmaiamukua arhini Tata Diosï Jeobani juchiiti tsípikua jimbo.

“Kánikuajtsïni sési kámaspti” (MAURÍCIO ARAÚJO)

UÉXURHINI ENGA ANDAJPENUKA: 1967

PAISI: BRASIL

MÁTERU AMBE: ÍSKU JÁNDIKUA AMBE NIÁTASÏREENDI

NA ENGANI IREKAPKA IÓNTKI: Avaré kʼuiripeska, ireta sapichurhu ma enga estadu de São Paulo jaka, jima anapuechaksï kánikua ánchikuarhisïndi.

Juchiiti taati uarhisti ante de ji andajpenuni. Engani sapiipka juchiiti naandiiri xukuparhakuani jukasïreenga jiáni enga ima no jarhenga. Uandaspka ísï jámani eska nanaka ma, ka kʼuiripuechajtsïni ueenaspti ísï exeni eska omoseksuali ma. Sánderu tátsekua ueenaspka apondini tumbiicha jingoni, ka asta acheetiicha jingoni.

Engani tumbiipka nirasïreenga klubicharhu, baricharhu ka iglesiaecherhu parani jirinhaani acheetiichani ka uarhiriichani parani jingoni apondini. Engaksï úkuarhienga karnabalicha, ísï xukuparhantasïreenga eska nanaka ma ka desfilecharhu uarhasïreenga samba anapu eskuelacharhu uératini. Kánikuarini sési nichexapti.

Kaasïreenga amiguechani engaksï omoseksualiika, ísku jándikua ambe niátajka ka drogarikuareni. Márujtsïni arhisïreendi eskani itsutapiringia crack (droga enga tsakapueni jáxepka), ka no ióni jimbo p’indespkia ísï úni. Ménichani iámu chúri jámasïreenga imeecha jingoni itsutani; ka ménichani mándani jurhiatikua jandiajku. Iáminduechaksï uandasïreendi eskani sida pʼamenchasïreenga jimbokani xáni no sési jáxentaspkia.

NA ENGARINI BIBLIA MÓJTAKUCHEKA IREKUA: Jiánisï míteaspka Jeobaeri testiguechani. Imeechajtsïni kánikua sési kámaspti. Arhichentasptijtsïni ambe enga arhijka Roma 10:​13, eska “nákinterku nema enga kómarhijka juchaari Tata Diosï Jeobaeri nombri jimbo pʼímutantskateaka”. Ísï kurhanguspka eska jukaparhakuespka úrani Tata Diosïiri nombrini. Someni, engani na itsuteenga crack chúrikuechani, mítasïreenga bentana parani erancheni ka ueparini kurhakusïreenga Jeobani eskarini jarhuatapiringa.

Kuenta íntskukuarhespka eska juchiiti naandi no sési pʼikuarherasïreenga enga exeenga na engani ji irekani japka, ísï jimbo jurajkuaspka drogechani. Sánderu tátsekua ueenaspka jorhenguarhini Biblia Jeobaeri testiguechani jingoni. Imeechajtsïni arhispti eska engani jorhenguarhipiringa Biblieri ambe úpiringa jurajkuani juchiiti bisiuechani, ka ísï úkuarhispti.

Engani na jorhenguarhipani japka jurhimbikua ambe Biblieri, kurhanguspka eskani jatsispka parani uánikua ambe mójtakuni. Ambe engani sánderu úkua jukanchapka jurajkuni jindeespti úkuechani engaksï omoseksualiicha újka, jimbokani ji ísï jámasïreenga desde engani sapiipka. Ambe engari jarhuatapka jindeespti jurajkuani juchiiti amiguechani, ka nóteru nirania baricharhu ka klubicharhu.

Nájkiruka ísï úni úkua jukapka, uinhaperantasïrendireni míteni eskarini Jeoba xénchasïnga ka eska jukaparharasïreenga engani ji jánguarhinteenga (1 Juanu 3:​19, 20). Ka para uéxurhini 2002 nóteru ísï jámasïreenga eska omoseksualiicha ka úspkia itsï atakuarhini komueska Jeobaeri testigu.

NÁKI KÓNTPERATECHANI INTSÏNHAASKIA: Engani mójtakupka juchiiti irekuani, juchiiti naandi ísku pakaraspti ka imajtu ueenaspti jorhenguarhini Biblieri ambe. Nájkiruka ima pʼika derrame serebrali, seguirixati xarhatakuni Tata Diosï Jeobani na enga xáni xénchajka imani ka ístu imeeri Karakatani.

Ochu uéxurhini ísïistia engani jánguarhintani jaka sánderu marhuani ka jorhendaani kʼuiripuechani Biblieri jurhimbikua ambe. Nájkirukani ménisï jatsiajka no sési járhati eratsekuechani, ma ambe engareni jarhuatajka parani no niárani ísï úni, jindeesti míteni eska Tata Diosï Jeoba kánikua tsípisïnga jindeeni jimbo.

Andarhierani Tata Diosïni ka ísï irekani eska ima na uéjka ústi eskani sánderu xénchakuarhiaka. Iásï k’oruni úsïnguia uandani eskani tsípikua jingoni irekasïnga.

“Ísïispka eska barrili ma enga no méni uinijka” (LUKA ŠUC)

UÉXURHINI ENGA ANDAJPENUKA: 1975

PAISI: ESLOVENIA

MÁTERU AMBE: KÁNIKUA KAUASÏREENDI

NA ENGANI IREKAPKA IÓNTKI: Liubliana kʼuiripeska, enga Eslovenia anapu kapitaliika. Sési irekaxapka engani sapiipka, joperu engani kuatru uéxurhini jatiripka, juchiiti taatii uándikukuarhispti. Indeni ambe jimbo, juchiiti naandi kánikua ánchikuarhispti parajtsïni úni k’uarhiperani juchiiti ermanuni ka jindeeni.

