Santo Domingo andajpenuska enga República Dominicana kapitalika; ji sánderuni sapichueska tʼámu uájpeecheri. Juchiiti taatichaksï sési jorhendaka jarhaspti ka uékasïreendiksï eskani juchajtuni ísï tʼarhexepirhinga. Tʼámu uéxurhini ante de ji andajpenuni míteasptiksï máru mormonichani engaksï misioneruepka ka ískuksï pakaraspti na engaksï sési jámeenga ka sési xukuparhani. Ísï no ióni República Dominicana anapuecheri, juchaari Familia ueenaspti kúnguarhini Iglesia de Jesucristo de los Santos de los Últimos Días, enga ísï mítekateka eska Iglesia Mormona.

Ji tsitisïreenga iglesia anapuecha jingoni kúnguarhini, joperu engani sánderuni tsitienga jindeespti na engaksï xáni jukaparharenga familiani ka ambakiti jánguaksï jatsini. Kánikua sési pʼikuarherasïreenga engani mormonipka ka uékasïreenga niárani misionerhueni.

Engani na andangutapkia 18 uéxurhini juchiiti familia mótsisptiksï Estados Unidos parakani ji úpiringa nirani ambakiti unibersidadirhu ma. Ma uéxurhini tátsekua juchiiti tiuecha engaksï Jeobaeri testigueka jurhasptijtsïni pʼorhembini Florida ka pʼímarhisptijtsïni nirani imeecha jingoni kʼéri tánguarhikuarhu ma. Ískuni pakaraspka exeni na engaksï iáminduecha jirinhantauenga imeecheri Bibliarhu karakatechani ka notechani uáni ísï jimbo, jíjtuni kurhajkuarhispka sïranda ka lapisi ma ka jíjtuni májkueni úspka.

Enga na kʼamarhupkia kʼéri tánguarhikua, juchiiti tiechajtsïni arhispti , jimbokani ji uékasïreenga misionerueni, eskajtsïni jarhuatapiringa sánderu sési kurhanguni Bibliani. Kánikua sési jarhaspti jimbokani sánderu sési mítespka mormonicheri Libruni ka eska Bibliani.

Engaksï na níntapkia seguiristijtsïni jorhendani Biblieri ambe telefonu jimbo. Méntkisïjtsïni arhisïreendi eskani terukutantapiringa ambe engani jakajkuenga Biblia jingoni. Uékasïreendiksï eskani jandiajku exentapiringa jurhimbikuani.

Uánikua ambe jarhaspti juchiiti relijionirhu engani jiókuarhienga, joperuni no mítespka sini inde ambe terukuntasïreeni ambe enga jorhentpijka Biblia. Juchiiti tiarini axachespti rebista ¡Despertad!, 8 de nobiembri de 1995 engaksï Jeobaeri testiguecha petaka, enga tsimani artikuluechani jukaaka enga mormonicheri ambe uandajka. Ískurini pakataspti exeni eskani uánikua ambe no mítespka juchiiti iglesieri ambe, ísï jimbo jirinhantaspka juchaari pájina internetirhu parani exeni sini ísïispi ambe enga arhienga rebista; ka ísïispti. Ístuni, uánikua máteru ambe exentaspka engani nípka mormonicheri museucheri engaksï estado de Utah jaka.

Méntkisï eratsespka eska Biblia ka libru mormonicheri terukuntasïreenga. Joperu engani uénapka arhintani Bibliani exespka eska no ísïispka. Pori ejemplu Ezequiel 18:4 Bibliarhu arhisïndi eska alma uarhisïnga. Joperu, Mormonicheri Librurhu Alma 42:9 arhisïndi eska alma no uarhisïnga.

Aparte de engaksï jorhenguarhikuecha no terukuntajka, no úsïreenga kurhanguni ambe engaksï mormonicha eratseenga imeecheri paisiri. Ma ambe jindeespti eska jardini de Edéni condado de Jackson (Misuri, Estados Unidos) jarhaspka. Ístuksï iglesiarhu anapu orhejtsïkutichaksï jorhentpisïndi, “enga na Tata Diosï Reinu ueenakia juramuni ixú echerirhu, eska Estados Unidos anapu gobiernuni jimboeuaka”.

Ístuni kurhamarhikuarhisïreenga ambe úkuarhipirini juchiiti paisini jingoni—ka ístu máteru paisicha jingoni⁠⁠— enga i ambe úkuarhipiringa. Ma xatini, uandajpastirini amigu ma engani mítepka ka enga estudiarini japka para misionerueni ka kurhamarhispka ini ambe: “Enga chiiti paisi uarhipeni japiringa máteruni jingoni, ¿uarhipepirindi jima anapu mormonicha jingoni?”. Ískuni pakaraspka engareni arhipka eska jo. Seguirispka jirinhantani máteru ambe juchiiti relijioniri ka ístuni kurhamarhiaspka iglesiarhu anapu orhejtsïkutichani engaksï kánikua janhanharhinheenga, engajtsïni arhipka eska juchiiti kurhamarhikuecheri mókuntskuecha no nema míteaspka ka eska sánderu orhepatini mítekuarhipiringia.

Kánikua no sési pʼikuarheraspka ambe engareni arhipka. Úndapka kurhamarhikuarhini andisïni uékeeni misionerueni ka kuenta íntskukuarhespka eska engani jimbo uékeenga misioneru úkuarhini jindeespka parani máteruechani jarhuatani; ístu tsitisïreenga na engaksï exeauenga imeechani engaksï indeni ánchikuarhitani ueenga. Joperuni no kánikua ambe mítespka Tata Diosïri ambe. Nájkirukani uánikua uelta arhiantapka Biblieri karakatechani, no méni niáraspka ísï jukaparharani indeni libruni eska na uétarhijka. Ístuni no mítespka nákispi Tata Diosïri eratsekua para echeri ka kʼuiripuecha.

Jorhenguarhini Biblia Jeobaeri testiguecha jingoni uánikua ambe míteskia: nákiski Tata Diosï nombri, ambe úkuarhisïni engachi uarhijka, nákiski tata Jesukristueri ánchikuarhita para Tata Diosïri eratsekua úkuarhini... Iásï kʼóruni uénaxapkia míteni ambe enga uandajka i xáni ambakiti libru, ¡kánikua tsitisïreenga aianguani máteruecha ambe engani jorhenguarhini japka! Méntkisï mítespka eska jarhaska Tata Diosï, joperuni iásï úsïngia uandontskuarhekuni ísï eskani na uandontskuarhejka juchiiti ambakiti amigu ma jingoni. Ka 12 de juliu 2004 jimbo itsï atakuarhiska komu Jeobaeri testigu ma ka seisi mesi tátsekua uénapka marhuakuni Jeobani tiempu kompletueri.

Sinko uéxurhini ánchikuarhiska Jeobaeri testiguecheri sede mundial jini Brooklyn (Nueva York). Kánikua sési pʼikuarheraska engani úka jarhuajpirini jima enga Bibliechani únhajka ka máteru publikasionichani enga jarhuatajka uánikua kʼuiripuechani iámu parhakpinirhu. ¡Násïni xáni sési pʼikuarherajki engani úni jaka jarhuatani uánikua kʼuiripuechani paraksï míteaka Tata Diosïni!