Uánikua kʼuiripuechaksï eratsesïndi eska ima Jurhiatikua enga Tata Diosï jusgarpiaka, ísï jánhaskuarhiaka eska na xarharajka ini dibujurhu enga máekandu jaka. Eranhaskasïndiksï eska ima jurhiatikua, iámindu almechaksï tánguarhintatini jauaka Tata Diosïri orhepatini para ima jusgariuani seguni ambe engaksï úka; ka eskaksï máru, auandarhu niuaka paraksï jima irekani ka eskaksï máteruecha infiernurhu niuaka. Joperu Biblia méntku máteru ambe uandasïndi. Uandasïndi eska Jurhiatikua enga Tata Diosï Jusgarpiaka, marhuauaka paraka jurhimbikua jingoni úkuarhiaka iámindu ambe ixú parhakpinirhu (Salmo 96:13). Ka Tata Diosï Jesúsini erakusti paraka jindeuaka Juesi ka ima uaati eska iámindu ambe jurhimbikua jingoni úkuarhiaka ixú echerirhu (arhinta je Isaías 11:1-5 ka Ukuecha [Hechos] 17:31).

Jimboka Adáni no kurhajchaspka Tata Diosï Jeobani, iámindu juchachi niárasïnga no sési ambe úni, kómu nitamakuarhini ka uarhini (Roma 5:12). Ísï jimbo, para sési peentani indeni ambe, Jesúsi tsítantauati xáni uánikua kʼuiripuechani engaksï uarhikia. Libru enga arhinhajka Jaŋaskuecha o Apocalipsis, uandasïndi eska i ambe jiáni úkuarhiaka enga tata Jesukristu mili uéxurhini juramuni jauakia (arhinta je Jaŋaskuecha 20:4, 11, 12).

Imeecha engaksï tsíntaaka, jusgarinhaatiksï; joperu no imani ambe jimbo engaksï jiáni úka antede uarhini, sino imani ambe jimbo engaksï uaaka jiáni enga na mítekuarhiakia ambe engaksï uandaaka ima karakatecha enga Jaŋaskuecha kapitulu 20 jimbo arhijka. Apostoli Pablu uandaspti “eska Tata Diosï tsítantauaka imeechani engaksï sési jámaka ka ístu imeechani engaksï no káni sési jámaka”, i ambe arhikuekasïndi eskaksï jauaka kʼuiripuecha engaksï tsíntaaka ka engaksï uaaka jorhenguarhini Tata Diosïri ambe (arhinta je Ukuecha 24:15).

Ima kʼuiripuecha engaksï uarhikia ka nóksï niárani míteni ni marhuakuni Tata Diosï Jeobani, jiánksï uaati úni ambe enga Tata Diosï uéjka. Engaksï sési ambe erakuska úni “tsíntaatiksï paraksï irekani”. Joperu imeecha engaksï no uékaaka kurhajchani Tata Diosïni, “tsíntaatiksï paraksï jusgarinhani” (arhinta je Juanu 5:28, 29 ka Isaías 26:10; 65:20).

Enga na nitamaakia mili uéxurhini na enga xáni durariuaka Jurhiatikua enga Tata Diosï Jusgarpiaka, Tata Diosï Jeoba uaati eskaksï kʼuiripuecha perfektueuakia ísï eska uénakuarhu (1 Korintu 15:​24-​28). ¡Xáni ambakiti ambe engaksï jatsiaka imeecha engaksï kurhandiraaka! Ini mili uéxurhini jimbo enga Noambakiti ónhakata jauaka, tátsekua Tata Diosï jurajkuati para últimu tsʼéjkuani kʼuiripuechani. Satanasi kánikua jánguarhintaati parakaksï kʼuiripuecha no kurhajchaaka Tata Diosï Jeobani, peru imeecha engaksï uaaka orhepani uérakuni ini últimu tsʼéjkukuani, irekaatiksï para méntkisï ixú Echerirhu (arhinta je Isaías 25:8 ka Jaŋaskuecha 20:1, 7-9).

Biblia uandasïndi eska jauaka máteru jurhiatikua enga Tata Diosï jusgarpiaka. I jindeesti enga kʼamajkuaka iámindu no sési ambe enga iásï úkuarhini jaka parhakpinirhu. I jurhiatikua májkueni úkuarhiati eska Dilubiu enga Noéri jurhiatikuecha jimbo úkuarhipka enga kʼamajkupka iámu kʼuiripu no sési úrini. No ióni jimbo, jiáni enga kʼamajkunhaaka kʼuiripu no sési úri, uaati eskaksï sési irekaaka ima kʼuiripuecha engaksï jurhimbitku jámaaka (arhinta je 2 Pedru 3:6, 7, 13).