Engani 15 jatiriipka mótsispka juchiiti mama kʼéri jingoni. Tsitisïreenga imani jingoni irekani jimbokani jima uánikua amiguechani jatsiapka ka sánderu ambe úsïreenga úni jima eska juchiiti naandi jingoni. Engani 16 jatiriipka ueenaspka kúnguarhini ima kʼuiripuecha jingoni engaksï fin de semanechani uéreenga kauini. Jurajkuspka eska juchiiti jauiri kʼuiripepiringa, ménderueni xukuparhasïreenga ka sánderu tátsekua ueenaspka itsutani jámani.

Mámaru járhati drogaechani úraspka, joperu ambe engani sánderu tsitienga jindeespti kauikua. No ióni nitamaspti engani no solu máru kopachentantku areenguia sino ma boteia ji jandiajku. Kánikua jorhendaspka parani no xarhatani eskani kauirini jarhasïreenga. Joperu ménisï, úsïreendiksï míteni eskani kauisïreenga engajtsïni sïpirueenga, joperu útasï, no nema úsïreendi míteni engani jamberi uánikua litru binu arheenga o serbesa bodka jingoni.

Uánikua uelta engachi diskotekecherhu nireenga, nájkirukani ji sánderu kauienga ji jarhuatasïreenga juchiiti amiguechani. Ma jurhiatikua kurhaaspka juchiiti amiguni ma enga máteruni arhini japka eskani ji ísïispka eska barrili ma enga no méni uinijka. No sési p’ikuarheraspka engani ísï kurhaapka, jimbokaksï ísï arhiasïreenga Eslovenia imeechani engaksï kánikua kauijka.

Inde ambe, úspti eskani eratsepiringa ambesï úni japi juchiiti tsípikua jingoni. Ueenaspka eratseni eskani no ma ambe úsïreenga úni. Ka eska ima ambe engani ueenga no ma ambe marhuasïreenga.

NA ENGARINI BIBLIA MÓJTAKUCHEKA IREKUA: Sáno jiánisï exespka eska eskuela anapu kompanieru ma mójtakuspka na enga jámeenga, nóteru xáni no sési jámasïrendia. Uékasïreenga míteni andi, ísï jimbo pʼímarhispka kafeteriarhu ma parachi sáni uandontskuarheni. aiangusptireni eska ueenaspka jorhenguarhini Biblieri ambe Jeobaeri testiguechani jingoni. Ístureni aianguspti máru ambeeri enga ima jorhenguarhini japka. Jimbokani ji no ma ambe mítespka relijioniiri ambe, iámindu ambe engareni aianguenga jimbanhi ambeespti. Ueenaspka nirani tánguarhikuecharhu Jeobaeri testiguechani jingoni ka ístu Biblieri ambe jorhenguarhini.

Ísïini ueenaspka jorhenguarhini jurhimbikua ambe engareni uinhaperanteenga. Pori ejemplu, jorhenguarhispka eskachi irekaxaka jurhiatikuechani jimbo enga Biblia arhijka “últimu jurhiatikuecha” ka eska Tata Diosï no ióndani kénditauaka no ambarhati kʼuiripuechani Echerirhu, joperu jurajkuati imeechani engaksï ambarhatiika paraksï méntkisï Echerirhu irekani paraisurhu ma (2 Timoteo 3:​1-5; Salmo 37:29). Ísï jimbo, uékaspka mójtakukuarhini parani úni kuenta únhaani imani kʼuiripuecha jingoni engaksï ambarhatiika.

Engani aianguapka juchiiti amiguechani ambe engani jorhenguarhipka, sáno iáminduechajtsïni teresmarhuspti. Joperu inde amberini jarhuataspti parani ji kuenta íntskukuarheni eskaksï no jindeespka ambarhati amiguecha. Ístu, kurhanguspka eskani ueenaspka kauini jimbokani kúnguarhisïreenga imeecha jingoni engani no jatsipka para kúnguarhini. Soluksï erokuarhini jarhasïreendi eska niárapiringa fin de semana paraksï ménderu kauini.

Erakuspka nóteru kúrhiania ka jimbanhi amiguechani uaani Jeobaeri testiguechani jingoni. Jimbokajtsïni no solu uinhaperantasïreendi, sino iámindu imeecheri mintsita jingonksï xénchasïreendi Tata Diosïni ka jánguarhintasïreendiksï ísï irekani eska ima na uéjka. Kánikuarini sési úchisïreendi na engaksï imeecha jámeenga ka tiempu jimbo úspka jurajkuni kauikua.

NÁKI KÓNTPERATECHANI INTSÏNHAASKIA: Diosmaiamukua íntskuntasïnga Tata Diosï Jeobani jimbokani nóteru uétarhinchasïngia kauikua parani úni tsípikua jingoni jámani. No míteska ambe engani úkuarhinchapiringa engani ísï seguiriini japiringa irekani eska ióntki. Joperu ambe engani kʼóru míteka jindeesti eskani iásï sánderu sési pʼikuarherasïngia.

Kóntperata engani jatsika ini últimu siete uéxurhiniichani jimbo, jindeesti marhuani Eslovenia anapu Betelirhu. Seguru jarhaska, eska engani míteka Tata Diosï Jeobani ka marhuakuni úska eskani tsípikua jingoni irekaka.